ກຽມພົບກັບຄອນເສີດໃຫຍ່ຂອງ ອາລູນ້າ “ເມື່ອຄວາມຮູ້ສຶກບອກ” Aluna Live Concert
ຖ້າເວົ້າເຖິງຊື່ນັກຮ້ອງຍິງທີ່ມີຊື່ສຽງ ແລະ ເປັນທີ່ຮູ້ຈັກ ໜຶ່ງໃນນັ້ນຄົງເປັນໄປບໍ່ໄດ້ທີ່ຈະບໍ່ມີຊື່ຂອງ ອາລູນ້າ ຖາວອນສຸກ ຫຼື Aluna. ຖ້າໃຜທີ່ຄິດຮອດເພງຂອງນັກຮ້ອງສາວຄົນນີ້ ໃນໄວໆນີ້ເຮົາຈະໄດ້ໄປຄອນເສີດໃຫຍ່ຂອງລາວກັນແລ້ວ.
Aluna ໄດ້ອອກມາປະກາດຄອນເສີດຂອງລາວ ເຊິ່ງຈະຈັດຂຶ້ນໃນວັນທີ 11 ຕຸລາ 2025ນີ້ ໃນຊື່ “ເມື່ອຄວາມຮູ້ສຶກບອກ” Aluna Live Concert.
Aluna ເຈົ້າຂອງເພງດັງຫຼາຍເພງເຊັ່ນ: ທຸກ 5 ນາທີ, ໄຮ້ດຽງສາ, ໄຮໂຊ, ລະດູການທີ່ບໍ່ມີເຈົ້າ ແລະ ຄວາມຮູ້ສຶກບອກ ເປັນຕົ້ນ.
ນອກຈາກຈະໄດ້ຟັງເພງມ່ວນໆຈາກ Aluna ແລ້ວນັ້ນ ລາວຍັງນຳທັບເພື່ອນສິລະປິນເຊັ່ນ: ແຊມ Sam Intharaphithak, Tee Oudalay, Taiy Akards ແລະ OLA Blackeyes ມາສ້າງສີສັນໃຫ້ກັບຄອນເສີດທີ່ຈະເຖິງນີ້ອີກດ້ວຍ.
ພິເສດກໍຄື ນອກຈາກຈະໄດ້ໄປຟັງເພງມ່ວນໆແລ້ວ ຄອນເສີດຄັ້ງນີ້ຍັງເປັນຄອນເສີດການກຸສົນນຳອີກ. ລາຍຮັບຫຼັງຈາກຫັກຄ່າໃຊ້ຈ່າຍທັງໝົດຈະຖືກນຳໄປຊື້ອຸປະກອນການແພດເພື່ອຊ່ວຍເຫຼືອໂຮງໝໍເດັກແຫ່ງຊາດ, ໂດຍສະເພາະແມ່ນການປິ່ນປົວພະຍາດມະເຮັງ, ພະຍາດທາງເລືອດ ແລະ ພະຍາດໂລຫິດຈາງ.
ການສະໜັບສະໜຸນຄອນເສີດຄັ້ງນີ້, ນອກຈາກຈະເປັນການໃຫ້ກຳລັງໃຈສິລະປິນແລ້ວ ຍັງເປັນການສົ່ງຕໍ່ຄວາມຊ່ວຍເຫຼືອ ແລະ ຄວາມຫວັງໃຫ້ກັບເດັກນ້ອຍທີ່ກຳລັງປ່ວຍ. ມາຮ່ວມກັນສ້າງຄວາມຊົງຈຳທີ່ອົບອຸ່ນ ແລະ ສົ່ງຕໍ່ສິ່ງດີໆໃຫ້ສັງຄົມໄປພ້ອມໆກັນ.
ຄອນເສີດ “ເມື່ອຄວາມຮູ້ສຶກບອກ” ໂດຍ Aluna ຈະຈັດຂຶ້ນທີ່ ຫໍວັດທະນະທຳແຫ່ງຊາດ ໃນວັນທີ 11 ຕຸລາ 2025 ນີ້.