Muan Watch - ມ່ວນຊວນເບິ່ງ

ຄວາມຮັກຈະເປັນແນວໃດ? ເມື່ອຍັງຖືກສັງຄົມປິດກັ້ນຄວາມເປັນພວກເຂົາ ເບິ່ງຊີຣີສ໌ເລື່ອງ Love in the Big City

ໂດຍ: Khainapha Chanthathilath

16 January 2025● 335

ມື້ນີ້ມ່ວນມີຊີຣີສ໌ດີໆອີກໜຶ່ງເລື່ອງມາເລົ່າສູ່ທຸກຄົນຟັງ ແລະ ໄດ້ຈັບປະເດັນທາງສັງຄົມທີ່ສຳຄັນຢ່າງ LGBTQ+ ເນື່ອງຈາກໄດ້ຮັບອັບເດດວ່າປະເທດໄທ “ໄດ້ອະນຸມັດໃຫ້ມີກົດໝາຍຮອງຮັບສົມລົດເທົ່າທຽມ” ມ່ວນເລີຍຢາກນຳປະເດັນທີ່ໜ້າສົນໃຈໃນຊີຣີສ໌ເລື່ອງ Love in the Big City (2024) ມານຳສະເໜີ.

ໂດຍເນື້ອຫາແມ່ນໄດ້ເລົ່າກ່ຽວກັບການໃຊ້ຊີວິດໃນເມືອງໃຫຍ່ຂອງກຸ່ມຄົນລຸ້ນໃໝ່ໃນ ໂຊລ ເກົາຫຼີໃຕ້ ທີ່ບອກເລົ່າເຖິງຄວາມສຳພັນຂອງກຸ່ມໝູ່ເພື່ອນ ແລະ ຄົນຮັກທີ່ຕ້ອງປະເຊີນກັບຄວາມຊັບຊ້ອນຂອງຊີວິດ ທັງເລື່ອງຄວາມຮັກ, ສຸຂະພາບ, ການຊອກຫາຕົວຕົນ ແລະ ການດຳເນີນຊີວິດໃນເມືອງໃຫຍ່ທີ່ເຕັມໄປດ້ວຍຄວາມວຸ່ນວາຍ.

Love in the Big City (2024) ມີປະເດັນທີ່ໜ້າສົນໃຈກໍຄືໃນເລື່ອງໄດ້ເລົ່າເຖິງມຸມມອງຊີວິດຂອງຊາຍໜຸ່ມທີ່ມີຊື່ວ່າ Go Yeong ລາວມີຄວາມມັກສ່ວນຕົວຄືການຮັກເພດດຽວກັນ, ການພະຍາຍາມໃຊ້ຊີວິດໃນແບບທີ່ຕົວເອງຕ້ອງການໂດຍບໍ່ຢາກໃຫ້ຖືກຈຳກັດ ແລະ ການຕີຂອບເຂດກັບຮູບແບບສັງຄົມແບບເກົ່າ. ລາວຍັງໄດ້ປະເຊີນກັບຄວາມທ້າທາຍໃນການຄົ້ນຫາຕົວຕົນ, ຄວາມສັບຊ້ອນໃນຄວາມສຳພັນ ແລະ ຊີວິດຮັກ, ຄວາມໂດດດ່ຽວ ແລະ ຕ້ອງໄດ້ຮັບມືກັບແຮງກົດດັນຈາກທາງສັງຄົມທີ່ຍັງບໍ່ເປີດກວ້າງໃນເພດທີ່ມີອັກຄະຕິຕໍ່ກຸ່ມ LGBTQ+.

ບົດບາດຄວາມເປັນ LGBTQ+ ໃນ Love in the Big City ກໍໄດ້ຖືກເລົ່າເຖິງໃນມຸມມອງທີ່ມີຄວາມເລີກເຊິ່ງຫຼາຍ, ເຮັດໃຫ້ເຫັນເຖິງຄວາມທ້າທາຍ ແລະ ຂໍ້ຫຍຸ້ງຍາກຫຼາຍຢ່າງໃນດ້ານວັດທະນະທຳສັງຄົມເກົາຫຼີ, ເລື່ອງລາວໄດ້ດຳເນີນຊີວິດຮັກຂອງພວກເຂົາທີ່ມີທັງຄວາມສຸກ, ຄວາມເຈັບປວດ ແລະ ຂໍ້ຈຳກັດຕ່າງໆ.

ໃຜທີ່ກຳລັງຫາຊີຣີສ໌ເບິ່ງຕ້ອງລອງ, ພວກເຮົາຈະຮູ້ອີກຄຸນຄ່າ ແລະ ອີກໜຶ່ງມຸມມອງຂອງຊີວິດຈາກເລື່ອງນີ້ Love in the Big City ມີທັງໝົດ 8 ຕອນ ເບິ່ງ Streaming ໄດ້ທີ່ Netflix.

ໂດຍ: ທີມບັນນາທິການ Muan