Muan RelationTips

ຍ້ອນຮັກຫຼາຍຈຶ່ງລະແວງ? Trust Issues ກຳລັງທຳຮ້າຍຄວາມສຳພັນ ເຂົ້າໃຈ ແລະ ຮັບມື ບັນຫາທີ່ເກີດຈາກຄວາມບໍ່ໄວ້ໃຈກັນ

ໂດຍ: Khainapha Chanthathilath

04 September 2025● 205

“ເຈົ້າຢ່າມາຫາເລື່ອງຜິດກັນເລີຍ ຂ້ອຍເມື່ອຍແລ້ວ!” ໃຜທີ່ກຳລັງຜິດກັບແຟນໃນເລື່ອງເກົ່າໆຄືການລະແວງບໍ່ໄວ້ໃຈກັນ ເນື່ອງມາຈາກສາເຫດພຶດຕິກຳໃນອະດີດຂອງຄົນຮັກທີ່ອາດຈະເຮັດຜິດພາດໃນບາງເລື່ອງຈົນເຮັດໃຫ້ເກີດການຢ້ານ, ບໍ່ສະບາຍໃຈ ແລະ ວິຕົກກັງວົນຢູ່ເລື້ອຍໆ ນັ້ນເອງ.

ການຫວາດລະແວງ ບໍ່ໄວ້ໃຈ ຫຼືຊື່ພາສາອັງກິດແມ່ນ Trust Issues ແມ່ນການອ້າງອີງອາການທີ່ເກີດຂຶ້ນຈາກບັນຫາທີ່ເກີດຂຶ້ນໃນເລື່ອງຂອງການທີ່ບໍ່ສາມາດໄວ້ວາງໃຈໃຜໄດ້ (ສ່ວນຫຼາຍຄຳນີ້ມັກຖືກຍົກມາເວົ້າໃນເລື່ອງຄວາມຮັກ-ຄວາມສຳພັນ) ທີ່ໝາຍເຖິງເລື່ອງສະພາວະທາງຈິດໃຈທີ່ຄົນເຮົາ ຫຼື ຄົນທີ່ຢູ່ໃນຄວາມສຳພັນ ມີຄວາມກັງວົນໃນຄວາມເຊື່ອໝັ້ນ ແລະ ບໍ່ໄວ້ວາງໃຈ ເຊິ່ງອາການເຫຼົ່ານີ້ສາມາດສະແດງອອກໄດ້ໃນຫຼາຍຮູບແບບບໍ່ວ່າຈະເປັນ ແບບຮູ້ໂຕ ແລະ ບໍ່ຮູ້ໂຕ.

Trust Issues ສາມາດເກີດຈາກຫຼາຍສາເຫດເຊັ່ນ: ປະສົບການທີ່ຖືກທຳຮ້າຍຈິດໃຈໃນໄວເດັກ ຫຼື ການທີ່ເດັກນ້ອຍຮັບຮູ້ເຖິງຄວາມສຳພັນທີ່ບໍ່ດີຂອງຄົນອ້ອມຂ້າງ. ພວກເຂົາຈະແນມເຫັນ, ແລ້ວຈື່ຈຳ ຮັບຮູ້ຈາກປະສົບການດ້ານລົບຈາກຄວາມສຳພັນທີ່ຜ່ານມາ ເຮັດໃຫ້ເກີດຄວາມບໍ່ເຊື່ອໃນເລື່ອງຄວາມຮັກ-ຄວາມສຳພັນດີໆ, ມັນຍັງສົ່ງຜົນເສຍຕໍ່ສຸຂະພາບຈິດ ແລະ ຄວາມສຳພັນກັບຄົນອ້ອມຂ້າງ.

ການເຂົ້າໃຈປະເພດຂອງອາການຈະຊ່ວຍໃຫ້ສາມາດຫາວິທີແກ້ໄຂບັນຫາໄດ້ຢ່າງຖືກຕ້ອງ ແລະ ໄດ້ຮັບຄວາມຊ່ວຍເຫຼືອຈາກຜູ້ຊ່ຽວຊານ. ມື້ນີ້ ມ່ວນ ເລີຍນຳຮູບແບບອາການຕ່າງໆມາແຊຣ໌ໃຫ້ທຸກຄົນຟັງ ເພື່ອທີ່ຈະສາມາດຊ່ວຍໃຫ້ເຮົາເຂົ້າໃຈບັນຫາຂອງຕົນເອງ ຫຼື ຄົນອ້ອມຂ້າງໄດ້ດີຂຶ້ນ.

ປະເພດອາການຂອງ Trust Issue

1. ອາການທາງຄວາມຄິດ (Cognitive Symptoms)

• ຄິດລົບຕໍ່ຄົນອື່ນ: ມັກຈະຄິດວ່າຄົນອື່ນມີເຈດຕະນາບໍ່ດີ, ຫຼອກລວງ ຫຼື ບໍ່ຊື່ສັດ.
• ຕີຄວາມຜິດພາດ: ແປຄວາມໝາຍການກະທຳເລັກໆ ນ້ອຍໆ ໄປໃນທາງລົບ.
• ການຄາດເດົາທີ່ບໍ່ດີ: ມັກຄິດໄປເອງວ່າຈະເກີດເລື່ອງຮ້າຍແຮງຂຶ້ນຢູ່ສະເໝີ.

2. ອາການທາງອາລົມ (Emotional Symptoms)

• ກັງວົນ ແລະ ບໍ່ໝັ້ນໃຈ: ຮູ້ສຶກບໍ່ສະບາຍໃຈໃນສາຍສຳພັນທີ່ໃກ້ຊິດ.
• ຄຽດແຄ້ນ ແລະ ຜິດຫວັງ: ໃຈຮ້າຍແບບຮຸນແຮງເມື່ອຮູ້ສຶກວ່າຖືກຫັກຫຼັງ.
• ຢ້ານຖືກທຳຮ້າຍ: ບໍ່ກ້າເປີດໃຈຍ້ອນຢ້ານຈະເຈັບປວດອີກ.

3. ອາການທາງພຶດຕິກຳ (Behavioral Symptoms)

• ຫຼີກລ້ຽງການຜູກສຳພັນ: ຮັກສາໄລຍະຫ່າງ ແລະ ຍາກທີ່ຈະສ້າງຄວາມສຳພັນທີ່ເລິກເຊິ່ງ.
• ກວດສອບ ແລະ ຄວບຄຸມ: ມັກກວດສອບພຶດຕິກຳຂອງຄົນອື່ນ ແລະ ຕ້ອງການໃຫ້ຄົນອ້ອມຂ້າງເຮັດຕາມທີ່ຕົນເອງຄິດ.
• ປິດກັ້ນຕົນເອງ: ບໍ່ຍອມເປີດເຜີຍຄວາມຮູ້ສຶກ ຫຼື ເລື່ອງສ່ວນໂຕ ເພື່ອປ້ອງກັນຈຸດອ່ອນ.
• ຊຸກດັນຄົນອື່ນອອກໄປ: ສ້າງບັນຫາເພື່ອຍູ້ຄົນທີ່ກຳລັງເຂົ້າມາໃນຊີວິດໃຫ້ຫ່າງອອກໄປ.

ວິທີຮັກສາອາການ Trust Issues

ການຮັກສາບັນຫາຄວາມໄວ້ວາງໃຈ (Trust Issues) ເປັນຂະບວນການທີ່ເລີ່ມຈາກການເຂົ້າໃຈສາເຫດໃນອະດີດ. ຈາກນັ້ນ, ເຮົາກໍຕ້ອງ ປ່ຽນແປງຄວາມຄິດຕົນເອງ ດ້ວຍການຢຸດເໝົາລວມວ່າຄົນໃໝ່ຈະເປັນຄືຄົນເກົ່າ ແລະ ຝຶກຄວາມຄິດ, ຊອກຫາຫຼັກຖານ, ໃຊ້ເຫດຜົນ ກ່ອນທີ່ຈະຕັດສິນຄົນອື່ນດ້ວຍອາລົມ.

ນອກຈາກນີ້, ໃຫ້ເລີ່ມ ສ້າງຄວາມໄວ້ວາງໃຈໃນຂັ້ນເລີ່ມຕົ້ນ ໂດຍການເປີດໃຈໃຫ້ກັບຄົນທີ່ເຮົາໄວ້ໃຈໄດ້ແລ້ວ ແລະ ຮຽນຮູ້ທີ່ຈະສື່ສານຢ່າງຊັດເຈນ. ຖ້າອາການຍັງຮຸນແຮງຄວນ ປຶກສາຜູ້ຊ່ຽວຊານທາງດ້ານສຸຂະພາບຈິດ ຈະຊ່ວຍໃຫ້ເຮົາເຂົ້າໃຈບັນຫາໄດ້ເລິກເຊິ່ງ ແລະ ພັດທະນາການສ້າງສາຍສຳພັນທີ່ດີຂຶ້ນ.

ການຮັກສາອາການ Trust Issues ແມ່ນການເດີນທາງທີ່ຕ້ອງໃຊ້ເວລາ, ຄວາມອົດທົນຫຼາຍ ເພາະການທີ່ຈະສ້າງຄວາມເຊື່ອໝັ້ນຄືນໃໝ່ຕ້ອງເລີ່ມຈາກຕົນເອງ. ຮຽນຮູ້ໃນການອົດທົນ ແລະ ຢ່າປ່ອຍໃຫ້ປະສົບການທີ່ເຈັບປວດໃນອະດີດກີດກັ້ນເຮົາຈາກການມີຄວາມສຳພັນທີ່ດີໃນອະນາຄົດ.