Muan Listen - ມ່ວນຊວນຟັງ

ມ່ວນຄັກໆ! ຟັງເພງໃໝ່ຮັບປີໃໝ່ລາວ “ນ້ຳມົນສົງການ” ຈາກ LUSSIAN x Donaknowurfeel 

ໂດຍ: Khainapha Chanthathilath

10 April 2026● 141

ເພາະເດືອນເມສາມັນຮ້ອນຈົນທົນບໍ່ໄຫວ ເລີຍຕ້ອງມີເພງນີ້ໄວ້ດັບຮ້ອນ. ມ່ວນຊວນຟັງ ເລີຍນຳ “ນ້ຳມົນສົງການ” ເພງໃໝ່ຫຼ້າສຸດຈາກ 2 ສິລະປິນ-ແຣັບເປີ ສຸດກວນຄື LUSSIAN x Donaknowurfeel ທີ່ຈັບມືກັນມາປ່ອຍພະລັງຄວາມມ່ວນ ພ້ອມປ່ຽນຄວາມຮ້ອນເດືອນເມສາໃຫ້ເປັນຄວາມມ່ວນແບບຢຸດບໍ່ຢູ່.

ທຸກຄົນຕ້ອງລອງຟັງເພງນີ້ກັນເລີຍ, ເພາະເພງ ນ້ຳມົນສົງການ ນັ້ນມີເນື້ອຫາສຸດກວນແບບສະບັບຄົນທີ່ມີຄວາມຂີ້ຫຼິ້ນ ແລະ ນິໄສ ມັກມ່ວນ-ມັກກວນ ກໍເປັນສະໄຕລ໌ຄົນລາວເຮົາທີ່ມີການຢອກໄຍກັນ ເຮັດໃຫ້ເຂົ້າເຖິງງ່າຍ ແລະ ຖືກໃຈໄວຮຸ່ນສາຍຕຳຈອກແບບສຸດໆ.

ຈັງຫວະດົນຕີກໍອອກແບບມາເພື່ອສາຍເຕັ້ນໂດຍສະເພາະ ດ້ວຍບີດ (Beat) ທີ່ມີຄວາມມັນ ແລະ ເລົ້າໃຈ ພໍແຕ່ດົນຕີຂຶ້ນກໍເຮັດໃຫ້ຮູ້ສຶກຢາກລຸກຂຶ້ນມາໂຢກໆທັນທີ. ບອກເລີຍວ່າເໝາະຫຼາຍທີ່ຈະເປີດໃສ່ລຳໂພງໂຕໃຫຍ່ໆແລ້ວເຕັ້ນກັບກຸ່ມໝູ່ຢູ່ໜ້າບ້ານກັນຈົນແອວສັ່ນໂລດ.

ເພງນີ້ຖືວ່າເປັນການສ້າງສີສັນໃໝ່ຊ່ວງບຸນປີໃໝ່ລາວ ແລະ ເປັນການປະສົມປະສານລະຫວ່າງກິ່ນອາຍປະເພນີ ແລະ ໄລຟ໌ສະໄຕລ໌ສະໄໝໃໝ່ໄດ້ຢ່າງລົງຕົວ.

ໃຜທີ່ບໍ່ຢາກຕົກເທຣນ (Trend) ຫຼື ຢາກເປັນຜູ້ນຳທ່າເຕັ້ນໃນວົງກັບໝູ່ເພື່ອນ ຕ້ອງຮີບໄປຊອກຟັງ ແລະ ຊ້ອມທ່າເຕັ້ນໄວ້ຖ້າເລີຍ.