Deep Talk ແມ່ນເປັນການສົນທະນາຢ່າງເລິກເຊິ່ງ ແລະ ຖືວ່າເປັນສິ່ງສຳຄັນຫຼາຍສຳລັບຄວາມສຳພັນຕ່າງໆບໍ່ວ່າຈະເປັນຄອບຄົວ, ໝູ່ເພື່ອນ ຫຼື ຄົນຮັກ, ເພາະມັນຈະຊ່ວຍໃຫ້ທຸກຄວາມສຳພັນເຂົ້າໃຈກັນໄດ້ຫຼາຍກວ່າແຕ່ພຽງພື້ນຜິວ. ບໍ່ວ່າຈະເປັນເລື່ອງຄວາມຝັນ, ຄວາມຢ້ານ, ສິ່ງທີ່ບໍ່ກ້າບອກ, ອຸປະສັກ ຫຼື ເລື່ອງໃນອະດີດທີ່ທຳຮ້າຍໃຈ.
ການບໍ່ເຂົ້າໃຈ ຫຼື ຜິດໃຈກັນເປັນເລື່ອງປັກກະຕິຂອງມະນຸດເຮົາຢູ່ແລ້ວ, ແຕ່ມັນຈະດີກວ່າຖ້າຄວາມສຳພັນຢູ່ໃນພື້ນຖານຄວາມເຂົ້າໃຈ ແລະ ຮັບຮູ້ວ່າທຸກຝ່າຍຕ້ອງການ, ມັກ ຫຼື ບໍ່ມັກຫຍັງ, ແບບນີ້ຮັບໄດ້ບໍ ການເລືອກລົມເປີດໃຈກັນກໍເພື່ອຫຼີກລ້ຽງບັນຫາຄວາມສຳພັນທີ່ເປັນພິດ.
ການ Deep Talk ບໍ່ພຽງແຕ່ເປັນການເປີດໃຈລົມກັນແບບບໍ່ມີກຳແພງກັ້ນ ແຕ່ມັນຍັງເພີ່ມຄວາມເຂົ້າໃຈເຮັດໃຫ້ເຫັນມຸມມອງຂອງກັນ ແລະ ກັນຊັດເຈນຂຶ້ນ, ຊ່ວຍຫຼຸດຄວາມເຂົ້າໃຈຜິດສິ່ງທີ່ຄ້າງຄາໃນໃຈ, ສ້າງຄວາມຜູກພັນທີ່ເຮັດໃຫ້ຮູ້ສຶກວ່າ
ພວກເຮົາມີໃຜຈັກຄົນທີ່ເບິ່ງແຍງຄວາມຮູ້ສຶກຂອງພວກເຮົາຢ່າງຈິງໃຈ” ແລະ ມັນຍັງຊ່ວຍຈັດການຄວາມຮູ້ສຶກ ໄດ້ແບ່ງເບົາຄວາມຄຽດ, ຄວາມຢ້ານ, ຫຼື ຄວາມບໍ່ໝັ້ນໃຈໃນຄວາມສຳພັນໄດ້.
ແຕ່ການເລີ່ມຕົ້ນ Deep Talk ເບິ່ງຄືຈະເປັນເລື່ອງງ່າຍແຕ່ກໍເປັນສິ່ງທີ່ໃນບາງຄັ້ງເຮັດໃຫ້ຮູ້ສຶກອຶດອັດ, ກ່ອນຈະເວົ້າສິ່ງໃດອອກມາກໍຕ້ອງລະມັດລະວັງ ແລະ ຄວາມເຂົ້າໃຈຄົນນັ້ນແທ້ໆ, ເພື່ອບໍ່ໃຫ້ເກີດຄວາມຜິດໃຈ ຫຼື ຄວາມບໍ່ສະບາຍໃຈລະຫວ່າງທັງສອງຝ່າຍກ່ອນຈະ Deep Talk ນັ້ນເຈົ້າສາມາດສ້າງບັນຍາກາດທີ່ປອດໄພໄດ້.
1. ເລືອກເວລາ ແລະ ສະຖານທີ່ທີ່ເໝາະສົມ
ເລືອກຊ່ວງເວລາທີ່ທັງສອງຝ່າຍຮູ້ສຶກຜ່ອນຄາຍ ແລະ ບໍ່ມີຄວາມກົດດັນເຊັ່ນ: ຕອນແລງທີ່ສະຫງົບ ຫຼື ມື້ທີ່ບໍ່ຕ້ອງຮີບຮ້ອນ ຫຼື ເລືອກສະຖານທີ່ສ່ວນຕົວສະບາຍໆເຊັ່ນ: ການນັ່ງຫຼິ້ນຢູ່ບ້ານ, ຮ້ານກາເຟທີ່ສະຫງົບ ຫຼື ການຍ່າງຢູ່ສວນສາທາລະນະ ໃຫ້ຫຼີກລ້ຽງສະຖານທີ່ທີ່ມີສຽງດັງ ຫຼື ມີຄົນແອອັດ, ເພາະອາດເຮັດໃຫ້ບໍ່ເປັນສ່ວນຕົວ ຫຼື ບໍ່ສາມາດໂຟກັສການສົນທະນາໄດ້.
2. ເລີ່ມດ້ວຍຄວາມຈິງໃຈ ແລະ ສະແດງຄວາມຫວັງດີ
ບອກຈຸດປະສົງຂອງເຈົ້າຢ່າງຈະແຈ້ງຊັດເຈນວ່າຢາກສົນທະນາເພື່ອເຂົ້າໃຈກັນຫຼາຍຂຶ້ນ, ຢາກສ້າງຄວາມສຳພັນທີ່ເລິກເຊິ່ງກວ່າເກົ່າ. ຄວນໃຊ້ຄຳຖາມທີ່ເປີດກວ້າງ, ບໍ່ຕ້ອງກົດດັນ, ຄຳຖາມຕ້ອງບໍ່ຄຸກຄາມ ເປີດໂອກາດ ແລະ ເປີດໃຈເລີ່ມຕົ້ນດ້ວຍການຕັ້ງຄຳຖາມງ່າຍໆທີ່ສາມາດຖາມສາລະສຸກດິບໃນຊີວິດປະຈຳວັນ ຫຼື ການສະແດງຄວາມເປັນຫວ່ງຖາມຄວາມຮູ້ສຶກຂອງອີກຝ່າຍເຊັ່ນ:
– ຊ່ວງນີ້ມີຫຍັງທີ່ກັງວົນ ຫຼື ມີບັນຫາຫຍັງທີ່ຄາໃຈບໍ່? ຂ້ອຍຮູ້ສຶກວ່າພວກເຮົາສະໜິດກັນຫຼາຍ, ແຕ່ຂ້ອຍຢາກຮູ້ຈັກເຈົ້າຫຼາຍກວ່ານີ້ ເຈົ້າຄິດແນວໃດຖ້າພວກເຮົາຈະລົມກັນແບບເລິກໆກ່ຽວກັບຄວາມຮູ້ສຶກ?”
– ເຄີຍຮູ້ສຶກຢ້ານການສູນເສຍຫຍັງທີ່ສຸດບໍ່? ຮູ້ສຶກວ່າພວກເຮົາຕ່າງກັນບ່ອນໃດ ແລະ ຄິດວ່າພວກເຮົາຄວນຈັດການແນວໃດດີ?
– ມີສິ່ງໃດໃນຊີວິດທີ່ເຈົ້າຮູ້ສຶກພູມໃຈທີ່ສຸດບໍ? ຖ້າເຈົ້າສາມາດຝັນໄດ້ໂດຍບໍ່ມີຂໍ້ຈຳກັດເຈົ້າຢາກມີຊີວິດແບບໃດໃນອະນາຄົດ?
– ມີປະສົບການຫຍັງໃນຊີວິດທີ່ເຮັດໃຫ້ເຈົ້າປ່ຽນແປງທາງຄວາມຄິດບໍ?
3. ສະແດງຄວາມເຫັນອົກເຫັນໃຈ ແລະ ບໍ່ຕັດສິນ
ໃຊ້ທັກສະການຟັງຢ່າງຕັ້ງໃຈ Active Listening ທີ່ກ່າວໃນ ທິດສະດີແຫ່ງການຟັງ. ໂດຍໃຫ້ສະແດງຄວາມເຂົ້າໃຈຜ່ານທ່າທາງເຊັ່ນ: ງຶກຫົວ, ສົບຕາ ຫຼື ຄຳເວົ້າທີ່ສະແດງຄວາມເຫັນອົກເຫັນໃຈເຊັ່ນ: “ຂ້ອຍເຂົ້າໃຈວ່າມັນຍາກສຳລັບເຈົ້າ, ເຈົ້າຜ່ານມັນມາໄດ້ແນວໃດ?” ຫຼື “ຂອບໃຈທີ່ແບ່ງປັນ, ຂ້ອຍຮູ້ສຶກວ່າໄດ້ເຂົ້າໃຈເຈົ້າຫຼາຍຂຶ້ນແລ້ວ” ໃຫ້ຫຼີກລ້ຽງການຕັດສິນ ຫຼື ໃຫ້ຄຳແນະນຳທັນທີ ເພາະອາດເຮັດໃຫ້ອີກຝ່າຍຮູ້ສຶກບໍ່ປອດໄພທີ່ຈະແບ່ງປັນຄວາມໃນໃຈຕໍ່.
4. ແບ່ງປັນຄວາມຮູ້ສຶກຂອງຕົນເອງດ້ວຍຄວາມຈິງໃຈ
ເພື່ອສ້າງຄວາມ Balance ໃນການສົນທະນາໃນການແບ່ງປັນຄວາມຮູ້ສຶກ ຫຼື ປະສົບການຂອງເຈົ້າໃນບາງສ່ວນ ເພື່ອສະແດງວ່າເຈົ້າກໍເປີດໃຈ, ການແບ່ງປັນຂອງເຈົ້າຈະເຮັດໃຫ້ຝ່າຍອື່ນຮູ້ສຶກວ່າການສົນທະນາເປັນການແລກປ່ຽນ ແລະ ບໍ່ແມ່ນການສອບຖາມພຽງຝ່າຍດຽວ.
5. ເຄົາລົບຂອບເຂດຂອງກັນ ແລະ ກັນ
ຖ້າອີກຝ່າຍເບິ່ງບໍ່ສະບາຍໃຈ ຫຼື ບໍ່ຕ້ອງການແບ່ງປັນໃນບາງເລື່ອງ ຢ່າບັງຄັບ ຫຼື ຖາມຕື່ມ. ການເຄົາລົບຂອບເຂດກັນ ແລະ ກັນ ຈະເຮັດໃຫ້ຮູ້ສຶກປອດໄພ ແລະ ມີໂອກາດທີ່ຈະເປີດໃຈຫຼາຍຂຶ້ນໃນອະນາຄົດ ໂດຍໃຫ້ສະແດງຄວາມເຂົ້າໃຈດ້ວຍຄຳເວົ້າທີ່ອ່ອນໂຍນເຊັ່ນ: “ບໍ່ເປັນຫຍັງ, ຖ້າເຈົ້າບໍ່ຢາກເວົ້າກ່ຽວກັບເລື່ອງນີ້ ພວກເຮົາສາມາດລົມເລື່ອງອື່ນໄດ້ ຫຼື ບໍ່ເປັນຫຍັງ, ພວກເຮົາລົມເລື່ອງທີ່ເຈົ້າສະບາຍໃຈດີກວ່າເນາະ”.
6. ສິ້ນສຸດການສົນທະນາດ້ວຍຄວາມຮູ້ສຶກໃນທາງບວກ
ຫຼັງຈາກ Deep Talk ແລ້ວ ກໍສະແດງຄວາມຂອບໃຈ ແລະ ຍ້ອງຍໍຊົມເຊີຍການແບ່ງປັນຂອງອີກຝ່າຍ ເພື່ອປິດການສົນທະນາດ້ວຍຄວາມຮູ້ສຶກດີ “ຂອບໃຈຫຼາຍທີ່ເປີດໃຈລົມກັບຂ້ອຍ, ຂ້ອຍຮູ້ສຶກວ່າໄດ້ຮູ້ຈັກເຈົ້າຫຼາຍຂຶ້ນ ແລະ ມັນມີຄວາມໝາຍກັບຂ້ອຍຫຼາຍ” ການສິ້ນສຸດດ້ວຍຄວາມຮູ້ສຶກໃນທາງບວກຈະເຮັດໃຫ້ທັງສອງຝ່າຍຮູ້ສຶກດີ ແລະ ຢາກມີ Deep Talk ກັນອີກໃນອະນາຄົດ.
ຄວາມສຳພັນທີ່ດີບໍ່ພຽງແຕ່ໃຊ້ເລື່ອງຄວາມຮັກພຽງສິ່ງດຽວເທົ່ານັ້ນ ແຕ່ມັນຄືການກ້າເວົ້າ, ກ້າຟັງ, ກ້າຍອມຮັບຄວາມຈິງ ແລະ ກ້າຢູ່ຂ້າງກັນດ້ວຍຄວາມເຂົ້າໃຈ.
