ປ່ອຍໃຫ້ຄວາມຮູ້ສຶກເຕັ້ນ ກ່ອນທີ່ຄຳຕອບຈະຊັດເຈນ ກັບເພງ Dancing on the floor ຈາກ vvvvanno

ເມື່ອເວົ້້າເຖິງແນວເພງປະສົມປະສານລະຫວ່າງ Synth Wave ແລະ Pop ບອກໄດ້ເລີຍວ່າ: Dancing on the floor ຄືໜຶ່ງໃນເພງຈາກສິລະປິນມ້າມືດຢ່າງ VVVVANNO ທີ່ຈະພາຫຼາຍຄົນປ່ອຍໃຈໃຫ້ໄຫຼໄປກັບອາລົມທີ່ຍັງບໍ່ເຄຼຍໃນຄວາມສຳພັນທີ່ບໍ່ຊັດເຈນ.

“Dancing on the floor” ບໍ່ແມ່ນເພງທຳອິດຂອງ VVVVANNO ໂດຍຜົນງານກ່ອນໜ້ານີ້ແມ່ນ Fancy ເຊິ່ງໃຫ້ໝູດເພງຊ້າເພີດເພີນກັບສຽງຮ້ອງ ແລະ ດົນຕີແນວ Jazz R&B ທີ່ແຕກຕ່າງຈາກເພງນີ້ທີ່ໃຫ້ຄວາມຕື່ນເຕັ້ນຫຼາຍກວ່າ.

ບົດເພງນີ້ຈະບອກເລື່ອງລາວບັນຍາກາດລຶກລັບໜ້າຄົ້ນຫາແຕ່ກໍເຕັມໄປດ້ວຍພະລັງຂອງອາລົມ ແລະ ຄວາມມ່ວນທີ່ແຝງຢູ່ໃນທຸກທຳນອງ. ເປັນຄວາມຮູ້ສຶກທີ່ວົນວຽນຢູ່ພາຍໃນໃຈ ໃນຊ່ວງເວລາຂອງຄວາມສຳພັນທີ່ຍັງບໍ່ຊັດເຈນລະຫວ່າງໂຕເອງກັບອີກຄົນທີ່ຮູ້ວ່າຕ່າງຝ່າຍຕ່າງກໍມີໃຈໃຫ້ກັນ ແຕ່ບໍ່ມີໃຜກ້າບອກອອກມາຕົງໆ.

ເພງນີ້ປຽບເໝືອນການປົດປ່ອຍອາລົມທີ່ອັດແໜ່ນຢູ່ຂ້າງໃນຜ່ານເນື້ອເພງ ແລະ ຄວາມດົນຕີແນວ Synth-Pop ທີ່ຈະພາເຮົາລອງລ່ອຍຄວາມຮູ້ສຶກທີ່ອະທິບາຍເປັນຄຳເວົ້າບໍ່ໄດ້ແຕ່ໃຫ້ຄວາມຮູ້ສຶກຢາກໂຢກຍ້າຍຮ່າງກາຍໄປຕາມສຽງດົນຕີ ນັ້ນຄືການເຕັ້ນ.

ການເຕັ້ນຈຶງກາຍເປັນພາສາໃນການສື່ສານຄວາມຮູ້ສຶກແທນຄຳເວົ້າໃນບົດເພງ.