ຢາກນັ່ງສະມາທິແຕ່ເປັນຄົນຄິດຫຼາຍ ນັ່ງໆຢູ່ມີເລື່ອງໄຫຼເຂົ້າມາໃນຫົວບໍ່ຢຸດ, ຖ້າເຈົ້າມີພຶດຕິກຳແບບນີ້ ບົດຄວາມນີ້ໜ້າຈະເໝາະກັບສະຖານະການຂອງເຈົ້າແລ້ວຕອນນີ້ ມື້ນີ້ເຮົາມີເຕັກນິກ 5 ຂໍ້ມາຝາກທຸກຄົນກັນ.
1. ນັ່ງສະມາທິກັບຄົນອື່ນ
ຫຼາຍຄົນອາດຈະມີພາບວ່າການນັ່ງສະມາທິຕ້ອງເຮັດຄົນດຽວ ໜີຈາກຜູ້ຄົນ ແນ່ນອນວ່າບໍ່ຜິດ ແຕ່ຜູ້ຊ່ຽວຊານດ້ານການເຮັດສະມາທິ Candice Fairoth ບອກວ່າການເຮັດສະມາທິກັບຄົນອື່ນນັ້ນມີຜົນທີ່ໜ້າສົນໃຈ ມັນອາດຈະເຮັດໃຫ້ເຮົາມີສະມາທິຫຼາຍຂຶ້ນ. ສ່ວນຫນຶ່ງອາດຈະມາຈາກການທີ່ເຮົາບໍ່ກ້າທີ່ຈະລົບກວນຄົນອື່ນທີ່ເຮັດສະມາທິຢູ່ແລະເປັນທຳມະດາຂອງມະນຸດທີ່ຈະສະແດງອອກມາຢ່າງເຕັມທີ່ຫຼາຍຂຶ້ນເມື່ອເຮັດຫຍັງຄ້າຍໆ ກັນ.
2. ລອງສະມາທິໂດຍໃຊ້ເຕັກໂນໂລຊີ
ຫູຟັງ ແວ່ນ VR ເຕັກໂນໂລຊີອາດຈະເປັນອີກໜຶ່ງທາງເລືອກສຳລັບຄົົນທີ່ຄິດຫຼາຍແຕ່ຢາກເຮັດສະມາທິ ການໃຊ້ພາບ ສຽງເຫມືອນຈິງນັ້ນຊ່ວຍໃຫ້ຫຼາຍຄົນຮູ້ສຶກສະຫງົບຂຶ້ນໄດ້ ບາງຄົນອາດຈະເລືອກສາກ ປ່າ ຊາຍຫາດ ພູເຂົາ ນ້ຳຕົກ ຜ່ານ VR ເຮັດໃຫ້ພວກເຂົາຖືກຕັດຂາດຈາກໂລກພາຍນອກ ແລະ ເຮັດໃຫ້ຈິດໃຈສະຫງົບ ມີສະມາທິແທ້ໆ.
ຫາກໃຜງົບບໍ່ຫຼາຍອາດຈະລອງເລີ່ມຈາກເປີດ YouTube ເປີດວິວທີ່ມັກກໍໄດ້ໃດ.
3. ໂຢຄະ
ບາງຄົນອາດຈະບໍ່ຄ່ອຍມີສະມາທິໄດ້ເມື່ອຮ່າງກາຍຢຸດນິ້ງ ຫຼື ເວົ້າງ່າຍໆ ພໍນິ້ງແລ້ວກໍຄິດຫຼາຍກວ່າເກົ່າ, ໂຢຄະ ເປັນອີກຄຳຕອບທີ່ຈະຊ່ວຍເຈົ້າໄດ້. ໂຢຄະນັ້ນເປັນການປະສານຂອງການເຮັດສະມາທິ, ການຫາຍໃຈ ແລະການເຄື່ອນໄຫວ ແນ່ນອນວ່າປາຍທາງມັນເຮັດໃຫ້ເຈົ້າມີສະມາທິຫຼາຍຂຶ້ນ.
4. ເພງ ດົນຕີຊ່ວຍໄດ້
ດົນຕີເຮັດໃຫ້ທຸກຢ່າງດີຂຶ້ນ ສະມາທິກໍເຊັ່ນກັນ ມີການສຶກສາບາງສະບັບລາຍງານວ່າ, ດົນຕີສາມາດຝຶກສະໝອງໃຫ້ມີສະມາທິຫຼາຍຂຶ້ນໄດ້. ບາງລາຍງານຍັງກ່າວເຖິງວ່າດົນຕີມີຜົນຕໍ່ການເຕັ້ນຂອງຫົວໃຈເລີຍ. ລອງຫາເພງທີ່ເໝາະກັບຕົວເຈົ້າ ບໍ່ແນ່ວ່າອາດຈະຊ່ວຍເພີ່ມສະມາທິໃຫ້ເປັນຢ່າງດີເລີຍ.
5. ຄິດຫຼາຍເປັນເລື່ອງປົກກະຕິ
ສຸດທ້າຍຂໍໃຫ້ຍອມຮັບວ່າ ການຄິດຫຼາຍ ການຢູ່ບໍ່ນິ້ງທາງຄວາມຄິດເປັນເລື່ອງປົກກະຕິ. ເຮົາຢູ່ໃນສັງຄົມທີ່ກະຕຸ້ນໃຫ້ມີການຄິດຕະຫຼອດເວລາ ຈຶ່ງບໍ່ໜ້າແປກທີ່ຫຼາຍຄົນຈະມີບັນຫານີ້ ເມື່ອຮູ້ຕົວວ່າຄິດຫຼາຍກໍພຽງແຕ່ດຶງກັບມາ.
ໂດຍ: ທີມບັນນາທິການ Muan
