ການເປັນແຟນຄລັບ ຫຼື “ຕິ່ງ” ສິລະປິນທີ່ເຮົາມັກ ເປັນຫຼາຍກວ່າການຕິດຕາມຜົນງານ ຫຼາຍຄັ້ງມັນສ້າງແຮງບັນດານໃຈ, ເປັນທີ່ເພິ່ງພາທາງໃຈ ແລະ ເປັນສ່ວນໜຶ່ງຂອງການໃຊ້ຊີວິດຢ່າງມີຄວາມສຸກ. ຫຼາຍຄັ້ງທີ່ເຮົາໄດ້ຍິນຄຳເວົ້າຈາກຄົນອ້ອມໂຕ ເຊັ່ນ: “ເປັນຫຍັງຈຶ່ງຕ້ອງຕິດຕາມຂະໜາດນັ້ນ?” ຫຼື “ມັນໄຮ້ສາລະໂພດຕິເບາະ?” ເຊິ່ງຄຳເວົ້າເຫຼົ່ານີ້ ອາດເຮັດໃຫ້ເຮົາຮູ້ສຶກບໍ່ໝັ້ນໃຈ ແລະ ເລີ່ມຕັ້ງຄຳຖາມກັບສິ່ງທີ່ເຮົາຮັກ.
ແນວໃດກໍຕາມ ການເປັນແຟນຄລັບເປັນເລື່ອງຄວາມສຸກສ່ວນຕົວ. ການມີຄວາມສຸກຖືເປັນເລື່ອງທີ່ໄຮ້ສາລະຂະໜາດນັ້ນບໍ່?
ຊີວິດນັ້ນສັ້ນເກີນກວ່າທີ່ຈະບໍ່ເຮັດໃນສິ່ງທີ່ເຮົາຮັກ
ເຮົາບໍ່ຮູ້ວ່າຊີວິດເຮົາໃນມື້ອື່ນຈະເປັນແນວໃດ ແລ້ວເປັນຫຍັງເຮົາຈຶ່ງຕ້ອງປິດກັ້ນບໍ່ໃຫ້ໂຕເອງໄດ້ເຮັດໃນສິ່ງທີ່ຫົວໃຈຕ້ອງການ? ເພາະການໄດ້ເຮັດສິ່ງທີ່ເຮົາຮັກນັ້ນ ມີປະໂຫຍດຫຼາຍຢ່າງ ເຊັ່ນ: ເຮັດໃຫ້ຮູ້ສຶກເຕີມເຕັມ, ເຮັດສິ່ງທີ່ມັກສ້າງແຮງກະຕຸ້ນໃຫ້ເຮົາໄດ້, ມີປະໂຫຍດຕໍ່ສຸຂະພາບທາງຈິດ ແລະ ອາລົມ ລວມເຖິງໃນແງ່ການເຮັດວຽກ ຍັງຊ່ວຍໃຫ້ເຮົາເຮັດວຽກໄດ້ມີປະສິດທິຜົນ ໄປຈົນເຖິງ ສ້າງແຮງບັນດານໃຈໃຫ້ກັບຄົນອື່ນ ແລະ ຜົນຂອງການສຶກສາກໍພົບອີກວ່າ ຜູ້ທີ່ມີຄວາມສຸກໃນສິ່ງທີ່ເຮັດຢູ່ນັ້ນ ມີທ່າອ່ຽງທີ່ຈະມີລາຍຮັບສູງກວ່າຜູ້ທີ່ບໍ່ມີຄວາມສຸກໃນສິ່ງທີ່ເຮັດ.
ຜິດບໍ່ທີ່ຂ້ອຍຈະເປັນ “ຕິ່ງ”?
ຢ່າປ່ອຍໃຫ້ຄຳວ່າ “ຕິ່ງ” ກາຍເປັນຄຳດ້ານລົບທີ່ສົ່ງຜົນກະທົບຕໍ່ກັບເຮົາ ຕາບໃດທີ່ມັນເຮັດໃຫ້ເຮົາໄດ້ໃຊ້ຊີວິດຢ່າງມີຄວາມສຸກ ນັ້ນກໍໂອເຄແລ້ວ. ການເປັນຕິ່ງບໍ່ໄດ້ເຮັດໃຫ້ເຮົາອ່ອນແອ ແຕ່ມັນເຮັດໃຫ້ເຮົາເຫັນຄຸນຄ່າໃນຄວາມຝັນຂອງຕົວສິລະປິນ ຜູ້ທີ່ສ້າງແຮງບັນດານໃຈໃຫ້ກັບເຮົາໄດ້.
ຫຼາຍຄົນອາດຈະຍັງບໍ່ຮູ້ວ່າ ການເປັນຕິ່ງ ນອກຈາກຈະສ້າງຄວາມສຸກ ແລະ ຮອຍຍິ້ມໃຫ້ກັບເຮົາແລ້ວ ຍັງເຮັດໃຫ້ເຮົາຮູ້ສຶກໄດ້ເປັນສ່ວນໜຶ່ງຂອງສັງຄົມນ້ອຍໆຂອງແຟນຄລັບ ບໍ່ຕ່າງຫຍັງກັບຄົນທີ່ມັກເຮັດກິດຈະກຳໃດໜຶ່ງເຊັ່ນ ອ່ານປຶ້ມ ຫຼື ປູກຕົ້ນໄມ້. ການໄດ້ມີສັງຄົມທີ່ສົນໃຈໃນສິ່ງດຽວກັນ ເຮັດໃຫ້ເຮົາຮູ້ວ່າ ເຮົາຍັງມີໝູ່ທີ່ມັກໃນເລື່ອງດຽວກັນ ແລະ ໄດ້ຮັບການສະໜັບສະໜຸນຈາກຄົນອື່ນໆ.
ຈະຈັດການແນວໃດ ຖ້າມີຄົນບອກວ່າສິ່ງທີ່ເຮົາເຮັດຢູ່ນັ້ນ ໄຮ້ສາລະ?
1. ຮູ້ສຶກພາກພູມໃຈໃນຄວາມສຸກຂອງໂຕເອງ:
ການເປັນແຟນຄລັບຂອງສິລະປິນ ຄືການເຊື່ອມຕໍ່ກັບສິ່ງທີ່ເຮັດໃຫ້ເຮົາມີຄວາມສຸດ. ຢ່າລືມວ່າ ແຕ່ລະຄົນມີວິທີການສ້າງຄວາມສຸກໃນແບບຂອງຕົວເອງ ແລະ ການທີ່ເຮົາເລືອກທີ່ຈະຮັກ ແລະ ສະໜັບສະໜຸນສິລະປິນ ກໍເປັນວິທີການຂອງເຮົາເອງ ບໍ່ວ່າຄົນອື່ນຈະເບິ່ງວ່າໄຮ້ສາລະສໍ່າໃດ ສິ່ງທີ່ສຳຄັນແມ່ນ ມັນເຮັດໃຫ້ເຮົາມີຄວາມສຸກ, ເປັນແຮງບັນດານໃຈ ແລະ ເຕີມເຕັມຊີວິດໄດ້ຈິງ.
2. ຕອບກັບດ້ວຍຄວາມເຂົ້າໃຈ:
ລອງຕອບກັບດ້ວຍຄວາມເຂົ້າໃຈ ແລະ ທັດສະນະທີ່ດີ ເຊັ່ນ: “ມັນອາດຈະເບິ່ງເປັນເລື່ອງໄຮ້ສາລະສຳລັບເຈົ້າ ແຕ່ສຳລັບຂ້ອຍມັນຄືຄວາມສຸກທີ່ຂ້ອຍເລືອກເອງ ແລະ ມັນກໍເຮັດໃຫ້ຂ້ອຍຍິ້ມໄດ້”. ຄຳຕອບແບບນີ້ ສະແດງໃຫ້ເຫັນເຖິງຄວາມສຸກທີ່ເຮົາໄດ້ຮັບ ແລະ ອາດເຮັດໃຫ້ຄົນອື່ນເຂົ້າໃຈມຸມມອງຂອງເຮົາຫຼາຍຂຶ້ນ.
3. ໃຫ້ຄວາມສຳຄັນກັບຄົນທີ່ເຂົ້າໃຈເຮົາ:
ຢ່າລືມວ່າຍັງມີຄົນອື່ນໆທີ່ມັກໃນສິ່ງດຽວກັນກັບເຮົາ ແລະ ຮູ້ສຶກຄືກັນກັບເຮົາ. ຄົນທີ່ຮັກ ແລະ ຕິດຕາມສິລະປິນຮ່ວມກັນ ຄືຄົນທີ່ເຂົ້າໃຈ ແລະ ພ້ອມສະໜັບສະໜຸນສະເໝີ ລອງເຂົ້າຮ່ວມກຸ່ມ ຫຼື ລົມກັບຄົນເຫຼົ່ານີ້ ເພື່ອແລກປ່ຽນກັນ ຈະຊ່ວຍໃຫ້ຮູ້ສຶກວ່າ ບໍ່ໄດ້ຍ່າງເທິງເສັ້ນທາງນີ້ຄົນດຽວ.
4. ຈື່ໄວ້ວ່າ ຄວາມສຸກບາງຄັ້ງກໍບໍ່ໄດ້ຕ້ອງການເຫດຜົນສະເໝີໄປ:
ບາງເທື່ອເຮົາກໍບໍ່ຈຳເປັນຕ້ອງມານັ່ງອະທິບາຍໃຫ້ໃຜຟັງຢ່າງເລິກເຊິ່ງ ສິ່ງທີ່ສຳຄັນທີ່ສຸດແມ່ນ ເຮົາຮູ້ສຶກດີ ແລະ ມີຄວາມສຸກແທ້ໆ ໂດຍທີ່ມັນກໍບໍ່ໄດ້ບຽດບຽນໃຜ ແລະ ສ້າງຄວາມລຳບາກແກ່ຕົນເອງ ກໍຖືວ່າພຽງພໍແລ້ວ
5. ໃຊ້ແຮງບັນດານໃຈຈາກສິລະປິນໃຫ້ເປັນພະລັງ:
ລອງໃຊ້ພະລັງບວກທີ່ໄດ້ຮັບຈາກສິລະປິນມາປັບໃຊ້ກັບໂຕເອງ ບໍ່ວ່າຈະເປັນການຕັ້ງໃຈເຮັດວຽກ, ຕັ້ງໃຈຮຽນ, ຄວາມອົດທົນ ຫຼື ຄວາມກ້າທີ່ຈະເຮັດຕາມຄວາມຝັນ ປ່ຽນພະລັງເຫຼົ່ານີ້ເປັນແຮງບັນດານໃຈໃນການສ້າງສັນສິ່ງດີໆ ເພື່ອໃຫ້ຄົນອື່ນເຫັນວ່າ ມັນບໍ່ແມ່ນເລື່ອງທີ່ໄຮ້ສາລະ.
ບໍ່ວ່າຄົນອື່ນຈະເວົ້າແນວໃດ ໂຕເຮົາເອງຮູ້ດີທີ່ສຸດວ່າ ການສະໜັບສະໜຸນສິລະປິນດ້ວຍໃຈຈິງ ເປັນຄວາມສຸກທີ່ເຮົາເລືອກເອງ, ການຍອມຮັບຄວາມຮູ້ສຶກຂອງໂຕເອງ ແລະ ການເຂົ້າໃຈໃນຄວາມມັກຂອງໂຕເອງ ເປັນສິ່ງທີ່ສຳຄັນທີ່ສຸດ 
“ບໍ່ມີຫຍັງທີ່ໄຮ້ສາລະ ຕາບໃດທີ່ມັນເຮັດໃຫ້ຫົວໃຈເຮົາມີຄວາມສຸກ”
ໂດຍ: ທີມບັນນາທິການ Muan
