ສາຍເບິ່ງຮູບເງົາລາວບໍ່ຄວນພາດ ກັບເລື່ອງ Shadow – ເງົາ ຖືກນຳມາສາຍຄືນໃໝ່ພິເສດພຽງຮອບດຽວ
ຖ້າໃຜທີ່ເຄີຍພາດບໍ່ໄດ້ເບິ່ງຮູບເງົາລາວເລື່ອງ “Shadow ຫຼື ເງົາ” ເມື່ອປີ 2022 ບອກເລີຍວ່າເທື່ອນີ້ເປັນໂອກາດທີ່ດີຫຼາຍ ເພາະເລື່ອງນີ້ຖືກເອົາມາສາຍຄືນໃໝ່ອີກຄັ້ງ ໃນງານສັບປະດາຮູບເງົາວັດທະນະທຳ ຈີນ-ອາຊຽນ ປີ 2026 ນີ້.
ມ່ວນຊວນເບິ່ງ ຂໍອະທິບາຍຄວາມພິເສດຂອງເລື່ອງນີ້ກ່ອນໜ້ອຍໜຶ່ງເດີ ແລະ ຂໍເວົ້າເຖິງ ຜູ້ກຳກັບ ສຸລະຊາດ ສຸວັນນະວົງ ທີ່ລາວໄດ້ດຶງເອົາເລື່ອງລາວ, ປະສົບການຈິງຈາກຊີວິດຂອງລາວເອງມາເລົ່າຜ່ານຮູບເງົາເລື່ອງນີ້ ແລະ ຕອນນັ້ນຍັງລົງມາຫຼິ້ນເປັນນັກສະແດງນຳອີກດ້ວຍ.
ທີ່ຜ່ານມາ, ຮູບເງົາເລື່ອງນີ້ກໍຍັງສ້າງປາກົດການໄປໄກຮອດລະດັບສາກົນ ແລະ ຄຳຮູ້ ພັນລືເດດ ນັກສະແດງຫຼັກອີກຄົນໜຶ່ງຂອງເລື່ອງ ກໍຍັງສາມາດຄວ້າລາງວັນນັກສະແດງດີເດັ່ນ ຫຼື Best Actor ຈາກງານເທດສະການຮູບເງົາສິລະປະເມືອງເບີລິນ ຄັ້ງທີ 8 ຢູ່ປະເທດເຢຍລະມັນ ມາຄອງ.
ເພາະຄວາມທຸ່ມເທນີ້ເອງເຮັດໃຫ້ລາງວັນນີ້ມີຄວາມໝາຍກັບວົງການຮູບເງົາລາວເຮົາຫຼາຍ ແລະ ຈຸດເດັ່ນທີ່ເຮັດໃຫ້ເລື່ອງ Shadow ໜ້າຕິດຕາມ ແມ່ນວິທີການເລົ່າເລື່ອງທີ່ຊວນໃຫ້ຄົນເບິ່ງໄດ້ຄິດ ແລະ ເດົາທາງໄປນຳຕັ້ງແຕ່ຕົ້ນຈົນຈົບ ແຖມຍັງຝາກຂໍ້ຄິດດີໆນຳອີກ.
ຮູບເງົາເລື່ອງ Shadow ຈະຖືກສາຍຢູ່ທີ່ Major Cineplex ເດີທຸກຄົນ, ຈະໄດ້ເບິ່ງພຽງຮອບດຽວເທົ່ານັ້ນ ໃນວັນທີ 29 ກັນຍາ 2026 ເວລາ 12:00 – 13:45 ໂມງ ທີ່ສໍາຄັນແມ່ນໃຜທີ່ຢາກເບິ່ງສາມາດໄປຮັບປີ້ຢູ່ໜ້າໂຮງໄດ້ເລີຍ (ເບິ່ງຟຣີ!), ຢ່າລືມຊວນໝູ່ໄປເບິ່ງນຳກັນເດີ.