ໝົດຍຸກຄ້າຍເພງເປັນເຈົ້ານາຍ ພາສ່ອງໂມເດວ ‘ເຄິ່ງເກົ້າ ກຣຸບ’ ທີ່ວົງການເພງລາວຕ້ອງຮູ້
Key Takeaways:
- ໂອມ Cocktail ໄດ້ເປີດໂຕ "ເຄິ່ງເກົ້າ ກຣຸບ" (Kruengkao Group) ເຊິ່ງເປັນຄ້າຍເພງທີ່ບໍ່ໄດ້ຮັບການສ້າງຕັ້ງຂຶ້ນຕາມລະບົບເກົ່າ ແຕ່ເປັນການສ້າງລະບົບນິເວດດົນຕີທີ່ເປັນທໍາ ແລະ ຍືນຍົງ.
- ຈຸດເດັ່ນຂອງ"ເຄິ່ງເກົ້າ ກຣຸບ" ຄືການປ່ຽນຮູບແບບການເຮັດວຽກຂອງຄ້າຍເພງ ຈາກ "ຜູ້ອຸປະຖຳ" ມາເປັນ "ຜູ້ໃຫ້ບໍລິການ" (Service Provider) ທີ່ສະໜັບສະໜູນສິລະປິນ.
- "ເຄິ່ງເກົ້າ ກຣຸບ" ໄດ້ກຳນົດ 4 ເສົາຫຼັກຄື: 1. ສິລະປິນຄື Partner 2. ຈັດການເລື່ອງວຸ້ນວາຍໃຫ້ຢ່າງມືອາຊີບ 3. ຄວາມໂປ່ງໃສຄືຫົວໃຈຫຼັກ 4. ຄືນສິດຄວາມເປັນເຈົ້າຂອງໃນຜົນງານໃຫ້ຜູ້ສ້າງສັນ.
- "ເຄິ່ງເກົ້າ ກຣຸບ" ໄດ້ແບ່ງການບໍລິຫານອອກເປັນ 4 ຄ້າຍຍ່ອຍຄື: MACHg, 9 Arkkhan, BRIDGE, ແລະ ENNEAD ເພື່ອຕອບສະໜອງແນວດົນຕີທີ່ຫຼາກຫຼາຍ.
- ອຸດສາຫະກຳດົນຕີລາວສາມາດຮຽນຮູ້ແນວຄິດ "ຄວາມຢືດຢຸ່ນ ແລະ ຄວາມເປັນທໍາ" ຈາກ "ເຄິ່ງເກົ້າ ກຣຸບ" ເພື່ອສ້າງການເຕີບໂຕທີ່ແຂງແຮງ ແລະ ປ້ອງກັນບັນຫາຂັດແຍ້ງໃນອະນາຄົດ.
ໃນຍຸກທີ່ສິລະປິນອິດສະຫຼະເກີດຂຶ້ນຄືກັບດອກເຫັດ, ຄຳຖາມທີ່ວ່າ ຄ້າຍເພງຍັງຈຳເປັນຢູ່ບໍ່? ກາຍເປັນໂຈດໃຫຍ່ທີ່ຄົນເຮັດເພງທົ່ວໂລກກຳລັງຊອກຫາຄຳຕອບ. ລວມເຖິງວົງການດົນຕີໄທ ທີ່ຫຼ້າສຸດ ໂອມ Cocktail (ປັນທະພົນ ປຣະສານຣາຊະກິດ) ສິລະປິນ ແລະ ນັກບໍລິຫານວິໄສທັດໄກ ໄດ້ອອກມາສ້າງແຮງສັ່ນສະເທືອນຄັ້ງໃໝ່ດ້ວຍການເປີດໂຕ “ເຄິ່ງເກົ້າ ກຣຸບ” (Kruengkao Group).
ນີ້ບໍ່ແມ່ນພຽງແຕ່ການເປີດຄ້າຍເພງໃໝ່ທົ່ວໄປ ແຕ່ມັນຄືການຮື້ຖອນກະຕິກາເກົ່າໆ ເພື່ອສ້າງລະບົບນິເວດດົນຕີທີ່ເປັນທຳ ແລະ ຍືນຍົງ. ເຮົາເຊື່ອວ່າ ນີ້ຄືບົດຮຽນທີ່ຄ້າຍເພງ ແລະ ສິລະປິນໃນລາວເຮົາສາມາດນຳມາຖອດລະຫັດເພື່ອປັບໃຊ້ໄດ້ບໍ່ທາງໃດກໍທາງໜຶ່ງ.
ຈາກ “ຜູ້ອຸປະຖຳ” ສູ່ “ຜູ້ໃຫ້ບໍລິການ”
ຈຸດເດັ່ນທີ່ສຸດຂອງ ເຄິ່ງເກົ້າ ກຣຸບ ຄືການປ່ຽນ Mindset ຂອງຄ້າຍເພງ ຈາກການເປັນ ຜູ້ມີພະຄຸນ ທີ່ຄອຍກຳນົດທຸກຢ່າງ ມາເປັນ Service Provider ຫຼື ຜູ້ໃຫ້ບໍລິການ ທີ່ສະໜັບສະໜຸນສິລະປິນ.
ໃນນີ້ ມີ 4 ເສົາຫຼັກທີ່ໜ້າສົນໃຈຄື:
- ສິລະປິນຄື Partner ບໍ່ແມ່ນ ລູກນ້ອງ: ຄ້າຍຈະເບິ່ງສິລະປິນເປັນຄູ່ຄ້າ ແລະ ລູກຄ້າຄົນສຳຄັນ ທີ່ພ້ອມຈະເຕີບໂຕໄປນຳກັນແບບເທົ່າທຽມ ໂດຍການອອກແບບການສະໜັບສະໜຸນໃຫ້ເໝາະກັບຕົວຕົນຂອງແຕ່ລະຄົນແທ້ໆ.
- ຈັດການເລື່ອງປວດຫົວໃຫ້ຢ່າງມືອາຊີບ: ປ່ອຍໃຫ້ສິລະປິນສ້າງສັນຜົນງານໄດ້ 100% ເພາະຄ້າຍຈະເບິ່ງແຍງເລື່ອງການຕະຫຼາດ, ບັນຊີ, ກົດໝາຍ ໄປຈົນເຖິງການຜະລິດຄອນເສີດ ແລະ ອີເວັນຕ່າງໆ ໃຫ້ແບບຄົບວົງຈອນ.
- ຄວາມໂປ່ງໃສຄືຫົວໃຈຫຼັກ: ຄ້າຍຈະມີລະບົບດິຈິຕອລໃຫ້ສິລະປິນເຂົ້າເບິ່ງລາຍໄດ້ ແລະ ລິຂະສິດຂອງຕົນເອງໄດ້ແບບ Real-time. ໝົດບັນຫາເລື່ອງຜົນປະໂຫຍດທີ່ບໍ່ຊັດເຈນ ເຊິ່ງເປັນບັນຫາຄລາດສິກຂອງວົງການເພງ.
- ຄືນສິດຄວາມເປັນເຈົ້າຂອງໃນຜົນງານໃຫ້ຜູ້ສ້າງສັນ: ນີ້ຄືຈຸດທີ່ເດັ່ນຂອງຄ້າຍເລີຍ ເພາະຄ້າຍບໍ່ຈຳເປັນຕ້ອງເປັນເຈົ້າຂອງລິຂະສິດເພງຕະຫຼອດໄປ. ເມື່ອເຖິງຈຸດຄຸ້ມທຶນ ສິລະປິນສາມາດເຈລະຈາ ແລະ ຕົກລົງໄດ້ວ່າຈະໃຫ້ໃຜເປັນຜູ້ເບິ່ງແຍງລິຂະສິດຕໍ່ໄປ ເພື່ອໃຫ້ສິດຄວາມເປັນເຈົ້າຂອງກັບຄືນສູ່ຜູ້ປະພັນຢ່າງແທ້ຈິງ.
4 ຄ້າຍຍ່ອຍ 34 ຊີວິດ ອານາຈັກທີ່ຫຼາກຫຼາຍໃນແນວເພງ
ໃນການເປີດໂຕຄັ້ງນີ້ ເຄິ່ງເກົ້າ ກຣຸບ ຍັງໄດ້ແບ່ງການບໍລິຫານອອກເປັນ 4 ຄ້າຍຍ່ອຍ ເພື່ອຕອບໂຈດແນວດົນຕີທີ່ແຕກຕ່າງ ເຊັ່ນ:
- MACHg: ສາຍໄທຮ່ວມສະໄໝ ນຳທັບໂດຍ ກ້ອງ ຫ້ວຍໄຣ່ ພ້ອມດ້ວຍສິລະປິນສາຍພະລັງຄື ໃໝ່ ພັດຊະລີ, ປາງ ປາງທິບ, ກໍກີ້ ກະວິດສະຣາ, VIEW VALNIKA , CHACHOM SAOWAKHON , NOOM JAISAEN
- 9 Arkkhan: ຄຸມບັງຫຽນໂດຍ ຈ໋າຍ TaitosmitH ທີ່ລວມເອົາສິລະປິນຄຸນນະພາບສາຍເພື່ອຊີວິດຍຸກໃໝ່ໄວ້ຢ່າງແໜ້ນໜາ ເຊັ່ນ: LITTLE JOHN , manutsawee , ວິຈິດຊົນ, ມານົບ, Gandharva , ສາມານ, PINKIE
- BRIDGE (ບຣິດ): ຄ້າຍເຮືອທຸງທີ່ລວມເອົາໄອດໍຂອງໄວລຸ້ນໄວ້ຫຼາຍທີ່ສຸດ ເຊັ່ນ: Three Man Down, Tilly Birds, ASIA7, FLURE , The Darkest Romance , AYLA’s , ASIA7 , Jigsaw Story , Hard Boy , ADORA , NINEOKMAI , QEETHA , Famoso , Par-T, fit aroon, M DAOSAI, ossey , AYEJAY , Dena Euprasert , miller
- ENNEAD: ຄ້າຍນ້ອງໃໝ່ທີ່ເນັ້ນຊຸກຍູ້ຄົນດັງໃນວົງການບັນເທີງ ໃຫ້ມີຜົນງານເພງທີ່ມີຄຸນນະພາບເປັນຂອງຕົນເອງ.
ອຸດສາຫະກຳດົນຕີລາວຮຽນຮູ້ຫຍັງໄດ້ແດ່ຈາກເລື່ອງນີ້?
ດ້ວຍຄວາມໃກ້ຊິດທາງດ້ານພາສາ ແລະ ວັດທະນະທຳ, ສິ່ງທີ່ເກີດຂຶ້ນໃນໄທ ມັກຈະສົ່ງຜົນກະທົບເຖິງບ້ານເຮົາສະເໝີ. ສຳລັບຄ້າຍເພງໃນລາວ ຫຼື ສິລະປິນລາວທີ່ກຳລັງສ້າງໂຕ, ແນວຄິດ ຄວາມຢືດຢຸ່ນ ແລະ ຄວາມເປັນທຳ ຂອງ ໂອມ Cocktail ຄືສິ່ງທີ່ໜ້າຮຽນຮູ້ທີ່ສຸດ.
ການສ້າງຄວາມສະບາຍໃຈໃຫ້ກັບຄົນເຮັດວຽກ ແລະ ການກ້າປ່ຽນແປງກົດເກນເກົ່າໆ ໃຫ້ທັນຍຸກສະໄໝ ຈະເປັນກະແຈສຳຄັນທີ່ເຮັດໃຫ້ອຸດສາຫະກຳດົນຕີລາວເຕີບໂຕໄດ້ຢ່າງແຂງແຮງ ແລະ ບໍ່ເກີດບັນຫາຂັດແຍ້ງໃນອະນາຄົດ.
ເຮົາເຊື່ອວ່າ ຖ້າເຮົາສາມາດສ້າງລະບົບທີ່ສິລະປິນຮູ້ສຶກປອດໄພ ແລະ ໄດ້ຮັບຄວາມເປັນທຳ, ເຮົາຈະໄດ້ເຫັນຜົນງານເພງລາວທີ່ມີຄຸນນະພາບ ແລະ ມີພະລັງອອກມາສູ່ສັງຄົມຫຼາຍຂຶ້ນຢ່າງແນ່ນອນ.