ຜົນງານເພງຫຼ້າສຸດຂອງ ຕີ໋ ອຸດາໄລ ທີ່ຫາກໍປ່ອຍອອກມາເມື່ອບໍ່ດົນມານີ້, ນອກຈາກເພງເອງທີ່ເປັນລາຍເຊັນຂອງສິລະປິນຊື່ດັງຜູ້ນີ້ ກໍຍັງມີນັກສະແດງໄວລຸ້ນທີ່ເປັນທີ່ຮູ້ຈັກຈາກການເປັນກະແສໃນຕິກຕັອກ ນັ້ນກໍຄື ຈິມມີ້. ນ້ອງໃໝ່ຄົນນີ້ອາຍຸພຽງ 15 ປີເທົ່ານັ້ນ ແຕ່ດ້ວຍຄວາມມີສະເໜ່ ແລະ ໜ້າຮັກ ຈຶ່ງເຮັດໃຫ້ລາວໄດ້ມີໂອກາດເຂົ້າສູ່ໂລກຂອງການສະແດງ.
ທີມມ່ວນ ກໍບໍ່ລໍຊ້າໄປຊອກໄປຄົ້ນໄປຕາມຫາວ່ານ້ອງແມ່ນໃຜ ເພື່ອໃຫ້ທຸກຄົນໄດ້ຮູ້ຈັກນ້ອງໃຫ້ຫຼາຍຂຶ້ນ.
ຈິມມີ້ ເປັນທີ່ຮູ້ຈັກຈາກການທີ່ລາວໄປຕັດຜົມ ແລ້ວທາງຮ້ານຕັດຜົມໄດ້ໂພສວິດີໂອລົງໃນຕິກຕັອກ ແລະ ອີກໜຶ່ງວິດີໂອແມ່ນເປັນວິດີໂອທີ່ລາວໄດ້ເສີບອາຫານໃຫ້ກັບແຂກຢູ່ທີ່ຮ້ານແຫ່ງໜຶ່ງໃນເຂດສີຫອມ. ດ້ວຍຄວາມໜ້າຮັກ ແລະ ມີສະເໜ່ຂອງລາວ, ຊາວເນັດຈຶ່ງແຫ່ກັນໄປສະແດງຄວາມເຫັນໃນວິດີໂອນັ້ນ ແລະ ສົ່ງຕໍ່ວິດີໂອດັ່ງກ່າວອອກໄປຈົນກາຍເປັນໄວຣັລ.
ຈິມມີ້ ມີຊື່ແທ້ວ່າ ວິທະຫວັດ ທຳມະວົງ ປັດຈຸບັນອາຍຸ 15 ປີ ກຳລັງຮຽນຢູ່ ໂຮງຮຽນມັດທະຍົມສົມບູນເຈົ້າອານຸວົງ.
ສຳລັບບົດບາດພະເອກເອັມວີ ໃນເພງ ຂອບໃຈທີ່ເຄີຍສອນຄຳວ່າຮັກ ຂອງ ຕີ໋ ອຸດາໄລ ນັ້ນ, ນີ້ເປັນຄັ້ງທຳອິດໃນການສະແດງຂອງລາວ ເຊິ່ງບົດບາດທີ່ໄດ້ຮັບຈະເປັນ ຊາຍໜຸ່ມທີ່ມີຮັກຄັ້ງທຳອິດ ໃນໄວເດັກໄຮ້ດຽງສາ ແຕ່ມີເຫດບັງເອີນເຮັດໃຫ້ຕ້ອງແຍກຍ້າຍກັນໄປເຮັດໜ້າທີ່ຂອງຕົນເອງ.
ຈິມມີ້ ບອກວ່າ ຕົນເອງມີລັກສະນະພິເສດ ແລະ ສະເໜ່ ຄື ຄວາມເປັນຕົວຂອງຕົວເອງຫຼາຍ, ເປັນຄົນຂີ້ອາຍ ແລະ ເຂີນເກັ່ງ, ແຕ່ກໍ່ຍັງເປັນຄົນທີ່ເຮັດສິ່ງຕ່າງຢ່າງເຕັມທີ່ ແລະ ມັກຄວາມທ້າທາຍ ໃນການເຮັດສິ່ງໃໝ່ໆ.
ໃນເວລາວ່າງ, ຈິມມີ້ມັກຢູ່ກັບຄອບຄົວ ແລະ ໝູ່ເພື່ອນ. ຄະຕິປະຈຳໃຈ ແລະ ແຮງບັນດານໃຈຂອງລາວແມ່ນ ‘ເຮັດໃຫ້ດີທີ່ສຸດ ແລະ ເປັນໂຕເອງໃຫ້ຫຼາຍທີ່ສຸດ’.
“ສິ່ງທີ່ທ້າທາຍຂອງຈິມມີ້ແມ່ນຄວາມແປກໃໝ່ ແລະ ເປັນສິ່ງທີ່ບໍ່ເຄີຍເຮັດມາກ່ອນ, ເພາະຈິມມີ້ເປັນຄົນຂີ້ອາຍ. ກໍຈະມີເຂີນໆກ້ອງແດ່ ແລະ ບາງທີກໍເຂີນຄົນທີ່ແນມມາຫຼາຍ. ແຕ່ຈິມມີ້ໄດ້ເຮັດວຽກບ້ານ ແລະ ກຽມໂຕໂດຍການເປັນຕົວຂອງຕົວເອງ, ຜົນງານກໍຈະອອກມາດີ,” ຈິມມີ້ ກ່າວ.
ຈິມມີ້ຍັງໄດ້ບອກອີກວ່າ ຕົນເອງຈະມີຜົນງານມາໃຫ້ທຸກຄົນໄດ້ເບິ່ງ ແລະ ຕິດຕາມກັນອີກຢ່າງແນ່ນອນ. ເຮົາຂໍຝາກຜົນງານເອັມວີເພງທຳອິດທີ່ ຈິມມີ້ ສະແດງໄວ້ແດ່ເດີ. ສາມາດຕິດຕາມຜົນງານອື່ນໆຂອງລາວໄດ້ໃນໄວໆນີ້.
ໂດຍ: ທີມບັນນາທິການ Muan
