ອາທຽນ ເສີບຄວາມຫວານຈົນນ້ຳຕານຊິຂຶ້ນຈໍ ໃນເພງໃໝ່ Coz i Love You
Highlights
- ອາທຽນ (ATIAN) ສິລະປິນຈາກຄ້າຍ Miracle Music ກັບມາໃນຮອບ 3 ປີ ພ້ອມຜົນງານໃໝ່ “Coz i Love You” ໃນລຸກ (Look) ທີ່ສົດໃສ ແລະ ຫວານກວ່າເກົ່າ.
- ຕົວເພງສື່ເຖິງການຕົກຂຸມຮັກຈົນໂງຫົວບໍ່ຂຶ້ນ ແລະ ການສາລະພາບຮັກແບບຊື່ໆ ຕົງໆ ເພື່ອຢືນຢັນຄວາມຈິງໃຈທີ່ມີຕໍ່ຄົນພິເສດ.
- MV ເພງນີ້ ໄດ້ ພິງກີ້ MVIIZ ມາຮ່ວມສະແດງເປັນນາງເອກ ເພີ່ມຄວາມໜ້າຮັກ ແລະ ຄວາມໂລແມນຕິກຈົນເຮັດໃຫ້ຄົນເບິ່ງຕ້ອງຍິ້ມຕາມ.
ຫຼັງຈາກຫ່າງຫາຍກັນໄປດົນເຖິງ 3 ປີ, ສິລະປິນດ່ຽວ ອາທຽນ (ATIAN) ຈາກຄ້າຍ Miracle Music ໄດ້ກັບມາພ້ອມຜົນງານເພງທີ່ສອງຂອງລາວທີ່ມີຊື່ວ່າ “Coz i Love You” ການກັບມາຄັ້ງນີ້ກໍໄດ້ເຜີຍອີກໂຕຕົນຂອງລາວທີ່ມີທັງຄວາມສົດໃສ, ເປັນຊາຍຄົນຮັກທີ່ສຸດແສນຈະໜ້າຮັກ ແລະ ລາວຈະມາເສີບຄວາມຫວານໃຫ້ທຸກຄົນໄດ້ຊຸ່ມຊື່ນຫົວໃຈກັນ.
ໃນວິດີໂອເພງຍັງໄດ້ ພິງກີ້ MVIIZ ມາຮ່ວມສະແດງເປັນນາງເອກປະກົບຄູ່ ອາທຽນ ເຮັດໃຫ້ເຮົາໄດ້ເຫັນໂມເມັ້ນ (Moment) ສຸດໜ້າຮັກຂອງທັງສອງຄົນ ຕ້ອງບອກວ່າຫວານກັນຫຼາຍຈົນນ້ຳຕານຊິຂຶ້ນຈໍແລ້ວ ຄົນໂສດທີ່ກຳລັງຟັງເພງນີ້ຕ້ອງອົດທົນກັນແດ່ເດີ.
Coz i Love You ແມ່ນເພງທີ່ສື່ເຖິງຄົນທີ່ກຳລັງຕົກຢູ່ໃນຄວາມຫຼົງໃຫຼຂອງຄວາມຮັກ. ເພງນີ້ໄດ້ບອກເລົ່າຜ່ານຄວາມຮູ້ສຶກທີ່ກຳລັງຫຼົງຮັກໃຜຜູ້ໜຶ່ງຢ່າງເລິກເຊິ່ງ ແລະ ມີການສື່ສານຢ່າງຊັດເຈນ ເພື່ອຢືນຢັນຄວາມຕ້ອງການທີ່ຈະມີຄົນຮັກໄວ້ຢູ່ຄຽງຂ້າງແຕ່ພຽງຜູ້ດຽວເທົ່ານັ້ນ.
ເພງຍັງເນັ້ນອາລົມຂອງຄວາມຮູ້ສຶກຮັກທີ່ສົດໃສ, ຄວາມຜູກພັນທີ່ໝັ້ນຄົງ ແລະ ການໃຫ້ຄວາມສຳຄັນກັບຄວາມສຳພັນເໜືອກວ່າສິ່ງອື່ນໃດ. ການຕົກຂຸມຮັກຈົນໂງຫົວບໍ່ຂຶ້ນ (Crazy Love) ເຊິ່ງເປັນສິ່ງທີ່ຢູ່ໃນໃຈຈົນມັນລົ້ນອອກມາເລີຍຕ້ອງຮີບບອກສາລະພາບຮັກຊ້ຳໆວ່າ “Coz i Love You. Love You-Love You-Love You” ເພື່ອຢ້ຳເຕືອນເຖິງຄວາມຈິງໃຈທີ່ມີຕໍ່ຄົນພິເສດ.