ພະເອກເອັມວີໜ້າໃສ ຈິມມີ້ – ວິທະຫວັດ ທຳມະວົງ ຂ້າມຝັ່ງໄທ ເພື່ອຖ່າຍໂປຣໄຟລ໌ຄ້າຍນັກສະແດງ
ທຸກຄົນຈື່ເດັກນ້ອຍຜູ້ຊາຍໜ້າຮັກໆທີ່ຫຼິ້ນເປັນພະເອກເອັມວີໃນເພງ “ຂອບໃຈທີ່ເຄີຍສອນຄຳວ່າຮັກ” ຂອງ ຕີ໋ ອຸດາໄລ ໄດ້ຢູ່ບໍ່? ຕອນນັ້ນເພງນີ້ເປັນກະແສຫຼາຍ ຈົນຄົນພາກັນຊອກຫາຂໍ້ມູນກັນໄປທົ່ວເລີຍວ່າເດັກນ້ອຍຄົນນັ້ນແມ່ນໃຜ ເພາະການສະແດງຂອງລາວເຮັດໃຫ້ຄົນເບິ່ງຮູ້ສຶກວ່າຢາກເອົາໃຈຊ່ວຍ ແລະ ຢາກຕິດຕາມຕໍ່ໄປ.
ຄົນທີ່ຫຼິ້ນເປັນພະເອກໃນໄວເດັກຄົນນັ້ນກໍຄື ຈິ້ມມີ້ – ວິທະຫວັດ ທຳມະວົງ ເຊິ່ງການຫຼິ້ນເອັມວີໂຕນັ້ນ ກໍເປັນຈຸດເລີ່ມຕົ້ນທີ່ພາລາວເຂົ້າສູ່ໂລກການສະແດງເປັນຄັ້ງທຳອິດ.
ຫຼັງຈາກທີ່ຫາຍໜ້າຫາຍຕາໄປດົນ ຕອນນີ້ມີຂ່າວດີມາບອກ ເພາະເບິ່ງຄືວ່າ ຈິມມີ້ ກຳລັງມີຜົນງານໃໝ່ໆ ມາໃຫ້ພວກເຮົາໄດ້ຕິດຕາມກັນແລ້ວ ເພາະຫຼ້າສຸດແອບເຫັນລາວເດີນທາງຂ້າມຝັ່ງໄປຖ່າຍຮູບໂປຣໄຟລ໌ເຖິງປະເທດເພື່ອນບ້ານ.
ແຖມທາງເພຈ H2GO Entertainment ເຊິ່ງເປັນບໍລິສັດເບື້ອງຫຼັງທີ່ເຮັດວຽກກ່ຽວກັບສື່ບັນເທີງ ກໍຍັງໄດ້ໂພສຮູບຂອງ ຈິມມີ້ ພ້ອມທັງແນະນຳປະຫວັດເລັກໆນ້ອຍຂອງລາວລົງໃນເພຈອີກດ້ວຍ.
ພໍເຫັນຄວາມເຄື່ອນໄຫວແບບນີ້ແລ້ວ ກໍຊວນໃຫ້ຄິດວ່າ ຈິມມີ້ ກຳລັງຈະກ້າວເຂົ້າສູ່ວົງການບັນເທີງແບບເຕັມໂຕ ຫຼື ອາດຈະມີໂປຣເຈັກໃໝ່ໆອອກມາໃຫ້ໄດ້ເຫັນໃນໄວໆນີ້.
ພວກເຮົາມາລໍຖ້າຕິດຕາມ ແລະ ຊ່ວຍສົ່ງກຳລັງໃຈໃຫ້ລາວໄປນຳກັນເດີ.