Muan Listen - ມ່ວນຊວນຟັງ

ເຮົາເຮັດທຸກມື້ນີ້ໄປເພື່ອຫຍັງ? ຊອກຫາຄຳຕອບໃນ “ໂລກອ້ອມຕົວ” ຮ້ອງໂດຍ HORLOCK x ALITA

ໂດຍ: Khainapha Chanthathilath

25 December 2024● 279

“ລອງຟັງສຽງຂອງຫົວໃຈໂຕເອງ”

ຫຼາຍຄັ້ງ ເຮົາມັກຈະໂຟກັສກັບສິ່ງທີ່ເປັນເປົ້າໝາຍຂອງເຮົາ ແລະ ສະແຫວງຫາຄວາມໝາຍຂອງສິ່ງທີ່ເຮັດ ຈົນຫຼົງລືມໄປວ່າ ຖ້າເຮົາແນມກັບມາເບິ່ງດີໆມັນອາດຈະໃກ້ເຮົາຫຼາຍກວ່າທີ່ຄິດ, ຄືກັບທີ່ເພງ “ໂລກອ້ອມໂຕ” ຂອງ HORLOCK ແລະ ALITA ຕ້ອງການຢາກຈະບອກ.

”ໂລກອ້ອມຕົວ” ຖືວ່າເປັນບົດເພງທີ່ດີຂອງປີນີ້ອີກເພງໜຶ່ງທີ່ມ່ວນຢາກແນະນຳໃຫ້ຟັງ. ເພາະເພງໄດ້ຖືກຖ່າຍທອດອອກມາໄດ້ມີຄວາມໝາຍຊື້ງກິນໃຈເຮັດໃຫ້ນ້ຳຕາຈົນຊຶມ ແລະ ເປັນການເຮັດໃຫ້ຕ້ອງກັບມາທົບທວນຫຍັງຫຼາຍຢ່າງ.

ເພງໄດ້ເລີ່ມຕົ້ນຈາກທ່ອນທີ່ມີສຽງຮ້ອງມ່ວນໆຂອງ ALITA ແລະ ພາບຂອງເອັມວີແມ່ນໄດ້ເລີ່ມເລົ່າສາກໃນສະຕູດິໂອເພື່ອຖ່າຍທຳເລົ່າເລື່ອງຊີວິດຂອງທັງສາມຄົນທີ່ແຕກຕ່າງກັນທັງອາຊີບ, ທີ່ມາ ແລະ ການດຳເນີນຊິວິດ.

ແຕ່ສິ່ງທີ່ທຸກຄົນມີຄືກັນຄືຄວາມຮູ້ສຶກການຖືກຄາດຫວັງ, ໂດດດ່ຽວ, ທໍ້ໃຈ ແລະ ຄວາມຍາກລຳບາກ. ແຕ່ກໍຕ້ອງທົນຈາກການຖືກກົດດັນຈາກສະພາບແວດລ້ອມຫຼາຍໆຢ່າງ, ເຮັດໃຫ້ພວກເຂົາຄິດເຖິງຄວາມໝາຍຂອງຊີວິດວ່າ: “ເຮົາເຮັດໄປເພື່ອຫຍັງ?” ແລະ ໃນຄຳຖາມນັ້ນກໍມີຄຳຕອບຢູ່ຄືຄົນທີ່ເຮົາຮັກ“ຄອບຄົວ”.

“ຂ້ອຍກະແຄ່ຄົນໆໜຶ່ງທີ່ ຕ້ອງການເຫັນວັນສວຍງາມ” ພໍມາເຖິງທ່ອນຮ້ອງຂອງ HORLOCK ທີ່ໄດ້ເຂົ້າມາແຣັບເຮັດໃຫ້ເພງເກີດມີມິຕິຫຼາຍຂຶ້ນດ້ວຍໂທນສຽງທີ່ນຸ້ມນວນປະສົມເທ່ ແລະ ໄດ້ເລົ່າເລື່ອງລາວອີກມຸມມອງໜຶ່ງຂອງຄົນທີ່ເຮັດວຽກໃນເບຶ້ອງຫຼັງທີ່ຫຼາຍໆຄົນມັກລືມໄປ.

ລາວໄດ້ເລົ່າເຖິງຊິວິດທີ່ຕ້ອງພົບກັບຄວາມລຳບາກທີ່ຕ້ອງດຸໝັ່ນເພື່ອໃຫ້ມີລາຍໄດ້ ແລະ ບໍ່ໄດ້ຢຸດພັກເລີຍ, ໄດ້ທຸ່ມເທກັບການເຮັດວຽກຢ່າງໜັກຈົນເກີດເຫດການທີ່ລາວເກືອບຈະສູນເສຍສິ່ງທີ່ສຳຄັນໄປ.

ໃນບາງຄັ້ງ ການມີເປົ້າໝາຍໃນຊິວິດມັນກໍເຮັດໃຫ້ເຮົາພຽງແຕ່ແນມເບິ່ງໄປແຕ່ທາງໜ້າ, ຕ້ອງດິ້ນລົນສູ້ຊິວິດເພື່ອຕໍ່ສູ້ກັບໂລກຄວາມຈິງແລ້ວຄິດວ່າຖ້າໄດ້ຫຍັບໄປໃກ້ໆນັ້ນຄືຄວາມສຸກ ແລະ ການປະສົບຜົນສຳເລັດສຳລັບເຮົາແລ້ວ.

ແມ່ນຢູ່ວ່າສິ່ງທີ່ເຮົາເຮັດແມ່ນເພື່ອຄົນທີ່ເຮົາຮັກ ຫຼື ຄອບຄົວ. ແຕ່ກໍຢ່າຫຼົງລືມວ່າການທີ່ມີກັນຢູ່ມັນຕ້ອງໃຊ້ເວລາໝັ່ນດູແລສ້າງຄວາມສຸກໃຫ້ກັນທັງຕົນເອງ ແລະ ຄອບຄົວ.

ມ່ວນຂໍນິຍາມສັ້ນໆສຳລັບເພງ “ໂລກອ້ອມຕົວ” ນີ້ວ່າ: ”ຄອບຄົວ ແລະ ຄຸນຄ່າຂອງເວລາ”.

ໂດຍ: ທີມບັນນາທິການ Muan