ອານິສະຣາ ໄຊຍະກອນ: ສ້າງສິ່ງທີ່ຮັກໃຫ້ເປັນຜົນງານຈົບການສຶກສາດ້ວຍ Art Toy Collection NUOL

ຫຼາຍຄົນຄົງຄິດບໍ່ເຖິງວ່າ ອາດທອຍ (Art Toy) ຈະສາມາດກາຍມາເປັນໂຄງການຈົບຊັ້ນທີ່ໜ້າສົນໃຈໄດ້ ແຕ່ ໄອລິນ – ອານິສະຣາ ໄຊຍະກອນ ປັດຈຸບັນ ອາຍຸ 22 ປີ, ນັກສຶກສາປີສຸດທ້າຍ ຈາກຄະນະສະຖາປັດຕະຍະກຳສາດ, ສາຂາອອກແບບຜະລິດຕະພັນ ໄດ້ພິສູດໃຫ້ເຫັນວ່າຄວາມຮັກໃນການສະສົມ Art Toy ສາມາດເປັນແຮງບັນດານໃຈມາສ້າງສັນເປັນ Collection ‘NUOL’ ເພື່ອເປັນຕົວແທນຂອງນັກສຶກສາແຕ່ລະຄະນະ ໄດ້ສົ່ງເອກະລັກຂອງແຕ່ລະຄະນະມາຖ່າຍທອດຜ່ານຕົວລະຄອນທີ່ໜ້າຮັກ ແລະ ມີຄວາມໝາຍທີ່ເລິກເຊິ່ງ. ນີ້ຄືເລື່ອງລາວຂອງຄວາມມຸ່ງໝັ້ນ ແລະ ຄວາມທ້າທາຍໃນການສ້າງສິ່ງໃໝ່ໆທີ່ບໍ່ເຄີຍມີໃຜເຮັດມາກ່ອນຂອງນັກສຶກສາຈົບໃໝ່ຄົນນີ້.

ລາວເລົ່າວ່າ ຄວາມທ້າທາຍທີ່ຄົນຮຸ່ນໃໝ່ມັກຈະພົບເລີຍກໍຄື ປັດຈຸບັນໂລກເຄື່ອນທີ່ ພັດທະນາໄປໄວຫຼາຍ ມີສິ່ງໃໝ່ໆເຂົ້າມາສະເໝີ ແລະ ສິ່ງນັ້ນຈະເປັນໄອເດຍໃໝ່ທີ່ເຮັດໃຫ້ພວກເຂົາສາມາດສ້າງສັນຜົນງານທີ່ດີຍິ່ງຂຶ້ນ.

ທັງນີ້, Art Toy ກໍເປັນອີກສິ່ງທີ່ເປັນກະແສ ທີ່ຄົນໃນຍຸກນີ້ມັກຊື້ໄວ້ສະສົມ ແລະ ກໍກາຍມາເປັນໄອເດຍໃຫ້ສິລະປິນຫຼາຍຄົນສ້າງສັນຜົນງານໃນຮູບແບບຂອງຕົນເອງອອກມາ.

ສໍາລັບຄົນຮຸ່ນໃໝ່, ຂ້ອຍຄິດວ່າຄວາມທ້າທາຍທີ່ອາດຈະພົບຄືການສ້າງສັນສິ່ງໃໝ່ ແລະ ແປກຈາກເກົ່າ, ແຕ່ເຊື່ອໝັ້ນວ່າຄົນຮຸ່ນໃໝ່ເຮັດໄດ້ແນ່ນອນ. ຂໍພຽງແຕ່ມີຄວາມກ້າທີ່ຈະຄິດ ແລະ ກ້າທີ່ຈະລົງມືເຮັດກໍພຽງພໍແລ້ວ.

NUOL Collection ເອກະລັກທີ່ເປັນເຄື່ອງທີ່ລະນຶກ

ພາບ : Ailin Sayakone 

ໄອລິນເລົ່າວ່າ ແຮງບັນດານໃຈຂອງລາວແມ່ນ ຢາກມີເຄື່ອງທີ່ລະນຶກທີ່ເປັນເອກະລັກສະເພາະຂອງແຕ່ລະຄະນະ ແລະ ທີ່ບໍ່ແມ່ນຂອງຂອງຂວັນທົ່ວໄປ. ລາວເລີຍເລືອກສ້າງ Art Toy Collection ‘NUOL’ (ຕົວລະຄອນນັກສຶກສາມະຫາວິທະຍາໄລແຫ່ງຊາດ) ເພື່ອເປັນເຄື່ອງທີ່ລະນຶກກ່ອນຈົບການສຶກສາ. ເປົ້າໝາຍຫຼັກແມ່ນຢາກໃຫ້ທຸກຄົນທີ່ເຫັນ Art Toy ແຕ່ລະໂຕສາມາດຮູ້ໄດ້ທັນທີວ່າຕົວລະຄອນນີ້ມາຈາກຄະນະໃດ. ດັ່ງນັ້ນ, ລາວຈຶ່ງໄດ້ອອກແບບໂດຍເນັ້ນເອກະລັກທີ່ໂດດເດັ່ນຂອງແຕ່ລະຄະນະ ເຊັ່ນ:

• ຄະນະສະຖາປັດຕະຍະກຳສາດ: ໂດດເດັ່ນດ້ວຍການຕັດໂມເດວເຮືອນ ແລະ ການພາຍກະບອກເຈ້ຍ, ສິ່ງທີ່ຂາດບໍ່ໄດ້ຄື “ກາລະວັດສີສົ້ມ” ທີ່ເປັນສັນຍາລັກ.
• ຄະນະນິຕິສາດ ແລະ ລັດຖະສາດ: ດ້ວຍເນື້ອໃນການຮຽນກ່ຽວກັບກົດໝາຍ, ສິ່ງທີ່ນຶກເຖິງຄື “ສານໄອຍະການ”, ຈຶ່ງໄດ້ນຳມາອອກແບບພ້ອມກັບ “ກາລະວັດສີແດງເລືອດໝູ” ອັນເປັນເອກະລັກ.
• ຄະນະກະເສດສາດ: ເປັນຄະນະທີ່ຮຽນກ່ຽວກັບ “ການປູກຝັງ ແລະ ລ້ຽງສັດ”, ໄອລິນຈຶ່ງອອກແບບໃຫ້ Art Toy ກຳລັງເກັບກ່ຽວຜັກ ແລະ ໃສ່ໝວກກຸບເພີ່ມຄວາມໜ້າຮັກ.

ນອກຈາກນັ້ນ, ການຕັ້ງຊື່ຂອງຕົວລະຄອນແຕ່ລະໂຕກໍມີຄວາມໝາຍເລິກເຊິ່ງ ໂດຍນຳສັບຈາກພາສາບາລີ-ສັນສະກິດມາຕັ້ງເຊັ່ນ: ນ້ອງ ພະນາ (ໝາຍເຖິງປ່າໄມ້) ຈາກຄະນະວິທະຍາສາດປ່າໄມ້ ແລະ ນ້ອງ ທາລາ (ໝາຍເຖິງສາຍນໍ້າ) ຈາກຄະນະຊັບພະຍາກອນນໍ້າ.

Art Toy ເປັນສິ່ງທີ່ມັກຈຶ່ງເລືອກນຳມາເຮັດເປັນໂຄງການບົດຈົບຊັ້ນ

ດ້ວຍຄວາມທີ່ ໄອລິນ ມັກ ແລະ ສົນໃຈ Art Toy ມາໄດ້ໄລຍະໜຶ່ງແລ້ວນັ້ນ, Art Toy ມັນມີຄວາມໝາຍທີ່ຫຼາກຫຼາຍ, ມີເລື່ອງລາວ, ມີຄວາມໝາຍເຊື່ອງຢູ່ໃນທຸກໆຜົນງານສະເໝີ. ລາວຍັງເປັນນັກສະສົມຕົວຍົງທີ່ເລີ່ມສະສົມຕັ້ງແຕ່ Art Toy ໄປຈົນຮອດຕຸກກະຕາທຸກຮູບແບບມາແຕ່ນ້ອຍຢູ່ແລ້ວ, ອີກຢ່າງໜຶ່ງກໍຄື Art Toy ຍັງບໍ່ທັນມີຄົນເຮັດເປັນບົດໂຄງການຈົບຊັ້ນເທື່ອ ລາວກໍເລີຍຢາກລອງນຳມາເຮັດເປັນບົດໂຄງການຈົບຊັ້ນຂອງຕົວເອງ ເພາະຄິດວ່າມັນໜ້າສົນໃຈດີ ແລະ ບໍ່ຄືໝູ່.

ພາບ : Ailin Sayakone 

ຄວາມທ້າທາຍທີ່ພົບລະຫວ່າງການເຮັດບົດຈົບຊັ້ນ

ການສ້າງໂຄງການບົດຈົບຊັ້ນດ້ວຍ Art Toy ບໍ່ແມ່ນເລື່ອງງ່າຍສຳລັບ ໄອລິນ ເພາະທຸກຢ່າງແມ່ນຖືວ່າໃໝ່ໝົດ ແລະ ຄວາມທ້າທາຍທີ່ລາວພົບ ແລະ ຄິດວ່າເປັນໂຈດທີ່ແກ້ຍາກທີ່ສຸດມີຢູ່ 2 ຢ່າງນຳກັນ ເຊັ່ນ:

1. ງົບປະມານ: ການນຳເຂົ້າວັດສະດຸຈາກຕ່າງປະເທດມີຄ່າໃຊ້ຈ່າຍສູງ ເຊິ່ງເປັນອຸປະສັກໃຫຍ່ໃນຕອນທຳອິດ ເພາະຢູ່ໃນລາວຍັງບໍ່ຄ່ອຍມີຄົນເຮັດ, ໄອລິນ ຍັງບໍ່ທັນມີກຳລັງຊັບພຽງພໍ ເຮັດໃຫ້ເກີດມີຄວາມຮູ້ສຶກທໍ້.
2. ຂັ້ນຕອນການຜະລິດ: ການພິມ 3D ແລະ ການລົງສີ Art Toy ທັງ 14 ໂຕເປັນວຽກທີ່ລະອຽດອ່ອນ ແລະ ຕ້ອງໃຊ້ຄວາມພະຍາຍາມຫຼາຍ. ໄອລິນ ຕ້ອງໄດ້ລອງຜິດລອງຖືກຫຼາຍຄັ້ງ ແຕ່ໂຊກດີທີ່ໄດ້ຮຸ່ນອ້າຍມີຄວາມຮູ້ດ້ານນີ້ໂດຍສະເພາະມາຊ່ວຍໃຫ້ຄຳປຶກສາ ແລະ ຊ່ວຍເຫຼືອຈົນສຳເລັດ.

ຫຼັງຈາກທີ່ໂຄງການສຳເລັດ, ຂ້ອຍຮູ້ສຶກພູມໃຈຫຼາຍທີ່ສາມາດນຳເອົາຄວາມຄິດທັງໝົດມາສ້າງເປັນຜົນງານທີ່ຈັບຕ້ອງໄດ້, ຮູ້ສຶກດີໃຈທີ່ໄດ້ເຮັດໃນສິ່ງທີ່ຮັກ ເຖິງວ່າຈະເມື່ອຍກໍຍັງສູ້ບໍ່ທໍ້ຖອຍ ຍັງຢາກເຮັດຕໍ່ໄປໃຫ້ສຳເລັດ. ຂ້ອຍຮູ້ສຶກຂອບໃຈຄອບຄົວ, ໝູ່ເພື່ອນທີ່ຊ່ວຍເຫຼືອຕັ້ງແຕ່ຕົ້ນຈົນຈົບ ຮູ້ສຶກຕົກໃຈທີ່ຕົວເອງສາມາດເຮັດສິ່ງນີ້ອອກມາໄດ້ແທ້ ແລະ ມີຄົນເຫັນໃນຄວາມຕັ້ງໃຈຂອງເຮົາ.

ຄວາມຕັ້ງໃຈໃນອະນາຄົດ

ເຖິງວ່າຈະມີຫຼາຍຄົນສົນໃຈ ແລະ ໄດ້ຮັບສຽງຕອບຮັບໄປໃນດ້ານທີ່ດີຈາກຫຼາຍພາກສ່ວນ, ແຕ່ລາວເລົ່າວ່າ ຕົນເອງຕັ້ງໃຈຈະບໍ່ເຮັດເປັນທຸລະກິດແບບຈິງຈັງ ເພາະວ່າຢາກໃຫ້ Art Toy ທີ່ສ້າງນັ້ນ ເປັນພຽງອີກໜຶ່ງ Hobby (ວຽກທີ່ມັກເຮັດຍາມວ່າງ) ທີ່ເຮັດດ້ວຍໃຈຮັກເທົ່ານັ້ນ ແຕ່ກໍມີແຜນຈະເປີດໃຫ້ສັ່ງຊື້ເປັນຮອບໆໃນຊ່ວງຮັບໃບປະລິນຍາ.