ເຫຼືອເວລາອີກພຽງແຕ່ໜຶ່ງເດືອນກໍຈະກ້າວເຂົ້າສູ່ປີ 2025 ແລ້ວ, ມັນຄືໄວແທ້ທຸກຄົນວ່າບໍ? ໃຜທີ່ຮູ້ສຶກວ່າກຳລັງຢາກປ່ຽນແປງຕົວເອງໃຫ້ເປັນຄົນທີ່ດູດີຂຶ້ນຕ້ອງລອງເບິ່ງວິທີນີ້ເລີຍ Manifest Energy ຕົວເອງໃຫ້ດີຂຶ້ນພາຍໃນ 21 ມື້. ກ່ອນທີ່ຈະໄປອ່ານສິ່ງທີ່ມ່ວນໄດ້ນຳມາແຊຣ໌ບອກນັ້ນ. ມ່ວນຈະຂໍມາອະທິບາຍຕື່ມອີກໜ່ອຍໜຶ່ງກ່ອນເພາະຄິດວ່າຫຼາຍຄົນຄົງຈະສົງໄສວ່າ: ທິດສະດີການ Manifest Energy ແມ່ນຫຍັງ? ຮູ້ແລ້ວຈະເກີດປະໂຫຍດຫຍັງກັບຕົວເຮົາ?.
“ການ Manifest Energy ແມ່ນກົດຂອງການດຶງດູດໃນສິ່ງທີ່ເຮົາຕ້ອງການໃຫ້ເຂົ້າມາສູ່ຊີວິດຂອງເຮົາ ດ້ວຍການຕັ້ງເປົ້າໝາຍທາງດ້ານຄວາມຄິດ, ຄວາມຮູ້ສຶກ ແລະ ການພັດທະນາໃນດ້ານບວກ. ເພື່ອໃຫ້ສິ່ງທີ່ຕ້ອງການນັ້ນເປັນຈິງ”
ໃຜທີ່ຮູ້ຄຳຕອບແລ້ວ ແລະ ຕ້ອງການ Manifest ໃຫ້ຕົວເອງມາລອງເບິ່ງວິທີດີໆທີ່ແອັດນຳມາແຊຣ໌ນີ້ກັນເລີຍ.
- ຕັ້ງເປົ້າໝາຍທີ່ຊັດເຈນ.
ກຳນົດເປົ້າໝາຍທີ່ເຈາະຈົງເຊັ່ນ: ການພັດທະນາທັກສະ, ການຮັກສາສຸຂະພາບໃຫ້ດີຂຶ້ນ ຫຼື ການປ່ຽນແປງນິໄສທີ່ຮູ້ສຶກວ່າບໍ່ດີ. ແບ່ງເປົ້າໝາຍໃຫຍ່ໃຫ້ເປັນຂັ້ນຕອນຍ່ອຍໆເພື່ອສາມາດເຮັດໄດ້ໃນທຸກມື້.
2. ສ້າງນິໄສດ້ານບວກ ແລະ ຈັດການເວລາໃຫ້ດີ.
ເລືອກໜຶ່ງນິໄສທີ່ເຈົ້າຢາກສ້າງເຊັ່ນ: ການອອກກຳລັງກາຍ, ການອ່ານໜັງສື ແລະ ການຝຶກສະມາທິ. ໃຫ້ຝຶກຊ້ອມຊ້ຳໆທຸກມື້ ດ້ວຍ Routine ເວລາດຽວກັນເພື່ອສ້າງຄວາມລື້ງເຄີຍ.
ວາງແຜນແຕ່ລະມື້ໃນລາຍການສິ່ງທີ່ຕ້ອງເຮັດ (To-Do List) ຫຼື ວາງນັດໝາຍໄວ້ໃນປະຕິທິນເພື່ອຈັດລໍາດັບຄວາມສໍາຄັນ ແລະ ແບ່ງເວລາການພັກຜ່ອນເຊັ່ນ: ການພັດນາຕົນເອງ ແລະ ການເຮັດວຽກ.
3. ຊອກຫາຮຽນຮູ້ທັກສະໃໝ່ ແລະ ປັບປຸງການສື່ສານ.
ໃຊ້ເວລາໃນການຮຽນຮູ້ທັກສະຄວາມຮູ້ໃໝ່ເຊັ່ນ: ການເບິ່ງວິດີໂອໃຫ້ຄວາມຮູ້ ຫຼື ເຂົ້າຄອສ໌ອອນລາຍ ແລະ ຕັ້ງເປົ້າໝາຍເພື່ອຈະຮຽນຮູ້ສິ່ງໃໝ່ໃນທຸກມື້. ຝຶກການຟັງໃຫ້ດີຂຶ້ນ ແລະ ຕັ້ງໃຈຟັງຄົນຮອບຂ້າງເພື່ອພັດທະນາຄວາມສຳພັນ.
4. ຝຶກຝົນການຄິດບວກ, ຕິດຕາມຜົນ ແລະ ປະເມີນຕົວເອງ.
ຈົດບັນທຶກເລື່ອງລາວດີໆທີ່ເກີດຂຶ້ນໃນແຕ່ລະມື້ ຫຼື ສິ່ງທີ່ເຈົ້າຮູ້ສຶກຢາກຂອບໃຈ, ຝືກການເບິ່ງຫາຂໍ້ດີໃນທຸກໆສະຖານະການລວມເຖິງບັນຫາທີ່ພົບເຈິ. ໃນທຸກໆ 7 ມື້ ໃຫ້ທົບທວນ ແລະ ປະເມີນສິ່ງທີ່ເຈົ້າເຮັດໄດ້ດີ ຫຼື ສິ່ງທີ່ຕ້ອງປັບປຸງ ແລະ ຢ່າກົດດັນຕົວເອງ.
5. ພາຕົວເອງອອກຈາກ Comfort Zone.
ທ້າທາຍຕົວເອງດ້ວຍສິ່ງໃໝ່ໆທີ່້ເຈົ້ານັ້ນຍັງບໍ່ໄດ້ລອງເຊັ່ນ: ການເວົ້າ Present ໃນບ່ອນຄົນຫຼາຍໆ, ການພົບເຈິກັບຄົນໃນສັງຄົມໃໝ່ໆ ແລະ ການເປັນອາສາສະໝັກຊ່ວຍເຫຼືອສັງຄົມ.
ການປ່ຽນແປງຊີວິດຕົວເອງໃນ 21 ວັນນັ້ນ, ເປັນເລື່ອງທີ່ຕ້ອງໄດ້ໃຊ້ຄວາມຕັ້ງໃຈ ແລະ ໃຫ້ເຮົາເປັນຜູ້ພັດທະນາທີ່ຂຶ້ນອີກເລື້ອຍໆໃນປີຕໍ່ໄປ. ຖ້າໃຜເຮັດແລ້ວເຫັນຜົນແນວໃດ? ມາເລົ່າສູ່ມ່ວນຟັງແດ່ເດີ
ໂດຍ: ທີມບັນນາທິການ Muan
