VEILED MUSICIAN ເປັນລາຍການປະກວດຮ້ອງເພງທີ່ໂດ່ງດັງຈາກປະເທດເກົາຫຼີໃຕ້, ລາຍການນີ້ມີຮູບແບບທີ່ເປັນເອກະລັກຄືການປິດບັງຕົວຕົນຂອງຜູ້ເຂົ້າແຂ່ງຂັນທີ່ຈະຮ້ອງເພງຢູ່ຫຼັງສາກທີ່ໃຫ້ເຫັນພຽງເງົາ ແລະ ຄະນະກຳມະການຈະບໍ່ເຫັນໜ້າຕາ, ອາຍຸ, ຊື່, ຫຼື ຂໍ້ມູນສ່ວນຕົວໃດໆຂອງຜູ້ແຂ່ງຂັນຮ້ອງເພງ. ປັດຈຸບັນ, ລາຍການນີ້ໄດ້ຂະຫຍາຍສູ່ຕະຫຼາດສາກົນ ມີປະເທດທີ່ເຂົ້າຮ່ວມຫຼາຍເຖິງ 12 ປະເທດເຊັ່ນ: ເກົາຫຼີໃຕ້, ຍີ່ປຸ່ນ, ໄທ, ຫວຽດນາ, ມາເລເຊຍ, ອິນໂດເນເຊຍ, ຟິລິບປິນ, ສິງກະໂປ, ອົດສະຕຣາລີ, ນິວຊີແລນ, ກຳປູເຈຍ ແລະ ລາວ.
VEILED MUSICIAN ລາຍການຈາກເກົາຫຼີໃຕ້ສູ່ປະເທດລາວ
ລາຍການຮ້ອງເພງທີ່ຈະຄັດເລືອກພຽງແຕ່ສຽງຮ້ອງຂອງຜູ້ເຂົ້າແຂ່ງຂັນ ແລະ ຈະນຳຜູ້ຊະນະພຽງ 3 ຄົນເທົ່ານັ້ນ ຈະໄດ້ເປັນຕົວແທນປະເທດລາວໄປແຂ່ງຂັນ “Global Veiled Musician” ໃນຮອບ Grand Final (ຮອບຊີງຊະນະເລີດ) ທີ່ ປະເທດເກົາຫຼີໃຕ້.
ພາບ: JoJo Miracle
ລາຍການນີ້, ແມ່ນຍັງໄດ້ພິທີກອນຄຸນນະພາບຢ່າງ ມິດປະຊາ ບຸດສະວົງ (Mitpasa Boudsavong) ທີ່ຈະມາດຳເນີນລາຍການ ແລະ ໃນສ່ວນຂອງຄະນະກຳມາການທີ່ຈະມາຊ່ວຍຕັດສິນຄັດເລືອກ ທຸກຄົນຄົງຈະຮູ້ຈັກກັນດີເພາະພວກເຂົາລ້ວນມີຜົນງານທີ່ໂດດເດັ່ນໃນວົງການເພງລາວ. ເລີ່ມຕົ້ນທີ່ຄະນະກຳມາການຄົນທຳອິດກັນເລີຍກໍຄື: ຕ່າຍ ອາກາດ (Taiy Akard), ຕີ ອຸດາໄລ (Tee Oudalay), ລາລາ ສຸດທິດາ (Lala Soudthida), ຊານົນ ມະນີຜົນ (Sanonh Maniphon), ໂຈ້ໂຈ້ ມິຣາໂຄ (Jojo Miracle) ແລະ ແຂກສຸດພິເສດຈາກເກົາຫຼີ ມູນ (Moon).
VEILED MUSICIAN LAOS EP01
ໃນຕອນທີ 1 ນີ້, ແມ່ນການຄັດເລືອກຮອບທຳອິດ (1st Round Audition) ນັກຮ້ອງປິດສະໜາຈະຖືກຄັດເລືອກຈາກຫຼາຍຮ້ອຍຄົນໃຫ້ເຫຼືອພຽງແຕ່ 40 ຄົນເທົ່ານັ້ນ ເພື່ອເຂົ້າສູ່ໃນຮອບຕໍ່ໄປ (Semi Final).
ກະຕິກາແມ່ນຈະໃຫ້ຄະນະກຳມະການທັງ 5 ໄດ້ຟັງສຽງຮ້ອງຈາກຫຼັງສາກ ຖ້າຄະນະກຳມະການໄດ້ກົດປິດໄຟຫຼາຍກວ່າ 2 ຄົນຂຶ້ນໄປຜູ້ເຂົ້າແຂ່ງຂັນປິດສະໜາກໍຈະຕົກຮອບທັນທີ ແລະ ຖ້າໃຜທີ່ສາມາດຮ້ອງເພງໄດ້ຈົນຈົບແມ່ນສາມາດເຂົ້າຮອບໄດ້ທັນທີ.
ພຽງເລີ່ມກໍຖືວ່າເດືອດປຸດໆ ປານລາວາຮ້ອນ ແລະ ກຳມະການກໍຕ້ອງເຈັບຫົວກັນສຸດໆ ເພາະນັກຮ້ອງປິດສະໜານັ້ນມີຫຼາກຫຼາຍຮູບແບບການຮ້ອງທີ່ໂດດເດັ່ນ. ໃນລາຍການນີ້ເຮັດໃຫ້ເຫັນເລີຍວ່າຄົນລາວນັ້ນມີຄວາມສາມາດບໍ່ແພ້ໃຜເລີຍ ເພາະສຽງຮ້ອງທີ່ດີເກີນຄາດຈົນເຮັດໃຫ້ ມ່ວນ ຮູ້ສຶກຂົນລຸກໃນນ້ຳສຽງຂອງແຕ່ລະຄົນ ແລະ ລຸ້ນວ່າຈະມີໃຜແດ່ທີ່ຈະໄດ້ເຂົ້າໃນຮອບຕໍ່ໄປ.
