Muan RelationTips

“ເຊົາລະເຊົາເດີ ເມົາແລ້ວມັກໂທຫາແຟນເກົ່າ” ວິທີຢຸດອາການເມົາແລ້ວມັກໂທຫາອະດີດຄົນຮັກເກົ່າ

ໂດຍ: Khainapha Chanthathilath

19 December 2024● 151

ກົດເຫຼັກສຳລັບແລງມື້ນີ້ກໍຄື “ຈົ່ງເອົາມືຖືໜີໃຫ້ໄກຈາກຄົນເມົາ” ເພາະເຂົາເຈົ້າອາດກົດສົ່ງຂໍ້ຄວາມໄປຫາຄົນທີ່ບໍ່ຄວນສົ່ງຫາ ໂດຍສະເພາະຄົນໃນຄວາມສຳພັນເກົ່າໆ. ຫຼາຍຄັ້ງ ຮູ້ໂຕອີກເທື່ອກໍຕອນທີ່ສວ່າງເມົາ ແລ້ວເຈົ້າໂຕກັບໄປອ່ານແຊັດຄືນ ຈົນເຖິງຂັ້ນຕ້ອງອຸທານອອກມາວ່າ “ຈິບຫາຍ!”

ອາການເມົາແລ້ວແຊັດໄປຫາເຂົາເຈົ້າໂດຍບໍ່ຕັ້ງໃຈ ນັບເປັນໜຶ່ງພິດຕິກຳທີ່ພົບເຫັນໄດ້ທົ່ວໄປ ຈົນເຖິງຂັ້ນຕ່າງປະເທດມາເຮັດວິໄຈກັນກ່ຽວກັບອາການແຊັດຕອນເມົານີ້.

ໃນທາງພຶດຕິກຳ, ການດື່ມເຄື່ອງດື່ມມຶນເມົາມີຄວາມສຳພັນກັບຄວາມບອບບາງທາງຄວາມຮູ້ສຶກທີ່ເກີດຈາກການດື່ມ ແລະ ສຳພັນກັບການສົ່ງຂໍ້ຄວາມທາງອອນລາຍ. ເຫດຜົນກໍຍ້ອນພາວະແອວກໍຮໍໃນເລືອດສູງ ເຮັດໃຫ້ສະໝອງບາງສ່ວນເຮັດວຽກໄດ້ໜ້ອຍລົງ ໂດຍສະເພາະສ່ວນທີ່ຄວບຄຸມການຢັບຢັ້ງຊັ່ງໃຈ ສົ່ງຜົນໃຫ້ການຄິດໄຕ່ຕອງເຖິງຜົນຂອງການກະທຳເຮັດວຽກໄດ້ບໍ່ເທົ່າຕອນທີ່ບໍ່ເມົາ.

ນອກຈາກນັ້ນ ຍັງມີຜົນການວິໄຈທີ່ວ່າ ແອວກໍຮໍຊ່ວຍເພີ່ມຄວາມໝັ້ນໃຈໃນຕົວເອງ ເຮັດໃຫ້ບາງຄົນຕັດສິນໃຈເຮັດບາງຢ່າງທີ່ໝັ້ນໃຈກວ່າປົກກະຕິ ເຊັ່ນ: ການສະແດງອອກທາງຄວາມຮູ້ສຶກ, ການເວົ້າໃນສິ່ງທີ່ປົກກະຕິຈະບໍ່ເວົ້າ ຫຼື ຄິດວ່າສິ່ງນັ້ນບໍ່ດີ ເລີຍບໍ່ເວົ້າອອກມາ, ມັກເຮັດສິ່ງທີ່ສ່ຽງ ກໍເລີຍເປັນທີ່ມາຂອງການສົ່ງຂໍ້ຄວາມຫາແຟນເກົ່າ ຫຼື ໂທໄປເຄຼຍກັບຄົນທີ່ເຄີຍຜິດໃຈກັນ ເປັນຕົ້ນ.

ນັກວິໄຈມີຄວາມເຫັນວ່າ ການສື່ສານເມື່ອມີອາການເມົາຖືວ່າບໍ່ດີ ເພາະອາດກໍ່ໃຫ້ເກີດຜົນເສຍຕາມມາໄດ້ ລວມທັງມີຜົນຕໍ່ພາບລັກ ໂດຍສະທ້ອນເຖິງການຈັດການອາລົມຂອງເຮົາ ຫຼື ເຮັດໃຫ້ຜູ້ທີ່ເຮົາສົ່ງຫານັ້ນມີບັນຫາ, ລຳບາກໃຈ ຫຼື ລຳຄານໄດ້ ເພາະສ່ວນໃຫຍ່ຕອນທີ່ເມົາກໍຈະເປັນຕອນເດິກດື່ນທ່ຽງຄືນ, ຄົງບໍ່ມີໃຜຮູ້ສຶກມ່ວນທີ່ໄດ້ຮັບຂໍ້ຄວາມຈາກຄົນເກົ່າ ສົ່ງມາເປັນສິບໆຂໍ້ຄວາມ ຫຼື ຖືກໂທຫາມາຕໍ່ວ່າ ໃນຕອນກຳລັງຈະຫຼັບຕານອນ.

ແລ້ວເຮັດແນວໃດຈະຢຸດພຶດຕິກຳເມົາແລ້ວແຊັດຫາແຟນເກົ່າໄດ້?

1. ເຮັດໃຫ້ການສົ່ງຂໍ້ຄວາມ ຫຼື ການເຂົ້າເຖິງລາຍຊື່ທີ່ບໍ່ຄວນສົ່ງຫາ (ແຟນເກົ່າ) ເຂົ້າເຖິງໄດ້ຍາກເຊັ່ນ:

ໃຫ້ໝູ່ຊ່ວຍເບິ່ງຕອນທີ່ເລີ່ມເມົາ ແລະ ເລີ່ມເວົ້າເຖິງຄວາມສຳພັນເກົ່າໆ ໃຫ້ຊ່ວຍເຕືອນສະຕິ ຫຼື ອາດເປີດໂໝດເຮືອບິນຕອນເລີ່ມເມົາກໍໄດ້ (ເຊິ່ງກໍອາດຈະບໍ່ຄ່ອຍດີ ເພາະຖ້າຫາກເກີດເຫດສຸກເສີນມາ ອາດໃຊ້ມືຖືໄດ້ລຳບາກ).

2. ວິທີທີ່ຍາກຂຶ້ນ ແຕ່ອາດຮູ້ສຶກເຈັບປວດແດ່, ແຕ່ຊ່ວຍໄດ້ຫຼາຍແມ່ນຕັດການເຊື່ອມຕໍ່ກັບຄົນໆນັ້ນໄປ ເຊັ່ນ:

ການບຼັອກ ຫຼື ເຊົາຕິດຕາມຄົນທີ່ເຮົາອາດສົ່ງຂໍ້ຄວາມໄປຫາ ແລະ ສ້າງບັນຫາໃຫ້.

ໝູ່ແຕ່ລະຄົນເຄີຍມີປະສົບການເມົາແລ້ວແຊັດຫາຄົນທີ່ບໍ່ຄວນແຊັດຫາບໍ່? ລອງເລົ່າສູ່ເຮົາຟັງໄດ້ເດີ.

ໂດຍ: ທີມບັນນາທິການ Muan