Muan Listen - ມ່ວນຊວນຟັງ

ຢ່າ “ເກັ່ງແຕ່ປາກ” FIZCHE ບອກຜ່ານເພງ ຖ້າຮັກແລ້ວບໍ່ເວົ້າສຸດທ້າຍກໍເຈັບເອງ!

ໂດຍ: Khainapha Chanthathilath

27 May 2026● 67

ເຄີຍເຈິເຫດການແບບນີ້ບໍ່? ໃນຄວາມຊົງຈຳຄັ້ງໜຶ່ງຂອງເຈົ້າໃນຕອນນັ້ນ, ເຄີຍມີຄົນທີ່ເຮັດໃຫ້ຫວັ່ນໄຫວ, ເຮັດຮູ້ສຶກດີ ແລະ ໃນໃຈຂອງເຈົ້າຄືຮັກເຂົາແບບສຸດໆ. ແຕ່ປາກເຮົາມັນໂຄດແຂງເລີຍ ເຮັດຄືບໍ່ໄດ້ຄິດຫຍັງ… ແລ້ວເປັນແນວໃດລະ? ເພາະສຸດທ້າຍກໍເສຍເຂົາໄປ ເພາະເລືອກ “ເກັ່ງແຕ່ປາກ”. ນີ້ເປັນອີກໜຶ່ງຄວາມຄວາມຮູ້ສຶກຂອງຄົນທີ່ກຳລັງຮູ້ສຶກເສຍໃຈ ແລະ ໄດ້ແຕ່ໂທດໂຕເອງ. ມັນເປັນຄວາມຮູ້ສຶກເສົ້າໃຈທີ່ FIZCHE ຕ້ອງການຢາກບອກກັບຄົນທີ່ປາກບໍ່ຕົງກັບໃຈ.

ເປັນເພງທີ່ແທງໃຈດຳຄົນປາກເກັ່ງທີ່ສຸດ! ແຕ່ມັນກໍແມ່ນຄວາມໃດທຸກຄົນວ່າບໍ່? ເພາະການທີ່ເຮົາບໍ່ຊື່ສັດກັບຄວາມຮູ້ສຶກໂຕເອງ ເຮັດໃຫ້ຕ້ອງສູນເສຍສິ່ງສຳຄັນໄປຫຼາຍຢ່າງເລີຍ.

ສຸດທ້າຍແລ້ວ, ຄວາມປາກແຂງ ແລະ ການຝືນຄວາມຮູ້ສຶກໂຕເອງ ກໍກາຍເປັນອາວຸດທີ່ຍ້ອນກັບມາທຳຮ້າຍໂຕເອງ. ເພາະຕອນທີ່ເຮົາ, ປາກແຂງບໍ່ຍອມເວົ້າ… ຄົນທີ່ເຮົາແອບຮັກເຂົາກໍເລີຍຖອດໃຈ ແລ້ວຕັດສິນໃຈຍ່າງຈາກໄປກັບຄົນອື່ນແລ້ວ.

ຍ້ອນຄວາມປາກແຂງນີ້ແຫຼະ! ຈຶ່ງເຮັດໃຫ້ຕ້ອງເສຍຄົນທີ່ຮັກໄປ…  ສິ່ງທີ່ເຫຼືອໄວ້ໃນຕອນທ້າຍຈຶ່ງມີພຽງແຕ່ຄວາມໂດດດ່ຽວ, ຄວາມເສຍໃຈ, ໄດ້ແຕ່ນັ່ງຄິດເຖິງຄວາມຜິດພາດຂອງໂຕເອງທີ່ຮັກສາໃຜໄວ້ບໍ່ໄດ້ ພຽງເພາະຄວາມຟອມຈັດຂອງປາກໂຕເອງ ແລະ ຕ້ອງຢູ່ກັບຄາບນ້ຳຕາແທນ.

ໃນສ່ວນຂອງເອັມວີນີ້ຄືເຮັດດີໂພດ ພາບງາມສຸດໆ, ຕ້ອງຂໍບອກຕື່ມວ່າສາວໆ FIZCHE ຄື Visua ດີແຮງ ແບບບໍ່ມີໃຜຍອມໃຜ, ງາມໜ້າຮັກກັນຄົນລະແບບ. ເລື່ອງສຽງຮ້ອງສາວໆກໍໄດ້ສະແດງທັກສະ ໂດຍການແບ່ງພາກຮ້ອງກັນໄດ້ຊັດເຈນ ແລະ ລາຍເຕັ້ນກໍຄົມຊັດ ເຊິ່ງເວລາສະແດງໃນສ່ວນເຕັ້ນແມ່ນສາມາດດຶງສະເໜ່ອອກມາໄດ້ດີ. 

ມ່ວນຊວນຟັງ ຄິດວ່າເພງນີ້ຄືສາມາດເຕືອນໃຈໄດ້ດີເລີຍ ຖ້າທຸກຄົນຮັກໃຜ ກໍຮີບເວົ້າຮີບບອກເລີຍເດີ ຢ່າເອົາແຕ່ເກັ່ງ ເອົາແຕ່ປາກແຂງ ບໍ່ຊັ້ນຊິເຫຼືອແຕ່ນ້ຳຕາຄືໃນເພງນີ້.