ຊວນສຳຜັດ “ຂວັນ Khuan Exhibition” ຜ່ານມຸມມອງສິລະປະລາວທີ່ຫາເບິ່ງໄດ້ຍາກ
Highlights
- ຂວັນ ແມ່ນພະລັງງານຊີວິດ ຫຼື ຈິດວິນຍານທີ່ເບິ່ງບໍ່ເຫັນ ໂດຍເຊື່ອວ່າມະນຸດມີ 32 ຂວັນໃຫຍ່ ແລະ 90 ຂວັນນ້ອຍ ປະຈຳຢູ່ຕາມອະໄວຍະວະຕ່າງໆ ເພື່ອຄອຍປົກປັກຮັກສາຮ່າງກາຍໃຫ້ສົມບູນ.
- ຖ້າຂວັນຢູ່ກັບເນື້ອກັບຕົວ ຈະເຮັດໃຫ້ສຸຂະພາບແຂງແຮງ ແລະ ຈິດໃຈສົດຊື່ນ ແຕ່ຖ້າປະສົບເຫດການຕົກໃຈ ຫຼື ເຈັບປ່ວຍ ຈົນ “ຂວັນໜີ” ອອກຈາກຮ່າງກາຍ ຈະສົ່ງຜົນໃຫ້ຮ່າງກາຍອ່ອນເພຍ ຫຼື ມີຄວາມເຊື່ອວ່າດວງຕົກ.
- ຄົນລາວມີພິທີສູ່ຂວັນ ເພື່ອເອີ້ນຂວັນໃຫ້ກັບຄືນມາ ແລະ ເສີມສິລິມົງຄຸນ ເຊິ່ງນິຍົມເຮັດທັງໃນ ງານມົງຄຸນ (ແຕ່ງງານ, ຂຶ້ນເຮືອນໃໝ່) ແລະ ການປອບໃຈ (ເອີ້ນຂວັນຄົນປ່ວຍ ຫຼື ຜູ້ເດີນທາງໄກ).
ປູ່-ຍ່າ ຫຼື ພໍ່ຕູ້-ແມ່ຕູ້ ມັກຈະເອີ້ນເຮົາໃຫ້ເຂົ້າໄປຫາ ແລະ ນຳຝ້າຍຜູກແຂນມາມັດເອີ້ນເອົາ “ຂວັນ” ຂອງເຮົາກັບບ້ານ ເຊິ່ງຄຳວ່າ “ຂວັນ” ໃນປະເພນີລາວ ແມ່ນມີຄວາມໝາຍທີ່ເລິກເຊິ່ງ ແລະ ຜູກພັນກັບວິຖີຊີວິດຂອງຄົນລາວມາແຕ່ບູຮານນະການ.
ເພາະ ຂວັນ” ບໍ່ແມ່ນພຽງຄວາມເຊື່ອ ແຕ່ຄືພະລັງງານແຫ່ງຊີວິດທີ່ຄອຍໂອບກອດຈິດວິນຍານຂອງພວກເຮົາໄວ້.
ມ່ວນຊວນໄປ ຈະພາທຸກຄົນເດີນທາງຄົ້ນຫາຄວາມໝາຍຂອງ “32 ຂວັນ” ຜ່ານຄວາມໝາຍທີ່ສິລະປິນນຳມາສື່ສານຜ່ານ ລາຍເສັ້ນ, ສິລະປະຈັດວາງ (Installation Art) ແລະ ມຸມມອງສິລະປະຮ່ວມສະໄໝ.
ທຸກຄົນຈະຮູ້ສຶກຄືວ່າໄດ້ກັບບ້ານໄປມາສຳຜັດຄວາມອົບອຸ່ນຈາກຄອບຄົວ ແລະ ພາຈິດວິນຍານທີ່ມີໄປຮຽນຮູ້ໃຫ້ເລິກເຊິ່ງຂຶ້ນໃນຄຳວ່າ “ຂວັນເອີ້ຍ… ຂວັນມາ” ໃຫ້ມີຄວາມໝາຍກວ່າເກົ່າ.
ຄວາມໝາຍ ແລະ ຄວາມເຊື່ອກ່ຽວກັບ “ຂວັນ”
ຕາມຄວາມເຊື່ອຂອງຄົນບູຮານ, ໄດ້ມີຄວາມເຊື່ອວ່າມະນຸດທຸກຄົນມີຈິດວິນຍານຢູ່ໃນຮ່າງກາຍທີ່ເບິ່ງບໍ່ເຫັນດ້ວຍຕາເປົ່າ ຄົນລາວເຮົາມັກເອີ້ນວ່າ “ຂັວນ ຫຼື ຜີຂວັນ”.
ສຳລັບກຸ່ມຊາວລາວ-ໄຕ ເຊື່ອວ່າຮ່າງກາຍຂອງເຮົາປະກອບດ້ວຍ 32 ຂວັນໃຫຍ່ (ທີ່ຄອຍປົກປັກຮັກສາຮ່າງກາຍ) ແລະ 90 ຂວັນນ້ອຍ ທີ່ປະຈຳຢູ່ໃນອະໄວຍະວະຕ່າງໆຂອງຮ່າງກາຍ.
“ຂວັນ” ແມ່ນເຊື່ອມໂຍງກັບສຸຂະພາບຮ່າງກາຍ
ຖ້າ “ຂວັນ” ຢູ່ກັບເນື້ອກັບໂຕ ຄົນຜູ້ນັ້ນຈະມີສຸຂະພາບແຂງແຮງ, ມີຈິດໃຈສົດຊື່ນ ແລະ ມີຄວາມສຸກ. ແຕ່ຫາກມີເຫດການທີ່ເຮັດໃຫ້ “ຂວັນໜີ ຫຼື ຂວັນອອກຈາກຮ່າງກາຍ (ຂວັນບາງສ່ວນ)” ເຊັ່ນ: ການຕົກໃຈຢ້ານ, ເຈັບປ່ວຍ ຫຼື ພົບອຸບັດຕິເຫດ ກໍຈະເຮັດໃຫ້ຄົນນັ້ນຮູ້ສຶກອ່ອນເພຍ, ບໍ່ສະບາຍ ຫຼື ມີຄວາມເຊື່ອວ່າດວງຕົກ.
ໃນທາງສາສະໜາພຸດທີ່ແປຄຳວ່າ “ຂັວນ” ແບບກົງໂຕແມ່ນ “ພະລັງງານຊີວິດ” ຫຼື “ສິ່ງສັກສິດ” ທີ່ປະຈຳຢູ່ແຕ່ລະພາກສ່ວນຂອງຮ່າງກາຍ ນັ້ນເອງ.
ພິທີ “ສູ່ຂວັນ” ແລະ ໂອກາດສຳຄັນ
ຄົນລາວມັກເຮັດພິທີສູ່ຂວັນ ຫຼື ບາສີໃນຫຼາຍໆວາລະ ເຊິ່ງແບ່ງອອກເປັນ 2 ປະເພດໃຫຍ່ຄື:
- ງານມົງຄຸນ: ການສູ່ຂວັນຂຶ້ນເຮືອນໃໝ່, ສູ່ຂວັນແຕ່ງງານ (ກິນດອງ), ສູ່ຂວັນວັນເກີດ, ສູ່ຂວັນຮັບຕຳແໜ່ງ ຫຼື ສູ່ຂວັນພຣະສົງ.
- ສູ່ຂວັນເພື່ອໃຫ້ກຳລັງໃຈ ຫຼື ເອີ້ນຈິດໃຈ (ຈິນວິນຍານ) ໃຫ້ກັບຄືນມາ: ສູ່ຂວັນຄົນປ່ວຍ ເພື່ອໃຫ້ຫາຍດີ, ສູ່ຂວັນໃຫ້ຜູ້ທີ່ຈະອອກເດີນທາງໄກ ຫຼື ສູ່ຂວັນໃຫ້ຜູ້ທີ່ຫາກໍ່ກັບມາຈາກທາງໄກ.
ສະນັ້ນ, ຄົນລາວຈຶ່ງມີພິທີ “ສູ່ຂວັນ” ເພື່ອເອີ້ນຂວັນໃຫ້ກັບຄືນມາ ແລະ ເສີມສິລິມົງຄຸນ. ພິທີນີ້ມີສ່ວນປະກອບສຳຄັນຫຼາຍໃນປະເພນີລາວເຮົາ.
ມາຮ່ວມເຕີມເຕັມພະລັງໃຈ ແລະ ເຊື່ອມຕໍ່ຈິດວິນຍານໄປນຳກັນໃນງານນີ້.
- ສະຖານທີ່: PARKSON LAOS, ຊັ້ນ 2.
- ເລີ່ມຕັ້ງແຕ່ມື້ນີ້ – 22 ມີນາ 2026, ເວລາ 10:00 – 22:00 ໂມງ.
- ຄ່າເຂົ້າຊົມ: 15,000 ກີບ/ຄົນ (ຟຣີ! ສຳລັບເດັກນ້ອຍທີ່ມີອາຍຸຕໍ່າກວ່າ 5 ປີ).