ມັກຈົ່ມຈຸກຈິກມັນບໍ່ດີໃດ ວິທີຄວບຄຸມອາລົມບໍ່ໃຫ້ເປັນຄົນຈູຈີ້ຈຸກຈິກ

ຫຼາຍຄົນກໍຄືຊິເຄີຍໄດ້ຍິນປະໂຫຍກທີ່ວ່າ ‘ເຂົາຮ້າຍເຂົາຈົ່ມ ເພາະເຂົາຮັກ’ ເຊິ່ງເປັນຄໍາເວົ້າທີ່ບໍ່ໄດ້ຜິດ ແຕ່ກໍບໍ່ໄດ້ຖືກສະເໝີໄປ, ການທີ່ເຮົາມັກຈົ່ມ ອາດເປັນເພາະເຮົານັ້ນໃສ່ໃຈ ແລະ ເປັນຫ່ວງເຂົາເຈົ້າໃນເລື່ອງຕ່າງໆ ບໍ່ວ່າຈະເລື່ອງເລັກນ້ອຍ ຫຼື ເລື່ອງໃຫຍ່, ແຕ່ອີ່ຫຍັງທີ່ມັນຫຼາຍເກີນໄປກໍບໍ່ດີຕໍ່ສຸຂະພາບຈິດເຂົາກັບເຮົາເອງໃດ.

ແລ້ວເຮົາຈະເຮັດແນວໃດເພື່ອທີ່ຈະບໍ່ເປັນນົກເປັນໄກ່ຕອດເຂົາທຸກມື້? ກ່ອນອື່ນເຈົ້າກໍຕ້ອງຮູ້ກ່ອນວ່າເຮົາເປັນແບບນີ້ຍ້ອນສາເຫດອັນໃດ ແລະ ສາເຫດຕ່າງໆທີ່ພົບເຫັນຫຼາຍສຸດກໍຈະເປັນຍ້ອນ ເຮົາຄິດວ່າເຂົາຕ້ອງການຄໍາສອນຈາກເຮົາຈຶ່ງຈະດີຂຶ້ນ, ເຮົາຄວບຄຸມໃຫ້ທຸກຢ່າງເປັນໄປດັ່ງໃຈຕ້ອງການບໍ່ໄດ້, ຄວາມສໍາພັນມີບັນຫາທີ່ໃຫຍ່ ແຕ່ເຮົາເລືອກທີ່ຈະຍົກເອົາບັນຫານ້ອຍໆມາເວົ້າແທນເພື່ອເປັນການຫຼີກລ່ຽງ.

ເພື່ອກໍາຈັດອາການຈຸກຈິກເກີນຄວາມຈໍາເປັນນີ້ ເຮົາມີວິທີປັບການປະພຶດບໍ່ໃຫ້ເປັນຄົນມັກຈົ່ມມາໃຫ້ທຸກຄົນ.

1. ຈັດການອາລົມຂອງຕົນເອງ

ຮູ້ບໍ່ວ່າ ການສະແດງອອກທາງຄໍາເວົ້າກັບການກະທໍາຂອງເຮົານັ້ນມັນເປັນໄປຕາມອາລົມຂອງເຮົາເອງ, ຫາກເຮົາປ່ອຍໃຫ້ອາລົມຢູ່ເໜືອການຄວບຄຸມຂອງສະໝອງ, ຮ່າງກາຍ ແລະ ຈິດໃຈຈະສະແດງການປະພຶດຕາມອາລົມໃນຕອນນັ້ນອອກມາ, ບໍ່ວ່າຈະເປັນຕອນທີ່ອາລົມດີ ຫຼື ອາລົມບໍ່ດີ.

2. ສື່ສານກັບຄົນຮັກດ້ວຍໃຈທີ່ເປີດກວ້າງ

ເປີດໃຈເວົ້າເຖິງການກະທໍາຕ່າງໆທີ່ຜ່ານມາຂອງເຮົາ ທີ່ເຄີຍຈົ່ມເລັກຈົ່ມນ້ອຍ ຫຼື ເຄີຍເວົ້າບໍ່ດີໃສ່ໂດຍບໍ່ຮູ້ໂຕ ສາມາດເຮັດໃຫ້ຄວາມສໍາພັນຂອງທັງສອງແຂງແຮງຂຶ້ນ, ສິ່ງທີ່ຄວນເຮັດກ່ອນເລີຍແມ່ນຕ້ອງຄິດຍ້ອນກັບໄປວ່າເຮົາເວົ້າຫຍັງໄປແດ່ ແລ້ວເລີ່ມຈາກການຂໍໂທດ ແລະ ສໍານຶກຜິດໃນສິ່ງທີ່ເຮັດໄປ.

3. ຮູ້ວ່າສິ່ງໃດແດ່ທີ່ເຮົາຄວບຄຸມໄດ້ ແລະ ບໍ່ໄດ້

ຈາກທີ່ເວົ້າວ່າການຈຸກຈິກເກີດຈາກວ່າເຮົາຢາກຄວບຄຸມສິ່ງຕ່າງໆໃຫ້ເປັນໄປຕາມໃຈຕ້ອງການ, ແຕ່ໃນຄວາມເປັນຈິງແມ່ນເຮົາບໍ່ສາມາດຄວບຄຸມທຸກຢ່າງທີ່ເກີດຂຶ້ນໄດ້, ສະນັ້ນ, ການເຮັດຄວາມເຂົ້າໃຈຕໍ່ສິ່ງອ້ອມໂຕແລ້ວປ່ອຍວາງປ່ອຍໃຈໄປ ຈະເຮັດໃຫ້ເຮົາຫຼຸດພົ້ນໄດ້.

4. ຄິດກ່ອນເວົ້າ

ຂໍ້ນີ້ສໍາຄັນຫຼາຍ, ເພາະການເວົ້າອອກໄປໂດຍທີ່ບໍ່ຄິດໃຫ້ຖີຖ້ວນນັ້ນມັນຈະເປັນການທໍາຮ້າຍຈິດໃຈອີກຝ່າຍແບບບໍ່ໄດ້ຕັ້ງໃຈ, ເຮົາອາດຈະຫວັງດີກໍແທ້ ແຕ່ສະພາບຈິດໃຈ ແລະ ການຕອບສະໜອງຕໍ່ຄໍາເວົ້າແຮງໆຂອງແຕ່ລະບຸກຄົນນັ້ນບໍ່ເທົ່າກັນ, ການເວົ້າທໍາຮ້າຍຈິດໃຈອາດເຮັດໃຫ້ເຈົ້າເສຍອີກຝ່າຍໄປກໍໄດ້.

ການຈູ້ຈີ້ຈຸກຈິກ ເກີດຂຶ້ນກັບທຸກໆຄວາມສໍາພັນ ບໍ່ວ່າຈະເປັນຄອບຄົວ, ໝູ່ເພື່ອນ ແລະ ຄົນຮັກ. ເພາະຄວາມໃສ່ໃຈຕໍ່ອີກຝ່າຍນັ້ນເຮັດໃຫ້ເຮົາເປັນຫ່ວງເຂົາຈົນເກີນໄປ, ຄິດເລື່ອງເຂົາຫຼາຍຈົນເກີດໄປ ສິ່ງທີ່ດີທີ່ສຸດຄືການສື່ສານກັນ ແລະ ຫາທາງອອກນໍາກັນໃນທຸກເລື່ອງ ຈະເຮັດໃຫ້ຄວາມສໍາພັນເປັນໄປໄດ້ດ້ວຍດີ.