We Running ເພງປຸກໃຈຈາກ PHOENIX BOII ເລົ່າຄວາມຝັນຜ່ານມຸມມອງຂອງນັກກີລາລາວ
We Running ແມ່ນເພງທີ່ຖືກຂຽນຂຶ້ນໂດຍອີງຈາກຊີວິດຈິງຂອງ PHOENIX BOII ນັກຮ້ອງ-ແຣັບເປີ ໜຸ່ມຈາກຫຼວງພະບາງ ດ້ວຍຄວາມຝັນທີ່ບໍ່ຍອມແພ້ໃນການສ້າງອາຊີບໃນສາຍງານດົນຕີ ຫຼື ການເປັນສິລະປິນ.
ຍິ່ງຮູ້ວ່າຄວາມຝັນມັນຍາກ ກໍຍິ່ງຕ້ອງທ້າທ້າຍ ແລະ ຕ້ອງເຮັດໃຫ້ໄດ້, ຈຶ່ງພ້ອມລຸຍລົງໃນທຸກການແຂ່ງຂັນນັ້ນເອງ. ໃນ MV ກໍຍັງໄດ້ຍົກພາບປະກອບເປັນນັກກີລາລາວໃນປະເພດຕ່າງໆ ທີ່ເຖິງຈະເມື່ອຍກໍບໍ່ມີທາງຍອມແພ້ໃນອຸປະສັກ ແລະ ມີຄວາມອົດທົນ ການເປັນສິລະປິນກໍເຊັ່ນກັນ ເພາະສິ່ງທີ່ເຮັດຢູ່ກໍຄືກັບການເປັນນັກກີລາທີ່ໝັ່ນຝຶກຊ້ອມທຸກໆມື້.
ໃນສ່ວນຂອງເນື້ອຫາເພງກໍກົງໂຕເລີຍ We Running ຄືເພງສຳລັບຄົນທີ່ພ້ອມຈະແລ່ນຕາມຫາຄວາມຝັນ, ພໍຟັງແລ້ວກໍຮູ້ສຶກວ່າມັນຍິ່ງສ້າງແຮງບັນດານໃຈ ເພາະເພງນີ້ປະກອບດ້ວຍສຽງແຣັບຂອງ PHOENIX BOII ແລະ ສຽງດົນຕີທີ່ກະຕຸ້ນຈັງຫວະຫົວໃຈໃຫ້ຕື່ນເຕັ້ນ ພ້ອມພາບຄວາມປະທັບໃຈຈາກຊີວິດນັກກີລາ.
ຖືວ່າເປັນເພງທີ່ໄດ້ເປີດມຸມມອງໃໝ່ໆໃຫ້ພວກເຮົາໄດ້ຮູ້ເຖິງຄວາມພະຍາຍາມຈາກສາຍອາຊີບອື່ນໆ ເຊິ່ງມັນບໍ່ພຽງແຕ່ເຫັນຄວາມຕັ້ງໃຈຈາກຄົນດຽວ ແຕ່ທຸກຄົນມີຄວາມຝັນທີ່ຍິ່ງໃຫຍ່ບໍ່ຕ່າງກັນ.