ເປັນຄົນໃຈດີ ຂີ້ເກງໃຈ ຈົນມັກຖືກເອົາປຽບ ຊວນຮີບດຶງໂຕເອງກັບມາດ້ວຍ 3 ວິທີງ່າຍໆ
Key Takeaways:
- ການເປັນຄົນເກງໃຈ ແລະ ໃຈດີເກີນໄປ ສາມາດກາຍເປັນການເອົາປຽບໂຕເອງໄດ້ ໂດຍບໍ່ຮູ້ໂຕ.
- ການຍອມແບກຮັບທຸກຢ່າງຄົນດຽວ ຫຼື ການຄິດເຖິງຄົນອື່ນຈົນລືມສົນໃຈໂຕເອງ ເປັນສັນຍານເຕືອນຂອງການເສຍສົມດຸນໃນຊີວິດ.
- ເຫດຜົນທີ່ຍອມເສຍປຽບຍ້ອນຄວາມເກງໃຈ ສ່ວນໜຶ່ງມາຈາກຄວາມຢ້ານບໍ່ເປັນທີ່ຮັກ, ຢ້ານການຜິດຖຽງ, ແລະ ແຍກຄວາມໃຈດີອອກຈາກຂອບເຂດຂອງໂຕເອງບໍ່ອອກ.
- ວິທີການດຶງໂຕເອງກັບມາໂດຍບໍ່ຮູ້ສຶກຜິດຄື: ຝຶກເວົ້າ 'ບໍ່' ຢ່າງມີສິລະປະ, ຂີດເສັ້ນ 'ກົດເຫຼັກ' ໃຫ້ໂຕເອງ, ແລະ ປ່ຽນຄວາມຄິດວ່າ 'ການຮັກສາສິດບໍ່ແມ່ນຄວາມເຫັນແກ່ຕົວ'.
- ການຮັກສາພະລັງງານແລະສຸຂະພາບຈິດຂອງໂຕເອງເປັນສິ່ງສຳຄັນ ເພື່ອໃຫ້ມີແຮງໄປຊ່ວຍເຫຼືອຄົນອື່ນໄດ້ຢ່າງເຕັມທີ່, ຄວາມສຸກຂອງຕົນເອງກໍສຳຄັນເຊັ່ນກັນ.
ເຊົາເປັນເດັກດີທີ່ຍອມໃຫ້ຄົນອື່ນເອົາປຽບໄດ້ແລ້ວ… ເພາະຕັ້ງແຕ່ນ້ອຍຮອດໃຫຍ່ ເຮົາມັກຈະຖືກສອນໃຫ້ເປັນຄົນ ຂີ້ເກງໃຈ ແລະ ໃຈດີ ຢູ່ຕະຫຼອດ. ອັນໃດຍອມໄດ້ກໍຍອມ ໃຜຂໍໃຫ້ຊ່ວຍຫຍັງກໍເອີອໍໄປນຳ ເພາະບໍ່ຢາກມີບັນຫາ. ແຕ່ດົນໆໄປ ຄວາມເກງໃຈນີ້ພັດກາຍເປັນອາວຸດມາທຳຮ້າຍໂຕເຮົາເອງແບບບໍ່ຮູ້ໂຕ.
Muan RelationTips ກໍຂໍຍອມຮັບວ່າ ຄວາມເກງໃຈ ແລະ ການມີນ້ຳໃຈມັນຄືສະເໜ່ຢ່າງໜຶ່ງທີ່ດີຫຼາຍ. ແຕ່ຖ້າມັນມີຫຼາຍເກີນໄປ ມັນຈະກາຍເປັນການ ເອົາປຽບໂຕເອງ ໂດຍທີ່ເຮົາບໍ່ທັນໄດ້ຕັ້ງໂຕ.
ການຍອມແບກຮັບທຸກຢ່າງໄວ້ຄົນດຽວ ຫຼື ການແຄຣ໌ຄວາມຮູ້ສຶກຄົນອື່ນ ຈົນລືມສົນໃຈຄວາມຮູ້ສຶກຂອງໂຕເອງ ມັນຄືສັນຍານເຕືອນແລ້ວວ່າ ຊີວິດເຮົາກຳລັງເສຍສົມດຸນ.
ສຸດທ້າຍ, ເຮົາເອງນີ້ລະທີ່ຕ້ອງມາຕົກຢູ່ໃນສະຖານະການອຶດອັດໃຈແທນ ອາລົມກໍຈະປະມານວ່າກືນບໍ່ເຂົ້າຄາຍບໍ່ອອກຢູ່ເລື້ອຍໆ ເຊິ່ງ Muan RelationTips ຢາກບອກວ່າ ທຸກຄົນຢ່າປ່ອຍໃຫ້ຄວາມໃຈດີ ມາເຮັດໃຫ້ເຮົາກາຍເປັນຄົນທີ່ຖືກເອົາປຽບທີ່ສຸດໃນທຸກຄວາມສຳພັນເລີຍເດີ.
ເປັນຫຍັງເຮົາເຖິງຍອມເສຍປຽບ ເພາະຄວາມເກງໃຈ
ທຸກຄົນເຄີຍສົງໄສບໍ່ວ່າເປັນຫຍັງ? ເຮົາຄືຕ້ອງຍອມເສຍປຽບ ແລະ ຍອມເຮັດຕາມໃຈຄົນອື່ນຢູ່ເລື້ອຍໆ ທັງທີ່ໃນໃຈຄືຢາກປະຕິເສດຈະຕາຍ ແຕ່ສຸດທ້າຍກໍເວົ້າຄຳວ່າ ໄດ້ ອອກໄປທຸກເທື່ອ ເຊິ່ງຄວາມຈິງແລ້ວມັນມີເຫດຜົນທາງຈິດໃຈເຊື່ອງຢູ່ ເຊິ່ງຫຼາຍຄົນກໍເປັນແບບນີ້ໂດຍບໍ່ຮູ້ໂຕ.
- ຢ້ານເຂົາບໍ່ມັກ: ສະໝອງຂອງເຮົາມັກຄິດໄປເອງວ່າ ຖ້າເຮົາເປັນຄົນຕາມໃຈ ແລະ ຍອມເປັນຜູ້ໃຫ້ຕະຫຼອດ ຈະເຮັດໃຫ້ຄົນອື່ນຮັກ ແລະ ຄວາມສຳພັນຈະໄປໄດ້ດີ.
- ຢ້ານການຜິດຖຽງກັນ: ເວລາທີ່ມີເລື່ອງຂັດແຍ້ງເຮົາຈະຮູ້ສຶກອຶດອັດໃຈຫຼາຍ ສຸດທ້າຍເລີຍເລືອກຕັດບັນຫາດ້ວຍການຍອມໆໄປໃຫ້ມັນແລ້ວ ເພາະບໍ່ຢາກຜິດຖຽງກັບໃຜ.
- ແຍກ “ຄວາມໃຈດີ” ກັບ “ຂອບເຂດ” ບໍ່ອອກ: ຫຼາຍຄົນມັກເຂົ້າໃຈຜິດວ່າ ການປະຕິເສດຄືການເປັນຄົນແລ້ງນ້ຳໃຈ. ແຕ່ຄວາມຈິງແລ້ວ ມັນຄືການຂີດເສັ້ນເພື່ອປົກປ້ອງພະລັງງານ ແລະ ຮັກສາຈິດໃຈຂອງໂຕເອງຫຼາຍກວ່າ.
Muan RelationTips ຄິດວ່າການເປັນຄົນໃຈດີມັນກໍດີຢູ່ ແຕ່ຖ້າຄວາມໃຈດີນັ້ນມັນກັບມາທຳຮ້າຍໂຕເຮົາເອງ ມັນອາດຈະເຖິງເວລາແລ້ວທີ່ເຮົາຕ້ອງຫັນມາຮັກສາສິດຂອງໂຕເອງແດ່ເດີ.
ວິທີດຶງໂຕເອງກັບມາ ໂດຍບໍ່ຕ້ອງຮູ້ສຶກຜິດ
ຖ້າເຮົາເປັນຄົນໜຶ່ງທີ່ຢາກປະຕິເສດແຕ່ກໍຢ້ານເຂົາເສຍໃຈ ສຸດທ້າຍກໍຕ້ອງມາຮູ້ສຶກຜິດຢູ່ຄົນດຽວ ເຊິ່ງ Muan RelationTips ຢາກໃຫ້ທຸກຄົນລອງປ່ຽນວິທີຄິດໃໝ່ເບິ່ງ ເພາະພວກເຮົາທຸກຄົນສາມາດເປັນຄົນໜ້າຮັກທີ່ມີນ້ຳໃຈໄດ້ ໂດຍທີ່ບໍ່ຈຳເປັນຕ້ອງປ່ອຍໃຫ້ໃຜມາເອົາປຽບດ້ວຍ 3 ວິທີງ່າຍໆນີ້.
ກ່ອນອື່ນເລີຍ, ຢາກໃຫ້ທຸກຄົນໝັ້ນໃຈໃນສິ່ງທີ່ຄວນເຮັດ ຖ້າເຮົາເຫັນ, ແລ້ວທົບທວນວ່າມັນຖືກຕ້ອງແລ້ວ ເຮົາສາມາດເປັນຄົນໜ້າຮັກທີ່ມີນ້ຳໃຈໄດ້ ໂດຍທີ່ບໍ່ຈຳເປັນຕ້ອງປ່ອຍໃຫ້ໂຕເອງຖືກເອົາປຽບດ້ວຍອີງຈາກຄວາມຄິດເຫຼົ່ານີ້.
1. ຝຶກເວົ້າຄຳວ່າ “ບໍ່” ຢ່າງມີສິລະປະ
ການປະຕິເສດບໍ່ໄດ້ແປວ່າເຮົາເປັນຄົນໃຈຮ້າຍ ເຊິ່ງເຮົາສາມາດບອກປັດດ້ວຍຄວາມສຸພາບ ແລະ ຊັດເຈນໄດ້ ຝຶກເວົ້າຄຳວ່າ “ບໍ່” ໃຫ້ເປັນ ເຊັ່ນ: “ຢາກຊ່ວຍຢູ່ເດີ ແຕ່ຊ່ວງນີ້ຄິວແໜ້ນແຮງ” ຫຼື “ເຮົາບໍ່ສະດວກແທ້ໆ ຂໍໂທດຫຼາຍໆເດີ” ພໍເວົ້າແບບນີ້ ຄົນຟັງກໍເຂົ້າໃຈ ແລະ ເຮົາເອງກໍບໍ່ອຶດອັດນຳອີກ.
2. ຂີດເສັ້ນ “ກົດເຫຼັກ” ໃຫ້ໂຕເອງ
ເຮົາທຸກຄົນຕ້ອງຮູ້ເດີວ່າຂີດຈຳກັດຂອງເຮົາຢູ່ບ່ອນໃດ ແລະ ໃຫ້ກຳນົດຂອບເຂດໃຫ້ຊັດເຈນວ່າສິ່ງໃດທີ່ເຮົາຮັບໄດ້ ແລະ ສິ່ງໃດທີ່ເກີນເສັ້ນ, ຖ້າສິ່ງທີ່ເຂົາຂໍມັນເລີ່ມມາກວນເວລາພັກຜ່ອນ, ບຽດບຽນເວລາພັກຜ່ອນ, ເງິນຄຳ ຫຼື ເຮັດໃຫ້ສະພາບຈິດໃຈຂອງເຮົາເພ ໃຫ້ຄິດໄວ້ເລີຍວ່າສິ່ງນີ້ຄືສິ່ງທີ່ ຕ້ອງປະຕິເສດ ເທົ່ານັ້ນ.
3. ປ່ຽນຄວາມຄິດໃໝ່ “ການຮັກສາສິດ ບໍ່ແມ່ນຄວາມເຫັນແກ່ຕົວ”
ຖ້າເຮົາບໍ່ປົກປ້ອງຄວາມຮູ້ສຶກຂອງໂຕເອງ ແລ້ວໃຜຈະມາປົກປ້ອງໃຫ້ເຮົາ? ການຮັກສາພະລັງງານຂອງໂຕເອງໃຫ້ເຕັມ ແລະ ສຸຂະພາບຈິດຂອງໂຕເອງໃຫ້ດີ ມັນຈະເຮັດໃຫ້ເຮົາມີແຮງໄປຊ່ວຍເຫຼືອຄົນອື່ນໄດ້ຢ່າງເຕັມທີ່ ໃນເວລາທີ່ຈຳເປັນແທ້ໆ.
Muan RelationTips ຢາກໃຫ້ທຸກຄົນຈື່ໄວ້ເດີວ່າ ຄວາມສຸກຂອງໂຕເຮົາເອງກໍສຳຄັນບໍ່ແພ້ຄວາມສຸກຂອງຄົນອື່ນຄືກັນ ໃຈດີກັບຄົນອື່ນໄດ້ ແຕ່ກໍຢ່າລືມໃຈດີກັບໂຕເອງ ເຊົາແບກທຸກຢ່າງ ແລ້ວຫັນມາຮັກໂຕເອງ ໂດຍບໍ່ຕ້ອງຮູ້ສຶກຜິດ ໄດ້ແລ້ວ.