ເປັນຫຍັງບາງຄົນຈຶ່ງມັກນອກໃຈ? ຮູ້ຈັກທິດສະດີ 90/10 ທີ່ອະທິບາຍເລື່ອງນີ້ໄວ້
ທຸກຄົນເຄີຍໄດ້ຍິນເລື່ອງຫຼັກການ 90/10 ກັນບໍ່? ຫຼັກການນີ້ຖືກຂຽນຂຶ້ນໂດຍ Dr. Stephen Covey ໂດຍ ຕົວເລກ 90/10 ນີ້ ຖືກຍົກຂຶ້ນມາໃຊ້ກັບທິດສະດີທາງຈິດຕະວິທະຍາຫຼາຍຢ່າງບໍ່ວ່າຈະເປັນການເລືອກເສັ້ນທາງຕອບສະໜອງຕໍ່ເຫດການຕ່າງໆໃນຊີວິດປະຈຳວັນ ຫຼື ການຕັ້ງເປົ້າໝາຍເພື່ອປະສົບຜົນສຳເລັດ. ແຕ່ມື້ນີ້ເຮົາຈະມາເວົ້າເຖິງຫຼັກການ 90/10 ໃນມຸມມອງຂອງຄວາມຮັກ.
ເວລາທີ່ເຮົາຫຼົງຮັກໃຜຄົນໜຶ່ງລາວຄົນນັ້ນມັກຈະດູດີ ແລະ ສຸດຍອດທຸກຢ່າງ, ນັ້ນແມ່ນຂໍ້ດີໃນໂຕຄົນນັ້ນເຊິ່ງນັບເປັນ 90% ເປັນຂໍ້ດີທີ່ຄົນຜູ້ນັ້ນມີ. ແນ່ນອນວ່າ ເມື່ອເວລາຜ່ານໄປຄົນດີຂອງເຮົາກໍເລີ່ມຈະເຜີຍຂໍ້ເສຍບາງຢ່າງອອກມາໃຫ້ເຫັນ, ເຮັດໃຫ້ເລີ່ມມີການຜິດຖຽງກັນ ແລະ ຄວາມບໍ່ເຂົ້າໃຈກັນເກີດຂຶ້ນສິ່ງທີ່ກ່າວມານີ້ແມ່ນເປັນ 10% ທີ່ເປັນຂໍ້ເສຍ ເຊິ່ງຖືວ່າມັນເປັນສິ່ງທີ່ເລັກນ້ອຍຫຼາຍ.
ເມື່ອຄວາມຮັກເລີ່ມເປັນຄວາມລຶ້ງເຄີຍ, ສະໝອງຂອງເຮົາກໍຈະເລີ່ມໃຫ້ຄ່າຄວາມສຳຄັນຂອງຂໍ້ເສຍຫຼາຍກວ່າຂໍ້ດີ ເຮັດໃຫ້ເຮົາເຫັນຂໍ້ເສຍຫຼາຍ ແລະ ຊັດເຈນຂຶ້ນ. ທັງທີ່ຄວາມຈິງແລ້ວຂໍ້ດີຂອງລາວກໍບໍ່ໄດ້ລົດລົງເລີຍ, ມັນໝາຍຄວາມວ່າໃນໃຈເລິກໆເຮົາແລ້ວກຳລັງຕາມຫາ 10% ທີ່ຄົນຮັກເຮົາບໍ່ມີ.
ຖ້າເຮົາໄດ້ບັງເອີນໄປພົບກັບໃຜຄົນໜຶ່ງທີ່ຄອບຄອງສິ່ງນັ້ນໄວ້ເປັນຂໍ້ດີ, ທີ່ຄົນຮັກຂອງເຮົາບໍ່ມີເຮົາກໍຈະອົດໃຈບໍ່ໄດ້ທີ່ຈະເຂົ້າຫາຜູ້ນັ້ນ ແລະ ຄິດວ່າຜູ້ນັ້ນເປັນຄົນທີ່ຕາມຫາມາຕະຫຼອດ ພຽງເພາະລາວມີພຽງແຕ່ 10% ທີ່ເຮົາຕ້ອງການ ແລະ ໃນຂະນະດຽວກັນເຮົາກຳລັງຈະເສຍ 90% ທີ່ມີຢູ່ໄປ.
ຖ້າເຮົາບໍ່ຢາກໃຫ້ມັນເກີດແບບນັ້ນເຮົາຕ້ອງໄດ້ມາທຳຄວາມເຂົ້າໃຈວ່າຄວາມຮັກມັນບໍ່ມີຄວາມສົມບູນແບບດອກ, ບໍ່ມີໃຜໃຫ້ທຸກຢ່າງທີ່ເຮົາຕ້ອງການໄດ້ ເພາະວ່າເຮົາເອງກໍບໍ່ສາມາດໃຫ້ທຸກຢ່າງທີ່ຄົນຮັກຂອງເຮົາຕ້ອງການໄດ້ເຊັ່ນກັນ.
ຄ່ອຍໆຮຽນຮູ້ກັບຄວາມບໍ່ສົມບູນແບບເລັກນ້ອຍຂອງກັນ ແລະ ກັນ ຄ່ອຍໆເຕີບໂຕຂຶ້ນ, ຈົນເຮັດໃຫ້ຫຼັກການ 90/10 ເຮັດຫຍັງກັບຄວາມສຳພັນຂອງເຮົາບໍ່ໄດ້ ເມື່ອຄວາມຮັກບໍ່ມີ 100% ກໍຈົ່ງພູມໃຈກັບ 90% ທີ່ມີ.
ໂດຍ: ທີມບັນນາທິການ Muan