Muan RelationTips

ຮູ້ສຶກກຳລັງຈະຖືກບອກເລີກ? ຄົນຮັກມິດໃສ່ເຮັດຄືເຮົາບໍ່ມີໂຕຕົນ ພຶດຕິກຳຄົນມີຄູ່ທີ່ຈະທຳຮ້າຍຄວາມສຳພັນ

ໂດຍ: Khainapha Chanthathilath

24 November 2025● 99

ເຊື່ອວ່າຫຼາຍຄົນຄົງເຄີຍເຈິເຫດການແບບນີ້ໃນຄວາມສຳພັນແນ່ນອນ ທີ່ຢູ່ດີໆຄົນຮັກກໍປິດກັ້ນການສື່ສານ, ມິດງຽບຫາຍໄປ, ບໍ່ຕອບ, ບໍ່ຟັງ ຫຼື ຫຼີກໜີບໍ່ພົບໜ້າ ເຮັດໃຫ້ບໍ່ມີວິທິຈັດການກັບບັນຫາທີ່ເກີດຂຶ້ນລະຫວ່າງທັງສອງຄົນ ຈົນບາງເທື່ອກໍຄືວ່າມີແຟນແຕ່ກໍປານບໍ່ມີ. ຖ້າເຈົ້າກຳລັງ “ຮູ້ສຶກກະວົນກະວາຍຢູ່ຄົນດຽວ ຫຼື ຄິດວ່າກຳລັງຈະຖືກຕັດອອກຈາກຄວາມສຳພັນ” ຕ້ອງມາຮູ້ຈັກພຶດຕິກຳນີ້ໃຫ້ຫຼາຍຂຶ້ນກ່ອນ ເພື່ອກຽມວິທີຮັບມື ແລະ ຫາທາງອອກທີ່ດີໃຫ້ກັບຄວາມສຳພັນແບບ “Stonewalling Relationship”.

ພຶດຕິກຳແບບ “Stonewalling Relationship ຫຼື ການປິດກັ້ນຄວາມສຳພັນ” ຖືກເວົ້າເຖິງຫຼາຍໃນທາງຈິດຕະວິທະຍາເລື່ອງຄວາມສຳພັນ ເຊິ່ງຜູ້ຊ່ຽວຊານດ້ານການແຕ່ງງານ ແລະ ຄວາມສຳພັນ Dr. John Gottman ໄດ້ຈັດໝວດໝູ່ພຶດຕິກຳ Stonewalling Relationship ນີ້ວ່າເປັນໜຶ່ງໃນພຶດຕິກຳທີ່ເປັນຈຸດສຳຄັນຂອງການທຳຮ້າຍຄວາມສຳພັນ.

ແລ້ວເຮົາຈະສັງເກດອາການຂອງຄົນຮັກໄດ້ແນວໃດ?

ສິ່ງທຳອິດທີ່ຈະເຮັດໃຫ້ເຮົາເບິ່ງ ແລະ ສັງເກດເຫັນຄວາມຜິດປົກກະຕິເລີຍຄື: ຢູ່ດີໆຄົນຮັກກໍມິດໃສ່ ເຮັດຄືເຮົາບໍ່ມີໂຕຕົນ, ມັກປ່ຽນເລື່ອງທີ່ກຳລັງລົມກັນຢູ່ ພ້ອມຫຼົບສາຍຕາ, ບໍ່ມັກຕອບຄຳຖາມ, ມັກຕອບແບບປັດໆ ຫຼື ຕອບກັບສັ້ນໆ ແລະ ບໍ່ຟັງຫຍັງທັງນັ້ນ ເຖິງວ່າບັນຫາຈະບໍ່ໄດ້ຮັບການແກ້ໄຂກໍຕາມ ຖ້າເກີດເຫດການແບບນີ້ກໍໃຫ້ຮູ້ໄວ້ເລີຍວ່າຄວາມສຳພັນກຳລັງເຂົ້າສູ່ການຖືກປິດກັ້ນຄວາມສຳພັນຈາກຄົນຮັກຂອງເຮົານັ້ນເອງ.

ເປັນຫຍັງຈຶ່ງສະແດງອາການ Stonewalling Relationship?

ທຸກໆຢ່າງທີ່ມະນຸດສະແດງອອກລ້ວນແລ້ວຕ້ອງມີເຫດຜົນ ແລະ ຈຸດເລີ່ມຕົ້ນກັນທັງນັ້ນ ເພາະການທີ່ຄົນໆໜຶ່ງຈະເລືອກສະແດງພຶດຕິກຳປິດກັ້ນຄວາມສຳພັນອອກມາ ສ່ວນໃຫຍ່ແມ່ນມາຈາກລະບົບປ້ອງກັນຕົນເອງ (Self-defense mode) ເຊັ່ນ: ການບໍ່ຢາກຜິດຖຽງກັນ, ຢ້ານຖືກຮ້າຍ, ບໍ່ຮູ້ວິທີການສື່ສານຄວາມຮູ້ສຶກ, ຮູ້ສຶກກົດດັນ-ຄິດຫຍັງບໍ່ອອກ ແລະ ຕ້ອງການຄວບຄຸມສະຖານະການດ້ວຍ “ຄວາມງຽບ”.

Stonewalling Relationship ສາມາດສົ່ງຜົນກະທົບຕໍ່ຄູ່ຮັກ

ພືດຕິກຳນີ້, ມັກຈະທຳຮ້າຍຄວາມສຳພັນແບບຮ້າຍແຮງ ແລະ ເຮື້ອຮັງ ຢ່າງທີ່ຫຼາຍຄົນອາດຈະຄິດບໍ່ເຖິງເລີຍ ເຊິ່ງມັນຈະສົ່ງຜົນກະທົບຕໍ່ຄົນຄູ່ຮັກ ເຮັດໃຫ້ອີກຝ່າຍຮູ້ສຶກໂດດດ່ຽວ, ນ້ອຍໃຈ, ຄວາມໄວ້ໃຈທີ່ມີຈະຫຼຸດລົງ ຫຼື ເຮັດໃຫ້ເກີດມີຊ່ອງວ່າງ ແລະ ຄວາມຮູ້ສຶກຫ່າງໄກກັນຂຶ້ນເລື້ອຍໆ (Emotional distance).

ວິທີຮັບມືຖ້າເກີດເຫດການ Stonewalling Relationship.

• ສຳລັບຄົນທີ່ຖືກກະທຳ: ໃຫ້ບອກຄວາມຮູ້ສຶກຂອງຕົນເອງດ້ວຍຄວາມໃຈເຢັນແບບກົງໄປ-ກົງມາ, ໃຫ້ເວລາກັບຕົນເອງໄດ້ຄິດ ແຕ່ບໍ່ຄວນປ່ອຍເວລາໃຫ້ດົນຫຼາຍເກີນໄປ ແລະ ນັດລົມໃຫ້ຊັດເຈນເພື່ອຊ່ວຍກັນແກ້ໄຂບັນຫາ.
• ສຳລັບຄົນທີ່ກະທຳ: ຂໍເວລາ (Time-Out) ໃນການທົບທວນສິ່ງທີ່ອາດເຮັດໄປພຽງເພາະໃຈຮ້ອນ ໂດຍບໍ່ແມ່ນການໜີຫາຍໜ້າໄປ ພ້ອມບອກເວລາຊັດເຈນໃນການນັດລົມກັນ, ຝຶກການສື່ສານຢ່າງກົງໄປ-ກົງມາໃຫ້ຫຼາຍຂຶ້ນ ແລະ ໃຫ້ສື່ສານເຖິງຄວາມຮູ້ສຶກ (Overwhelm) ທີ່ມີຢູ່ໃນໃຈແທນການມິດງຽບ.