ລາວແມ່ນໃຜ? ພາສ່ອງ ເຈມມີ່ ໄຊສົມພອນ ເດັກໜຸ່ມ 19 ປີ ທີ່ຫອບຄວາມຝັນຈາກປາກເຊ ສູ່ເວທີ Mister Universe Laos
ຫຼາຍຄັ້ງທີ່ຈຸດເລີ່ມຕົ້ນຂອງ “ຄວາມຍິ່ງໃຫຍ່” ບໍ່ໄດ້ເລີ່ມຈາກຄວາມພ້ອມແບບຮ້ອຍເປີເຊັນ ແຕ່ມັນເກີດຈາກ “ຄວາມກ້າ” ທີ່ຈະຍ່າງອອກຈາກກອບເດີມໆ.
ເຊັ່ນດຽວກັບເລື່ອງລາວຂອງເດັກໜຸ່ມໄວ 19 ປີ ທີ່ຫອບເອົາຄວາມຝັນເດີນທາງໄກຈາກນະຄອນປາກເຊ ແຂວງຈຳປາສັກ. ໄລຍະທາງອາດຈະເຮັດໃຫ້ລາວຮູ້ສຶກຫ່າງໄກຈາກບ້ານ ແຕ່ມັນຊ້ຳພັດຫຍັບເຂົ້າໃກ້ໂອກາດທີ່ລາວຈະບໍ່ມີວັນຍອມປ່ອຍໃຫ້ຜ່ານໄປ. ເມື່ອວິນາທີທີ່ຊື່ຂອງລາວຖືກປະກາດອອກມາ ມັນບໍ່ແມ່ນພຽງແຕ່ຄວາມດີໃຈ ແຕ່ມັນຄືເຄື່ອງຢືນຢັນວ່າ ລາວສາມາດເຮັດຕາມຄວາມຝັນໄດ້ສຳເລັດໄປອີກໜຶ່ງກ້າວແລ້ວ.
ມື້ນີ້ ມ່ວນຈະພາໄປເຈາະເລິກ ແລະ ທຳຄວາມຮູ້ຈັກກັບໂລກຂອງ ເຈມມີ່-ໄຊສົມພອນ ເພັດແພງລາສີ ຕົວແທນແຂວງຈຳປາສັກ ເທິງເວທີ Mister Universe Laos 2026 ນີ້ໃຫ້ຫຼາຍຂຶ້ນ.
ປັດຈຸບັນ ເຈມມີ່ກຳລັງສຶກສາຢູ່ຊັ້ນປີທີ 1 ຄະນະເສດຖະສາດ ມະຫາວິທະຍາໄລຈຳປາສັກ. ຫາກໃຜໄດ້ພົບລາວໃນຊີວິດປະຈຳວັນ ກໍຈະເຫັນພຽງເດັກໜຸ່ມທີ່ເຂົ້າກັບຄົນງ່າຍ, ມັກຕີດອກປີກໄກ່, ລອຍນ້ຳ, ເຕະບານ ແລະ ມັກໃຊ້ເວລາຫວ່າງຢູ່ໃນຟິດເນັດສະເໝີ. ຮອຍຍິ້ມອັນມີສະເໜ່ ແລະ ເປັນກັນເອງຂອງລາວ ເຮັດໃຫ້ບົດສົນທະນາທຸກຄັ້ງຮູ້ສຶກສະບາຍໃຈ ແລະ ເປັນທຳມະຊາດ.
ແຕ່ພາຍໃຕ້ເບື້ອງຫຼັງຄວາມມ່ວນຊື່ນນັ້ນ ເຈມມີ່ໄດ້ເຊື່ອງຄວາມຕັ້ງໃຈທີ່ຂ້ອນຂ້າງຈິງຈັງເອົາໄວ້, ລາວບອກວ່າ ສິ່ງທີ່ລາວຫຼົງໄຫຼທີ່ສຸດບໍ່ແມ່ນພຽງແຕ່ການສ້າງຮູບຮ່າງ ຫຼື ກ້າມໃຫ້ສວຍງາມ ແຕ່ແມ່ນການພັດທະນາຕົນເອງໃນທຸກໆມິຕິ ໂດຍລາວໄດ້ເນັ້ນຕື່ມວ່າ:
ການຝຶກວິໄນ ແລະ ການພັດທະນາແນວຄິດຂອງຕົນເອງຢູ່ສະເໝີນັ້ນແມ່ນສິ່ງທີ່ເຈມມີ່ໃຫ້ຄວາມສຳຄັນສະເໝີ ທັງການປັບບຸກຄະລິກກະພາບ, ທັກສະການເວົ້າ ຫຼື ແມ່ນແຕ່ການຮຽນຮູ້ສິ່ງໃໝ່ໆ ເພາະຄວາມສາມາດພิເສດຂອງຂ້ອຍ ຄືການເປັນຄົນທີ່ປັບຕົວ ແລະ ຮຽນຮູ້ໄດ້ໄວ.
ຄວາມມຸ່ງໝັ້ນນີ້ສ່ວນໜຶ່ງມີຈຸດເລີ່ມຕົ້ນມາຈາກ “ອ້າຍບັອບບີ້” ບຸກຄົນຕົ້ນແບບໃນດວງໃຈຂອງລາວ ຜູ້ທີ່ເກັ່ງຮອບດ້ານ ທັງການສະແດງອອກ, ການເວົ້າ, ບຸກຄະລິກກະພາບ ແລະ ຄວາມສາມາດດ້ານພາສາອັງກິດ. ເຈມມີ່ມອງວ່າ ລາວບໍ່ໄດ້ຢາກເປັນຄົນໆນັ້ນ ແຕ່ການມີຕົ້ນແບບທີ່ດີເຮັດໃຫ້ລາວເຫັນວ່າ ຖ້າຕົນເອງມີຄວາມພະຍາຍາມຫຼາຍພໍ ກໍຈະສາມາດກ້າວໄປເຖິງຈຸດນັ້ນໄດ້ຄືກັນ.
ເພາະເຫດນັ້ນ ເຈມມີ່ຈຶ່ງຕັດສິນໃຈກ້າວເຂົ້າສູ່ເວທີ Mister Universe Laos ເຊິ່ງເປັນເວທີທຳອິດ ແລະ ເປັນຄວາມທ້າທາຍທີ່ຍິ່ງໃຫຍ່ທີ່ສຸດໃນຊີວິດ ໂດຍທີ່ລາວບໍ່ເຄີຍມີປະສົບການໃນວົງການບັນເທີງມາກ່ອນເລີຍ ບໍ່ວ່າຈະເປັນການປະກວດ, ຍ່າງແບບ ຫຼື ການສະແດງໃດໆ. ລາວບອກເຫດຜົນໃນການຕັດສິນໃຈຄັ້ງນີ້ວ່າ ເພາະຢາກພັດທະນາຕົນເອງໃນຫຼາຍໆດ້ານ ແລະ ເຊື່ອວ່າເວທີນີ້ຈະຊ່ວຍປົດລັອກສັກກາຍະພາບທີ່ເຊື່ອງຢູ່ໃນໂຕລາວໃຫ້ທຸກຄົນໄດ້ເຫັນ.
ແລະ ເມື່ອຄວາມພະຍາຍາມປະສົມເຂົ້າກັບຄວາມມຸ່ງໝັ້ນ, ວິນາທີທີ່ປະກາດຜົນວ່າລາວຜ່ານເຂົ້າຮອບ ຈຶ່ງກາຍເປັນໜຶ່ງໃນຄວາມຊົງຈຳທີ່ເຈມມີ່ບໍ່ມີວັນລືມ ໂດຍລາວໄດ້ເລົ່າເຖິງຄວາມຮູ້ສຶກໃນຕອນນັ້ນວ່າ: “ຂ້ອຍດີໃຈຫຼາຍ ເພາະຂ້ອຍມາຈາກຈຳປາສັກ ຕ້ອງເດີນທາງມາໄກ ມັນເລີຍເຕັມໄປດ້ວຍຄວາມຫວັງ. ວິນາທີທີ່ຮູ້ວ່າເຂົ້າຮອບແມ່ນດີໃຈທີ່ສຸດ ເພາະມັນແປວ່າຂ້ອຍສາມາດເຮັດຕາມຄວາມຝັນໄດ້ສຳເລັດໄປອີກໜຶ່ງກ้าວແລ້ວ.”
ຕະຫຼອດໄລຍະເວລາຂອງການກຽມຕົວປະກວດ, ສິ່ງທີ່ເຈມມີ່ຄົ້ນພົບຊ້ຳພັດບໍ່ແມ່ນທັກສະໃໝ່ ແຕ່ເປັນການໄດ້ຮູ້ຈັກຕົນເອງໃນແບບທີ່ບໍ່ເຄີຍຮູ້ມາກ່ອນ. ລາວພົບວ່າຕົນເອງມີຄວາມອົດທົນ ແລະ ມີວິໄນຫຼາຍກວ່າທີ່ຄິດ. ການທີ່ຕ້ອງຕື່ນມາຝຶກຊ້ອມ, ເບິ່ງແຍງຕົນເອງ ແລະ ຮັບມືກັບຄວາມກົດດັນໃນທຸກໆມື້ ເຮັດໃຫ້ລາວເຂົ້າໃຈຢ່າງເລິກເຊິ່ງວ່າ ຂໍ້ຈຳກັດຫຼາຍຢ່າງທີ່ເຮົາເຄີຍບອກຕົນເອງວ່າມີ ຄວາມຈິງແລ້ວເຮົາສາມາດກ້າວຂ້າມມັນໄດ້ສະເໝີ ຖ້າເລືອກທີ່ຈະລົງມືເຮັດແທ້ໆ.
ການມາຢືນຢູ່ເທິງເວທີລະດັບປະເທດໃນຄັ້ງນີ້ ເຈມມີ່ບໍ່ໄດ້ພົກມາພຽງແຕ່ຄວາມໝັ້ນໃຈ ແຕ່ລາວຍັງມາພ້ອມກັບຄວາມຕັ້ງໃຈທີ່ຢາກຈະເປັນຕົວແທນຂອງຊາຍໜຸ່ມລາວຍຸກໃໝ່ ທີ່ຢາກພິສູດໃຫ້ເຫັນວ່າຄວາມສຳເລັດບໍ່ໄດ້ວັດກັນທີ່ຮູບຮ່າງໜ້າຕາ ແຕ່ວັດກັນທີ່ຄວາມຮັບຜິດຊອບ, ວິໄນ ແລະ ການບໍ່ຢຸດພັດທະນາຕົນເອງ ໂດຍສະເພາະມຸມມອງຕໍ່ຄຳວ່າ “ສຸພາບບຸລຸດ” ທີ່ລາວໄດ້ນิຍາມໄວ້ຢ່າງງົດງາມວ່າ:
ຄວາມເປັນສຸພາບບຸລຸດສຳລັບຂ້ອຍ ຄືການໃຫ້ກຽດ ແລະ ເຄົາລົບທຸກຄົນ ບໍ່ວ່າຄົນໆນັ້ນຈະເປັນຜູ້ໃຫຍ່ ຫຼື ຜູ້ນ້ອຍ ເປັນແມ່ຍິງ, ຜູ້ຊາຍ ຫຼື LGBTQ+ ເພາະທຸກຄົນລ້ວນແຕ່ເປັນມະນຸດຄືກັນ ເຮົາຈຶ່ງຄວນໃຫ້ກຽດ ແລະ ມອບສິດທິທີ່ເທົ່າທຽມກັນໃນທຸກໆດ້ານ.
ນອກຈາກມຸມມອງທີ່ເຕີບໂຕເກີນໄວແລ້ວ ຫາກລາວໄດ້ຮັບຕຳແໜ່ງ ເຈມມີ່ກໍຕັ້ງໃຈຈະໃຊ້ພື້ນທີ່ກົງນີ້ເປັນກະບອກສຽງເພື່ອສັງຄົມ ໂດຍສະເພາະການປຸກລະດົມຕໍ່ຕ້ານຢາເສບຕິດໃນທຸກຮູບແບບ ພ້ອມທັງຊຸກຍູ້ໃຫ້ຄົນລຸ້ນໃໝ່ຫັນມາເບິ່ງແຍງສຸຂະພາບທັງຮ່າງກາຍ ແລະ ຈິດໃຈຢ່າງຈິງຈັງ ເພາະລາວເຊື່ອໃນເລື່ອງນີ້ຈາກໃຈຈິງ ບໍ່ແມ່ນພຽງແຕ່ເຮັດເພື່ອຫວັງຄະແນນປະກວດ.
ຈາກເດັກໜຸ່ມນະຄອນປາກເຊທີ່ບໍ່ເຄີຍຂຶ້ນເວທີມາກ່ອນ ຕອນນີ້ລາວໄດ້ມາຍືນຢູ່ກາງແສງສະປອດໄລ້ລະດັບປະເທດ ພ້ອມກັບຮອຍຍิ້ມ ແລະ ຄວາມເຊື່ອທີ່ວ່າ ຄວາມຝັນບໍ່ໄດ້ລໍຖ້າໃຫ້ເຮົາພ້ອມກ່ອນ ມັນລໍຖ້າພຽງແຕ່ໃຫ້ເຮົາກ້າພໍທີ່ຈະເລີ່ມ. ໂດຍເຈມມີ່ໄດ້ຝາກຂໍ້ຄວາມເຖິງເຍົາວະຊົນທຸກຄົນທີ່ກຳລັງໄລ່ຕາມຄວາມຝັນວ່າ:
ຈົ່ງເຊື່ອໝັ້ນໃນຕົນເອງ ແລະ ພັດທະນາຕົນເອງໃຫ້ເປັນເວີຊັນທີ່ດີທີ່ສຸດ ເພາະເຈມມີ່ກໍເປັນຄົນໜຶ່ງທີ່ພັດທະນາຕົນເອງຈົນມາເຖິງເວີຊັນທີ່ດີທີ່ສຸດໃນມື້ນີ້ ເຈມມີ່ເຮັດໄດ້ ທຸກຄົນກໍຕ້ອງເຮັດໄດ້ຄືກັນ.
ພ້ອມກັນນັ້ນ ໃນຕອນທ້າຍ ເຈມມີ່ໄດ້ຝາກຂໍ້ຄວາມເຖິງແຟນໆທີ່ຄອຍຕິດຕາມວ່າ ລາວ ແລະ ທີມງານຕັ້ງໃຈສ້າງຜົນງານໃນເວທີ Mister Universe Laos ປີນີ້ຢ່າງເຕັມທີ່ເພື່ອບໍ່ໃຫ້ທຸກຄົນຜິດຫວັງ ແລະ ຂໍຝາກທຸກຄົນຊ່ວຍເປັນກຳລັງໃຈໃຫ້ກັບ “ເຈມມີ່” ໜຸ່ມນ້ອຍຈາກຈຳປາສັກຄົນນີ້ ໃນເສັ້ນທາງຄວາມຝັນຄັ້ງທຳອິດຂອງລາວແດ່ເດີ້.
ສາມາດຕິດຕາມເຈມມີ່ໄດ້ທີ່
FB: Jamemy Xaisomphone
IG: @jamemy.13
TIKTOK: @jamemyppls
