Muan RelationTips

ຝົນຕົກເຈົ້າເສົ້າບໍ່? ໄດ້ຍິນສຽງຝົນເທື່ອໃດກໍກາຍເປັນຄົນຂີ້ເຫງົາ ແລະ ຢາກໄດ້ກອດອຸ່ນໆຫຼາຍກວ່າປົກກະຕິ

ໂດຍ: Khainapha Chanthathilath

13 May 2026● 83

ເຄີຍສົງໄສບໍ່? ເປັນຫຍັງພໍຝົນເລີ່ມຕົກໜັກໆໃສ່ຫຼັງຄາ, ບາງເທື່ອເຈົ້າກໍຮູ້ສຶກ ຂີ້ຄ້ານ ແບບບອກບໍ່ຖືກ ຢາກນອນຢູ່ຊື່ໆ, ບໍ່ຢາກເຮັດຫຍັງ ຢາກຖິ້ມທຸກຢ່າງ ແລ້ວນອນມຸດຜ້າຫົ່ມຢູ່ຊື່ໆ ໂດຍບໍ່ຕ້ອງຄິດເລື່ອງໃດໆໃຫ້ປວດຫົວ ແລະ ໃນມື້ທີ່ຝົນຕົກ, ທຸກຄວາມຮູ້ສຶກມັນມັກຈະແລ່ນມາກອງກັນຢູ່ບ່ອນດຽວ.

ແຕ່ໃນຄວາມງຽບນັ້ນ… ບາງເທື່ອກໍມີ ຄວາມເຫງົາ ຈົນຢາກມີໃຜຈັກຄົນມານັ່ງຢູ່ຂ້າງໆ ຫຼື ຢາກກອດໃຜຈັກຄົນໃຫ້ອຸ່ນຂຶ້ນ ຫຼື ມີ ພື້ນທີ່ປອດໄພ ໃຫ້ຫົວໃຈໄດ້ພັກຜ່ອນແທ້ໆ.

ຖ້າເຈົ້າເຄີຍເປັນແບບນີ້ຄືກັນມາລອງປ່ຽນສຽງຝົນທີ່ເຮັດໃຫ້ເສົ້າໃຫ້ກາຍເປັນສຽງທີ່ຟັງແລ້ວຮູ້ສຶກວ່າສະບາຍໃຈ ແລະ ສຳຜັດກອດທີ່ອົບອຸ່ນດ້ວຍ 3 ວິທີງ່າຍໆນີ້ກັນ.

ປ່ຽນສຽງຝົນໃຫ້ເປັນ “ຜ້າມ່ານສຽງ”

ໃນທາງຈິດຕະວິທະຍາ, ສຽງຝົນ ມີຊື່ເອີ້ນວ່າເປັນ ສຽງສີບົວ ທີ່ຊ່ວຍຫຼຸດຄວາມກັງວົນ, ຄວາມຄຽດ ແລະ ສຽງວຸ່ນວາຍຈາກສິ່ງລົບກວນພາຍນອກເຮັດໃຫ້ມີສະມາທິ ແລະ ຜ່ອນຄາຍ.

ແທນທີ່ຈະປ່ອຍໃຫ້ໃຈລອຍໄປກັບຄວາມເສົ້າ ພວກເຮົາລອງມາເປີດໃຈຟັງສຽງຝົນແລ້ວຄິດວ່າມັນຄື ຜ້າມ່ານທີ່ກຳລັງກັນຄວາມວຸ່ນວາຍອອກໄປ ເພື່ອໃຫ້ເຈົ້າໄດ້ຢູ່ກັບຕົນເອງແທ້ໆ ເຊິ່ງມັນຈະຊ່ວຍໃຫ້ສະໝອງເຮົາຟື້ນຟູພະລັງງານໄດ້ໄວຂຶ້ນຫຼາຍ.

ໃຊ້ພະລັງແຫ່ງການກອດ

ຄວາມເຫງົາໃນມື້ຝົນຕົກ ແກ້ໄດ້ດ້ວຍການສ້າງຄວາມອົບອຸ່ນທີ່ສົ່ງພະລັງບວກໃຫ້ຈິດໃຈ ເຊິ່ງການກອດບໍ່ໄດ້ຈຳກັດແຕ່ກັບຄົນຮັກເທົ່ານັ້ນເດີ. ແຕ່ເຮົາຍັງສາມາດຮັກສາຄວາມສຳພັນກັບສິ່ງອ້ອມຕົວເຮົາຄື ຄອບຄົວ, ສັດລ້ຽງ ຫຼື ກັບຕົນເອງ ກໍໄດ້.

ຖືວ່າຝົນຕົກແມ່ນເວລາຂອງການພັກຜ່ອນ, ລອງວາງມືຖື ແລ້ວນັ່ງເບິ່ງ ຫຼື ນັ່ງຟັງສຽງຝົນ ລົມປຶກສາກັນກັບຄົນທີ່ຮັກເພື່ອແລກປ່ຽນຄວາມຄິດ, ກອດກັນເພື່ອສ້າງຄວາມເຂົ້າໃຈ ຫຼື ຈະກອດນ້ອງໝາ-ນ້ອງແມວ ໃນມື້ຝົນຕົກ ກໍຈະຊ່ວຍຫຼັ່ງຮໍໂມນແຫ່ງຄວາມສຸກ.

ແຕ່ຖ້າເຮົາຢູ່ຄົນດຽວ, ການກອດໝອນຂ້າງອຸ່ນໆ ຫຼື ຫໍ່ໂຕດ້ວຍຜ້າຫົ່ມນຸ້ມໆ ກໍຊ່ວຍໃຫ້ສະໝອງຮູ້ສຶກປອດໄພໄດ້ຄືກັນເດີ.

ປ່ຽນຄວາມຂີ້ຄ້ານໃຫ້ເປັນການຮັກສາໃຈ

ຢ່າຮູ້ສຶກຜິດທີ່ຢາກນອນຢູ່ຊື່ໆໃນມື້ຝົນຕົກ, ໃຫ້ຄິດວ່າທຳມະຊາດກຳລັງບັງຄັບໃຫ້ເຮົາພັກຜ່ອນ. ລອງຈູດທຽນຫອມ, ຈິບນ້ຳອຸ່ນໆ ຫຼື ຟັງເພງເບົາໆ ປ່ຽນບັນຍາກາດທີ່ເຄີຍເສົ້າ ໃຫ້ກາຍເປັນ Home Spa ນ້ອຍໆໃນຫ້ອງເຈົ້າເອງ.

“ກອດທີ່ອົບອຸ່ນ” ຈາກຄົນສຳຄັນຂອງເຮົາມັນຈະຊ່ວຍໃຫ້ມື້ທີ່ຮູ້ສຶກບໍ່ດີ ກາຍເປັນມື້ທີ່ອົບອຸ່ນ ແລະ ພິເສດຂຶ້ນມາ ຕໍ່ຈາກນີ້ໃຫ້ສຽງຝົນຕົກກາຍເປັນອີກສິ່ງໜຶ່ງທີ່ຄ່ອຍໂອບກອດຫົວໃຈເຈົ້າໃຫ້ຜ່ອນຄາຍເດີ.🤍

ແລ້ວທຸກຄົນເດ, ມື້ຝົນຕົກແບບນີ້ ມັກກອດໃຜ ຫຼື ກອດຫຍັງທີ່ສຸດ?