ເປັນຫຍັງຊ່ວງທ້າຍປີ ຫຼື ເດືອນທັນວາ ພວກເຮົາຈຶ່ງມັກຮູ້ສຶກວ່າເວລາຄ່ອຍໆຊ້າລົງ ພ້ອມກັນນັ້ນກໍເຮັດໃຫ້ເຮົາມັກຈະກັບມາທົບທວນ ແລະ ຄິດຫາໂຕເອງເປັນພິເສດສະເໝີ. ຫຼາຍຄົນມັກໃຊ້ເວລານີ້ໃນການສະຫຼຸບກ່ຽວກັບໂຕເອງ ແລະ ຕັ້ງເປົ້າໝາຍໃໝ່ໃນປີຕໍ່ໄປວ່າຈະເຮັດຫຍັງແດ່ ເພື່ອໃຫ້ເຮົານັ້ນຮູ້ວ່າໂຕເອງຕ້ອງການໃຊ້ຊີວິດແບບໃດກັນແທ້.
ນີ້ຄືອີກໜຶ່ງທິດສະດີຂອງເວລາປ່ຽນຜ່ານໃນແນວຄິດ “December Theory” ໃນລະຫວ່າງເຮົາຄົນເກົ່າສູ່ການເປັນເຮົາຄົນໃໝ່ໃນແບບທີ່ດີກວ່ານັ້ນເອງ. ນອກຈາກນີ້, ໃນເດືອນທັນວາຍັງເປັນເດືອນທີ່ເໝາະທີ່ສຸດໃນການລົບລ້າງຈິດໃຈ ໃຫ້ໃຈເຮົາພ້ອມທີ່ຈະຮັບສິ່ງໃໝ່ໆໃນປີຕໍ່ໄປ.
ແຕ່ຫຼາຍຄົນອາດຈະຮູ້ສຶກວ່າ “ມັນກໍຄືເກົ່າທຸກປີຫັນລະ ບໍ່ເຫັນມີຫຍັງປ່ຽນເລີຍ” ຄວາມຈິງແລ້ວຊີວິດຄົນເຮົາມີການປ່ຽນແປງໃນທຸກເວລາ ຂຶ້ນກັບພວກເຮົາຈະທັນໄດ້ສັງເກດເຫັນມັນບໍ່? ແລະ ກ່ອນຈະໝົດປີໄປ ມ່ວນ ເລີຍນຳ 4 ວິທີ ການລົບລ້າງຈິດໃຈໂຕເອງ ເພື່ອກຽມພ້ອມກັບຄວາມສຳພັນໃໝ່ໆ-ດີໆ ມາເລົ່າສູ່ທຸກຄົນຟັງ.
1. ຄວາມຄິດ (Mindset Reset)
ໃຫ້ພວກເຮົາລອງນັ່ງຄິດທົບທວນວ່າ ປີນີ້ສອນຫຍັງເຮົາມາແດ່? ໃຫ້ຍອມຮັບທັງຄວາມສຳເລັດ-ຄວາມຜິດພາດ ແລະ ຢຸດໂທດໂຕເອງໃນສິ່ງທີ່ບໍ່ສາມາດຄວບຄຸມໄດ້ ບໍ່ແບກບັນຫາຂ້າມປີ.
2. ອາລົມ (Emotional Reset)
ປ່ອຍໃຫ້ຄວາມເຈັບໃຈ, ຄວາມຄ້າງຄາໃນໃຈ ແລະ ຄວາມເສີຍໃຈໃຫ້ມັນຈົບໄປໃນເດືອນທັນວາ ຫຼື ປີເກົ່າ, ພ້ອມກັນນັ້ນ ເຮົາຕ້ອງໃຫ້ອະໄພໂຕເອງສະໝີ ແລະ ຍອມຮັບໂຕເອງແລ້ວຈຶ່ງຄ່ອຍໆແກ້ໄຂ. ໃນສ່ວນແນວໃດດີໆກໍໃຫ້ບັນທຶກເກັບໄວ້ ແລ້ວນຳໄປເຮັດຕໍ່ໃນປີໃໝ່.
3. ຄວາມສຳພັນ (Relationship Reset)
ທຸກໆຄວາມສຳພັນທີ່ເຮົາມີຢູ່ບໍ່ວ່າຈະເປັນມະນຸດ 1, 2, 3 ແລະ ໝູ່ ຫຼື ແຟນຂອງເຮົາ ກໍໃຫ້ຄິດທົບທວນວ່າໃຜຄວນຢູ່ຕໍ່ ໃຜຄວນປ່ອຍໄປຕາມທາງ. ເລີ່ມສ້າງຂອບເຂດໃນຄວາມສຳພັນໃໝ່ ພ້ອມເລືອກຄວາມສະຫງົບທາງດ້ານຈິດໃຈ ຫຼາຍກວ່າຄວາມວຸ່ນວາຍ.
4. ໂຕຕົນ (Identity Reset)
ໃຫ້ຄິດສະເໝີວ່າເຮົາບໍ່ແມ່ນຄົນເກົ່າອີກແລ້ວ ຈະບໍ່ກັບໄປເປັນແບບນັ້ນເພື່ອໃຫ້ໃຜຈັກຄົນທຳຮ້າຍຊ້ຳໆ ພ້ອມຄິດວ່າເຮົາຈະເປັນໃຜ ບໍ່ແມ່ນເຮົາເປັນແບບນັ້ນແລ້ວໄດ້ຫຍັງ ແລະ ໃຫ້ຈົດໄວ້ເລີຍວ່າເຮົາຢາກໄດ້ພະລັງງານແບບໃດ.
ການເປັນໂຕເອງໃນຮູບແບບທີ່ດີກວ່າມື້ນີ້ ແມ່ນເປັນສິ່ງທີ່ຈະສົ່ງເສີມຄວາມສຳພັນກັບຄົນອື່ນໆໃນດ້ານບວກ ໃຫ້ລອງສັງເກດໂຕເອງ ແລະ ຢ່າລືມສັງເກດຄົນອ້ອມຂ້າງໄປພ້ອມໆກັນ. ເພາະຄວາມຮູ້ສຶກທີ່ເຮົາໄດ້ໃຈດີກັບໂຕເອງນັ້ນມັນຈະຊ່ວຍເສີມສ້າງຈິດໃຈເຮົາໃຫ້ເຂັ້ມແຂງ ພ້ອມສາມາດສົ່ງຕໍ່ພະລັງບວກໃຫ້ຄົນອື່ນໆເຊັ່ນກັນ.
