ຖ້າຕ້ອງສູນເສຍຕົວຕົນຈາກຄວາມຮັກ ຈະຢູ່ຕໍ່ ຫຼື ຍ່າງອອກມາ? ຊອກຄຳຕອບໃນຮູບເງົາ “ແດ່ຄວາມຮັກ PHILO”
ເມື່ອ “ຄວາມຮັກ” ກາຍເປັນ ກົງຂັງ… ເຈົ້າຈະເລືອກຢູ່ຕໍ່ ຫຼື ຍ່າງອອກມາ?
ແດ່ຄວາມຮັກ PHILO ຮູບເງົາລາວທີ່ຈະພາເຮົາໄປສຳຜັດອີກດ້ານໜຶ່ງຂອງຄວາມຮັກ ທີ່ອາດຈະບໍ່ໄດ້ສວຍງາມສະເໝີໄປ.
ຫຼັງຈາກໄດ້ເບິ່ງຕົວຢ່າງສະບັບເຕັມທີ່ຫາກໍປ່ອຍອອກມາມື້ວານນີ້, ມ່ວນຊວນເບິ່ງ ບອກເລີຍວ່າ ຄວາມຮູ້ສຶກທຳອິດທີ່ໄດ້ຮັບຄື ຄວາມອຶດອັດ ແລະ ບີບຄັ້ນອາລົມສຸດໆ ຈົນເຮັດໃຫ້ຢາກຮູ້ວ່າ ແທ້ຈິງແລ້ວ, ເລື່ອງລາວຂອງຮູບເງົາເລື່ອງນີ້ກຳລັງຈະພາເຮົາໄປພົບກັບຫຍັງ.
ເພາະຖ້າຢ້ອນກັບໄປເບິ່ງ ຕົວຢ່າງສັ້ນທີ່ປ່ອຍອອກມາກ່ອນໜ້ານີ້, ພາບຈຳທຳອິດຂອງເຮົາແມ່ນ ນີ້ອາດເປັນຮູບເງົາຮັກທີ່ມີກິ່ນອາຍຄວາມໂຣແມນຕິກ, ອົບອຸ່ນ ແລະ ຊວນໃຫ້ອິນໄປກັບຄວາມສຳພັນຂອງຕົວລະຄອນ.
ແຕ່ພໍມາເຖິງຕົວຢ່າງເຕັມ, ທຸກຢ່າງຊໍ້າພັດປ່ຽນໄປ. ຈາກຄວາມຮັກທີ່ເບິ່ງຄືຈະອົບອຸ່ນ ມັນຄ່ອຍໆເຜີຍໃຫ້ເຫັນອີກດ້ານທີ່ໜັກໜ່ວງກວ່າທີ່ຄິດ ນັ້ນກໍຄື ເລື່ອງລາວທີ່ສະທ້ອນຊີວິດຄູ່, ຄວາມເຈັບປວດ ແລະ ສະພາບຄວາມສຳພັນໃນຄອບຄົວທີ່ໂຫດຮ້າຍ ທີ່ ພາຍ (ຮັບບົດໂດຍ ປຸ້ຍ – ເກດມະນີ ວົງປະເສີດ) ທີ່ເປັນພຽງຜູ້ຍິງຄົນໜຶ່ງຕ້ອງປະເຊີນ.
ໃນຂະນະດຽວກັນ, ອາທິດ (ຮັບບົດໂດຍ ນູ່ – ພອນສະຫວັນ ເກດຕະວົງ) ເຊິ່ງເປັນສາມີຂອງພາຍ ກໍໃຊ້ວິທີຄິດຂອງລາວໃນການປະຄັບປະຄອງຄອບຄົວໃຫ້ໄປຕໍ່ໄດ້ ເຊິ່ງໃນມຸມຂອງ ພາຍ ພັດເຫັນວ່າ ນັ້ນເປັນສິ່ງທີ່ກັກຂັງລາວໃຫ້ຂາດອິດສະລະໃນການເປັນຕົວເອງ.
ສິ່ງນີ້ເອງທີ່ເຮັດໃຫ້ລາວຕ້ອງໄດ້ເອົາໂຕເອງອອກຈາກສະພາບດັ່ງກ່າວ ເພື່ອໄປຢຽວຢາຈິດໃຈ ແລະ ດຶງເອົາຄວາມເປັນຕົວເອງກັບມາ ເຊິ່ງລາວໄດ້ໄປພົບກັບ ໂລ (ຮັບບົດໂດຍ ອາທິດ ສີລາວົງ) ທີ່ເປັນເຈົ້າຂອງໂຮມສະເຕຢູ່ດອນແດງ ເຊິ່ງມັນເຮັດໃຫ້ລາວໄດ້ກັບມາຄິດຄືນວ່າ ຄວາມຮັກທີ່ແທ້ຈິງແລ້ວຄວນເປັນແບບໃດ.
ປະເດັນທີ່ໜ້າສົນໃຈໃນເລື່ອງ “ແດ່ຄວາມຮັກ PHILO” ຄື ຜູ້ກຳກັບ ດິ້ງ – ອາທິດໄຊ ບວນດາວເຮືອງ ເລືອກພາເຮົາໄປສຳຜັດກັບຄວາມຮັກໃນມຸມທີ່ເບິ່ງຄືຈະເຈາະເລິກໄປກວ່າຄວາມສຳພັນຂອງຄົນສອງຄົນ ແລະ ຊວນໃຫ້ຄົນເບິ່ງໄດ້ຮຽນຮູ້, ທົບທວນ ແລະ ຖອດຖອນວິທີຄິດຈາກຊີວິດຄວາມສຳພັນຂອງຕົວລະຄອນໄປພ້ອມກັນ.
ເພາະບາງຄັ້ງ, ສິ່ງທີ່ເຮົາເອີ້ນວ່າ ຄວາມຮັກ ອາດກາຍເປັນສິ່ງດຽວກັນທີ່ກັກຂັງເຮົາໄວ້ ໂດຍບໍ່ຮູ້ຕົວ. ສຸດທ້າຍແລ້ວ, ທຸກຄົນຄິດວ່າຕົວລະຄອນ ພາຍ ຈະເລືອກທາງໃດ ຫຼື ລາວຈະເລືອກກັບມາຮັກຕົວເອງ?
ມ່ວນຊວນເບິ່ງ ຢາກຊວນທຸກຄົນໄປຄົ້ນຫາຄຳຕອບ ແລະ ສຳຜັດທຸກຄວາມຮູ້ສຶກພ້ອມກັນໃນ ແດ່ຄວາມຮັກ PHILO ເຊິ່ງຕອນນີ້ໄດ້ປ່ອຍຕົວຢ່າງອອກມາໃຫ້ເບິ່ງແລ້ວ.
ຢ່າລືມເດີ, ເຮົາມີນັດມາເບິ່ງພ້ອມກັນ ໃນວັນທີ 5 ພະຈິກ 2026 ທີ່ ໂຮງຮູບເງົາ ທົ່ວປະເທດລາວ.