ມາຮູ້ຈັກ 6 ສາວ Fizche ທີ່ມາພ້ອມສະເໜ່ເຕັມພິກັດ ຈົນເຮັດໃຫ້ແຟນເພງຕ້ອງ “ເສຍອາການ” ໄປຕາມໆກັນ

ພາມາຮູ້ຈັກວົງ Fizche Girl Group ສຸດປັງນ້ອງໃໝ່ມາແຮງຂອງວົງການ L-pop (Lao Pop), ທີ່ມີສະມາຊິກ 6 ຄົນ ປະກອບດ້ວຍ Piano, Koungnang, Phukboung, Namfon, Lisa, ແລະ Alicia.

ພວກເຂົາແມ່ນໄດ້ຜ່ານການແຂ່ງຂັນການຄັດເລືອກເພື່ອເດບິວເປັນສິລະປິນກຸ່ມ ແລະ ສົມການລໍຖ້າຂອງແຟນຄລັບ Fizche ໄດ້ເປີດຕົວຢ່າງເປັນທາງການໃນວັນທີ 12 ກຸມພາ 2025 ດ້ວຍຊິງເກິລເພງທຳອິດທີ່ມີຊື່ວ່າ “ເສຍອາການ” (You Make Me Blush) ເພງນີ້ຖືວ່າເປັນຈຸດເລີ່ມຕົ້ນທີ່ສຳຄັນຂອງພວກເຂົາໃນວົງການ L-pop ແລະ ຍັງໄດ້ຮັບຄວາມສົນໃຈຫຼາຍ.

“ເສຍອາການ” ເປັນເພງທີ່ມີທຳນຽມຕິດຫູ, ປະສົມປະສານລະຫວ່າງສຽງດົນຕີແບບປັອບສະໄໝໃໝ່ ແລະ ເຂົ້າກັນໄດ້ດີກັບ Character ຂອງສາວໆທີ່ມີທັງຄວາມໜ້າຮັກສົດໃສ ແລະ ຄວາມເຊັກຊີເບົາໆທີ່ເຮັດໃຫ້ຮູ້ສຶກຕື່ນເຕັ້ນທີ່ມາພ້ອມກັບຄວາມຂີ້ອາຍ, ມີຈັງຫວະທີ່ໄວເໝາະກັບການເຕັ້ນ ແລະ ຮ້ອງຕາມກໍງ່າຍ.

MV ຂອງເພງນີ້ໄດ້ສະແດງໃຫ້ເຫັນເຖິງຄວາມສາມາດຂອງສະມາຊິກທັງ 6 ຄົນ, ໃນການເຕັ້ນປະສານງານເປັນກຸ່ມ ແລະ Visual ຂອງ MV ກໍເຮັດໃຫ້ດຶງດູດ, ການໃຊ້ສີສັນ ແລະ ແສງໃນ MV ຍັງຊ່ວຍເສີມໃຫ້ເພງນີ້ເບິ່ງມີຊີວິດຊີວາ.

ຫຼັງຈາກເລົ່າເຖິງຜົນງານສາວໆໃຫ້ທຸກຄົນຟັງ ແລະ ແນະນຳໃຫ້ທຸກຄົນໄດ້ຮູ້ຈັກກັນພໍຫອມປາກຫອມຄໍໄດ້ປະມານໜຶ່ງກັນແລ້ວ, ມ່ວນຄິດວ່າທຸກຄົນຕ້ອງຢາກຮູ້ຈັກພວກເຂົາໃຫ້ຫຼາຍຂຶ້ນແລ້ວແມ່ນບໍ່? ວ່າແລ້ວກໍເລີ່ມກັນເລີຍເນາະ.

Fizche: ສະບາຍດີ ພວກເຮົາ Fizche~ ຕັ້ງແຕ່ເລີ່ມປ່ອຍເພງທຳອິດມາກໍຮູ້ສຶກວ່າຜົນຕອບຮັບດີເກີນຄາດເລີຍ ແບບວ່າຄຸ້ມກັບທີ່ພວກເຮົາໃຊ້ເວລາເຝິກຝົນກັນມາດົນ ຈາກແຕ່ກີ້ພວກເຮົາກໍເປັນຄົນທຳມະດາທີ່ໄລ່ລ່າຕາມຫາຄວາມຝັນ, ຕ່າງຈາກຕອນນີ້ ກໍມີຫຼາຍຄົນບອກຢາກເອົາພວກເຮົາມາເປັນ Idol ພວກເຮົາກໍຮູ້ສຶກດີໃຈແຮງ ແລະ ຈະພັດໂຕເອງໃຫ້ດີຂຶ້ນເລື້ອຍໆ.

ຊີນທີ່ພວກພວກເຮົາທັງ 6 ຄົນເວົ້າເປັນສຽງດຽວກັນວ່າມັກນັ້ນກໍຄື: ເຊັດຊຸດແດງທີ່ເປັນສາກໄຟ, ທີ່ພວກເຮົາມັກເພາະວ່າເປັນຊີນທີ່ງາມ ແລະ ທ້າທາຍພວກເຮົາແຮງ ເພາະຕ້ອງຖ່າຍໃນສະຖານທີ່ທີ່ຮ້ອນ ແລະ ຫາຍໃຈກໍລຳບາກ, ແຕ່ພໍຊີນນີ້ອອກມາໃນ MV ກໍເປັນຊີນໜຶ່ງທີ່ງາມ ແລະ ດຶງຄວາມ Sexy, ຄວາມເທ້ຂອງພວກເຮົາທັງ 6 ຄົນອອກມາໄດ້ຢ່າງ Perfect 😍✨🔥

ຂອບໃຈຮູບພາບຈາກເພຈ Fizche. official

Piano: ສະບາຍດີ ເຂົາເປຍໂນເດີ ອາຍຸ 21 ປີ, ຕຳແໜ່ງ Center, Main rap & Sup Vocal. ນິໄສທີ່ຫຼາຍໆຄົນບໍ່ຮູ້ແມ່ນ: ເປຍເປັນຄົນທີ່ປະຢັດສຸດໆ, ບໍ່ຄ່ອຍມັກຊື້ ຫຼື ຈ່າຍຫຍັງຫຼາຍປານໃດ ຈົນຄົນໃນທີມມັກບອກວ່າ: ”ເພິ່ນກະໃຊ້ເງິນທີ່ເພິ່ນຫາມາແດ່ດຸ🤣”. ເງິນຫາຍາກອ່າາາ ຂໍໂທດໄດ້ບໍ່😝.

ກ່ອນທີ່ພວກເຮົາທັງ 6 ຄົນຈະໄດ້ລວມໂຕກັນມາເປັນ Fizche ບອກເລີຍວ່າຍາກແຮງ ເພາະກ່ອນຈະເຂົ້າມາເປັນສະມາຊິກໃນວົງ Fizche ເປຍ, ຝົນ, ລິຊ້າ, ເຊຍ ແມ່ນໄດ້ເຂົ້າແຂ່ງຂັນ ແລະ ເທຣນນຳໝູ່ໆທີ່ເຝິກມານຳກັນ ແລະ ໄດ້ຖືກຄັດເລືອກມາເປັນ Girl Group ຕອນທຳອິດແມ່ນມີ 4 ຄົນ, ແຕ່ຮູ້ສຶກວ່າໃນວົງຍັງມີເຄມີໜຶ່ງທີ່ຂາດຫາຍໄປ ຈົນໄດ້ມີແຝດຜັກບຸ້ງ-ກຸ້ງນາງ ທີ່ເຂົ້າມາຊ່ວຍເຕີມເຕັມໃຫ້ພວກເຮົາເປັນ Fizche ໄດ້ຢ່າງສົມບູນແບບ.

ຫຼັງຈາກນັ້ນພວກເຮົາທັງ 6 ຄົນ ກໍພາກັນເຝິກຝົນ ການເຕັ້ນ,ການຮ້ອງນຳກັນມາເປັນເວລາເກືອບ 1 ປີ ຈົນໄດ້ມີຜົນງານເພງເດບິວ, ເພງທຳອິດຊື່ວ່າ: ເສຍອາການ. ເຊິ່ງການເດີນທາງຂອງພວກເຮົາທັງ 6 ຄົນບອກເລີຍວ່າເມື່ອຍ, ທໍ້ ແຕ່ກໍຄຸ້ມຄ່າເພາະມີທຸກໆຄົນຊັບພອດ ແລະ ໃຫ້ກຳລັງໃຈພວກເຮົາຈະຫຼອດມາ.

IG: piano_souksavanh

Phukboung: ສະບາຍດີ ຜັກບຸ້ງ ເດີ ອາຍຸ 21 ປີ, ຕຳແໜ່ງ Lead Dance & Sub vocal. ນິໄສທີ່ຫຼາຍໆຄົນບໍ່ຮູ້ແມ່ນ: ບຸ້ງກໍເປັນຄົນຫນຶ່ງທີ່ມັກພົບປະກັບຄົນໃໝ່ໆ, ແຕ່ເວລາໄດ້ພົບເຈິກັບຄົນໃໝ່ໆ ຄົນສ່ວນຫຼາຍຄິດວ່າບຸ້ງເປັນຄົນເວົ້າໜ້ອຍຂີ້ອາຍ, ແຕ່ຄວາມຈິງແລ້ວເວລາບຸ້ງເຈິຄົນໃໝ່ໆຈະຄິດກ່ອນ ແລະ ເບິ່ງຝ່າຍກົງກັນຂ້າມວ່າຄວນຈະສົນທະນາດ້ວຍແບບໃດ ຕ້ອນຮັບທຸກຄົນເດີ້🤗❣

ກ່ອນຈະຮູ້ວ່າກຳລັງຈະມີເພງທຳອິດ “ເພງ ເສຍອາການ” ກ່ອນໜ້ານີ້ພວກເຮົາກໍໄດ້ມີການກຽມໂຕ ແລະ ເຝິກຊ້ອມ, ບໍ່ວ່າຈະເປັນການຮ້ອງ ຫຼື ເຕັ້ນ. ພວກເຮົາ 6 ຄົນກໍມີຄວາມຕັ້ງໃຈ ແລະ ພະຍາຍາມເຝິກຝົນດ້ວຍຕົວເອງເປັນສ່ວນຫຼາຍ ເພາະເວລາຂອງພວກເຮົາບໍ່ຄ່ອຍກົງກັນ, ແຕ່ພວກເຮົາກໍສູ້ເຖິງຈະວ່າງບໍ່ກົງກັນສໍ່າໃດ ແຕ່ພວກເຮົາກໍນັດກັນມາຊ້ອມໃຫ້ຄົບຈົນໄດ້, ເພາະພວກເຮົາທັງ 6 ຄົນມີເປົ້າໝາຍ ແລະ ຄວາມຝັນອັນດຽວກັນ.

IG: boung_bk5

Koungnang: ສະບາຍດີ ກຸ້ງນາງ ເດີ ອາຍຸ 21 ປີ, ຕຳແໜ່ງ Main Dance & Lead Vocal. ນິໄສທີ່ຫຼາຍໆຄົນບໍ່ຮູ້ແມ່ນ: ເບິ່ງພາຍນອກຄືຈະເຂົ້າຫາຍາກ, ແຕ່ຖ້າເຂົ້າມາທັກກໍທັກຕອບ ເປັນຄົນທີບໍ່ກ້າທັກໃຜກ່ອນປານໃດເພາະວ່າບໍ່ກ້າ, ແລ້ວກໍຊວນລົມບໍ່ເກັ່ງ ແຕ່ຖ້າໄດ້ຮູ້ຈັກກໍເວົ້າຫຼາຍເປັນພິເສດ ແລະ ເປັນຄົນສຽງຫົວດັງນຳ🤭

ເວລາວ່າງສາວໆຢູ່ນຳກັນກໍຈະມັກນັ່ງລົມກັນ, ປຶກສາກັນ ແລະ ເລົ່າເລື່ອງຂອງໂຕເອງໃຫ້ກັນຟັງ ແຊຣ໌ປະສົບການຄວາມສາມາດຂອງແຕ່ລະຄົນເຮັດໃຫ້ພວກເຮົາສະນິດກັນຫຼາຍຂຶ້ນ.

IG: koung_kb5

Namfon: ສະບາຍດີ ນ້ຳຝົນ ເດີ ອາຍຸ 20 ປີ, ຕຳແໜ່ງ Sub Vocal & Visual. ນິໄສທີ່ຫຼາຍໆຄົນບໍ່ຮູ້ແມ່ນ: ຝົນເປັນຄົນທີ່ມັກມ່ວນເຮຮາ, ແຕ່ກໍຈະມີມຸມທີ່ຈະມິດໆຄືກັນ, ເປັນມຸມທີ່ຫຼາຍໆຄົນຈະບໍ່ຄ່ອຍເຫັນກັນ ແຕ່ຖ້າມື້ທີ່ດີດກໍດີດຈົນສຸດ ແລະ ກໍມັກກິນຢູ່ຕະຫຼອດເວລາແຮ່ໆ ທຸກຄົນໃນທີມຈະຮູ້ເລີຍວ່າຝົນຈະມີເຂົ້າໜົມໄວ້ຢູ່ໃນກະເປົາ🍬.

ບັນຍາກາດໃນກອງບອກເລີຍວ່າຄຶກຄື້ນ ແລ້ວກໍມ່ວນກັນເເຮງ, ທຸກຄົນທັງທີມງານ ແລະ ພວກເຮົາທັງ 6 ຄົນຕ່າງຄົນກໍຕ່າງເຕັມທີກັບຜົນງານໃນຄັ້ງນີ້ ເຖີງຈະມີບາງຄົນທີ່ບໍ່ສະບາຍແຕ່ພວກເຮົາກໍທຸ້ມເທ ເເລະ ຢາກຈະເຮັດຜົນງານນີ້ໃຫ້ອອກມາດີທີ່ສຸດເທົ່າທີ່ພວກເຮົາທັ້ງ 6 ຄົນຈະເຮັດໄດ້ບັນຍາກາດໃນກອງກໍບໍ່ກົດດັນເລີຍ ທຸກຄົນເປັນກັນເອງແຮງ.

IG: namfon.stx

Lisa: Hi~ Lisa ເດີ ອາຍຸ18 ປີ, ຕໍາເເໜ່ງ Main vocal. ນິໄສທີ່ຫຼາຍໆຄົນບໍ່ຮູ້ແມ່ນ: ທຸກຄົນມັກຈະຄິດວ່າລີຊ້າເປັນຄົນນີ້ງໆ, ເເຕ່ຄວາມຈິງເເລ້ວເປັນຄົນທີມັກກວນໝູ່ໃນທີມສຸດໆ ຮູ້ສຶກວ່າຢູ່ຊື່ໆບໍ່ໄດ້ເປັນຄົນທີ່ຄົນຢູ່ກັບໝູ່ເເລ້ວ Energy ຈະລົ້ນເຫຼືອ ຈົນບາງທີໝູ່ໃນທີມບອກວ່າຊ້າບໍ່ເມື່ອຍເເນ່ຫວາ😅 ຮາຮາ .

ຢາກຈະເມົ້າອ້າຍນົນວ່າຕອນທີ່ກຳລັງກຽມໂຕຢູ່ເເມ່ນອ້າຍນົນງຽບເເຮງ, ຮູ້ສືກວ່າອ້າຍນົນໜ້າຈະກໍາລັງໝົກໝຸ້ນຢູ່ກັບສາກຂອງໂຕເອງຢູ່😅 ເເຕ່ທີ່ສຸດເເລ້ວອ້າຍນົນກໍເຮັດອອກມາໄດ້ດີເເຮງມີຄວາມເປັນມືອາຊີບສຸດໆ ແລ້ວກໍດີໃຈທີ່ອ້າຍນົນໃຫ້ກຽດມາເປັນພະເອກໃນເອັມວີທຳອິດຂອງ Fizche ເລີຍ ຂອບໃຈຫຼາຍໆເລື່ອງທີ່ຢາກເມົ້າກໍມີເທົ່ານີ້ເນາະ😂😂.

IG: lililililililsa

Hello Alicia, ເດີ ອາຍຸ 16 ປີ, ຕຳແໜ່ງ Main rap, Lead dance. ນິໄສທີ່ຫຼາຍໆຄົນບໍ່ຮູ້ແມ່ນ: ຫຼາຍຄົນຈະຄິດວ່າເຊຍຫຍິ່ງແຕ່ທີ່ຈິງແລ້ວໜ້າມັນເປັນເອງ😭 ຖ້າໄດ້ລົມໄດ້ເວົ້າຈະເປັນຄົນເວົ້າຫຼາຍ555 ເປັນຄົນຄ່ອນຂ້າງຈິງຈັງກັບສິ່ງທີ່ເຮັດຢູ່, ສ່ວນຄວາມດີດນັ້ນແລ້ວແຕ່ມື້ ຫຼາຍອາລົມບາງຄົນຈົນວ່າເປັນ Bipolar ຫວາ😂.

Alicia: ຖ້າຖາມວ່າຊ້ອມໜັກບໍ່?  ບອກເລີຍວ່າໜັກພວກເຮົາໃຊ້ເວລາຊ້ອມທັງໝົດເກືອບປີ ເພາະຢາກໃຫ້ອອກມາດີທີ່ສຸດບາງເທື່ອກໍທໍ້ ຫຼື ໝົດໄຟບາງຄົນກໍຈົນໄຫ້, ແຕ່ພວກເຮົາກໍໃຫ້ກຳລັງໃຈກັນ ເພາະພວກເຮົາມີເປົ້າໝາຍດຽວກັນ.

IG: raffy.alicia

Fizche: ສຸດທ້າຍນີ້ພວກເຮົາ Fizche ກໍຢາກຝາກຜົນງານເພງ ເສຍອາການ (You Make Me Blush), ເຊິ່ງເປັນເພງເດບິວຂອງພວກເຮົາເລີຍ ແລະ ໄວໆນີ້ພວກເຮົາກໍຈະມີຜົນງານເພງທີ 2 ອອກມາ, ເຊິ່ງພວກເຮົາທຸ້ມເທກັບຜົນງານນີ້ແຮງ ເປັນແນວໃດກໍຝາກພວກເຮົາ Fizche ໄວ້ໃນໃຈຂອງທຸກໆຄົນແດ່ເດີ ພວກເຮົາຈະບໍ່ເຮັດໃຫ້ຜິດຫວັງແນ່ນອນ😊🙏🏻

ຕິດຕາມສາວໆ Fizche ໄດ້ທີ່:
IG: fizche_official
FB: Fizche.
TikTok: Fizche officail
YouTube: Alist Laos

ໂດຍ: ທີມບັນນາທິການ Muan