ອາຍຸນ້ອຍຮ້ອຍລ້ານ, ຊື້ບ້ານຊື້ລົດແຕ່ນ້ອຍ, ສິ່ງທີ່ສັງຄົມຍ້ອງຍໍ ແລະ ຄອບຄົວຂອງໃຜຫຼາຍໆຄົນຕ່າງກໍຄາດຫວັງໃຫ້ພວກເຮົາປະສົບຜົນສໍາເລັດຕັ້ງແຕ່ຫໜຸ່ມໆ ອາດສົ່ງຜົນເຖິງຈິດໃຈຂອງເຮົາໄດ້ເລີຍໃດ.
ທຸກມື້ນີ້ເວລາຜ່ານໄປໄວຈົນເຮົາບໍ່ທັນຕັ້ງຕົວ ເຮັດໃຫ້ໃຜຫຼາຍຄົນຮູ້ສຶກບໍ່ໝັ້ນໃຈໃນຕົວເອງ, ຮູ້ສຶກບໍ່ເກັ່ງພໍ, ບໍ່ງາມພໍ ໂດຍສະເພາະຢ່າງຍິ່ງແມ່ນໄວລຸ້ນຍຸກປັດຈຸບັນ ຫຼື Gen Z ທີ່ໄດ້ເຕີບໃຫຍ່ມາພ້ອມກັບໂຊຊຽວມີເດຍ ແລະ ຕ້ອງເຈິກັບຄວາມກົດດັນໃນການໃຊ້ຊີວິດໃນສັງຄົມໃນໂລກອອນລາຍ. ບໍ່ວ່າຈະເຫັນໝູ່ເພື່ອນທີ່ກຳລັງມີຄອບຄົວ ຊື້ບ້ານ ຊື້ລົດ, ເຫັນຊີວິດດີໆຂອງດາລາຄົນດັງທີ່ກໍາລັງມີຄວາມສຸກ ເຮັດໃຫ້ເບິ່ງຍ້ອນກັບມາທີ່ຕົວເອງ ວ່າເປັນຫຍັງເຮົາຈຶ່ງບໍ່ມີຄືເຂົາ, ເປັນຫຍັງເຮົາຈຶ່ງເກັ່ງບໍ່ພໍ?
ຄວາມຄາດຫວັງ ແລະ ການກົດດັນຕົວເອງສ້າງຄວາມບໍ່ໝັ້ນໃຈໃນຄວາມສາມາດຂອງຕົນ, ເຮັດໃຫ້ຄິດວ່າຕົວເອງເກັ່ງບໍ່ສູ້ຜູ້ອື່ນ ຢ້ານວ່າຈະຖືກຕັດສິນ ແລະ ເມື່ອເຮົາໄດ້ເຮັດວຽກຫຍັງສຳເລັດກໍຈະມີຄວາມຄິດທີ່ວ່າ ຄົນອື່ນເຮັດໄດ້ດີກວ່າເຮົາ. ເຊິ່ງຄວາມຈິງແລ້ວເຮົາເອງນັ້ນກໍມີຄວາມສາມາດ ແລະ ເກັ່ງບໍ່ແພ້ໃຜຄືກັນ.
ສາເຫດທີ່ຄວາມຮູ້ສຶກເຫຼົ່ານີ້ເກີດຂຶ້ນກໍມີສາເຫດມາຈາກການທີ່ເຮົາປຽບທຽບຕົນເອງກັບຄົນອື່ນສະເໝີ, ຕິດກັບດັກທີ່ມາດຖານສູງເກີນໄປ ແລະ ສຸດທ້າຍແມ່ນຢ້ານເຮັດຜິດພາດ. ເຮົາຈະສາມາດເອົາຊະນະອາການເຫຼົ່ານີ້ໄດ້ດ້ວຍ 7 ວິທີນີ້ຄື:
1. ຍອມຮັບຄວາມຮູ້ສຶກຂອງຕົນເອງ
ຍອມຮັບ ແລະ ສື່ສັດຕໍ່ຄວາມຮູ້ສຶກຂອງຕົນເອງ ດີກວ່າປ່ອຍໃຫ້ຄວາມຮູ້ສຶກດ້ານລົບເຂົ້າມາລົບກວນ ເຊິ່ງມັນບໍ່ດີຕໍ່ສຸຂະພາບຈິດເລີຍ.
2. ຢຸດປຽບທຽບກັບຄົນອື່ນ
ການປຽບທຽບຕົວໃນອະດີດກັບປັດຈຸບັນແມ່ນຈະເຫັນໄດ້ເຖິງການປ່ຽນແປງຫຼາຍຢ່າງ ເຮົາຄວນພັດທະນາຕົວເອງຈາກມື້ວານໃຫ້ດີຂຶ້ນ ໂດຍເລີ່ມເທື່ອລະເລັກເທື່ອລະໜ້ອຍ.
3. ຍິນດີກັບຄວາມສຳເລັດນ້ອຍໆຂອງຕົນເອງ
ຢ່າລືມທີ່ຈະສະຫຼອງກັບຄວາມສຳເລັດຂອງເຮົາບໍ່ວ່າເລື່ອງນັ້ນຈະເປັນເລື່ອງເລັກນ້ອຍ ຫຼື ໃຫຍ່, ເພື່ອໃຫ້ຄຸນຄ່າກັບຄວາມລຳບາກ ແລະ ຄວາມພະຍາຍາມຂອງເຮົາ.
4. ຂໍຄຳແນະນຳຈາກຄົນອ້ອມຂ້າງ
ການຖາມຄຳແນະນຳຈາກຄອບຄົວ, ໝູ່ເພື່ອນ ຫຼື ຄົນອ້ອມຂ້າງ ຈະເຮັດໃຫ້ເຮົາຮູ້ເຖິງມຸມມອງທີ່ຫຼາຍຂຶ້ນເພື່ອໃຫ້ເຮົາມີເປົ້າໝາຍໃໝ່ໆຂຶ້ນມາໄດ້ ແລະ ຍັງໄດ້ຮັບກຳລັງໃຈດີໆອີກນຳ.
5. ຮຽນຮູ້ການໃຫ້ອະໄພຕົນເອງ
ທຸກຄົນສາມາດເຮັດຜິດພາດໄດ້, ການໃຫ້ອະໄພຕົນເອງຍັງຊ່ວຍໃຫ້ເຮົາກ້າວຕໍ່ໄປໄດ້ໃນຄວາມຜິດພາດທີ່ເກີດຂຶ້ນ.
6. ເຝິກທັກສະໃໝ່ໆຢູ່ສະເໝີ
ການຄົ້ນຄວ້າຮຽນຮູ້ເລື່ອງຕ່າງໆ ຈະເຮັດໃຫ້ໝັ້ນໃຈໃນຄວາມສາມາດຂອງຕົນເອງ ແລະ ຍັງເປັນການໃຫ້ຄຸນຄ່າແກ່ເຮົາ.
7. Social detox
ໝາຍເຖິງການຫຼຸດຜ່ອນການຫຼິ້ນໂຊຊຽວມີເດຍ ເພື່ອໃຫ້ເຮົາໄດ້ຈົດຈໍ່ກັບຕົວເອງ ແລະ ຄົນອ້ອມຂ້າງໃຫ້ຫຼາຍຂຶ້ນເຊິ່ງຊ່ວຍຟື້ນຟູສະພາບຈິດໃຈຂອງເຮົາໃຫ້ເຂັ້ມແຂງ ແລະ ຜ່ອນຄາຍຂຶ້ນ.
ການທີ່ເຮົາຄາດຫວັງໃຫ້ຕົນເອງປະສົບສໍາເລັດໄວໆນັ້ນບໍ່ແມ່ນເລື່ອງຜິດ ເພາະເຮົາອາດຖືກສອນມາຕັ້ງແຕ່ນ້ອຍໃຫ້ເຊື່ອວ່າຊັບສິນເປັນຕົວວັດແທກຄວາມໝັ້ນຄົງຂອງເຮົາໃນຍຸກປັດຈຸບັນ, ແຕ່ຢ່າລືມວ່າມື້ນີ້ເຮົາທຸກຄົນໃນໂລກພະຍາຍາມສຸດຄວາມສາມາດແລ້ວ ແລະ ເຮົາຍັງມີໂອກາດໃນມື້ຕໍ່ໄປສະເໝີ.
ໂດຍ: ທີມບັນນາທິການ Muan
