ໝາເດັກທີ່ຈິງໃຈຄົນນີ້ເປັນຂອງເຈົ້າເດີ ວິທີດູແລຄົນຮັກເປັນພື້ນທີ່ສະບາຍໃຈໃຫ້ກັນ

ໃຜທີ່ມີສະເປັກເປັນຄົນທີ່ມີບຸກຄະລິກທີ່ມີຄວາມໜ້າຮັກສົດໃສ, ດື້ໆ ແລະ ມັກອ້ອນ ຫຼື ເອີ້ນງ່າຍໆວ່າ “ໄທປ໌ໝາເດັກ”. ເພາະຄົນທີ່ບຸກຄະລິກແບບນີ້ເວລາທີ່ໄດ້ຢູ່ນຳກັນຈະເຮັດໃຫ້ຮູ້ສຶກສະບາຍໃຈ, ຜ່ອນຄາຍ, ມ່ວນຊື່ນ ແລະ ອົບອຸ່ນໃນເວລາດຽວກັນ. ບໍ່ຕ້ອງແປກໃຈເລີຍວ່າເປັນຫຍັງຫຼາຍຄົນເຖິງມັກຄົນບຸກຄະລິກ ຫຼື ສະໄຕລ໌ນີ້.

ໝາເດັກຂອງເຈົ້າເຖິງຈະເປັນປະເພດຄົນງ່າຍໆສະບາຍໆ, ແຕ່ທຸກຄວາມສຳພັນກໍຕ້ອງມີການຜິດຖຽງ ແລະ ບໍ່ເຂົ້າໃຈກັນເປັນທຳມະດາ ແລະ ເຈົ້າຈະຈັດການບັນຫາຄວາມຂັດແຍ້ງນີ້ໄດ້ແນວໃດ? ມື້ນີ້ມ່ວນມີວິທີດູແລໝາເດັກ ແລະ ການຟື້ນຟູຄວາມສຳພັນໃຫ້ກັບມາເປັນພື້ນທີ່ຄວາມສະບາຍໃຈໃຫ້ກັນ ແລະ ກັນດ້ວຍ 5 ວິທີນີ້.

1. ສະຫງົບສະຕິອາລົມກ່ອນລົມກັນ.

ໃຫ້ອາລົມເຢັນກ່ອນຈຶ່ງລົມກັນ, ເພື່ອຫຼີກເວັ້ນການປະທະອາລົມຮ້ອນຂອງທັງສອງຄົນ ແລະ ເລືອກເວລາທີ່ຈະປັບຄວາມເຂົ້າໃຈກັນ, ເພາະຈະເຮັດໃຫ້ລາວສະບາຍໃຈທີ່ຈະເວົ້າລົມເລື່ອງທີ່ຜິດຖຽງກັນ ແລະ ປັບຄວາມເຂົ້າໃຈກັນໃນທີ່ສຸດ.

2. ໃຫ້ເວລາລາວໄດ້ລະບາຍ.

ເປີດໂອກາດ ແລະ ພື້ນທີ່ໃຫ້ລາວໄດ້ລະບາຍຄວາມຮູ້ສຶກຂອງລາວອອກມາ, ເຖິງລາວອາດຈະສະແດງຄວາມນ້ອຍໃຈ ຫຼື ບໍ່ຖືກຕ້ອງທັງໝົດ, ການຮັບຟັງໂດຍບໍ່ຂັດຕອນລາວເວົ້າຈະເຮັດໃຫ້ລາວຮູ້ສຶກວ່າໄດ້ຮັບການເຂົ້າໃຈ.

3. ໃຫ້ຄວາມຮັກ ແລະ ຄວາມເອົາໃຈໃສ່.

ຄົນໄທປ໌ນີ້ຈະມັກການເອົາໃຈໃສ່ ແລະ ການສະແດງຄວາມຮັກ. ເພາະວ່າລາວມັກຄວາມອົບອຸ່ນ ແລະ ກນໄດ້ຮັບຄວາມສົນໃຈຈາກຄົນຮັກ. ໃສ່ໃຈໃນສິ່ງນ້ອຍໆຖາມວ່າເຂົາເປັນແນວໃດ ຫຼື ການກອດໃຫ້ກຳລັງໃຈ.

4. ສະແດງຄວາມຮັກຜ່ານການກະທໍາ.

ຫຼັງຈາກການປັບຄວາມເຂົ້າໃຈກັນຮຽບຮ້ອຍແລ້ວ, ການກອດກັນ ຫຼື ການສະແດງຄວາມຮັກເລັກໆນ້ອຍໆຈະຊ່ວຍເຮັດໃຫ້ຄວາມຮູ້ສຶກໄດ້ຮັບການຮັກສາ, ຢ່າລືມຢອດຄໍາຫວານພ້ອມດ້ວຍການສະແດງອອກຜ່ານການກະທຳນຳເດີ.

5. ສ້າງບັນຍາກາດມ່ວນຊື່ນ ແລະ ຜ່ອນຄາຍ.

ແຟນໝາເດັກແມ່ນມັກຄວາມມ່ວນຊື່ນສະໜຸກສະໜານ, ລອງຫາເຮັດກິດຈະກຳງ່າຍໆແຕ່ມີຄວາມສຸກນຳກັນເຊັ່ນ: ຫຼິ້ນເກມ, ໄປຄາເຟ່, ຖ່າຍຮູບ ຫຼື ໄປທ່ຽວບ່ອນໃໝ່ໆນຳກັນ, ຈະເຮັດໃຫ້ເຈົ້າທັງສອງຮູ້ສຶກມີຄວາມສຸກ ແລະ ສົດຊື່ນຂຶ້ນ.

ການໃຊ້ຊີວິດກັບຄົນໄທປ໌ໝາເດັກແມ່ນມັນສຸດແສນຈະມີສີສັນ, ຄວາມອົບອຸ່ນ ແລະ ຄວາມສຸກ. ການທີ່ໄດ້ສະແດງຄວາມຮັກ ແລະ ຄວາມເຂົ້າໃຈໃນທຸກໆວັນຍິ່ງເພີ່ມຄວາມສໍາພັນໃຫ້ເຂັ້ມແຂງ ແລະ ມີຄວາມໝາຍຫຼາຍຂຶ້ນ.

ໂດຍ: ທີມບັນນາທິການ Muan