ໃນກຸ່ມໝູ່ມັນກໍຈະມີໝູ່ຄົນໜຶ່ງທີ່ພໍເວລານັດລວມຕົວກັນເທື່ອໃດ, ກໍຈະມາຊ້າຕະຫຼອດ ຫຼື ກໍມາຕອນໝູ່ໃກ້ຈະກັບກັນໆໝົດແລ້ວ ແລະ ມັນກໍບໍ່ແມ່ນພຽງແຕ່ຄັ້ງທຳອິດເພາະຫຼິ້ນນຳກັນມາຫຼາຍປີກໍຍັງເປັນຄືເກົ່າຕະຫຼອດບໍ່ມີປ່ຽນແປງ.
ຍິ່ງພໍນັດກັນເປັນກຸ່ມໝູ່ເພື່ອນທີ່ຈະມີການເດີນທາງໄປທ່ຽວນຳກັນເທື່ອໃດ ກໍ່ມາຊ້າ ແລະ ເກືອບຈະບໍ່ທັນການເດີນທາງທຸກຄັ້ງໄປ, ພໍເປັນແບບນີ້ຫຼາຍໆຄັ້ງມັນອາດຈະເປັນການສະສົມຄວາມບໍ່ພໍໃຈ ແລະ ເຮັດໃຫ້ຈິດໃຈເຈົ້າຮູ້ສຶກເກີດຄວາມອຸກອັ່ງໄດ້, ທຸກຄົນຄິດຄືກັນບໍ? ວ່າມັນຄວນພໍໄດ້ແລ້ວກັບການມາຊ້າ ຫຼື ເຮັດໃຫ້ໝູ່ທຸກຄົນຕ້ອງມາລໍຖ້າແບບນີ້.
ແລ້ວພວກເຮົາຈະຈັດການກັບສະຖານະການນີ້ໄດ້ແນວໃດ? ເພື່ອບໍ່ຢາກໃຫ້ໝູ່ຮູ້ສຶກບໍ່ດີ ແລະ ຕ້ອງປັບປຸງເລື່ອງພຶດຕິກຳນີ້, ມື້ນີ້ມ່ວນເລີຍຊອກຫາວິທີຮັບມືດີໆມາແຊຣ໌ໃຫ້ທຸກຄົນລອງນຳໄປປັບໃຊ້ກັນເບິ່ງເດີ.
1. ສື່ສານກັນໂດຍກົງ
ຢ່າປ່ອຍໃຫ້ຄວາມອຸກອັ່ງຄ້າງຢູ່ດົນ. ຄວນລົມກັບໝູ່ຂອງເຈົ້າວ່າເຈົ້າຮູ້ສຶກແນວໃດກັບການມາຊ້າ ແລະ ຜົນເສຍທີ່ເຈົ້າໄດ້ຮັບຈາກການມາຊ້າຂອງລາວເພື່ອສື່ສານໃຫ້ລາວເຂົ້າໃຈຢ່າງສື່ກົງ ແລະ ຊັດເຈນ.
2. ຢ່າໃຈຮ້າຍທັນທີ ແລະ ໃຫ້ຖາມເຫດຜົນຂອງການມາຊ້າ
ພະຍາຍາມບໍ່ໃຫ້ຄວາມບໍ່ພໍໃຈກາຍເປັນອາລົມຂອງການໃຈຮ້າຍ. ບາງຄັ້ງໝູ່ຂອງເຈົ້າມີເຫດຜົນທີ່ບໍ່ສາມາດຄວບຄຸມໄດ້ເຊັ່ນ: ເລື່ອງເລັ່ງດ່ວນ ຫຼື ການສັນຈອນຕິດຂັດ. ການທີ່ເຈົ້າຖາມວ່າເປັນຫຍັງ? ມັນຈະສາມາດຊ່ວຍໃຫ້ເຈົ້າເຂົ້າໃຈສະຖານະການຂອງໄດ້ດີຂຶ້ນ ແລະ ຫຼຸດຜ່ອນຄວາມຮູ້ສຶກທາງລົບໃຫ້ຫຼຸດລົງ.
3. ການຈັດຕາຕະລາງນັດໝາຍໃຫ້ຍືດຫຍຸ່ນ
ຖ້າເຈົ້າຮູ້ວ່າໝູ່ຂອງເຈົ້າມາຊ້າສະເໝີ, ໃຫ້ພະຍາຍາມກໍານົດເວລາທີ່ມີຄວາມຍືດຫຍຸ່ນເຊັ່ນ: ການນັດເວລາທີ່ໄວກວ່າເວລານັດໝາຍທີ່ເຈົ້າຕ້ອງການແທ້ໆເພື່ອໃຫ້ສອງຝ່າຍໄດ້ພົບປະກັນໃນເວລາທີ່ເໝາະສົມ.
4. ກໍານົດເວລາຂອງເຈົ້າ
ຖ້າເຈົ້າມີຂໍ້ຈຳກັດເລື່ອງຂອງເວລາ, ໃຫ້ລອງບອກໝູ່ຂອງເຈົ້າກ່ອນວ່າເຈົ້າຈະສາມາດລໍຖ້າໄດ້ດົນປານໃດເຊັ່ນ: “ຖ້າເຈົ້າບໍ່ມາຮອດໃນເວລາ 15 ນາທີ, ໝູ່ພວກເຮົາຈະອອກໄປກ່ອນໂດຍບໍ່ຖ້າເດີ.” ເພື່ອໃຫ້ໝູ່ເຈົ້າຮູ້ສຶກເຖິງຄວາມສໍາຄັນຂອງການຮັກສາເວລາ.
5. ປະເມີນຄວາມສໍາພັນ
ຖ້າໝູ່ຂອງເຈົ້າມັກຈະມາຊ້າ, ມັນມີຜົນກະທົບຕໍ່ຄວາມຮູ້ສຶກ ແລະ ຄວາມສໍາພັນຂອງເຈົ້າ. ໃຫ້ຖາມຕົວເອງກ່ອນວ່າໝູ່ຄົນນີ້ໃຫ້ຄຸນຄ່າຄວາມສໍາພັນກັບເຈົ້າບໍ່ ແລະ ລອງປະເມີນວ່າຍັງຈະຫຼິ້ນນຳກັນໄດ້ ຫຼື ຄວນຖອຍອອກມາ.
ໂດຍ: ທີມບັນນາທິການ Muan
