ທຸກຄົນມີຄວາມເຊື່ອແນວໃດກ່ຽວກັບຄຳວ່າ “ໂຊກດີ”? ສຳລັບຄົນຈີນນັ້ນ ເຂົາເຈົ້າເຊື່ອວ່າ ໂຊກ ເປັນຄືກັບວົງລໍ້ທີ່ກຳລັງໝູນຢູ່ ແລະ ມັນຄືສິ່ງທີ່ເຮົາຕ້ອງໄດ້ອອກໄປຫາ ເພາະຊີວິດທີ່ມີການເຄື່ອນໄຫວປຽບດັ່ງການພາໂຕເອງເຂົ້າໄປຢູ່ໃນຈັງຫວະຂອງວົງລໍ້ນັ້ນ. ແລ້ວຢູ່ດີໆເປັນຫຍັງເຮົາຈຶ່ງຍົກເລື່ອງນີ້ມາເວົ້າ ດຽວເຮົາຈະມາເລົ່າສູ່ຟັງ.
ບັງເອີນໄປອ່ານເຈິບົດຄວາມໜຶ່ງກ່ຽວກັບພາສາຈີນ ແລ້ວໄປສະດຸດຕາກັບຄຳວ່າ “走运” (zǒu yùn) ທີ່ບອກເລີຍວ່າອ່ານແລ້ວມັກແຮງ ເພາະຮາກຄຳ ແລະ ຄວາມໝາຍທີ່ເຊື່ອງຢູ່ນັ້ນມັນໜ້າສົນໃຈ ແລະ ໃຫ້ແງ່ຄິດທີ່ດີຫຼາຍໆ ຈົນຕ້ອງຟ້າວເອົາມາຂຽນແຊຣ໌ໃຫ້ທຸກຄົນໄດ້ອ່ານກັນ.
ຄຳນີ້ບໍ່ໄດ້ແປວ່າໂຊກດີແບບທຳມະດາ, ແຕ່ມັນມີປັດຊະຍາການໃຊ້ຊີວິດທີ່ບອກວ່າ “ຖ້າຢາກໃຫ້ສິ່ງດີໆ ເຂົ້າມາຫາ… ເຮົາຕ້ອງບໍ່ຢຸດຢູ່ກັບທີ່”. ມັນຈະມີຄວາມໝາຍເລິກເຊິ່ງແນວໃດ ແລະ ເອົາໄປປັບໃຊ້ກັບຄວາມສຳພັນ ຫຼື ຊີວິດໄດ້ແນວໃດ? ມາເບິ່ງກັນເລີຍ.
走运 (Zǒu yùn) ໃນພາສາຈີນ ແປວ່າ “ໂຊກດີ” ແຕ່ຄວາມໝາຍແທ້ໆ ຄື “ໂຊກທີ່ກຳລັງຍ່າງ”.
ຖ້າເຮົາແຍກຄຳສັບນີ້ອອກມາເບິ່ງຈະເຫັນຄວາມໝາຍທີ່ໜ້າສົນໃຈຫຼາຍ ເຊັ່ນ:
走 (zǒu): ແປວ່າ ຍ່າງ ຫຼື ເຄື່ອນທີ່
运 (yùn): ແປວ່າ ໂຊກຊະຕາ ຫຼື ດວງ.
ເມື່ອເອົາມາມັດລວມກັນ ມັນບໍ່ໄດ້ແປວ່າໂຊກດີແບບບັງເອີນ ແຕ່ມັນໝາຍເຖິງ “ໂຊກຊະຕາທີ່ກຳລັງເຄື່ອນທີ່ມາຫາ” ຫຼື “ການຍ່າງໄປຫາໂຊກ” ນັ້ນເອງ. ສຳລັບເລື່ອງນີ້ ຄົນຈີນເຊື່ອວ່າ ໂຊກບໍ່ແມ່ນສິ່ງທີ່ຢຸດນິ້ງ ແຕ່ມັນຄືວົງລໍ້ທີ່ໝຸນວຽນຢູ່ຕະຫຼອດເວລາ.
4 ເຫດຜົນທີ່ບອກວ່າ “ຍິ່ງຍ່າງ ຍິ່ງເຄື່ອນໄຫວ ຍິ່ງໂຊກດີ”
ເປັນຫຍັງຄົນທີ່ບໍ່ຢູ່ຊື່ໆ ຈຶ່ງມັກຈະໂຊກດີກວ່າຄົນອື່ນ?
1. ພະລັງງານທີ່ໄຫຼວຽນຄືພະລັງງານທີ່ດີ (Flowing Water)
ໃນທາງຮວງຈຸ້ຍ ແລະ ປັດຊະຍາເຕົາ, ພະລັງງານ (ຊີ່ – 气) ທີ່ຢຸດນິ່ງຄືພະລັງງານທີ່ “ຕາຍແລ້ວ”. ການທີ່ເຮົາ “走” (ຍ່າງ/ເຄື່ອນທີ່) ອອກໄປຂ້າງນອກ, ໄປພົບປະຜູ້ຄົນ ຫຼື ປ່ຽນສະຖານທີ່ໃໝ່ໆ ຄືການເຮັດໃຫ້ພະລັງງານໃນຕົວເຮົາໄຫຼວຽນ. ເມື່ອພະລັງງານໄຫຼວຽນ, ໂອກາດດີໆ ກໍຈະໄຫຼເຂົ້າມາຫາເຮົາເອງ.
2. “人遇走 运会开” – ເມື່ອຄົນຍ່າງ ດວງຈະເປີດ
ຄົນຈີນມີຄວາມເຊື່ອທີ່ວ່າ ຖ້າເຮົາເອົາແຕ່ໝົກໂຕຢູ່ແຕ່ໃນຫ້ອງ, ໂອກາດທີ່ດວງດີໆຈະແລ່ນມາຕຳເຮົາ ມັນຈະມີໜ້ອຍຫຼາຍ. ແຕ່ຖ້າເຮົາກ້າວຂາອອກຈາກບ້ານ, ໄປຮຽນຮູ້ສິ່ງໃໝ່, ໄປ Event, ຫຼື ໄປທ່ອງທ່ຽວ, ມັນຄືການເພີ່ມພື້ນທີ່ໃຫ້ໂຊກຊະຕາໄດ້ເຂົ້າມາສຳຜັດກັບເຮົາໄດ້ງ່າຍຂຶ້ນ.
3. ປ່ຽນດວງຮ້າຍໃຫ້ກາຍເປັນດີດ້ວຍການ “转运” (Zhuǎn yùn)
ຄຳວ່າ 转 (Zhuǎn) ແປວ່າ ໝຸນ ຫຼື ປ່ຽນທິດທາງ. ເມື່ອໃດທີ່ຮູ້ສຶກວ່າດວງຕົກ, ຄົນຈີນມັກຈະແນະນຳໃຫ້ “ເຄື່ອນເໜັງ” ຫຼື “ເຮັດຫຍັງບາງຢ່າງ” ເພື່ອປ່ຽນທິດທາງຂອງວົງລໍ້ຊີວິດ. ຖ້ານັ່ງເສົ້າຢູ່ບ່ອນເກົ່າ, ດວງກໍຈະຕິດຢູ່ບ່ອນເກົ່າ. ຢາກປ່ຽນດວງ (转运) ຕ້ອງເລີ່ມທີ່ການປ່ຽນແປງພຶດຕິກຳກ່ອນ.
4. ຄວາມໂຊກດີມັກມາຫາຄົນທີ່ “ກະຕືລືລົ້ນ”
ໃນທາງຈິດຕະວິທະຍາ, ຄົນທີ່ເຄື່ອນໄຫວ (Active) ມັກຈະມີສາຍຕາທີ່ເຫັນໂອກາດໄດ້ດີກວ່າຄົນທີ່ຢູ່ຊື່ໆ (Passive). ການຍ່າງ (走) ຈຶ່ງສື່ເຖິງຄວາມພະຍາຍາມ ແລະ ການສະແຫວງຫາ. ໂຊກດີບໍ່ໄດ້ເລືອກຄົນເກັ່ງສະເໝີໄປ ແຕ່ເລືອກຄົນທີ່ພ້ອມຈະອອກໄປເຈິມັນຕ່າງຫາກ.
ແລ້ວຈະເຮັດແນວໃດໃຫ້ “走运” (ໂຊກດີ) ແບບຊໍ້າໆ?
ຖ້າເຈົ້າຢາກໃຫ້ຄົນທັກວ່າ “走运走运!” (ເຮັງແທ້ໆ! ໂຊກດີສຸດໆ) ລອງເອົາ Tips ເຫຼົ່ານີ້ໄປໃຊ້:
1. ຢ່າປະຕິເສດຄຳຊວນ: ບາງຄັ້ງ “ໂຊກ” ອາດຈະມາໃນຮູບແບບຂອງການຊວນໄປກິນເຂົ້າ ຫຼື ໄປງານສັງສັນທີ່ເຮົາບໍ່ຢາກໄປ. ລອງໄປເບິ່ງ ແລ້ວເຮົາອາດຈະເຈິ Connection ໃໝ່ ຫຼື ເຈິຄົນທີ່ຖືກໃຈຢູ່ຫັ້ນກໍໄດ້.
2. ປ່ຽນເສັ້ນທາງໄປເຮັດວຽກ: ລອງຍ່າງ ຫຼື ຂັບລົດໄປທາງໃໝ່ໆ ເພື່ອປ່ຽນພະລັງງານ ແລະ ເປີດມຸມມອງໃໝ່ໃຫ້ສະໝອງ.
3. ຖ້າໂຊກດີແລ້ວ ໃຫ້ “ຖ່ອມຕົວ”: ເມື່ອມີຄົນຍ້ອງວ່າເກັ່ງ, ໃຫ້ຕອບວ່າ “走运走运” (Zǒu yùn zǒu yùn) ເພື່ອສື່ວ່າ “ໂຊກຊ່ວຍນຳແດ່”. ນີ້ບໍ່ແມ່ນພຽງແຕ່ການຖ່ອມຕົວ, ແຕ່ຄືການໃຫ້ກຽດຈັງຫວະຊີວິດ ແລະ ເຮັດໃຫ້ເຮົາເປັນຄົນທີ່ໜ້າຮັກໃນສາຍຕາຄົນອ້ອມຂ້າງ.
ຄວາມໂຊກດີ ບໍ່ແມ່ນເລື່ອງຂອງພົມລິຂິດ 100% ແຕ່ມັນຄື ການພາຕົວເອງໄປຢູ່ໃນຈັງຫວະທີ່ຖືກຕ້ອງ. ສະນັ້ນ, ຖ້າມື້ນີ້ຮູ້ສຶກວ່າຊີວິດມັນນິ້ງເກີນໄປ, ລອງລຸກຂຶ້ນແລ້ວ “走” (ຍ່າງ) ອອກໄປເຮັດອີ່ຫຍັງໃໝ່ໆເບິ່ງ. ເພາະບາງເທື່ອ… ໂຊກດີຂອງເຮົາອາດຈະກຳລັງຍ່າງສວນທາງມາກໍໄດ້.
ມື້ນີ້ໝູ່ເພື່ອນໄດ້ “ຍ່າງ” ອອກໄປຫາສິ່ງໃໝ່ໆ ແລ້ວຫຼືຍັງ? ລອງມາແບ່ງປັນເລື່ອງດີໆ ທີ່ເກີດຂຶ້ນຍ້ອນການ “ເຄື່ອນເໜັງ” ໃຫ້ Muan ຟັງແດ່.
