ວົງການສິລະປະທຸກມື້ນີ້ແມ່ນໄປໄກ ແລະ ກວ້າງກວ່າທີ່ພວກເຮົາຄິດຫຼາຍເລີຍ ເຊິ່ງບາງຄົນອາດຈະຄິດວ່າສິລະປະຄືການແຕ້ມຮູບຊື່ໆ ຫຼື ປັ້ນຮູບປັ້ນຢູ່ໃນຫ້ອງມິດໆ ແຕ່ຄວາມຈິງແລ້ວມັນຢູ່ອ້ອມຕົວພວກເຮົາທັງນັ້ນເລີຍ.

ຕັ້ງແຕ່ການອອກແບບກຣາຟິກງາມໆຢູ່ເທິງປ້າຍໂຄສະນາ, ໜ້າຕາຂອງແອັບມືຖືທີ່ພວກເຮົາກົດຢູ່ທຸກມື້, ເສື້ອຜ້າແຟຊັນທີ່ພວກເຮົາໃສ່ໄປຈົນຮອດການຈັດສາກ, ການຍ້ອມສີໃນຄລິບວິດີໂອ ຫຼື ຮູບເງົາ ເຊິ່ງສິ່ງເຫຼົ່ານີ້ແຫຼະຄືສາຍງານສິລະປະ ແລະ ການອອກແບບ (Art & Design) ທັງນັ້ນ.

ມັນມີທັງສາຍ Visual Arts, Digital Art, Motion Design ແລະ ການສ້າງເນື້ອຫາແຕ້ມຮູບສິລະປະແບບທີ່ ສິລະປິນ-ນັກແຕ້ມ ຫົງສາ ໂຄດສຸວັນ ເຮັດ ເຊິ່ງທຸກສາຍແມ່ນມີສະເໜ່ ແລະ ໜ້າຄົ້ນຫາແຕກຕ່າງກັນໄປຄົນລະແບບ.

ຫົງສາ ສິລະປິນອິດສະລະ ຜູ້ບໍ່ເຄີຍຢຸດພັດທະນາໂຕເອງ

ມື້ນີ້ Muan TheInterview ກໍເລີຍຈະພາທຸກຄົນໄປທຳຄວາມຮູ້ຈັກກັບສິລະປິນ-ນັກແຕ້ມ ຫົງສາ ໂຄດສຸວັນ ໃຫ້ຫຼາຍຂຶ້ນວ່າເປັນຫຍັງ ຜູ້ຊາຍໃນໄວ 51 ປີ (ເກີດວັນທີ 26 ພະຈິກ 1975) ຈຶ່ງສາມາດເປັນຜູ້ທີ່ຄວ້າລາງວັນ Muan Awards 2025 ໃນສາຂາ Best Art Design Content Creator of the Year – ນັກສ້າງເນື້ອຫາສາຍອອກແບບສິລປ໌ດີເດັ່ນແຫ່ງປີ ນີ້ໄປຄອງໄດ້.

ຕ້ອງຂໍບອກວ່າເຖິງວ່າອາຍຸຂອງລາວຈະກ້າວເຂົ້າເລກຫ້າແລ້ວ ແຕ່ບອກເລີຍວ່າຄວາມຄິດ ແລະ ຜົນງານແມ່ນມີຄວາມໂດດເດັ່ນຫຼາຍ. ປັດຈຸບັນ ຫົງສາ ເຮັດວຽກເປັນສິລະປິນອິດສະລະ ເຊິ່ງການເປັນອິດສະລະນີ້ເອງທີ່ເຮັດໃຫ້ລາວມີຄວາມຄິດໃນການສ້າງສັນ ແລະ ຖ່າຍທອດເລື່ອງລາວຕ່າງໆ ອອກມາເປັນເນື້ອຫາສິລະປະທີ່ເຂົ້າເຖິງໃຈຄົນເບິ່ງ ຜ່ານເຕັກນິກການແຕ້ມທີ່ເປັນເອກະລັກ.

ປຽບທຽບຊີວິດ ຄືງານສິລະປະທີ່ເຕັມດ້ວຍຮ່ອງຮອຍປະສົບການ

ຂ້ອຍຄິດວ່າ… ຕົວຕົນຂອງຂ້ອຍມັນຄືກັບງານສິລະປະຮູບແບບເໝືອນຈິງ.

ຄຳເວົ້ານີ້ຄືສິ່ງທີ່ ຫົງສາ ໄດ້ບອກກັບ Muan TheInterview ເພາະຖ້າໃຫ້ປຽບຕົວຕົນ ແລະ ຊີວິດຂອງລາວໃນຕອນນີ້ມັນກໍຄືກັບງານສິລະປະຈັກອັນໜຶ່ງ ທີ່ສະທ້ອນຄວາມເປັນຕົວຕົນຂອງລາວໄດ້ດີທີ່ສຸດ ມັນຄົງຈະບໍ່ແມ່ນຮູບແຕ້ມສີນ້ຳມັນທີ່ຫຼູຫຼາຢູ່ໃນກອບຄຳ ແຕ່ມັນຄື ງານສິລະປະສື່ປະສົມ (Mixed Media Art) ທີ່ຜ່ານການເວລາ ແລະ ເຕັມไປດ້ວຍຮ່ອງຮອຍຂອງປະສົບການຊີວິດທີ່ຜ່ານມາຂອງລາວ.

ສິ່ງຕ່າງໆໄດ້ສະທ້ອນເຖິງການເປັນນັກສ້າງເນື້ອຫາທີ່ບໍ່ເຄີຍຢຸດພັດທະນາໂຕເອງ ໃນຄວາມໝາຍຂອງສິລະປະເໝືອນຈິງຂອງງານນີ້ ບໍ່ແມ່ນການແຕ້ມຮູບຄົນໃຫ້ຄືໂຕຈິງແບບເປະໆ ແຕ່ມັນຄືການສະທ້ອນ “ຄວາມຈິງຂອງຊີວິດສິລະປິນອິດສະລະ” ທີ່ມີທັງຮ່ອງຮອຍຂອງຄວາມຜິດພາດ, ຄວາມກົດດັນ, ຄວາມສຸກໃນການຄົ້ນພົບສິ່ງໃໝ່ໆ ແລະ ຄວາມອິດສະລະທີ່ບໍ່ມີຂອບເຂດ.

ລາງວັນແຫ່ງຄວາມທຸ່ມເທ ທີ່ປ່ຽນເປັນແຮງດັນເຮັດໃຫ້ມີກຳລັງໃຈ

ເວລາທີ່ເຮົາຕັ້ງໃຈເຮັດສິ່ງໃດສິ່ງໜຶ່ງຢ່າງສຸດຄວາມສາມາດໂດຍບໍ່ໄດ້ຄາດຫວັງຫຍັງຕອບແທນ ແຕ່ມື້ໜຶ່ງສິ່ງນັ້ນພັດສົ່ງຜົນໃຫ້ມີຄົນເຫັນຄຸນຄ່າ ມັນຈະຮູ້ສຶກພູມໃຈຂະໜາດໃດ ເຊິ່ງຄວາມຮູ້ສຶກນີ້ແຫຼະທີ່ກຳລັງເກີດຂຶ້ນກັບ ຫົງສາ ໃນຕອນທີ່ລາວໄດ້ຮັບຮູ້ວ່າຕົວເອງຄວ້າລາງວັນ.

ໃນຖານະຂອງຄົນທີ່ເຮັດວຽກຢູ່ໃນສາຍງານສິລະປະມາດົນ ການໄດ້ຮັບລາງວັນນີ້ມັນບໍ່ແມ່ນພຽງແຕ່ເລື່ອງຂອງຄວາມດີໃຈພຽງຢ່າງດຽວ ແຕ່ມັນມີຄວາມໝາຍ ແລະ ຄຸນຄ່າຕໍ່ຈິດໃຈຂອງລາວຫຼາຍ. ມັນເໝືອນກັບເປັນສິ່ງທີ່ເຂົ້າມາຢືນຢັນວ່າ ເສັ້ນທາງສິລະປິນທີ່ເລືອກ ແລະ ຄວາມທຸ່ມເທໃນການສ້າງສັນເນື້ອຫາຕະຫຼອດໄລຍະເວລາທີ່ຜ່ານມານັ້ນ ມັນມີຄົນເບິ່ງເຫັນ ແລະ ເຂົ້າໃຈໃນສິ່ງທີ່ລາວຕ້ອງການສື່ສານ.

“ລາງວັນນີ້ມີຄວາມໝາຍຫຼາຍ ເປັນແຮງພັກດັນໃຫ້ມີກຳລັງໃຈສ້າງງານຂຶ້ນໄປເລື້ອຍໆ” ຫົງສາ ກ່າວ.

ຫຼາຍຄົນອາດຈະຄິດວ່າຄົນທີ່ເຮັດວຽກມາຮອດຈຸດນີ້ຄົງຈະອິ່ມຕົວແລ້ວ ແຕ່ຄວາມຈິງແລ້ວການໄດ້ລາງວັນຈາກ Muan Awards ນີ້ໄດ້ກາຍເປັນຄືກັບນ້ຳຫຼໍ່ລ້ຽງຫົວໃຈ ແລະ ເປັນແຮງດັນອັນໃຫຍ່ທີ່ເຮັດໃຫ້ມີກຳລັງໃຈ ພ້ອມທັງມີໄຟທີ່ຈະລຸກຂຶ້ນມາຄິດຄົ້ນ, ສ້າງສັນ ແລະ ພັດທະນາຜົນງານສິລະປະໃໝ່ໆ ໃຫ້ພວກເຮົາໄດ້ຕິດຕາມກັນຕໍ່ໄປເລື້ອຍໆນັ້ນເອງ.

ສື່ສານດ້ວຍຄວາມຈິງໃຈ ເຄັດລັບການແຕ້ມຮູບໃຫ້ມີຊີວິດ

ທຸກຄົນເຄີຍສົງໄສບໍ່? ວ່າສິລະປິນເຮັດແນວໃດ ຈຶ່ງສາມາດເອົາຄວາມຄິດສ່ວນໂຕອັນເລິກເຊິ່ງ ມາເລົ່າໃຫ້ຄົນທົ່ວໄປຟັງແລ້ວເຂົ້າໃຈໄດ້ງ່າຍໆໂດຍທີ່ບໍ່ເສຍຄວາມເປັນໂຕເອງໄປ ເຊິ່ງສິ່ງນີ້ຖືເປັນໂຈດທີ່ຫິນພໍສົມຄວນສຳລັບຄົນເຮັດວຽກສາຍນີ້ ເພາະງານ “ສິລະປະ ແລະ ການອອກແບບ” ບາງເທື່ອກໍມີຄວາມເປັນສ່ວນຕົວສູງຫຼາຍ ແຕ່ໃນບົດບາດຂອງນັກສ້າງເນື້ອຫາ ມັນກໍມີຄວາມຈຳເປັນທີ່ຕ້ອງເຮັດໃຫ້ຄົນເບິ່ງເຂົ້າເຖິງນຳ.

ສຳລັບ ຫົງສາ ກໍມີເຄັດລັບໃນການຮັກສາຄວາມສົມດຸນລະຫວ່າງ “ຕົວຕົນຂອງສິລະປິນ” ກັບ “ສິ່ງທີ່ຄົນເບິ່ງຢາກຮູ້” ໄດ້ຢ່າງໜ້າສົນໃຈຫຼາຍ ເຊິ່ງວິທີການຂອງລາວບໍ່ໄດ້ຊັບຊ້ອນຫຍັງເລີຍ ແຕ່ຕ້ອງໃຊ້ຄວາມຈິງໃຈສູງ ເພາະມັນຄືການພະຍາຍາມຖ່າຍທອດສິ່ງທີ່ຕາເຫັນ ແລະ ສື່ສານມັນອອກມາໃຫ້ຮູບພາບນັ້ນມີຊີວິດຊີວາທີ່ສຸດ.

ການເຮັດໃຫ້ຮູບມີຊີວິດມັນບໍ່ແມ່ນພຽງແຕ່ແຕ້ມ ຫຼື ການອອກແບບໃຫ້ງາມຕາມທິດສະດີ ແຕ່ມັນຄືການໃສ່ຄວາມຮູ້ສຶກ, ບັນຍາກາດ ແລະ ເລື່ອງລາວທີ່ເປັນຄວາມຈິງລົງໄປໃນຜົນງານ. ເວລາທີ່ຄົນເບິ່ງໄດ້ສຳຜັດ ພວກເຂົາຈະຮັບຮູ້ໄດ້ທັນທີໂດຍບໍ່ຕ້ອງມີຄຳອະທິບາຍຫຍັງຫຼາຍ.

ວິທີທຸບກຳແພງເວລາທີ່ “ໄອເດຍຕັນ”

ມັນເປັນອາຖັນບໍ່? ທຸກຄົນຄິດວ່າແນວໃດ ຫຼື ວ່າມັນເປັນເລື່ອງທຳມະດາຂອງຄົນເຮັດວຽກສາຍ Art & Design ທີ່ມັກຈະເຈິກັບກຳແພງໜາໆທີ່ຊື່ວ່າ “ໄອເດຍຕັນ” ເພາະໃນຄວາມເປັນຈິງແລ້ວ ສິ່ງທີ່ຍາກກວ່າການເລີ່ມຕົ້ນສ້າງສັນຜົນງານກໍຄື “ການຮັກສາມາດຕະຖານ ແລະ ເຮັດໃຫ້ຄວາມຄິດສ້າງສັນຂອງເຮົາມັນຄົງທີ່ຢູ່ຕະຫຼອດເວລາ”.

Muan TheInterview ກໍສົງໄສ ເຊິ່ງເຄັດລັບງ່າຍໆຂອງ ຫົງສາ ກໍເປັນສິ່ງທີ່ທຸກຄົນມັກເຮັດປະຈຳຢູ່ແລ້ວລາວຈຶ່ງໄດ້ມາແບ່ງປັນໃນສ່ວນມຸມມອງຂອງລາວໃຫ້ຟັງວ່າ: “ປົກກະຕິແລ້ວ, ເວລາໄອເດຍຕັນ ຂ້ອຍມັກຈະພະຍາຍາມອອກໄປຄົ້ນຫາມຸມມອງອັນໃໝ່ໆ ເຊິ່ງທຸກຄັ້ງທີ່ເຮັດມັນກໍໄດ້ຜົນສະເໝີ”.

ກໍແມ່ນຕາມທີ່ລາວບອກມາໃດເນາະທຸກຄົນ ເພາະເວລາທີ່ຄິດງານບໍ່ອອກ ກໍບໍ່ຕ້ອງຝືນນັ່ງຈ້ອງໜ້າຈໍ ຫຼື ຈ້ອງແຜ່ນເຈ້ຍຢູ່ບ່ອນເກົ່າ ແຕ່ໃຫ້ກ້າວຂາອອກໄປທາງນອກ ເພື່ອໄປເຫັນສິ່ງໃໝ່, ໄປພົບປະຜູ້ຄົນ, ໄປສຳຜັດກັບບັນຍາກາດທີ່ແຕກຕ່າງ ຫຼື ພາໂຕເອງໄປຢູ່ໃນສະພາບແວດລ້ອມທີ່ບໍ່ຄຸ້ນເຄີຍ ກໍຈະໄດ້ບາງສິ່ງບາງຢ່າງກັບມາ.

ບົດຮຽນຄວາມທ້າທາຍ ທີ່ເຮັດໃຫ້ເຕີບໂຕອີກຂັ້ນ

ຄວາມຮູ້ສຶກເວລາທີ່ເຮົາຕ້ອງເຮັດວຽກໃດໜຶ່ງທີ່ຍາກຈົນເຮັດໃຫ້ເຮົາຕ້ອງກັບມາຕັ້ງຄຳຖາມ ແລະ ຮື້ລະບົບຄວາມຄິດຂອງໂຕເອງໃໝ່ທັງໝົດ ແຕ່ພໍຜ່ານມັນໄປໄດ້ມັນພັດເຮັດໃຫ້ເຮົາເກັ່ງ ແລະ ເຕີບໂຕຂຶ້ນແບບກ້າວກະໂດດ ພວກຄວາມທ້າທາຍແບບນີ້ແຫຼະທີ່ເຮັດໃຫ້ຄົນເຮັດວຽກສາຍສິລະປະຍັງຄົງມ່ວນ ແລະ ມີໄຟຢູ່ສະເໝີ.

ສຳລັບ ຫົງສາ ເອງກໍເຄີຍຜ່ານຊ່ວງເວລາທີ່ຕ້ອງເຮັດຜົນງານ ຫຼື ຄອນເທັນທີ່ທ້າທາຍລະບົບຄວາມຄິດຂອງໂຕເອງແບບສຸດໆມາກ່ອນຄືກັນ.

ມັນເປັນວຽກທີ່ບໍ່ສາມາດໃຊ້ຄວາມຄຸ້ນເຄີຍແບບເດີມໆມາເຮັດໄດ້, ແຕ່ຕ້ອງໄດ້ຄິດຄົ້ນ, ທົດລອງ ແລະ ຜ່ານຂະບວນການຄິດທີ່ຊັບຊ້ອນຫຼາຍ ເຖິງວ່າມັນຈະຍາກ ແລະ ຕ້ອງໃຊ້ພະລັງງານສະໝອງໄປຫຼາຍ, ແຕ່ພໍຜົນງານນັ້ນສຳເລັດອອກມາ ມັນບໍ່ແມ່ນແຕ່ຄວາມພູມໃຈໃນຄວາມສຳເລັດເທົ່ານັ້ນ, ແຕ່ມັນຄືການປົດລັອກສັກກະຍະພາບທີ່ເຮັດໃຫ້ລາວໄດ້ເຕີບໂຕຂຶ້ນໄປອີກຂັ້ນໜຶ່ງໃນຖານະສິລະປິນ.

ເມື່ອໂຕເອງໄດ້ຮຽນຮູ້ ແລະ ເຕີບໂຕມາຈົນຮອດຈຸດນີ້ແລ້ວ, ເປົ້າໝາຍຕໍ່ໄປທີ່ ຫົງສາ ຕັ້ງໃຈໄວ້ ຈຶ່ງບໍ່ແມ່ນແຕ່ການສ້າງຜົນງານເພື່ອຕົວເອງອີກຕໍ່ໄປ ແຕ່ລາວຢາກຖ່າຍທອດຄວາມຮູ້, ປະສົບການ ແລະ ເຕັກນິກທັງໝົດທີ່ມີໃຫ້ກັບຮຸ່ນນ້ອງທີ່ມີຄວາມມັກຮັກໃນງານສິລະປະຄືກັນ. 

ລາວຢາກໃຫ້ຄົນຮຸ່ນໃໝ່ໄດ້ຮຽນຮູ້ວິທີການເຮັດວຽກ ເພື່ອເອົາໄປພັດທະນາ ແລະ ຍົກລະດັບການສ້າງສັນຜົນງານຂອງໂຕເອງໃຫ້ມີຄຸນນະພາບ ແລະ ກ້າວໄປໄດ້ໄກກວ່າເກົ່າ. Muan TheInterview ຮູ້ສຶກດີແຮງ ເພາະການໄດ້ເຫັນສິລະປິນຮຸ່ນອ້າຍທີ່ມີປະສົບການ ພ້ອມທີ່ຈະສົ່ງຕໍ່ຄວາມຮູ້ໃຫ້ຮຸ່ນນ້ອງແບບນີ້ ມັນເປັນສິ່ງທີ່ໜ້ານັບຖື ແລະ ເຮັດໃຫ້ວົງການສິລະປະບ້ານເຮົາມີຄວາມຫວັງຫຼາຍຂຶ້ນຕື່ມອີກ.

ຈາກມື້ທີ່ບໍ່ມີໃຜຮູ້ຈັກ ມຸມມອງຊີວິດທີ່ປ່ຽນໄປຫຼັງຄວ້າລາງວັນ

ຖ້າທຸກຄົນໄດ້ລອງຄິດຍ້ອນກັບໄປມື້ທຳອິດທີ່ເຮົາເລີ່ມຕົ້ນເຮັດສິ່ງໃດສິ່ງໜຶ່ງ ໃນມື້ທີ່ຍັງບໍ່ທັນມີໃຜຮູ້ຈັກ, ມື້ທີ່ມີແຕ່ຄວາມມັກ ແລະ ຄວາມຕັ້ງໃຈເປັນຕົວນຳທາງ. ຈາກຈຸດເລີ່ມຕົ້ນນັ້ນມາຮອດມື້ທີ່ໄດ້ຮັບລາງວັນໃຫຍ່ລະດັບປະເທດ ມັນຄົງຈະເປັນເສັ້ນທາງທີ່ຍາວໄກ ແລະ ເຮັດໃຫ້ມຸມມອງຕໍ່ຊີວິດປ່ຽນໄປຫຼາຍແທ້ໆແມ່ນບໍ່.

ຫົງສາ ໄດ້ເຫັນເຖິງຄວາມປ່ຽນແປງໃນຊີວິດ ຕັ້ງແຕ່ມື້ທຳອິດທີ່ເລີ່ມກ້າວເຂົ້າສູ່ໂລກອອນລາຍ ເພື່ອສື່ສານເລື່ອງລາວສິລະປະ ຜ່ານບົດບາດການເປັນນັກສ້າງເນື້ອຫາ. ຈົນມາຮອດມື້ທີ່ປະສົບຄວາມສຳເລັດໄດ້ຮັບລາງວັນ Muan Awards.

ສິ່ງທີ່ປ່ຽນແປງໄປຫຼາຍທີ່ສຸດໃນມຸມມອງຂອງລາວ ບໍ່ແມ່ນເລື່ອງຂອງຊື່ສຽງເງິນຄຳ ແຕ່ມັນຄືການຮັບຮູ້ວ່າ ໃນຕອນນີ້ມີຄົນເຫັນ, ເຂົ້າໃຈ ແລະ ເຂົ້າມາມັກຮັກໃນຜົນງານສິລະປະທີ່ລາວຕັ້ງໃຈສ້າງຂຶ້ນມາຫຼາຍຂຶ້ນເລື້ອຍໆ.

ລາຍເສັ້ນທີ່ເປັນເອກະລັກ ຈະປາກົດອອກມາຜ່ານງານທີ່ເຮົາເຮັດ 

“ລາຍເສັ້ນ” ຫຼື “ຕົວຕົນ” ຂອງຄົນເຮົາ ມັນຈະສາມາດຊອກເຈິໄດ້ແນວໃດ? ເຊິ່ງບາງຄົນອາດຈະນັ່ງຄິດ ນັ່ງວາງແຜນຢູ່ໃນຫ້ອງດົນເຕີບ ແຕ່ກໍຍັງຫາຄຳຕອບບໍ່ໄດ້ຈັກເທື່ອ. ໃນຖານະຮຸ່ນໃຫຍ່ທີ່ຜ່ານຮ້ອນຜ່ານໜາວມາ ຫົງສາ ກໍມີຄຳແນະນຳສັ້ນໆ ທີ່ກັ່ນມາຈາກປະສົບການທັງຊີວິດ ທີ່ຢາກຈະສົ່ງຕໍ່ໃຫ້ຄົນຮຸ່ນໃໝ່ທີ່ກຳລັງຫຼົງທາງ ຫຼື ພະຍາຍາມຄົ້ນຫາຕົວຕົນໃນສາຍງານ Art & Design ນີ້ຢູ່.

ຄຳເວົ້າຂອງລາວກໍງ່າຍໆຕາມສະໄຕລ໌ສາຍຊິລ ແຕ່ໄດ້ໃຈຄວາມ ແລະ ກິນໃຈທີ່ສຸດກໍຄື: “ໃຫ້ເຮັດ, ໃຫ້ສ້າງງານສິລະປະໃຫ້ຫຼາຍໆ ແລະ ຊອກຫາຕົວຕົນຂອງເຮົາໃຫ້ໄດ້”.

ໃນສິ່ງທີ່ລາວຢາກສື່ສານກັບທຸກຄົນກໍມີຄວາມໝາຍວ່າ ການທີ່ເຮົາຈະສ້າງ “ຕົວຕົນ ຫຼື ລາຍເສັ້ນທີ່ເປັນເອກະລັກ” ມັນບໍ່ໄດ້ມາຈາກການນັ່ງຈິນຕະນາການ ຫຼື ລໍຖ້າໃຫ້ມັນເກີດຂຶ້ນເອງ ແຕ່ມັນຈະຄ່ອຍໆປາກົດອອກມາຜ່ານທຸກໆການຝຶກຝົນ ແລະ ທຸກໆຜົນງານທີ່ເຮົາລົງມືເຮັດ.

ຍິ່ງເຮົາລົງມືສ້າງສັນງານຫຼາຍເທົ່າໃດ ເຮົາກໍຈະຍິ່ງເຫັນຄວາມຊັດເຈນຂອງໂຕເອງຫຼາຍຂຶ້ນເທົ່ານັ້ນ, ຈະຮູ້ວ່າເຮົາມັກແບບໃດ, ຖະໜັດແບບໃດ ແລະ ສິ່ງໃດທີ່ເຮັດແລ້ວມັນເປັນຕົວເຮົາຫຼາຍທີ່ສຸດ. ສະນັ້ນ ທຸກຄົນບໍ່ຕ້ອງຢ້ານວ່າ ຕອນເລີ່ມຕົ້ນແລ້ວມັນຈະບໍ່ທັນງາມ ຫຼື ບໍ່ທັນມີໃຜເຫັນ, ຂໍແຕ່ລົງມືເຮັດໃຫ້ຫຼາຍ ເຮັດດ້ວຍຄວາມຕັ້ງໃຈ ແລ້ວມື້ໜຶ່ງຕົວຕົນທີ່ແທ້ຈິງຂອງເຮົາກໍຈະສະທ້ອນອອກມາໃນຜົນງານເອງ.

ບົດສະຫຼຸບຄວາມສຳເລັດ ທີ່ຕ້ອງເລີ່ມຈາກການລົງມືເຮັດ

ໃນຕອນທ້າຍຂອງການລົມກັນກັບ ສິລະປິນອິດສະລະ ທີ່ຜ່ານປະສົບການໃນວຽກງານສາຍນີ້ມາດົນ ເຊິ່ງກ່ອນຈະຈົບບົດຄວາມນີ້ ຫົງສາ ໂຄດສຸວັນ ກໍໄດ້ຝາກຂໍ້ຄິດດີໆທີ່ເປັນເໝືອນກຳລັງໃຈອັນອົບອຸ່ນໃຫ້ກັບທຸກຄົນທີ່ມີຄວາມສົນໃຈ ແລະ ຢາກກ້າວເຂົ້າມາໃນເສັ້ນທາງສາຍສິລະປະນີ້ວ່າ: “ໃຫ້ພະຍາຍາມສ້າງງານທີ່ຕົນເອງມັກຮັກໃຫ້ຫຼາຍໆ ແລ້ວຈຸດໝາຍຈະຢູ່ໃກ້ມືຂອງເຮົາແນ່ນອນ”.

ຄຳເວົ້າທຳມະດາງ່າຍໆນີ້ ແຕ່ມັນພິເສດຫຼາຍ, ໄດ້ເຮັດໃຫ້ເຫັນເຖິງຄວາມຈິງຂອງຊີວິດ ແລະ ການເຮັດວຽກໄດ້ດີຫຼາຍ ເພາະເມື່ອໃດທີ່ເຮົາເລີ່ມຕົ້ນເຮັດສິ່ງໃດສິ່ງໜຶ່ງດ້ວຍຄວາມມັກຮັກທີ່ແທ້ຈິງ ເຮົາຈະມີພະລັງໃນການສ້າງສັນຜົນງານອອກມາໄດ້ເລື້ອຍໆ ໂດຍບໍ່ຮູ້ສຶກອິດເມື່ອຍ.

ຄວາມຕັ້ງໃຈ ແລະ ຄວາມໝັ້ນພຽນໃນການລົງມືເຮັດນີ້ແຫຼະທີ່ຈະຄ່ອຍໆ ຫຍັບຫຍໍ້ໄລຍະທາງໃຫ້ພວກເຮົາກ້າວເຂົ້າໃກ້ຄວາມສຳເລັດ ແລະ ຈຸດໝາຍທີ່ຫວັງໄວ້ໄດ້ໄວຂຶ້ນ ເຊິ່ງການທີ່ Muan TheInterview ໄດ້ລົມກັບ ຫົງສາ ໂຄດສຸວັນ ໃນມື້ນີ້ ເຮັດໃຫ້ເຫັນວ່າ ສິລະປະມັນບໍ່ມີຂີດຈຳກັດເລື່ອງອາຍຸ ແລະ ຄວາມສຳເລັດກໍບໍ່ມີທາງລັດ ມັນມີແຕ່ຕ້ອງລົງມືເຮັດດ້ວຍຄວາມຮັກເທົ່ານັ້ນ.