ຊື້ປຶ້ມມາແລ້ວບໍ່ອ່ານ ເຈົ້າອາດເປັນ “Tsundoku ຫຼື ອາການດອງປຶ້ມ” ລອງ Check ເບິ່ງວ່າເຈົ້າມີພຶດຕິກຳແບບນີ້ບໍ?

Tsundoku ເປັນພາສາຍີ່ປຸ່ນທີ່ມີຄວາມໝາຍວ່າການຊື້ປຶ້ມ ແລະ ຕັ້ງເອົາໄວ້ເປັນກອງໂດຍທີ່ບໍ່ອ່ານ(ດອງປຶ້ມໜັງສື) ເຊິ່ງວ່າພຶດຕິກໍານີ້ມັນອາດຈະບໍ່ກ່ຽວກັບອາການທາງຈິດໂດຍກົງກໍໄດ້, ແຕ່ມັນເປັນພຶດຕິກໍາການມີທ່າອ່ຽງທີ່ເກີດຂື້ນໃນຜູ້ທີ່ມັກອ່ານ ຫຼື ການສະສົມປຶ້ມໜັງສື.

ແຕ່ໃນບາງກໍລະນີມັນອາດຈະສະແດງໃຫ້ເຫັນເຖິງການຈັດການເວລາ ຫຼື ການວາງແຜນຊີວິດທີ່ຍັງບໍ່ທັນສົມດຸນ. ແນວໃດກໍຕາມຖ້າການສະສົມປຶ້ມໂດຍບໍ່ໄດ້ອ່ານມັນເລີ່ມສົ່ງຜົນກະທົບທາງດ້ານລົບຕໍ່ຊີວິດປະຈໍາວັນເຊັ່ນ: ການເຮັດໃຫ້ເຈົ້າຮູ້ສຶກເຄັ່ງຄຽດບໍ່ພໍໃຈເມື່ອບໍ່ມີເວລາອ່ານປຶ້ມ ຫຼື ການຊື້ປຶ້ມຫຼາຍເກີນໄປເຮັດໃຫ້ເກີດບັນຫາທາງດ້ານການເງິນ.

ຖ້າຫາກວ່າມັນເປັນບັນຫາແລ້ວນັ້ນ, ເຈົ້າຄວນຕ້ອງພິຈາລະນາເພື່ອປັບພຶດຕິກໍານີ້ໄດ້ແລ້ວ ແລະ ມື້ນີ້ມ່ວນເລີຍນຳສິ່ງທີ່ຈະເຮັດໃຫ້ເຮົາຢຸດພຶດຕິກໍາ “Tsundoku ຫຼື ການດອງປຶ້ມໜັງສື” ມາແຊຣ໌ໃຫ້ທຸກຄົນລອງມາຫາວິທີຈັດການອາການເຫຼົ່ານີ້.

1. ຈັດລໍາດັບຄວາມສໍາຄັນຂອງປຶ້ມທີ່ເຈົ້າຕ້ອງການອ່ານ ແລະ ຕັ້ງເປົ້າໝາຍການອ່ານ.

ເລີ່ມຈາກການເລືອກປຶ້ມທີ່ເຈົ້າສົນໃຈ ຫຼື ຢາກອ່ານຫຼາຍທີ່ສຸດກ່ອນ ໂດຍການຈັດລໍາດັບຄວາມສໍາຄັນໃຫ້ຕັ້ງເປົ້າໝາຍໃຫ້ຊັດເຈນ ແລະ ຢ່າຮູ້ສຶກວ່າເຈົ້ານັ້ນຕ້ອງຈົມຢູ່ກັບປຶ້ມທີ່ຍັງບໍ່ທັນໄດ້ອ່ານ ພະຍາຍາມຕັ້ງເປົ້າໝາຍນ້ອຍໆເຊັ່ນ: ອ່ານມື້ລະ 10-20 ໜ້າ ຫຼື ໃຊ້ເວລາອ່ານ 30 ນາທີຕໍ່ມື້ ມັນຈະຊ່ວຍສ້າງນິໄສເຮັດໃຫ້ເຈົ້າຄ່ອຍໆດີຂຶ້ນ.

2. ສ້າງລາຍຊື່ບັນທືກປຶ້ມໜັງສືທີ່ມີຢູ່ແລ້ວ ແລະ ຢຸດຊື້ປຶ້ມໜັງສືໃໝ່ຊົ່ວຄາວ.

ສ້າງລາຍຊື່ບັນທືກປຶ້ມທີ່ຍັງບໍ່ໄດ້ອ່ານຈະຊ່ວຍໃຫ້ເຈົ້າເຫັນພາບຢ່າງຊັດເຈນ ແລະ ມັນອາດຈະຊ່ວຍຫຼຸດຜ່ອນການຊື້ປຶ້ມໃໝ່ຖ້າຫາກເຈົ້າຍັງມີປຶ້ມທີ່ກຳລັງລໍຖ້າອ່ານຢູ່ ຖ້າເຈົ້າຮູ້ສຶກວ່າເຈົ້າມີປຶ້ມທີ່ຍັງບໍ່ໄດ້ອ່ານຫຼາຍໃຫ້ລອງຢຸດການຊື້ປຶ້ມໃໝ່ຈົນກວ່າເຈົ້າຈະອ່ານທີ່ມີຢູ່ແລ້ວໃຫ້ຈົບຖືວ່າເປັນການສ້າງລະບຽບວິໄນໃນການອ່ານ ແລະ ການເກັບສະສົມ.

3. ສ້າງມຸມນັ່ງອ່ານໜັງສືທີ່ຜ່ອນຄາຍ.

ການມີມຸມສໍາລັບການອ່ານທີ່ງຽບ ແລະ ສະດວກສະບາຍ. ຈະຊ່ວຍສ້າງບັນຍາກາດໃຫ້ເອື້ອອໍານວຍໃຫ້ແກ່ການອ່ານ,ອາດຈະເພີ່ມຕັ່ງນັ່ງສະບາຍໆ ແລະ ສ້າງບັນຍາກາດອ່ານທີ່ດີ ເພື່ອເຮັດໃຫ້ກິດຈະກຳການອ່ານເປັນກິດຈະກໍາທີ່ໜ້າສົນໃຈ.

4. ເລີ່ມອ່ານຈາກເນື້ອໃນສັ້ນກ່ອນ.

ຖ້າເຈົ້າຮູ້ສຶກວ່າປຶ້ມທີ່ມີຢູ່ແລ້ວອາດຈະຍາວເກີນໄປ ຫຼື ຊັບຊ້ອນເກີນໄປໃນເວລາທີ່ເຈົ້າວຸ່ນວາຍຢູ່ກັບວຽກອື່ນ ລອງເລີ່ມຕົ້ນການອ່ານບົດຄວາມສັ້ນ ຫຼື ປຶ້ມທີ່ມີເນື້ອໃນບໍ່ໜັກຫຼາຍເພື່ອກະຕຸ້ນການອ່ານ ແລະ ຊ່ວຍສ້າງແຮງບັນດານໃຈໃຫ້ເຈົ້າຢາກອ່ານປຶ້ມໃນພາຍຫຼັງ.

5. ເຂົ້າຮ່ວມກຸ່ມຄົນທີ່ຮັກການອ່ານ.

ການເຂົ້າຮ່ວມກຸ່ມກັບຄົນທີ່ມີຄວາມຄິດເຫັນກ່ຽວກັບໜັງສືທີ່ອ່ານນັ້ນມັນອາດຊ່ວຍສ້າງແຮງບັນດານໃຈໃນການອ່ານ ແລະ ໃຫ້ເຈົ້າມີເປົ້າໝາຍທີ່ຊັດເຈນຂຶ້ນສໍາລັບການອ່ານປຶ້ມໜັງສືແຕ່ລະຫົວ.

ການນໍາໃຊ້ວິທີການເຫຼົ່ານີ້ຈະຊ່ວຍໃຫ້ເຈົ້າຈັດການກັບ Tsundoku ຫຼື ການດອງປຶ້ມ ໂດຍເຈົ້າຈະບໍ່ມີຄວາມກົດດັນຫຼາຍເກີນໄປ ແລະ ມັນຈະຊ່ວຍສ້າງຄວາມສຸກໃນການອ່ານໃຫ້ເຈົ້າອີກດ້ວຍ.

ໂດຍ: ທີມບັນນາທິການ Muan