ນີ້ແຫຼະຄົນທີ່ແມ່ນ 5 ສັນຍານທີ່ບອກວ່າຜູ້ນີ້ແຫຼະຄືຄູ່ຊີວິດທີ່ເຮົາຕາມຫາ

ໃຜໆກໍລ້ວນແຕ່ຢາກພົບຄວາມຮັກທີ່ດີ ຮັກທີ່ສົມຫວັງກັບຄົນທີ່ເຮົາຮັກ ແລ້ວຈະຮູ້ໄດ້ແນວໃດລະວ່າຜູ້ນີ້ແມ່ນແລ້ວເຮົາຈະສາມາດຝາກຊີວິດນໍາເຂົາໄດ້, ຜູ້ນີ້ແຫຼະຄືພໍ່ຂອງລູກ ຫຼື ແມ່ຂອງລູກ ແລະ ຜູ້ນີ້ແຫຼະທີ່ເຮົາຈະແຕ່ງດອງນໍາ. ຂໍພອນແລ້ວພົບເລີຍກໍຄົງຈະດີ ກະຫັນແຫຼະເນາະຄົນທີ່ແມ່ນຄົນທີ່ຈະມາສ້າງຄອບຄົວນຳເຮົາມັນບໍ່ໄດ້ຫາຊື້ມາໄດ້ງ່າຍໆຄືສິນຄ້າທີ່ຂາຍຮ້ານສະດວກຊື້ ສະນັ້ນກໍຕ້ອງເບິ່ງໆກັນໄປໃຫ້ເວລາ ແລະ ຄວາມຮູ້ສຶກໄດ້ພິສູດວ່າເຂົ້າກັນໄດ້ແທ້ບໍ ຢາກຢູ່ນຳຜູ້ນີ້ໄປຕະຫຼອດຊີວິດບໍ?, ມື້ນີ້ເພື່ອໃຫ້ທຸກຄົນໄດ້ຮູ້ໃຈໂຕເອງ, ໝັ້ນໃຈ ແລະ ສາມາດສັງເກດໄດ້ວ່າຜູ້ນີ້ແຫຼະ ຜູ້ທີ່ກຳລັງຄົບຢູ່ນີ້ລະແມ່ນແລ້ວ ເຮົາຮັກ ແລະ ຢາກຢູ່ນໍາຜູ້ນີ້ ມ່ວນເລີຍມີ 5 ສັນຍານມາໃຫ້ທຸກຄົນມາໄຂຂໍ້ສົງໄສນີ້ກັນ ຮັບຮອງວ່າຈະເຮັດໃຫ້ທຸກຄົນຕາສະຫວ່າງ ແລະ ຮູ້ເລີຍວ່າຜູ້ນີ້ແຫຼະທີ່ເຮົາຈະໃຫ້ມາເປັນຄູ່ຊີວິດເຮົາ, ພວກເຮົາໄປເບິ່ງພ້ອມໆກັນເລີຍ.

1. ມັກທ່ຽວ ແລະ ມັກເດີນທາງໄປໃນບ່ອນຄ້າຍຄືກັນ

ຫາກຢາກຮູ້ວ່າຄົນຮັກຂອງເຮົາ ແລະ ເຮົາເຂົ້າກັນໄດ້ດີສໍ່າໃດໃຫ້ລອງວາງແຜນໄປທ່ຽວນໍາກັນເບິ່ງຈັກເທື່ອ ຕາມຂໍ້ພິສູດຈາກຜູ້ຊຽວຊານທາງດ້ານຄວາມສໍາພັນໄດ້ກ່າວວ່າ ຄູ່ຮັກທີ່ເຂົ້າກັນໄດ້ເປັນຢ່າງດີພວກເຂົາມັກຈະຢາກໄປທ່ຽວໃນແບບດຽວກັນ. ຖ້າເຮົາມີຄວາມຄິດຢາກໄປທ່ຽວໃນສະຖານທີ່ ທີ່ມີທຳມະຊາດສົມບູນພະຈົນໄພນ້ອຍ ແລະ ອາດຈະມີພັກນອນໃນເຕັ້ນ ແຕ່ແຟນ ຫຼື ຄົນຮັກຂອງເຮົາກັບບໍ່ເຫັນດີ ແລະ ຄິດສວນກັນແບບສຸດໆ ຕົວຢ່າງວ່າຕ້ອງການນອນສະບາຍໃນໂຮງແຮມຫຼູລະດັບ 5 ດາວ ແລະ ທ່ຽວຊົມໃນເມືອງແບບຊິວໆຊັອບປິ້ງຊື້ເຄື່ອງຈົນໝົດມື້ ອີ່ຫຍັງປະມານນີ້ເຮົາອາດຈະຕ້ອງກັບມາຄິດທວນຄືນໃນຄວາມສຳພັນທີ່ເປັນວ່າຈະມີທາງສາມາດໄປຕໍ່ໄດ້ບໍ ຫຼື ມີຫຍັງທີ່ຈະຕ້ອງປັບເພື່ອໃຫ້ເຂົ້າໃຈກັນ ແລະ ຄວາມສຳພັນນີ້ໄປລອດ. ເພາະເຮົາທຸກຄົນລ້ວນແຕ່ມີຄວາມມັກຮັກທີ່ຕ່າງກັນໄປ ແຕ່ເຮົາຈະເຮັດແນວໃດ, ປ່ຽນແປງຫຍັງຫຼາຍສໍ່າໃດເພື່ອໃຫ້ສາມາດເຂົ້າໃຈ ແລະ ໃຊ້ຊີວິດຢູ່ກັບຄົນທີ່ເຮົາຮັກໄດ້ຢ່າງມີຄວາມສຸກ ແຕ່ທີ່ຮູ້ໆກັນຈະປັບກໍຕ້ອງປັບທັງສອງຝ່າຍຫາກຝ່າຍໃດຝ່າຍໜຶ່ງປັບປ່ຽນພຽງຝ່າຍດຽວ ຕໍ່ໃຫ້ມີຄວາມອົດທົນສູງ ຫຼື ຮັກແຟນຫຼາຍສ່ຳໃດສິ່ງທີ່ເປັນຢູ່ກໍບໍ່ມີຄວາມສຸກ ແລະ ຄວາມສຳພັນຄັ້ງນີ້ກໍຈະຈົບລົງເອງພຽງແຕ່ມັນຈະຊ້າ ຫຼື ຈະໄວເທົ່ານັ້ນ.

2. ມີຄວາມສົນໃຈ ແລະ ຄວາມມັກຊື້ມັກເຮັດອີ່ຫຍັງຄ້າຍຄືກັນ

ຂໍ້ນີ້ເປັນຂໍ້ສັງເກດທີ່ບອກໄດ້ເລີຍວ່າເຫັນຊັດເຈນແຮງ ແລະ ໃນຫຼາຍໆຄູ່ກໍອາດຈະເຄີຍຕ້ອງເລີກລາກັນດ້ວຍເຫດຜົນທີ່ວ່າບໍ່ມີອີ່ຫຍັງມັກເຮັດຄືກັນເລີຍເຮົາສອງຄົນແຕກຕ່າງກັນຫຼາຍໂພດ. ການໃຊ້ຊີວິດ, ອາຫານ, ຄວາມມັກ, ສະໄຕລການແຕ່ງໂຕ, ການກະທຳ ແລະ ນິໄສ ຫາກບໍ່ມີຢ່າງໃດຢ່າງໜຶ່ງທີ່ມັກຄືກັນເລີຍບອກໄດ້ເລີຍວ່າຍາກ ແຕ່ມັນກໍມີຄຳເວົ້າທີ່ບອກວ່າຄວາມແຕກຕ່າງຄືການເຕີມເຕັມໃຫ້ກັນ ແລະ ກັນ. ແຕ່ຖ້າແຕກຕ່າງກັນເກີນໄປ ຫຼື ທັງໝົດເລີຍມັນກໍຈະບໍ່ມີຈຸດກາງ ແລະ ທາງອອກຂອງການຢູ່ຮ່ວມກັນເຊັ່ນດຽວກັນ, ຕ່າງຄົນຕ່າງຄວາມຄິດສິ່ງທີ່ມັກເຮັດບໍ່ເຂົ້າກັນຈັກຢ່າງ, ຫາກບໍ່ມີຈຸດໃດຈຸດໜຶ່ງຄິກກັນມັນກໍຍາກທີ່ຈະເຂົ້າໃຈ ຫຼື ຍອມຮັບພ້ອມສົ່ງຜົນໃຫ້ຄວາມສຳພັນຂອງຄູ່ຮັກກໍຕ້ອງມີການສັ່ນຄອນ ແລະ ອາດຮອດທາງຕັນ.

3. ຄວາມສຳພັນມີຄວາມສົມດຸນ ແລະ ໃຫ້ກຽດກັນ

ສຳລັບຂໍ້ນີ້ບອກໄດ້ເລີຍວ່າສຳຄັນສຸດ ຖ້າຄູ່ຮັກຄູ່ໃດມີຂໍ້ນີ້ແມ່ນພວກເຂົາຢູ່ກັນຍືນແທ້ ຕ່າງຝ່າຍຕ່າງເປັນຝ່າຍສັບພອດກັນ ຕ່າງຝ່າຍຕ່າງເຂົ້າໃຈກັນ, ໃຫ້ການຊ່ວຍເຫຼືອກັນ ແລະ ກັນຢູ່ຕະຫຼອດ. ເອົາງ່າຍໆຄົນແບບນີ້ກໍຫາຍາກແຮງແມ່ນບໍ? ສົມໝຸດວ່າຝ່າຍໜຶ່ງມັກເຂົ້າສັງຄົມ ຫຼື ວຽກຂອງເຂົານັ້ນຕ້ອງພົບປະ ແລະ ຈຳເປັນຕ້ອງໂອ້ລົມຄົນຫຼາກໜ້າຫຼາຍຕາ ແຕ່ອີກຄົນກັບມີໂລກສ່ວນຕົວສູງ, ມິດງຽບເຂົ້າສັງຄົມບໍ່ເປັນແບບນີ້ມັນກໍປັບກັນຍາກຢູ່ແຕ່ກໍຕ້ອງຄ່ອຍປັບຕ່າງຝ່າຍຕ່າງຄ່ອຍເປີດໂລກຂອງອີກຝ່າຍໃຫ້ກັນ ແລະ ກັນເຫັນພ້ອມທັງໃຫ້ເຂົາເຂົ້າມາລອງເບິ່ງໃນການຮ່ວມມາໃຊ້ຊີວິດແບບດຽວກັນແລ້ວຈຶ່ງມາລົມກັນວ່າປັບ ຫຼື ຕ້ອງຈູນປະມານໃດ ແຕ່ບອກເລີຍຕ້ອງເປີດໃຈເດີ້ ເປີດໃຈຍອມຮັບສິ່ງໃໝ່ໆ ຖ້າປະໄວ້ຢູ່ຊື່ຕ່າງຄົນຕ່າງບໍ່ປ່ຽນຕ່າງຄົນຕ່າງບໍ່ປັບຈະໃຫ້ຄວາມສຳພັນຢູ່ຕໍ່ຍາວນິເປັນໄປບໍ່ໄດ້ແນ່ນອນ ຢາກຮັກກັນໄປດົນໆກໍຕ້ອງເຂົ້າໃຈກັນຫຼາຍໆເດີ້ທຸກຄົນ.

4. ຢູ່ນໍາກັນແລ້ວສາມາດເປັນໂຕຂອງໂຕເອງໄດ້ເຕັມທີ່

ຄວາມສຳພັນແບບບໍ່ກັກ ແບບທີ່ກ້າສະແດງຕົວຕົນຂອງຕົວເອງອອກມາໄດ້ເຕັມທີ່, ບໍ່ຫວງງາມບໍ່ຫຼໍ່ເຮັດຫຍັງສະບາຍໃຈກໍເຮັດໄປເລີຍ ຕ່າງຄົນຕ່າງບໍ່ເຟກແຖມພ້ອມຮັບຂໍ້ເສຍຂອງກັນ ແລະ ກັນໄດ້, ເອົາງ່າຍເຫັນກັນປານຄົນໃນຄອບຄົວແລ້ວ, ພຽງແຕ່ເຂົາເປັນເຂົາຈະເປັນແນວໃດກໍໜ້າຮັກ, ກໍງາມ, ຫຼໍ່, ເທ່ ແລະ ສົດໃສທຸກມຸມ ຖ້າຄູ່ຮັກໃດເປັນແບບນີ້ໄດ້ສາມາດຮັບຕົວຕົນຂອງອີກຝ່າຍໄດ້ແບບບໍ່ລຳບາກໃຈ ແລະ ເຊື່ອໃຈກ້າເປີດຄວາມເປັນຕົວເອງໃຫ້ເຂົາເຫັນກໍຄືສົມຫວັງສຸດໆແລ້ວແຫຼະ ສາມາດເຮັດແນວແປກໆມ່ວນນຳກັນໄດ້ (ເຊັ່ນ: ຕົດໃສ່ກັນ, ເຕັ້ນທ່າແປກໆ ແລະ ອື່ນໆ) ບອກໄດ້ເລີຍວ່າເປັນຄູ່ຮັກທີ່ເພີເຟັກເລີຍ.

5. ຕ່າງຝ່າຍຕ່າງປັບຈູນອາລົມ ແລະ ຄວາມຕ່າງໃຫ້ສາມາດເຂົ້າກັນໄດ້

ແນ່ນອນທຸກຄົນເຮົາມີຄວາມຄິດ, ຄວາມມັກທີ່ແຕກຕ່າງແບບທີ່ຖ້າມີຫຍັງທີ່ເຮົາບໍ່ມັກໃນຕົວອີກຝ່າຍແລ້ວບໍ່ລົມກັນອີ່ຫຼີກໍຈະບໍ່ເຂົ້າໃຈກັນເລີຍ. ບາງຄົນກໍມັກໃຈຮ້ອນບໍ່ຟັງໃຜ, ບາງຄົນກໍຂີ້ເຫິງແບບຄິດໄປໄກເລີຍ, ບາງຄົນກໍມັກປ່ອຍບໍ່ຄ່ອຍມັກສົນໃຈຄວາມຮູ້ສຶກຂອງອີກຝ່າຍ, ບາງຄົນກໍໂຟກັດແຕ່ຄວາມຕ້ອງການຂອງຕົວເອງເປັນທີ່ຕັ້ງ ເຊິ່ງໃນທຸກປັນຫາເຫຼົ່ານີ້ຫາກບໍ່ມີຄວາມພະຍາຍາມຢາກປັບ ຫຼື ປ່ຽນແປງເພື່ອໃຫ້ເຂົ້າໃຈກັນຫຼາຍຂຶ້ນ ຫຼື ມັກເກັບໄວ້ບໍ່ບອກບໍ່ລົມກັນເລີຍຕໍ່ໃຫ້ຮັກກັນຫຼາຍສຳໃດກໍໝົດຮັກໄດ້ ດີບໍ່ດີຖ້າຍັງຄົບກັນຢູ່ອີກຝ່າຍອາດຈະເປັນຂອງຕາຍ ບໍ່ກໍຮັບກັບບໍ່ໄຫວຈົນຕ້ອງຜິດຖ່ຽງກັນເລີກລາຊັງກັນໃນທີ່ສຸດ. ຮັກແນວໃດສະບາຍໃຈ ແລະ ມີຄວາມສຸກກໍຕ້ອງເຮັດເດີ້ທຸກຄົນ.

ແລ້ວທຸກຄົນເດພົບແລ້ວບໍຄົນຮັກແບບນີ້, ແລ້ວຄົນທີ່ມີຄູ່ມີແຟນ ຫຼື ຄົບກັນມາດົນແມ່ນໄດ້ສັງເກດບໍ່ວ່າຄວາມສຳພັນຂອງຕົວເອງມີຂໍ້ໃດໃນນີ້ ຫຼື ບໍ່, ຫາກວ່າມີເກືອບໝົດບອກເລີຍວ່າບໍ່ດົນເຈົ້າກຽມຕົວເປັນເຈົ້າບ່າວເຈົ້າສາວກັນແນ່ນອນ. ແຕ່ຖ້າມີພຽງ 1 – 2 ຂໍ້ຕ້ອງໄດ້ເບິ່ງກັນຄັກລົມກັນປັບກັນໃໝ່ອີ່ຫຼີເດີ້ ໃຫ້ເຂົ້າໃຈກັນ ແລະ ກັນສຸດໆຍອມໃຫ້ກັນແນ່ບາງເລື່ອງກໍບໍ່ເສຍຫາຍ. ແຕ່ແນວໃດກໍຕາມຖ້າຜູ້ນັ້ນແມ່ນຄົນທີ່ແມ່ນອີ່ຫຼີແນວໃດມັນກໍແມ່ນກະຖືກກະໂດນໄປໝົດແຫຼະ ໃຈເຮົາຮູ້ດີທີ່ສຸດອັນນີ້.

ໂດຍ: ທີມບັນນາທິການ Muan