Crown Spotlight

ຈາກເດັກໄຮ້ສັນຊາດສູ່ເຈົ້າຂອງມຸງກຸດ “ນ້ຳເຜິ້ງ ການທີຣາ” Miss World Thailand 2026

ໂດຍ: Tonmai Phoutthasack

11 May 2026● 80

ທຸກຄົນຮູ້ບໍ່ວ່າຜູ້ຊະນະ Miss World Thailand ປີນີ້ປະຫວັດນັ້ນເພິ່ນບໍ່ທຳມະດາ. ນັ້ນກໍຄື “ນ້ຳເຜິ້ງ ການທີຣາ ເຕຊະພັດທະຣະທະນາກຸນ” (MWT 15) ທີ່ຫາກໍຄວ້າມຸງກຸດໄດ້ສົດໆຮ້ອນໆ. ບອກເລີຍວ່າ “ງາມສົມມຸງ” ແຖມມີເລື່ອງລາວທີ່ອ່ານແລ້ວຕ້ອງມີນ້ຳຕາຊຶມແນ່ນອນ.

ນ້ຳເຜິ້ງ ສາວໃນອາຍຸ 25 ປີ ເຕີບໃຫຍ່ມາໃນຄອບຄົວຊົນເຜົ່າໄຕໃຫຍ່ຂອງຊຽງຮາຍ.  ເຊື່ອບໍ່ວ່າ ນາງເຄີຍເປັນ “ເດັກໄຮ້ສັນຊາດ” ມາກ່ອນ. ໃນປີ 2019 ນາງເຄີຍໄດ້ຮັບຄັດເລືອກເປັນຕົວແທນເຍົາວະຊົນໄທໄປແຂ່ງຂັນໂຄງງານວິທະຍາສາດລະດັບໂລກທີ່ສະຫະລັດອາເມຣິກາ ແຕ່ພັດມີບັນຫາເລື່ອງວີຊ່າ(ຍ້ອນເລື່ອງສັນຊາດນັ້ນແຫຼະ) ເຮັດໃຫ້ບໍ່ໄດ້ໄປ.

ເຖິງຈະພາດໂອກາດໃນການເດີນທາງ, ແຕ່ນ້ຳເຜິ້ງ ແລະ ໝູ່ເພື່ອນກໍບໍ່ຍັງຄົງພະຍາຍາມຢູ່ເລື່ອຍມາ ໄດ້ສົ່ງໂຄງງານ “ການພັດທະນາສານເຄືອບເມັດພັນອຸ້ມນ້ຳຈາກຢາງໄມ້ໃນທ້ອງຖິ່ນ” ເຂົ້າປະກວດ ຈົນສາມາດຄວ້າລາງວັນ Special Award ຈາກ USAID ໃນດ້ານຄວາມຊ່ວຍເຫຼືອດ້ານມະນຸດສະທຳມາໄດ້ສຳເລັດ. 

ນອກຈາກຈະງາມແລ້ວ ຍັງຮຽນຈົບຈາກຄະນະເຕັກນິກການແພດ ມະຫາວິທະຍາໄລຊຽງໃໝ່. ສະໄໝຮຽນກໍບໍ່ແມ່ນທຳມະດາ ເປັນເຖິງປະທານສະໂມສອນນັກສຶກສາ. ແລະ ປະຈຸບັນກໍເຮັດວຽກເປັນນັກເຕັກນິກການແພດອີກ.

ອີກໜຶ່ງເຫດຜົນທີ່ເຮັດໃຫ້ນ້ຳເຜິ້ງ ເໝາະສົມມົງທີ່ສຸດກັບເວທີ Miss World ກໍຄືໂຄງການ “Dare to Dream” ທີ່ເພິ່ນເຮັດເພື່ອຊ່ວຍເຫຼືອເດັກນ້ອຍໄຮ້ສັນຊາດໃຫ້ໄດ້ຮຽນໜັງສື. ເພິ່ນມຸ່ງໝັ້ນຫຼາຍ ຈົນໄດ້ໄປນັ່ງປະຊຸມຮ່ວມກັບຕົວແທນຈາກ 16 ປະເທດ ແລະ UNHCR ເພື່ອຊ່ວຍແກ້ໄຂບັນຫາເລື່ອງສັນຊາດໃນລະດັບອາຊີເລີຍ.

ກ່ອນຈະມາມົງຢູ່ເວທີນີ້ ນ້ຳເຜິ້ງກໍເຄີຍຜ່ານເວທີ Miss Universe Thailand 2023 ມາກ່ອນ (ຕອນນັ້ນເປັນຕົວແທນຊຽງໃໝ່). ການກັບມາຄັ້ງນີ້ ນ້ຳເຜິ້ງພິສູດໃຫ້ເຫັນແລ້ວວ່າ ຄວາມພະຍາຍາມບໍ່ເຄີຍຖິ້ມໃຜ ແລະ ຕອນນີ້ເພິ່ນກໍພ້ອມແລ້ວທີ່ຈະໄປສູ້ຕໍ່ຢູ່ເວທີໂລກແລ້ວ ທີ່ປະເທດຫວຽດນາມ.

“ຕົ້ນທຶນຊີວິດຄົນເຮົາອາດຈະບໍ່ເທົ່າກັນ ແຕ່ຄວາມຝັນມີສິດເທົ່າກັນສະເໝີ”.

ຈາກເດັກສາວ ທີ່ຄັ້ງໜຶ່ງເຄີຍຖືກກຳແພງເລື່ອງສັນຊາດກີດກັ້ນໂອກາດຈົນເກືອບຈະຖິ້ມຄວາມຝັນ. ແຕ່ມື້ນີ້ ໄດ້ພິສູດໃຫ້ເຫັນແລ້ວວ່າ “ສັນຊາດ” ບໍ່ແມ່ນເຄື່ອງວັດແທກ “ຄຸນຄ່າ” ຂອງຄວາມເປັນຄົນ ແລະ ອຸປະສັກກໍເປັນພຽງບົດທົດສອບທີ່ເຮັດໃຫ້ມຸງກຸດໃນມື້ນີ້ສວຍງາມກວ່າເກົ່າ.

ນ້ຳເຜິ້ງບໍ່ໄດ້ສູ້ເພື່ອແຕ່ຕົວເອງ, ແຕ່ສູ້ເພື່ອເປັນ “ແສງສະຫວ່າງ” ໃຫ້ກັບເດັກນ້ອຍອີກຫຼາຍພັນຄົນທີ່ກຳລັງຕິດຢູ່ໃນເງົາຂອງການໄຮ້ຕົວຕົນ, ຢ່າໃຫ້ໃຜມາບອກວ່າ “ເຈົ້າເຮັດບໍ່ໄດ້” ເພາະຖ້າຫາກເຮົາກ້າທີ່ຈະຝັນ ແລະ ລົງມືເຮັດຢ່າງສຸດກຳລັງ, ຈັກມື້ໜຶ່ງ ໂລກຈະຕ້ອງຢຸດຟັງ ແລະ ເປີດເສັ້ນທາງໃຫ້ກັບພວກເຮົາເອງ.