ຢອກແຮງ ຊັອດຟິວເກັ່ງ ໝູ່ເຈົ້າກໍເປັນຫວາ? ມັກເຮັດໃຫ້ເສຍຄວາມໝັ້ນໃຈ

176

ແບ່ງປັນ

ໝູ່ທີ່ໃຫ້ກຳລັງໃຈ, ມີເຫດຜົນ ແລະ ແນະນຳກັນໃນທາງທີ່ດີນັ້ນໃຜກໍ່ຢາກມີ, ແຕ່ມັນກໍມັກຈະມີຄົນໜຶ່ງໃນກຸ່ມທີ່ມັກເຮັດໃຫ້ເຈັບຫົວ, ຄຳເວົ້າທີ່ບໍ່ຄິດ ແລະ ພຶດຕິກຳທີ່ບໍ່ໜ້າຮັກ. ມັນໄດ້ສ້າງຄວາມບໍ່ສະບາຍໃຈໃຫ້ໝູ່ເພື່ອນທີ່ຢູ່ຮ່ວມກັນ.

ຈົນເຮັດໃຫ້ຄິດວ່າຈະຢູ່ນຳກັນໄດ້ໄປຮອດມື້ໃດເພາະເຈິໜ້າກັນເທື່ອໃດກໍມັກຖາມວ່າ: “ມື້ນີ້ແຕ່ງໂຕຫຍັງມາ? ແຕ່ງໂຕສະໄຕລ໌ຫຍັງນິ? ແບນ ຫຼື ຕຸ້ຍແຕ່ງຈັງໃດກໍບໍ່ງາມ”. ພໍໄດ້ຍິນເທື່ອໃດມັນກໍຮູ້ສຶກບໍ່ດີ ແລະ ບໍ່ໝັ້ນໃຈຕະຫຼອດ.

ພໍບອກໝູ່ວ່າປະໂຫຍກເຫຼົ່ານີ້ມັນບໍ່ດີ ແລະ ບໍ່ຢາກໃຫ້ເວົ້າອີກ, ກໍ່ບອກວ່າ: “ຮັກໃດນິຈຶ່ງບອກ ຫຼື ຢອກຊື່ໆກະບໍ່ໄດ້ຄິດຫຼາຍ” ຖ້າມີໝູ່ລັກສະນະນີ້ເຈົ້າຕ້ອງພິຈາລະນາແລ້ວເດີວ່າຄວນຄົບຕໍ່ ຫຼື ພໍສ່ຳນີ້. ເພາະມັນຈະເຮັດໃຫ້ເຈົ້າສູນເສຍຕົວຕົນ ຫຼື ກາຍເປັນຄົນບໍ່ໝັ້ນໃຈໃນຕົວເອງໄປເລີຍກໍ່ໄດ້.

ແຕ່ຖ້າເຮົາຍັງຄົງຢູ່ໃນກຸ່ມໝູ່ດຽວກັນ ແລະ ຍັງຫາໂອກາດຫຼີກລ້ຽງບໍ່ໄດ້ເຮົາຈະມີວິທີການຮັບມື້ແບບໃດລະ? ມື້ນີ້ມ່ວນຈະພາທຸກຄົນມາຫາຄຳຕອບກັນ.

1.ປະເມີນສະຖານະການ ແລະ ສື່ສານກົງໄປກົງມາ

ໃຫ້ປະເມີນວ່າໝູ່ຄົນນີ້ມີພຶດຕິກຳການວິຈານໝູ່ໃນທາງບໍ່ດີແບບນີ້ກັບທຸກຄົນບໍ່? ຫຼື ມີທ່າອ່ຽງຮຸນແຮງຂຶ້ນເລື້ອຍໆ. ລາວອາດຈະເຮັດໂດຍບໍ່ຮູ້ຕົວວ່າມັນເປັນສິ່ງທີ່ຜິດບໍ່ດີ ຫຼື ລາວບໍ່ມີໝູ່ທີ່ຈະຄອຍເຕືອນ, ລາວອາດຈະມີບັນຫາພາຍໃນຈິດໃຈທີ່ບໍ່ຮູ້ຈະສະແດງອອກແນວໃດ.

ໃຫ້ປຶກສາກັບໝູ່ສະໜິດທີ່ໄວ້ໃຈໄດ້ແລ້ວລົມກັນເລື່ອງບັນຫານີ້, ເພື່ອຫາໂອກາດລົມລາວຢ່າງເປີດໃຈ ແລະ ມີເຫດຜົນໂດຍບໍ່ໃຫ້ໃຊ້ອາລົມ, ໃຫ້ຍົກປະເດັນຂື້ນມາພ້ອມອະທິບາຍວ່າມັນໄດ້ກະທົບກັບຄວາມຮູ້ສຶກພວກເຈົ້າແນວໃດເພື່ອຫາທາງແກ້ໄຂເພື່ອຮັກສາຄວາມສຳພັນ.

2. ກຳໜົດຂອບເຂດ ແລະ ພະຍາຍາມຫຼີກລ້ຽງໃຫ້ໄດ້ຫຼາຍທີ່ສຸດ

ບາງຄັ້ງຄວາມສະໜິດກັນຫຼາຍ, ອາດເຮັດໃຫ້ລາວເບິ່ງຂ້າມເຮົາໄປ ແລະ ເວົ້າຫຍັງໂດຍບໍ່ຄິດ, ເຈົ້າຄວນຕັ້ງຂອບເຂດໃຫ້ຊັດເຈນ ແລະ ບອກເຂົາວ່າຕ້ອງຮັກສາຄວາມສຳພັນທີ່ດີ. ເພື່ອການຮັກສາຄວາມສຳພັນເຈົ້າຄວນຫຼີກລ້ຽງການປະທະອາລົມ ແລະ ໃນບາງຄັ້ງຖ້າຮູ້ສຶກບໍ່ສະບາຍໃຈຄວນຫຼຸດການພົບເຈິກັນກ່ອນກໍດີ.

3. ປ່ອຍວາງ ແລະ ດູແລຄວາມຮູ້ສຶກຕົນເອງ

ອ່ານຕື່ມ: 5 ສິ່ງທີ່ບໍ່ຄວນເວົ້າກັບຄົນເປັນຊຶມເສົ້າ ຄຳເວົ້າມີທັງຜົນດີ ແລະ ຜົນເສຍຕໍ່ພວກເຂົາ ສຸຂະພາບຈິດເປັນສິ່ງທີ່ຕ້ອງການຄວາມໃສ່ໃຈສູງ

ຫາກພຶດຕິກຳຂອງໝູ່ຍັງບໍ່ປ່ຽນແປງ ແລະ ມັນເຮັດໃຫ້ເຈົ້າຕ້ອງທຸກໃຈ, ການປ່ອຍວາງຄວາມສຳພັນອາດເປັນທາງເລືອກທີ່ດີທີ່ສຸດ. ຫຼັງຈາກຈາກຈັດການກັບໝູ່ທີ່ເປັນຄົນ Toxic ແລ້ວ, ໃຫ້ຫັນກັບມາດູແລຄວາມຮູ້ສຶກຕົວເອງ, ລອງເຮັດກິດຈະກຳທີ່ມັກທີ່ເຮັດໃຫ້ເຈົ້າມີຄວາມສຸກເພື່ອປູກຝັງຄວາມຄິດບວກໃຫ້ກັບຕົວເອງ.

ການຮັບມື້ກັບໝູ່ທີ່ມີພຶດຕິກຳ Toxic ແບບນີ້ແມ່ນຕ້ອງໃຊ້ຄວາມກ້າຫານ, ເຂັ້ມແຂງ ແລະ ຊັດເຈນໃນຕົວເອງ, ການປົກປ້ອງຕົວເອງຈາກພຶດຕິກຳທີ່ເປັນພິດຈະຊ່ວຍໃຫ້ເຈົ້າມີສຸຂະພາບຈິດທີ່ດີ ແລະ ມີຄວາມສຸກ.

ໂດຍ: ທີມບັນນາທິການ Muan

ບົດຄວາມ

ຢອກແຮງ ຊັອດຟິວເກັ່ງ ໝູ່ເຈົ້າກໍເປັນຫວາ? ມັກເຮັດໃຫ້ເສຍຄວາມໝັ້ນໃຈ

ຢອກແຮງ ຊັອດຟິວເກັ່ງ ໝູ່ເຈົ້າກໍເປັນຫວາ? ມັກເຮັດໃຫ້ເສຍຄວາມໝັ້ນໃຈ

ກ່ຽວກັບພວກເຮົາ - About Muan