ພວກເຮົາມາຫາກິດຈະກຳເຮັດ ແລະ ມາເລີ່ມຕົ້ນ ເດືອນຕຸລາ 2026 ແບບມ່ວນໆກັນເຖາະ. ຖ້າທຸກຄົນກຳລັງເບິ່ງຫາບ່ອນເລາະພັກຜ່ອນສະໝອງ ຫຼື ຢາກຫາອີ່ຫຍັງໃໝ່ໆເຮັດໃນທ້າຍອາທິດນີ້, ມ່ວນຊວນໄປ ໄດ້ລວມ 4 ກິດຈະກຳ ທີ່ລວມເລື່ອງສິລະປະ ແລະ ວັດທະນະທຳສຸດຊິລມາໄວ້ໃຫ້ແລ້ວ.

ບໍ່ວ່າຈະເປັນການເບິ່ງຮູບເງົາ, ສາຍງານຄຣາຟ-ແຮນເມດ, ຄົນມັກງານສິລະປະ ຫຼື ໃຜທີ່ກຳລັງເບິ່ງຫາກິດຈະກຳຕ້ອນຮັບບຸນອອກພັນສາປີນີ້ ບອກເລີຍວ່າປັກໝຸດໄວ້ ແລ້ວຕາມມາເບິ່ງລາຍລະອຽດແຕ່ລະງານນຳກັນໄດ້ເລີຍ.

CINÉMA OCTOBRE 2026

ສາຍລຸຍ ແລະ ຄົນມັກຄວາມໄວຕ້ອງບໍ່ພາດ, ມ່ວນຊວນໄປ ຈະພາໄປທຸກຄົນໄປເບິ່ງຮູບເງົາ Rodeo ແນວ Drama-Action ຂອງປະເທດຝຣັ່ງ ທີ່ເຄີຍສ້າງຄວາມຮືຮາມາແລ້ວໃນ ເທດສະການຮູບເງົາເມືອງຄານ (Cannes Film Festival).

ເລື່ອງ Rodeo ແມ່ນໄດ້ເລົ່າເຖິງ ຈູເຣຍ ເດັກສາວຜູ້ມີຄວາມຫຼົງໃຫຼໃນການຂີ່ລົດຈັກແບບສຸດຂັ້ນ. ມື້ໜຶ່ງລາວໄດ້ກ້າວເຂົ້າໄປໃນກຸ່ມນັກແຂ່ງລົດຖະໜົນສາຍເຖື່ອນທີ່ມີແຕ່ຜູ້ຊາຍ ແລະ ເຕັມໄປດ້ວຍດ້ານມືດ. ເລື່ອງລາວກຳລັງເຂັ້ມຂຸ້ນ ແຕ່ກໍເກີດອຸບັດເຫດບໍ່ຄາດຝັນທີ່ເຮັດໃຫ້ຊີວິດຂອງລາວ ແລະ ຄົນໃນກຸ່ມ ຕ້ອງແຂວນຢູ່ເທິງຄວາມສ່ຽງ.

ງານນີ້ Institut français du Laos, LanXang Shorts ແລະ European Union in Laos ໄດ້ຮ່ວມມືກັນນຳຮູບເງົາເລື່ອງນີ້ມາສາຍໃຫ້ເຮົາໄດ້ເບິ່ງກັນ. ໃຜມັກຮູບເງົາແນວຕື່ນເຕັ້ນປັກໝຸດໄວ້ແລ້ວຊວນໝູ່ໄປເບິ່ງນຳກັນເດີ.

ລາຍລະອຽດກ່ຽວກັບງານ

• ເຂົ້າຊົມຟຣີ!
• ຂໍ້ມູນກິດຈະກຳ: Institut français du Laos
• ວັນງານ: ວັນທີ 09 ຕຸລາ 2026
• ເວລາ: 18:00 ໂມງ
• ສະຖານທີ່:  Institut français du Laos, ນະຄອນຫຼວງວຽງຈັນ.

Lao Art Week 2026

ເຄີຍເປັນບໍ່… ບາງສະຖານທີ່ທີ່ເຮົາໄປ ເຮົາກັບຮູ້ສຶກອົບອຸ່ນ ແລະ ຢາກກັບໄປອີກ. ແລ້ວຖ້າບ່ອນເກົ່າບ່ອນນັ້ນ ມີງານສິລະປະງາມໆເພີ່ມເຂົ້າມາຕື່ມ ມັນຊິດີຂະໜາດໃດ?

ປີນີ້ Lao Art Week 2026 ກັບມາພ້ອມຄອນເຊັບ Radiant ທີ່ຈະພາເຮົາອອກໄປຄົ້ນຫາຄວາມງາມທີ່ຢູ່ອ້ອມໂຕ. ຄວາມພິເສດແມ່ນໄດ້ຂະຫຍາຍງານໄປເຖິງ 4 ແຂວງ: ຫຼວງພະບາງ, ນະຄອນຫຼວງວຽງຈັນ, ສະຫວັນນະເຂດ ແລະ ຈຳປາສັກ.

ພາຍໃນງານມີຜົນງານສິລະປະຫຼາຍກວ່າ 100 ຊິ້ນ ຈັດສະແດງກະຈາຍຢູ່ຕາມສະຖານທີ່ຕ່າງໆ ຫຼາຍກວ່າ 20 ແຫ່ງ, ພ້ອມກິດຈະກຳມ່ວນໆ ອີກ 10 ກວ່າຢ່າງໃຫ້ຕາມເກັບ.

ໃຜມັກງານສິລະປະ ຫຼື ຢາກຫາບ່ອນເລາະຖ່າຍຮູບງາມໆ ປັກໝຸດໄວ້ເລີຍ ແລ້ວອອກໄປເລາະເບິ່ງນຳກັນວ່າ ທຸກຄົນຊິໄປຄົ້ນພົບຫຍັງແດ່.

ລາຍລະອຽດກ່ຽວກັບງານ

• ມີຄ່າໃຊ້ບາງກິດຈະກຳ ແລະ ສະຖານທີ່
• ຂໍ້ມູນກິດຈະກຳ: Lao Art Week
• ວັນງານ: ວັນທີ 10-25 ຕຸລາ 2026
• ສະຖານທີ່: ຫຼວງພະບາງ, ນະຄອນຫຼວງວຽງຈັນ, ສະຫວັນນະເຂດ ແລະ ຈຳປາສັກ.

Lao Cultural Kathong Workshop

ອອກພັນສາປີນີ້ ໃຜຍັງເຮັດກະທົງບໍ່ເປັນ ຫຼື ບໍ່ຮູ້ຊິໄປຫາອຸປະກອນຢູ່ໃສແດ່? ມ່ວນຊວນໄປ ຊວນມາຈອຍກິດຈະກຳ Lao Cultural Kathong Workshop ນຳກັນ.

ງານນີ້ເຮົາຊິໄດ້ຮຽນຮູ້ຄວາມເປັນມາຂອງປະເພນີ ພ້ອມລົງມືປະດິດກະທົງໃບຕອງ-ດອກໄມ້ສົດດ້ວຍໂຕເອງ. ເລື່ອງອຸປະກອນແມ່ນບໍ່ຕ້ອງຫ່ວງ ເພາະ NAPHA Space & Atelier ກຽມໄວ້ໃຫ້ຄົບຊຸດ ແຖມມີຜູ້ຊ່ຽວຊານຄອຍພາເຮັດ ແລະ ແນະນຳທຸກຂັ້ນຕອນ, ເຮັດບໍ່ເປັນກໍເຮັດໄດ້ສະບາຍ.

ພິເສດຜູ້ເຂົ້າຮ່ວມ ຮັບຟຣີ Gift Voucher ສ່ວນຫຼຸດ 10% ອາຫານ ແລະ ເຄື່ອງດື່ມ ຢູ່ Napha Cafe ອີກດ້ວຍ. ໄດ້ທັງກະທົງງາມໆສີມືໂຕເອງ ໄດ້ທັງສ່ວນຫຼຸດເຄື່ອງດື່ມ. ໃຜກຳລັງເບິ່ງໄວ້ວ່າຈະໄປທ່ຽວບຸນອອກພັນສາປີນີ້ ປັກໝຸດກິດຈະກຳໄວ້ເລີຍ.

ລາຍລະອຽດກ່ຽວກັບງານ

• ມີຄ່າໃຊ້ຈ່າຍ: 18$ / ຄົນ (ຮັບຈຳນວນຈຳກັດ)
• ຂໍ້ມູນກິດຈະກຳ: NAPHA Space & Atelier
• ວັນງານ: ວັນທີ 10-17-24 ຕຸລາ 2026
• ເວລາ: 10:00-12:00 ໂມງ
• ສະຖານທີ່: NAPHA Space & Atelier, ນະຄອນຫຼວງວຽງຈັນ.

ຕະຫຼາດນ້ອຍ Lao Art & Craft Market

ວັນເສົາ-ອາທິດນີ້, ໃຜຢາກຫາບ່ອນເລາະຊິລໆທ່າມກາງບັນຍາກາດຮົ່ມເຢັນຂອງຕົ້ນໄມ້ ພ້ອມທັງມັກງານສິລະປະ ແລະ ງານສີມືມ່ວນຊວນໄປ ຂໍແນະນຳວ່າຕ້ອງລອງໄປບ່ອນນີ້ ຕະຫຼາດນ້ອຍ ທີ່ໄດ້ລວມເອົາຄົນທີ່ມີຄວາມຄິດສ້າງສັນມາໄວ້ຢູ່ບ່ອນນີ້ ເໝາະກັບເປັນສະຖານທີ່ພັກຜ່ອນສະໝອງສຸດໆ.

ທຸກຄົນຈະໄດ້ເລາະເບິ່ງງານສິລະປະ, ເລືອກຊື້ຂອງຄຣາຟ ພ້ອມທັງໄດ້ຮ່ວມກິດຈະກຳ ແລະ ເວີກຊັອບມ່ວນໆນຳກັນອີກດ້ວຍ. ທີ່ສຳຄັນ, ໃຜຊິໄປ ແນະນຳໃຫ້ຫິ້ວຖົງແພ ຫຼື ກ່ອງໃສ່ອາຫານໄປເອງນຳເດີ ເພາະງານເນັ້ນຄວາມເປັນມິດກັບສິ່ງແວດລ້ອມ.

ລາຍລະອຽດກ່ຽວກັບງານ

ເຂົ້າຊົມຟຣີ!

• ຂໍ້ມູນກິດຈະກຳ: Le Padaek
• ວັນງານ: ວັນທີ 10-11 ຕຸລາ 2026
• ເວລາ: 11:00-20:00 ໂມງ
• ສະຖານທີ່: Le Padaek, ນະຄອນຫຼວງວຽງຈັນ.