ຮອດງານລວມຍາດພີ່ນ້ອງເທື່ອໃດກໍເຮັດໃຫ້ຮູ້ສຶກບໍ່ຢາກໄປທຸກຄັ້ງ, ແຕ່ກໍຫຼີກໜີບໍ່ໄດ້ ແລະ ຈຳເປັນຕ້ອງໄປຮ່ວມງານ ແຕ່ພໍໄປເຫັນກັນຄົບໜ້າເທື່ອໃດກໍ່ຈະຖືກຍິງຄຳຖາມທີ່ເຮັດໃຫ້ອຶດອັດໃຈໃສ່ກັນຕະຫຼອດເຊັ່ນ: ຕຸ້ຍຂຶ້ນຫວາ, ຮຽນຈົບແລ້ວຈະເຮັດຫຍັງຕໍ່, ໄດ້ເງີນເດືອນເທົ່າ, ປານໃດຈະມີແຟນ ຫຼື ປານໃດຈະແຕ່ງງານ ເປັນຕົ້ນ.
ການທີ່ຕ້ອງປະເຊີນໜ້າກັບຄຳຖາມຈາກຍາດພີ່ນ້ອງທີ່ເຮັດໃຫ້ເຮົາຮູ້ສຶກບໍ່ສະບາຍໃຈເປັນສິ່ງທີ່ຫຼາຍຄົນມັກພົບໃນງານລ້ຽງຄອບຄົວ, ເຮົາຈະເຮັດແນວໃດດີເພາະບໍ່ຢາກພົບກັບສະຖານະການແບບນີ້ອີກແລ້ວ.
ມື້ນີ້ມ່ວນມີ 4 ວິທີເພື່ອຮັບມືກັບບັນດາຍາດພີ່ນ້ອງໃນງານລວມຕົວຂອງຄອບຄົວມາແນະນຳໃຫ້ຟັງກັນ.
1. ກຽມຄຳຕອບລ່ວງໜ້າ
ພະຍາຍາມມາກັບຄໍາຕອບທີ່ສັ້ນ ແລະ ສຸພາບ. ທີ່ສາມາດຕອບໄດ້ໂດຍບໍ່ຕ້ອງມີການອະທິບາຍລາຍລະອຽດຫຼາຍເຊັ່ນ: “ຂ້ອຍກຳລັງຊອກຫາຕົວເອງ ແລະ ຂອບໃຈທີ່ເປັນຫວ່ງເດີ”; “ຂ້ອຍບໍ່ມີແຜນເທື່ອເພາະກຳລັງພິຈາລະນາ.”
2. ປ່ຽນຫົວຂໍ້ການສົນທະນາ
ຖ້າເຈົ້າກຳລັງເລີ່ມຮູ້ສຶກບໍ່ສະບາຍໃຈກັບຄໍາຖາມ ໃຫ້ລອງພະຍາຍາມປ່ຽນຫົວຂໍ້ການສົນທະນາໃຫ້ເປັນສິ່ງທີ່ຜ່ອນຄາຍຫຼາຍຂຶ້ນ ເຊັ່ນ: ຖາມເລື່ອງສຸຂະພາບຂອງພີ່ນ້ອງ ຫຼື ເລື່ອງອື່ນໆທີ່ບໍ່ກ່ຽວກັບໂຕເຈົ້າ.
3. ໃຊ້ຄວາມຄິດກ່ອນໃນເວລາທີ່ຈະຕອບ
ຢ່າຟ້າວຕອບທຸກຄຳຖາມທັນທີ, ໃຫ້ພະຍາຍາມຢຸດຄິດ ແລະ ຕອບຢ່າງໃຈເຢັນ, ສຸພາບ. ມັນຈຶ່ງສາມາດຊ່ວຍຮັກສາການສົນທະນາຕໍ່ຈາກນີ້ໄດ້.
4. ກໍານົດຂອບເຂດ ຫຼື ເລືອກບໍ່ຕອບ
ຖ້າຍາດພີ່ນ້ອງຖາມຄໍາຖາມທີ່ທ່ານຮູ້ສຶກວ່າກໍາລັງຂ້າມເສັ້ນຫຼາຍເກີນໄປ ເຈົ້າສາມາດເວົ້າໄດ້ວ່າເຈົ້າບໍ່ສະບາຍໃຈທີ່ຈະຕອບເຊັ່ນ: “ຂ້ອຍບໍ່ຕ້ອງການເວົ້າກ່ຽວກັບເລື່ອງນີ້ໃນຕອນນີ້ ຫຼື ຖ້າຂ້ອຍສະດວກໃຈແລ້ວຈະບອກເຈົ້າໃນເທື່ອໜ້າທີ່ພົບກັນ.”
ເລືອກບໍ່ຕອບເລີຍຖ້າທ່ານຮູ້ສຶກວ່າຄໍາຖາມແມ່ນເກີນຂອບເຂດ ເຈົ້າສາມາດຍິ້ມ ແລະ ບໍ່ຕອບໄດ້ເຊັ່ນກັນ. ເພາະບາງຄັ້ງການບໍ່ຕອບກໍຈະເຮັດໃຫ້ຄົນຮູ້ວ່າຄຳຖາມບໍ່ເໝາະສົມ.
ວິທີເຫຼົ່ານີ້ຈະຊ່ວຍໃຫ້ພວກເຮົາສາມາດຈັດການກັບຄໍາຖາມທີ່ບໍ່ສະບາຍໃຈໄດ້ໃນບາງສ່ວນ ແລະ ຖ້າໃຜມີວິທີຈັດການແນວໃດນອກຈາກນີ້ຊ່ວຍຄອມເມັ້ນແນະນຳມ່ວນແດ່ ຫຼື ໃຜເຄີຍພົບເຫດການແບບໃດມາກໍເລົ່າສູ່ຟັງແດ່ເດີ.
ໂດຍ: ທີມບັນນາທິການ Muan
