Muan RelationTips

ຖ້າມາຫຼິ້ນໆກໍເຊີນປ້າຍໜ້າ Breadcrumbing ວິທີຢຸດຄວາມສຳພັນທີ່ຫຼອກລວງ ແລະ ການໃຫ້ຄວາມຫວັງໂດຍທີ່ບໍ່ຈິງຈັງ

ໂດຍ: Khainapha Chanthathilath

02 January 2025● 203

ຖ້າຄວາມສຳພັນແບບ Ghosting ທີ່ຢູ່ໆກໍຫາຍໄປວ່າເຈັບແລ້ວ, ການຖືກ Breadcrumbing ທີ່ມັກມາໃຫ້ຄວາມຫວັງຊ້ຳໆແບບບໍ່ຈິງຈັງກໍເຈັບໜັກບໍ່ຕ່າງກັນ. ທັງສອງຄຳນີ້ແມ່ນຖືກນຳມາໃຊ້ກັບພຶດຕິກຳທີ່ກ່ຽວຂ້ອງກັບຄວາມສຳພັນຂອງຄົນໃນໂລກອອນລາຍ.

“Breadcrumbing”​ ເປັນຄຳສັບທີ່ມີຮາກຖານມາຈາກນິທານກຣິມເລື່ອງ “Hansel and Gretel” ທີ່ຄົນໃນອອນລາຍນຳມາປັບໃຊ້ກັນຫຼາຍຂຶ້ນ ແລະ ມັນໄດ້ຮັບຄວາມນິຍົມມາຈາກພຶດຕິກຳການໃຊ້ໂຊຊ້ຽວມີເດຍ ແລະ ແອັບຫາຄູ່.

Breadcrumbing ມັກໃຊ້ໃນຄວາມສໍາພັນທີ່ໝາຍເຖິງການທີ່ຄົນໆໜຶ່ງ ທີ່ເຈົ້າກຳລັງລົມຢູ່ໄດ້ສົ່ງສັນຍານຄວາມສົນໃຈພຽງເລັກໆນ້ອຍໆໃຫ້ກັບເຈົ້າເຊັ່ນ: ການສົ່ງຂໍ້ຄວາມບໍ່ສະໝ່ຳສະເໝີ, ການຕິດຕໍ່ຫາໃນບາງເທື່ອ ແລະ ຫຼີກລ້ຽງການນັດໝາຍ, ແຕ່ກໍມາຫາແລ້ວກໍຫາຍໄປຊ້ຳໆ.

ພຶດຕິກຳນີ້ມັນໄດ້ເຮັດໃຫ້ເຈົ້ານັ້ນຍັງມີຄວາມຫວັງວ່າຄວາມສຳພັນຈະພັດທະນາໄປໄດ້ໃນທາງທີ່ດີຂຶ້ນ, ແຕ່ໃນຄວາມເປັນຈິງເຂົານັ້ນພຽງແຕ່ໃຫ້ຄວາມຫວັງແບບລອຍໆໂດຍທີ່ບໍ່ຄິດທີ່ຈະຈິງຈັງຄືພຶດຕິກຳການຖິ້ມ “ເສດຂະໜົມປັງ” ໃນລະຫວ່າງທາງຄືເລື່ອງ Hansel and Gretel.

ມ່ວນເລີຍນຳ 3 ວິທີຮັບມືກັບຄົນທີ່ມີພຶດຕິກຳແບບ Hansel and Gretel ມາແຊຣ໌ໃຫ້ທຸກຄົນໄດ້ລອງນຳໄປປັບໃຊ້ກັນເລີຍ

1. ປະເມີນສະຖານະການ.

ໃຫ້ພິຈາລະນາຄວາມສະໝ່ຳສະເໝີ ແລະ ຄວາມຕັ້ງໃຈລາວ. ຖ້າຫາກເຈົ້າເຫັນວ່າຄວາມສໍາພັນຍັງບໍ່ພັດທະນາ ແລະ ຍັງຢູ່ບ່ອນເກົ່າ, ເຈົ້າຄວນພິ​ຈາ​ລະ​ນາ​ວ່າ​ລາວ​ກໍາ​ລັງ breadcrumbing ເຈົ້າຫຼືບໍ?​

2. ຖ້າຢາກຮູ້ຄຳຕອບໃຫ້ຖາມເລີຍ.

ຖ້າເຈົ້າຮູ້ສຶກສົງໄສ ແລະ ເລີ່ມເບື່ອໜ່າຍກັບຄວາມສຳພັນທີ່ບໍ່ຊັດເຈນແບບນີ້, ແມ່ນໃຫ້ເປີດໃຈກ່ຽວກັບຄວາມຮູ້ສຶກຂອງເຈົ້າ ແລະ ຖາມລາວເລີຍວ່າຈະເຮັດແນວໃດກັບຄວາມສໍາພັນນີ້? ເພື່ອໃຫ້ເຈົ້າມີຄວາມຊັດເຈນ ແລະ ຕັດສິນໃຈວ່າຈະເດີນໜ້າ ຫຼື Move on ດີກວ່າ.

3. ກໍານົດຂອບເຂດ ແລະ ຮັກສາຄວາມໝັ້ນຄົງທາງດ້ານຈິດໃຈໃຫ້ກັບເຈົ້າເອງ.

ຢ່າປ່ອຍໃຫ້ຕົວເອງຕ້ອງຕົກຢູ່ໃນສະຖານະການທີ່ເຮັດໃຫ້ເຈົ້າຮູ້ສຶກບໍ່ສະບາຍໃຈ ຫຼື ບໍ່ປອດໄພໃນຄວາມສຳພັນ,ຖ້າລາວຍັງຢາກຫຼິ້ນເກມຄວາມສໍາພັນ ເຈົ້າຄວນຖອຍອອກມາເພື່ອຮັກສາຄວາມສຸກຂອງເຈົ້າເອງ. ເຈົ້າຄວນມີສະຕິ ແລະ ໝັ້ນໃຈໃນຄວາມຕ້ອງການຂອງເຈົ້າຢ່າລັງເລທີ່ຈະຍ່າງອອກມາຢ່າງກ້າຫານ.

ໂດຍ: ທີມບັນນາທິການ Muan