ວິທີຮັກສາໃຈແບບໄວໆ ກັບຄວາມວ່າງເປົ່າທີ່ເກີດຂຶ້ນກັບອາການ Post- Event Crash ຫຼັງຈົບມື້ພັກຍາວ
Highlights
- ເຂົ້າໃຈຕົ້ນເຫດຂອງຄວາມວ່າງເປົ່າທີ່ເກີດຂຶ້ນຈາກສານແຫ່ງຄວາມສຸກໃນສະໝອງ ຫຼັງຈາກທີ່ເຮົາຜ່ານຊ່ວງເວລາທີ່ຕື່ນເຕັ້ນ ແລະ ມີຄວາມສຸກຫຼາຍໆຕິດກັນເປັນເວລາດົນ.
- ເຕັກນິກການ Landing ແບບນຸ່ມນວນ, ການຮັກສາໃຈແບບໄວໆແມ່ນການເລີ່ມຈາກ One Small Win ຫຼື ການເຮັດສິ່ງເລັກໆນ້ອຍໆໃຫ້ສຳເລັດ ເພື່ອໃຫ້ສະໝອງຄ່ອຍໆປັບຕົວເຂົ້າສູ່ໂໝດປົກກະຕິໂດຍບໍ່ຊັອກ.
- ປ່ຽນຄວາມຊົງຈຳໃຫ້ເປັນພະລັງ ໂດຍການຂຽນບັນທຶກ ຫຼື ຈັດລະບຽບບັນທຶກຮູບພາບແຫ່ງຄວາມສຸກໄວ້ໃນໃຈ ເຮັດໃຫ້ເຮົາຮູ້ສຶກວ່າຄວາມມ່ວນນັ້ນບໍ່ໄດ້ຫາຍໄປໃສ ແຕ່ກາຍເປັນພະລັງບວກໃຫ້ເຮົາກ້າວຕໍ່.
ຖ້າຕອນນີ້ເຈົ້າກຳລັງຮູ້ສຶກເກີດຄວາມວ່າງເປົ່າຢູ່ແມ່ນບໍ່? ມັນຮູ້ສຶກແບບຢູ່ລ້າໆກໍເຫງົາ, ເສົ້າຊຶມ ຈົນບໍ່ຢາກເຮັດຫຍັງເລີຍ ທຸກຢ່າງຄືເປັນງົງໆ ພໍຕ້ອງເລີ່ມກັບມາໃຊ້ຊີວິດແບບປົກກະຕິທີ່ເຄີຍເປັນຫຼັງຈາກທີ່ເຮົາໄດ້ສຳຜັດກັບຄວາມຕື່ນເຕັ້ນກິດຈະກຳມ່ວນໆຕິດກັນຫຼາຍມື້ ໂດຍສະເພາະຫຼັງຈາກຊ່ວງບຸນປີໃໝ່ ຫຼື ພັກຍາວທີ່ຜ່ານມາ.
ອາການ Post-Event Cras ຫຼື ຄວາມວ່າງເປົ່າ ຫຼັງພັກຍາວນີ້ແຫຼະ ຄືຕົວການທີ່ເຮັດໃຫ້ເຮົາຮູ້ສຶກ “ໃຈຫາຍ” ທີ່ສຸດມັນຄ້າຍຄືກັບການທີ່ເຮົາຂຶ້ນໄປນັ່ງຢູ່ເທິງລົດໄຟເຫາະ (Roller Coaster) ທີ່ແລ່ນດ້ວຍຄວາມໄວສູງ ແລ້ວຢູ່ໆມັນເບກກະທັນຫັນ ຈົນເຮັດໃຫ້ໃຈຫຼົ້ນໄປຢູ່ລຸ່ມ.
ລັກສະນະອາການທີ່ພົບເລື້ອຍໆຄືຄວາມຮູ້ສຶກວ່າງເປົ່າ ພໍກັບມາຢູ່ກັບຄວາມງຽບຈະຮູ້ສຶກເຫງົາຜິດປົກກະຕິ , ເມື່ອຍລ້າບໍ່ມີແຮງຈູງໃຈຈົນບໍ່ຢາກຕື່ນໄປເຮັດກິດຈະກຳອື່ນໆ (ລັກສະນະຄືກັບໄຟມອດ).
ມີອາການຄິດຮອດຊ່ວງເວລາເກົ່າໆທີ່ປະກອບມີອາການແບບ social media blue ຄືນັ່ງໄຖໜ້າຈໍໂທລະສັບເບິ່ງແຕ່ຮູບເກົ່າໆ, ເບິ່ງວິດີໂອທີ່ຫາກໍຖ່າຍໄປໃນຊ່ວງພັກ ເພື່ອຢາກດຶງຄວາມຮູ້ສຶກມ່ວນນັ້ນໄວ້ໃຫ້ດົນທີ່ສຸດ.
ສຸດທ້າຍ, ກໍມັກເກີດອາລົມຫງຸດຫງິດງ່າຍ ຮູ້ສຶກວ່າສິ່ງອ້ອມຂ້າງໃນຊີວິດປະຈຳວັນມັນໜ້າເບື່ອ ແລະ ບໍ່ໄດ້ດັ່ງໃຈ.
ເປັນຫຍັງເຮົາຈຶ່ງເຫງົາ?
Post-Event Crash ມັກຈະສົ່ງຜົນຕໍ່ການນອນ, ເຮັດໃຫ້ນອນບໍ່ຫຼັບ ຫຼື ກິນຫຼາຍເກີນໄປ, ລະບົບຮ່າງກາຍປັບໂຕບໍ່ທັນຈາກການປ່ອຍຈອຍໃນຊ່ວງພັກຍາວ ເຊິ່ງຮ່າງກາຍເຮົາຈະຫຼັ່ງສານ Adrenaline ຫຼື Dopamine (ສານແຫ່ງຄວາມສຸກ) ອອກມາຫຼາຍແບບຈັດເຕັມ.
ພໍເຮົາກັບມາສູ່ໂໝດປົກກະຕິ, ລະດັບສານເຫຼົ່ານີ້ຫຼຸດລົງແບບຕົກຮວບ (Crash) ຢ່າງໄວວາ ເຮັດໃຫ້ສະໝອງຮູ້ສຶກຂາດ ແລະ ເກີດເປັນຄວາມເສົ້າ ຫຼື ອາການເຫງົາຜິດປົກກະຕິ ນັ້ນເອງ.
ຮັກສາໃຈແບບໄວໆຈາກຄວາມວ່າງເປົ່າ
ວິທີຮັບມືກັບ Post-Event Crash ຫຼື ຄວາມວ່າງເປົ່າ ຕ້ອງເນັ້ນໄປທີ່ການ Landing ແບບນຸ່ມນວນ ເພື່ອບໍ່ໃຫ້ສະໝອງຊັອກກັບສະພາວະທີ່ Dopamine ຕົກຮວບ. Muan RelationTips ເລີຍນຳ 5 ເຕັກນິກຮັກສາໃຈແບບໄວໆທີ່ທຸກຄົນສາມາດເຮັດໄດ້ທັນທີ.
- ໃຊ້ກົດ One Small Win (ໄຊຊະນະນ້ອຍໆ)
ເວລາເຮົາເກີດຄວາມວ່າງເປົ່າ ເຮົາຈະຮູ້ສຶກວ່າຊີວິດປົກກະຕິມັນໜ້າເບື່ອ ແລະ ບໍ່ມີພະລັງ. ໃນຊ່ວງນີ້ທຸກຄົນຢ່າຟ້າວຄິດຮອດເປົ້າໝາຍໃຫຍ່ໆ, ໃຫ້ເລືອກເຮັດສິ່ງນ້ອຍໆ 1 ຢ່າງໃຫ້ສຳເລັດເຊັ່ນ: ການຈັດໂຕະເຮັດວຽກ, ຊັກເຄື່ອງທີ່ຄ້າງຈາກທຣິບ (Trip), ຫຼື ການມ້ຽນເຮືອນ ຫຼື ລ້າງລົດ.
ການທີ່ເຮົາໄດ້ເຮັດສິ່ງເລັກໆນ້ອຍໆສຳເລັດ ຈະຊ່ວຍໃຫ້ສະໝອງຫຼັ່ງ Dopamine ອອກມາແບບອ່ອນໆ ເພື່ອປະຄອງໃຈໃຫ້ຮູ້ສຶກວ່າເຮົາຍັງຄຸມຊີວິດຕົວເອງໄດ້.
2. ປ່ຽນຄວາມຊົງຈຳໃຫ້ເປັນສິ່ງຂອງ
ອາການໃຈຫາຍມັກເກີດຈາກການທີ່ເຮົາຮູ້ສຶກວ່າຄວາມມ່ວນນັ້ນຈົບລົງແລ້ວ ໃຫ້ທຸກຄົນລອງນັ່ງຄັດຮູບທີ່ມັກທີ່ສຸດມາໃສ່ກອບຮູບ, ເຮັດ Photo Album ໃນມືຖື ຫຼື ຂຽນບັນທຶກໂພສສັ້ນໆ 3 ຂໍ້ທີ່ປະທັບໃຈທີ່ສຸດຈາກງານນັ້ນ.
ມັນຄືການ Seal (ປິດຜຶກ) ຄວາມຊົງຈຳ ໃຫ້ເຮົາຮູ້ສຶກວ່າຄວາມມ່ວນນັ້ນບໍ່ໄດ້ຫາຍໄປໃສ ແຕ່ມັນຖືກເກັບໄວ້ເປັນທີ່ຮຽບຮ້ອຍແລ້ວ.
3. ວາງແຜນ Mini-Reward (ໃຫ້ລາງວັນນ້ອຍໆໃນມື້ທຳມະດາ)
Post-Event Crash ມັກເກີດເພາະເຮົາມັກທີ່ຈະເບິ່ງໄປທາງໜ້າ ແລ້ວບໍ່ເຫັນສິ່ງທີ່ໜ້າຕື່ນຕາຕື່ນໃຈຄືເກົ່າ ແຕ່ທຸກຄົນຢ່າເຮັດແບບນັ້ນ, ຢ່າລໍຖ້າໃຫ້ພຽງແຕ່ຮອດພັກຍາວເທື່ອໜ້າ.
ໃຫ້ທຸກຄົນວາງແຜນເຮັດສິ່ງທີ່ສາມາດເຮັດໃຫ້ຍິ້ມໄດ້ເຊັ່ນ: ການນັດກິນຂອງຫວານຮ້ານທີ່ມັກ, ເບິ່ງໜັງເລື່ອງທີ່ຢາກເບິ່ງ ຫຼື ສັ່ງອາຫານພິເສດທີ່ຢາກລອງມາກິນ ນີ້ຄືການສ້າງຈຸດໝາຍໃໝ່ທີ່ເຮັດໃຫ້ໃຫ້ຈິດໃຈມີແຮງທີ່ຈະຍ່າງຕໍ່.
4. ໃຊ້ທຳມະຊາດບຳບັດ (Earthing)
ຄວາມວ່າງເປົ່າມັກເຮັດໃຫ້ເຮົາມີອາການຄິດຫຼາຍທີ່ແຕກກະຈາຍຢູ່ໃນຫົວ. ທຸກຄົນລອງອອກໄປຍ່າງຫຼິ້ນຢູ່ສວນ, ໄປບ່ອນທີ່ມີຕົ້ນໄມ້ສີຂຽວ, ການປົດເກີບຍ່າງເທິງຫຍ້າ ຫຼື ດິນ ເພື່ອຮັບຮູ້ເຖິງສຳຜັດຂອງໂລກແຫ່ງຄວາມຈິງ.
ການກັບມາຢູ່ກັບປັດຈຸບັນ (Present Moment) ຈະຊ່ວຍຫຼຸດອາການລ່ອງລອຍຂອງຈິດໃຈໄດ້ດີທີ່ສຸດ.
5. ກົດ Digital Detox ສັ້ນໆ
ການນັ່ງໄຖເບິ່ງ Story ຂອງໝູ່ທີ່ຍັງທ່ຽວຢູ່ ຫຼື ເບິ່ງຮູບເກົ່າໆຊ້ຳໄປຊ້ຳມາ ຈະຍິ່ງເຮັດໃຫ້ Crash ແຮງຂຶ້ນ ໃຫ້ວາງມືຖືລົງຈັກ 1-2 ຊົ່ວໂມງ ແລ້ວມາຢູ່ກັບກິດຈະກຳທີ່ໃຊ້ມືເຮັດ ຫຼື ສຳຜັດເຊັ່ນ: ການແຕ້ມຮູບ, ການແຕ່ງກິນ ຫຼື ການອອກກຳລັງກາຍ. ສິ່ງນີ້, ຈະຊ່ວຍໃຫ້ສະໝອງໄດ້ພັກຈາກການປຽບທຽບ ແລະ ການກະຕຸ້ນທີ່ເກີນຈຳເປັນ.