Muan Scoop

ເປັນຫຍັງຈຶ່ງຄວນຕື່ນເຕັ້ນກັບລຸກໃໝ່ MVIIZ? ຊວນແກະຮອຍຄວາມໝາຍໃນ Visual Concept

ໂດຍ: Khainapha Chanthathilath

23 June 2026● 114

ທຸກຄົນເຫັນຮູບສາວໆ MVIIZ ໂຕຫຼ້າສຸດແລ້ວບໍ? ບອກເລີຍວ່າເທື່ອນີ້ພວກເຂົາມີຫຍັງໃໝ່ໆມາຝາກທຸກຄົນແນ່ນອນ ເພາະເພຈທາງການຂອງ MVIIZ ເລີ່ມປ່ອຍ Key Visual Concept ຂອງເພງໃໝ່ທີ່ຊື່ວ່າ FOCUZ ອອກມາໃຫ້ເຮົາໄດ້ຄາດເດົາຫຼິ້ນໆກັນແລ້ວ.

ຫຼາຍຄົນທີ່ຍັງບໍ່ຮູ້ກໍຄົງຈະງົງໆກັນແມ່ນບໍ່ວ່າ Muan Scoop ຕື່ນເຕັ້ນຫຍັງພິລຶກແທ້ ເອົ້າ! ຈະບໍ່ໃຫ້ຕື່ນເຕັ້ນໄດ້ແນວໃດລະທຸກຄົນ ເພາະ MVIIZ ມາພ້ອມກັບສະໄຕລ໌ໃໝ່ທີ່ປັງກວ່າເກົ່າ ຕ້ອງບອກວ່າຄອນເຊັບຮອບນີ້ມີຄວາມພິເສດຫຼາຍ ເພາະຈັດເຕັມທັງຄວາມເທ່ ແລະ ຍັງມີຄວາມແປກໃໝ່ທີ່ຍັງບໍ່ເຄີຍເກີດຂຶ້ນໃນບ້ານເຮົາເທື່ອ.

(ວິເຄາະຈາກຄວາມຄິດເຫັນສ່ວນຕົວຂອງນັກຂຽນ)

ຄວາມປັງຂອງແຟຊັນທີ່ເຊື່ອງໃນ Visual Concept

ຈາກທີ່ໄດ້ເຫັນແລ້ວກໍຄິດເຖິງແຟຊັນສະໄຕລ໌ຍີ່ປຸ່ນຂຶ້ນມາທັນທີເລີຍ ແບບວ່າມັນໃຫ້ກິ່ນອາຍ Y2K Futuristic ປະສົມເຂົ້າກັບ Cyberpunk ທີ່ເຮັດໃຫ້ຮູ້ສຶກວ່າເບິ່ງທັນສະໄໝ ແຕ່ຍັງມີຄວາມດິບຂອງຍຸກເກົ່າປະສົມຢູ່ ພ້ອມກັນນັ້ນກໍເຮັດໃຫ້ຮູ້ສຶກເລິກລັບ ແລະ ມີພະລັງໃນເວລາດຽວກັນ.

ສ່ອງລຸກຂອງສະມາຊິກ MVIIZ ທີ່ປ່ອຍອອກມາ

ຮູບສະມາຊິກຄົນທຳອິດທີ່ປ່ອຍມາຄື NAMTHIP ທີ່ມີຜົມສີຟ້າສົດເປັນສັນຍາລັກຂອງແຟຊັນຍຸກ Y2K ທີ່ໃຫ້ຄວາມຮູ້ສຶກແບບມີສະເໜ່ແບບໂຕແມ່ທີ່ຖືຄວາມໝັ້ນໃຈມາເກີນ 1000%, ຖືວ່າເປັນການນຳສະເໜີຮູບແບບ Visual Concept ທີ່ສາມາດເອີ້ນໄດ້ວ່າມີຫຼາຍມິຕິແຮງ.

ຮູບທີສອງທີ່ປ່ອຍອອກມາຂອງ YIANYII ທີ່ມີທັງຄວາມຫວານແຕ່ແອບເຊັກຊີນັ້ນ ມີການໃຊ້ Retro-Technology ເປັນອົງປະກອບຫຼັກ, ການນຳເອົາຮູບດວງຕາໄວ້ໃນໜ້າຈໍຄອມພິວເຕີເກົ່າໆ ມາເປັນອົງປະກອບມັນສື່ເຖິງຄວາມເປັນ Cyber ແລະ ການຖືກຈັບຕາເບິ່ງ.

ພໍມາລວມກັບແຟຊັນທີ່ທັນສະໄໝ ເຮັດໃຫ້ມັນເປັນຜົນງານທີ່ຮັກສາຄວາມສົມດຸນລະຫວ່າງການຫວນຄືນອະດີດ ແລະ ການກ້າວໄປສູ່ອະນາຄົດໄດ້ຢ່າງລົງຕົວທີ່ສຸດ ເປັນການສະແດງເຖິງຄວາມໝາຍຂອງຊື່ເພງ FOCUZ ໄດ້ດີຫຼາຍ ຍິ່ງເບິ່ງຍິ່ງຢາກຮູ້ວ່າໃນເພງຈະມີຫຍັງເຊື່ອງຢູ່.

ຮູບທີສາມ SOBAII ເປັນສະໄຕລ໌ທີ່ປະສົມປະສານລະຫວ່າງ Gothic ແລະ Futuristic Chic ທີ່ມີຄວາມມືດມົນ, ເລິກລັບ ແຕ່ມີຄວາມທັນສະໄໝ ແລະ ຫຼູຫຼາ ໃຫ້ອາລົມແບບມີຄວາມມືດມົນ, ດຶງດູດ ແລະ ມີພະລັງ. ບໍ່ແມ່ນຄວາມມືດແບບໜ້າຢ້ານເດີທຸກຄົນ ແຕ່ເປັນຄວາມມືດມົນທີ່ຊົງສະເໜ່ ແລະ ມີສະໄຕລ໌ແບບແພງໆຫັນນະ.

ຮູບທີສີ່ THIDA ມີດວງຕາທີ່ມີສະເໜ່ຫຼາຍ ແລະ ຍັງຖືກດຶງຄວາມໂດດເດັ່ນຜ່ານການແຕ່ງໜ້າທີ່ເນັ້ນລາຍລະອຽດ ແລະ ການຈັດແສງທີ່ເນັ້ນໜ້າສິລະປິນໃຫ້ໂດດເດັ່ນແບບ Futuristic Chic, ຄວາມໝັ້ນໃຈປະກອບກັບການໃສ່ເສື້ອຜ້າທີ່ເປັນໜັງ ແລະ ເສື້ອຂົນສັດ ການທີ່ສອງຢ່າງນີ້ຢູ່ຮ່ວມກັນໃນພາບດຽວ ເຮັດໃຫ້ມີຄວາມເປັນ High-Fashion ທີ່ໜ້າສົນໃຈ.

ສິ່ງທີ່ໜ້າຕື່ນເຕັ້ນ ແລະ ຄວນຕິດຕາມ

ການທີ່ທາງ Miracle Music ຄ່ອຍໆປ່ອຍສະປອຍຮູບອອກມາແບບນີ້ ໃນວົງການເພງໂດຍສະເພາະ K-Pop ຫຼື T-Pop ການເຮັດແບບນີ້ຍັງຖືກເອີ້ນວ່າເປັນການ Teasing  ຫຼື ປ່ອຍນ້ຳແຈ່ວລົດເດັດ ເພື່ອໃຫ້ແຟນເພງຕີຄວາມໝາຍຂອງ Storyline ຫຼື ປົມເລື່ອງທີ່ຈະເກີດຂຶ້ນໃນ Music Video ໂຕເຕັມ ນັ້ນເອງທຸກຄົນ ນີ້ແຫຼະຄືເລື່ອງມ່ວນໆທີ່ Muan Scoop ບອກ.

ຖືວ່າເປັນປະສົມປະສານໃນຍຸກປັດຈຸບັນທີ່ມີຄວາມເປັນດິຈິຕອລ ຫຼື ໂລກອະນາຄົດ, ການອອກແບບ Concept ທີ່ທັນສະໄໝທີ່ເນັ້ນຄວາມເລິກລັບ, ຄວາມຫຼູຫຼາ, ເພື່ອສ້າງບຸກຄະລິກທີ່ແຂງແກ່ນ ແລະ ໂດດເດັ່ນໃຫ້ກັບສິລະປິນໄດ້ຢ່າງລົງໂຕ. Muan Scoop ໄດ້ເບິ່ງຈາກຮູບແລ້ວ, ຄິດວ່າໂຕເພງນີ້ໜ້າຈະມີຈັງຫວະທີ່ໄວ, ໜັກແໜ້ນ ແລະ ເຕັມໄປດ້ວຍເລື່ອງລາວໃຫ້ເຮົາໄດ້ຄົ້ນຫາແນ່ນອນ ໃຜທີ່ລໍຖ້າການກັບມາຂອງ MVIIZ ຢູ່ ຢ່າລືມກຽມໂຕ FOCUZ ສາຍຕາໄວ້ໃຫ້ດີເດີ.

ໃຜທີ່ລໍຖ້າການກັບມາຂອງ MVIIZ ຢູ່ ຢ່າລືມກຽມໂຕລໍຖ້າເບິ່ງເພງເຕັມໃນວັນທີ 7 ກໍລະກົດ 2026 ນີ້ ລະຫວ່າງນີ້ກໍຕິດຕາມການອັບເດດຈາກເພຈທາງການ M.VIIZ ໄປກ່ອນເດີ.