ຫຼັງຈາກທີ່ເບິ່ງມາແລ້ວ 5 ຮອບ, ເຮົາເລີຍຢາກນຳເອົາໜັງທີ່ດີງາມທັງເນື້ອເລື່ອງ, ງານພາບ ແລະ ນັກສະແດງມາແນະນຳໃຫ້ທຸກຄົນໄດ້ເບິ່ງນຳກັນ. The Substance (2024) ທີ່ກຳກັບໂດຍ Coralie Fargeat ເປັນໜັງທີ່ເໝາະສຳລັບຜູ້ທີ່ຢາກເບິ່ງຫຍັງ ທີ່ມີຄວາມໝາຍເລິກເິຊິ່ງປະສົມກັບຄວາມສັ່ນປະສາດ. ໜັງເລື່ອງນີ້ບໍ່ພຽງແຕ່ເປັນໜັງ horror ແບບ body horror ທຳມະດາ, ແຕ່ຍັງມີຄວາມເລິກເຊິ່ງໃນການວິພາກວິຈານສັງຄົມ ໂດຍສະເພາະເລື່ອງຄວາມງາມ ແລະ ຄວາມກົດດັນທີ່ຜູ້ຍິງປະເຊີນ.
ເນື້ອເລື່ອງຫຍໍ້ The Substance
The Substance ເລົ່າເລື່ອງຂອງ Elisabeth Sparkle (ສະແດງໂດຍ Demi Moore), ນັກສະແດງທີ່ເຄີຍດັງໃນອະດີດ ແຕ່ຕອນນີ້ອາຊີບການສະແດງຂອງລາວກຳລັງຈືດຈາງຍ້ອນອາຍຸທີ່ຫຼາຍຂຶ້ນ. ລາວຖືກໄລ່ອອກຈາກລາຍການໂທລະພາບອອກກຳລັງກາຍທີ່ລາວເປັນພິທີກອນ ເພາະຜູ້ບໍລິຫານຄິດວ່າລາວ “ແກ່ເກີນໄປ.” ໃນຄວາມສິ້ນຫວັງ, Elisabeth ໄດ້ໃຊ້ຢາທີ່ເອີ້ນວ່າ “The Substance” ທີ່ສາມາດສ້າງຕົວຕົນອີກຄົນໜຶ່ງທີ່ອ່ອນໄວກວ່າ, ງາມກວ່າ ແລະ ສົມບູນແບບກວ່າ ໄດ້ໂດຍຊົ່ວຄາວ. ແຕ່ກົດການໃຊ້ຢາແມ່ນ: ຕົວຕົນດັ່ງເດີມ (Elisabeth) ແລະ ຕົວຕົນໃໝ່ (Sue, ສະແດງໂດຍ Margaret Qualley) ຕ້ອງແບ່ງເວລາຊີວິດກັນ ຄົນລະ 1 ອາທິດ ສະຫຼັບກັນໄປມາ. ຕໍ່ມາ Sue ກາຍເປັນດາວເດັ່ນທີ່ປະສົບຄວາມສຳເລັດໃນອຸດສາຫະກຳບັນເທີງ ແຕ່ຄວາມຂັດແຍ້ງລະຫວ່າງ Elisabeth ກັບ Sue ກໍ່ເລີ່ມຮຸນແຮງຂຶ້ນ ຈົນນຳໄປສູ່ຄວາມຫາຍະນະ.
ມາດຕະຖານຄວາມງາມຂອງສັງຄົມກົດດັນແມ່ຍິງ
ຄວາມງາມ ແລະ ຄວາມແກ່ເຖົ້າ: ໜັງເລື່ອງນີ້ຕີແຜ່ຄວາມກົດດັນທີ່ຜູ້ຍິງປະເຊີນໃນການຮັກສາຄວາມງາມ ແລະ ຄວາມອ່ອນເຍົາໃນອາຍຸ. Elisabeth ຮູ້ສຶກບໍ່ພໍໃຈກັບຕົວເອງເມື່ອເຫັນຮ່າງກາຍທີ່ແກ່ເຖົ້າລົງ ແລະບໍ່ຕົງກັບມາດຕະຖານທີ່ສັງຄົມຕັ້ງໄວ້. ລາວເລືອກໃຊ້ The Substance ເພາະຢ້ານຈະເຖົ້າ ແລະ ສູນເສຍຄວາມສຳຄັນໃນສາຍອາຊີບຂອງຄົນ. ມັນຄ້າຍຄືກັບທີ່ພວກເຮົາບາງຄົນອາດຮູ້ສຶກບໍ່ດີເມື່ອເບິ່ງຮູບໃນ Instagram ທີ່ຖືກເສີມເຕີມແຕ່ງຈົນງາມເພີເຟັກ ແລ້ວຄິດວ່າຕົວເອງບໍ່ງາມພໍ.
ຕົວຕົນ ແລະ ຄວາມເປັນຕົວຂອງຕົວເອງ ຜ່ານ Elisabeth ແລະ Sue: ໜັງສະແດງໃຫ້ເຫັນຄວາມຂັດແຍ້ງພາຍໃນໃຈ. Sue ຢາກມີຊີວິດຫຼາຍກວ່າ 1 ອາທິດທີ່ກຳນົດໄວ້. ສ່ວນ Elisabeth ກໍ່ອິດສາ Sue ທີ່ປະສົບຄວາມສຳເລັດ. ມັນສະແດງໃຫ້ເຫັນເຖິງການບໍ່ຍອມຮັບຕົວເອງ ແລະ ພະຍາຍາມສ້າງຕົວຕົນໃໝ່ທີ່ “ດີກວ່າ” ເຊິ່ງສາມາດທຳລາຍຕົວເອງໄດ້. ຄືກັບບາງຄົນທີ່ສ້າງພາບລັກໃໝ່ໃນ social media ແຕ່ສຸດທ້າຍກໍ່ບໍ່ມີຄວາມສຸກກັບຊີວິດຕົວຈິງ.
ການວິພາກວິຈານສັງຄົມ: ໜັງວິຈານສັງຄົມທີ່ບູຊາຄວາມງາມ ແລະ ຄວາມໜຸ່ມສາວ ໂດຍສະເພາະໃນອຸດສາຫະກຳບັນເທີງ. ຕົວລະຄອນ Harvey (ສະແດງໂດຍ Dennis Quaid) ຜູ້ບໍລິຫານທີ່ໂຫດຮ້າຍ ສະແດງໃຫ້ເຫັນວ່າອຸດສາຫະກຳນີ້ມັກຖິ້ມຄົນທີ່ແກ່ຕົວລົງໄວ້ເບື້ອງຫຼັງ ແລະ ໄລ່ລ່າສິ່ງໃໝ່ໆຢູ່ສະເໝີ. ມັນຄ້າຍກັບສັງຄົມທີ່ບໍ່ຄ່ອຍໃຫ້ຄ່າປະສົບການ ແຕ່ມຸ່ງໄປທີ່ຄວາມງາມພາຍນອກ.
ສະຫຼຸບກໍຄື The Substance ສະທ້ອນເຖິງຄວາມກົດດັນທີ່ຜູ້ຍິງຕ້ອງຮັກສາຄວາມງາມ ແລະ ຄວາມໜຸ່ມ ພ້ອມກັບຄວາມບໍ່ພໍໃຈທີ່ມາຈາກການພະຍາຍາມບັນລຸມາດຕະຖານທີ່ເກີນຄວາມເປັນຈິງ. ມັນເຕືອນໃຈວ່າການບໍ່ຍອມຮັບຕົວເອງ ແລະ ການພະຍາຍາມສ້າງຕົວຕົນໃໝ່ຜ່ານວິທີທີ່ບໍ່ເປັນທຳມະຊາດ (ຄືການໃຊ້ຢາໃນໜັງ) ຈະນຳໄປສູ່ຄວາມຫາຍະນະ. ສຸດທ້າຍ, ໜັງບອກວ່າການຫຼົບຫຼີກຄວາມເປັນຈິງຂອງຕົວເອງ “ບໍ່ຊ່ວຍແກ້ບັນຫາ”, ແຕ່ຈະຍິ່ງເຮັດໃຫ້ຊີວິດເພພັງ.
The Substance ເປັນໜັງທີ່ສະຫຼັບສັບຊ້ອນ, ມີຫຼາຍມິຕິ ໂດຍສະເພາະເລື່ອງຄວາມງາມ, ຄວາມແກ່ເຖົ້າ ແລະ ຕົວຕົນ. ມັນສະທ້ອນເຖິງຄວາມກົດດັນທາງສັງຄົມທີ່ຜູ້ຍິງຕ້ອງປະເຊີນ ແລະ ຄວາມບໍ່ພໍໃຈຈາກການໄລ່ຕາມມາດຕະຖານທີ່ບໍ່ເປັນຈິງ. ເຮົາຄິດວ່າ ໜັງເລື່ອງນີ້ເປັນການເຕືອນໃຈໃຫ້ຮູ້ຄຸນຄ່າຂອງຕົວເອງ ແລະ ບໍ່ຕົກເປັນເຫຍື່ອຂອງຄວາມກົດດັນຈາກສັງຄົມ — ໂດຍສະເພາະໃນຍຸກນີ້ທີ່ social media ມັກເຮັດໃຫ້ພວກເຮົາຮູ້ສຶກວ່າຕົວເອງບໍ່ດີພໍ. ມັນຄືການບອກວ່າ ການພະຍາຍາມເປັນ “ຄົນອື່ນ” ຈະບໍ່ຊ່ວຍໃຫ້ມີຄວາມສຸກ ແຕ່ຈະຍິ່ງເຮັດໃຫ້ຮູ້ສຶກຫວ່າງເປົ່າຫຼາຍຂຶ້ນ!
ອ້າງອີງ:
- https://www.imdb.com/title/tt17526714/
- https://www.rottentomatoes.com/m/the_substance
- https://www.forbes.com/sites/erikkain/2025/01/18/despite-rave-reviews-the-substance-is-actually-a-pretty-bad-movie/
