“ໂດຍໄດ້” ຕອບຮັບວຽກ ແຕ່ບໍ່ເຂົ້າໃຈທີ່ຫົວໜ້າສັ່ງ ຄວນເຮັດແນວໃດດີ?
ເຊື່ອວ່າຫຼາຍຄົນກະໜ້າຈະເຄີຍພົບກັບສະຖານະການນີ້, ຄືການຕອບຮັບວຽກທີ່ຫົວໜ້າສັ່ງມາແລ້ວໂດຍທີ່ຕົວເອງກະຍັງບໍ່ເຂົ້າໃຈລາຍລະອຽດ 100 %, ເລີຍເຮັດໃຫ້ເຮົາກັບມານັ່ງງົງກັບສິ່ງທີ່ໄດ້ຮັບມອບໝາຍມາຫຼືເຮົາເອງກະຍັງບໍ່ແນ່ໃຈກັບສິ່ງທີ່ຫົວໜ້າສັ່ງມາ.
ບໍ່ວ່າຈະຈາກເຮົາທີ່ຮັບສານຜິດຫຼືເປັນນຳຫົວໜ້າທີ່ສື່ສານບໍ່ຄ່ອຍຊັດເຈນ ແຕ່ແນວໃດກໍຕາມ,ເຮົາເອງທີ່ເປັນຄົນເຮັດວຽກ ບໍ່ມີທາງເລືອກຫຼາຍ ຄັນຖາມຄືນກະຢ້ານຖືກເວົ້າໃຫ້ວ່າບໍ່ຕັ້ງໃຈຟັງອີກ. ດັ່ງນັ້ນເຮົາກໍຄວນຮັບສິ່ງທີ່ຫົວໜ້າສື່ສານມັນອອກມາໃຫ້ໄດ້ກົງຕາມສິ່ງທີ່ຫົວໜ້າຕ້ອງການ.
ແລ້ວຊິເຮັດແນວໃດບໍ່ໃຫ້ສິ່ງນີ້ເກີດຂຶ້ນຊ້ຳອີກ? ມື້ນີ້ມ່ວນເລີຍຢາກມາແນະນຳທິບສ໌ດີໆໃນການຮັບຟັງບຣີຟຈາກຫົວໜ້າ ເພື່ອໃຫ້ການເຮັດວຽກເປັນໄປຢ່າງດີ ຈະໄດ້ບໍ່ມາງົງອີກ.
1. ຕັ້ງສະຕິກຽມຟັງ ແລະ ຈົດ
ເຮົາຕ້ອງຟັງເພື່ອຈັບຈຸດໃຈຄວາມໃຫ້ໄດ້ວ່າຫົວໜ້າກຳລັງເວົ້າເຖິງຫຍັງ,ໝາຍເຖິງວຽກໃດ,ກຳລັງອອກຄວາມຄິດເຫັນຫຼືກຳລັງເວົ້າລອຍໆ ແລ້ວຈົດສະຫຼຸບສິ່ງທີ່ເປັນໃຈຄວາມສຳຄັນລົງໄປ ແລະ ຄວນກຽມຄຳຖາມທີ່ເຮົາຍັງບໍ່ເຂົ້າໃຈເພື່ອຖາມຄືນອີກຄັ້ງ.
2. ຖາມຊ້ຳຄືນເພື່ອຄວາມແນ່ໃຈ
ການຢ້ຳຖາມຄືນເປັນສິ່ງທີ່ເຮົາຄວນເຮັດ ເພື່ອກວດຄວາມແນ່ໃຈກັບສິ່ງທີ່ຫົວໜ້າເວົ້າກັບສິ່ງທີ່ເຮົາຈົດນັ້ນກົງກັນຫຼືບໍ່.ເຮົາອາດຂໍອະນຸຍາດເພື່ອອັດສຽງໄວ້ ເພືອໃຫ້ຢັ້ງຢືນກັບສິ່ງທີ່ໄດ້ຮັບມາ ຍັງເປັນການຫຼຸດຜ່ອນການເຂົ້າໃຈຜິດອີກນຳ.
3. ພັກຜ່ອນໃຫ້ພຽງພໍ
ການນອນບໍ່ພໍເຮັດໃຫ້ເຮົາເຈັບຫົວ,ສະໝອງບໍ່ແລ່ນ ອາດເຮັດໃຫ້ເຮົາເບີໆເມື່ອກຳລັງຟັງສິ່ງທີ່ຫົວໜ້າສັ່ງວຽກ ກໍ່ໃຫ້ເກີດບັນຫາຕາມມາໄດ້ .
4. ເຝິກສະມາທິ
ເພື່ອໃຫ້ເຮົາໄດ້ຈົດຈໍ່ກັບສິ່ງທີ່ກຳລັງຟັງໄດ້ຫຼາຍຂຶ້ນ ແລະ ມີສະຕິໃນການຮັບຟັງເພື່ອໃຫ້ສິ່ງທີ່ເຮົາໄດ້ຮັບມາກົງກັບສິ່ງທີ່ຫົວໜ້າໄດ້ມອບໝາຍໃຫ້.
ແນວໃດກໍຕາມສິ່ງນີ້ກະຍັງຄົງເປັນບັນຫາກວນໃຈຂອງໃຜຫຼາຍຄົນ ແຕ່ຖ້າເຮົາພະຍາຍາມແລ້ວຍັງເກີດເຫດການແບບນັ້ນຄືເກົ່າກໍບໍ່ຟ້າວດ່ວນໂທດຕົວເອງເທື່ອ ເພາະມັນກໍອາດບໍ່ແມ່ນຍ້ອນເຮົາ ແຕ່ອາດເປັນຍ້ອນຫົວໜ້າເອງທີ່ສື່ສານບໍ່ຊັດເຈນ.
ໂດຍ: ທີມບັນນາທິການ Muan