ຢູ່ໆກໍຫາຍໄປ ຫາຍໄປເລີຍ… ລົມກັນຢູ່ດີໆເປັນຫຍັງເຂົາຈຶ່ງມິດໄປ? ໄປໂດຍທີ່ບໍ່ມີຮອດຄຳບອກກ່າວ ແລະ ບໍ່ບອກເຫດຜົນ?
ຕອນທີ່ເລີ່ມລົມກັນໃໝ່ໆ ອີ່ຫຍັງກໍດີໄປໝົດທຸກຢ່າງເບິ່ງຄືວ່າສົດໃສ, ເວົ້າຫຍັງກໍຖືກຄໍປານຮູ້ຈັກກັນມາເປັນສິບໆປີ. ແຕ່ເມື່ອໃດກໍຕາມທີ່ບາງຄົນຮູ້ສຶກໝົດໃຈ ກໍອາດຈະຫາຍໂຕໄປແບບກະທັນຫັນ, ຕິດຕໍ່ຫາກໍບໍ່ຕອບ, ໂທໄປກໍບໍ່ຍອມຮັບສາຍ ຕັດຂາດທຸກຊ່ອງທາງໃນການສື່ສານ ປານວ່າໄດ້ຕາຍໄປຈາກຊີວິດຂອງອີກຄົນໄປແລ້ວ…
ນີ້ເວົ້າສະເພາະແຕ່ຄູ່ທີ່ຫາກໍລົມກັນໃດ, ສໍ່ານີ້ກໍຍັງຮູ້ສຶກໃຈຫາຍແລ້ວ ພາສາຫຍັງກັບຄູ່ທີ່ເຖິງຂັ້ນຕົກລົງຄົບຫາກັນແລ້ວ ແຕ່ລະຫວ່າງທີ່ສານສຳພັນກັນນັັ້ນ ຊໍ້າພັດຫາຍໄປແບບໄຮ້ຮ່ອງຮອຍປ່ອຍໃຫ້ອີກຝ່າຍງົງວ່າທີ່ຜ່ານມາເອີ້ນວ່າຫຍັງ. ຍ້ອນຫຍັງ ໝໍນັ້ນ ຫຼື ສາວນັ້ນ ຈຶ່ງເລືອກຕັດຈົບຄວາມສຳພັນແບບກະທັນຫັນໂດຍບໍ່ຄິດທີ່ຈະບອກເລີກ ຫຼື ບອກລາເລີຍ? ເປັນຄວາມສົງໄສທີ່ຫາຄຳຕອບບໍ່ໄດ້ ເຊິ່ງພວກເຮົາຈະພາໝູ່ເພື່ອນທີ່ກຳລັງຕົກຢູ່ໃນສະຖານະການແບບນີ້ໄປຫາຄຳຕອບພ້ອມໆກັນ.
ນີ້ແມ່ນພຶດຕິກຳບັ່ນທອນຄວາມສຳພັນທີ່ພາສາອັງກິດເອີ້ນວ່າ Ghosting ທີ່ມາຈາກຄຳວ່າ ghost ທີ່ແປວ່າ ຜີ. ເປັນຫຍັງຈຶ່ງໃຊ້ຄຳນີ້? ນັ້ນກໍຍ້ອນວ່າ ຕ້ອງການສື່ຄວາມໝາຍເຖິງການມາຫຼອກແລ້ວກໍຈາກໄປ ຖິ້ມໃຫ້ອີກຝ່າຍງົງກັບເຫດການທີ່ເກີດຂຶ້ນ ປານກັບຜີທີ່ແນມບໍ່ເຫັນຫາຍໄປກັບອາກາດ ເຫຼືອໄວ້ພຽງຜົນກະທົບຕໍ່ຈິດໃຈທີ່ມີຕໍ່ອີກຝ່າຍ ແລະ ການເບິ່ງຄົນທີ່ຈະເຂົ້າມາໃນຕໍ່ໜ້າທີ່ປ່ຽນແປງໄປໃນດ້ານລົບ.
ທີ່ຈິງ ghosting ບໍ່ໄດ້ໃຊ້ແຕ່ກັບຄວາມຮັກເທົ່ານັ້ນ ແຕ່ໝາຍເຖິງທຸກຄວາມສຳພັນບໍ່ວ່າຈະເປັນໝູ່ເພື່ອນ, ຄົນທີ່ເຮັດວຽກຮ່ວມກັນ ຫຼື ກະທັ້ງຍາດຕິພີ່ນ້ອງ ແລະ ຄົນໃນຄອບຄົວ ທີ່ເຄີຍພົບໜ້າຄ່າຕາກັນ ແຕ່ມາຮອດມື້ໜຶ່ງກໍຫາຍໄປໄຮ້ກາຍຕິດຕໍ່ໂດຍບໍ່ບອກເຫດຜົນໃຫ້ຮັບຮູ້.
ແຕ່ໃນດ້ານຂອງຄວາມສຳພັນເລື່ອງຄວາມຮັກນັ້ນ ການສື່ສານທາງອອນລາຍເຮັດໃຫ້ເກີດພຶດຕິກຳນີ້ງ່າຍຂຶ້ນ ແລະ ເປັນພຶດຕິກຳຍອດນິຍົມ ໂດຍສະເພາະໃນແອັບຫາຄູ່ ຫຼື ການລົມກັນທາງແພລດຟອມອອນລາຍຕ່າງໆ ທີ່ສ່ວນໃຫຍ່ຈະບໍ່ຄ່ອຍໄດ້ເຫັນໜ້າ ຫຼື ພົບຕົວຈິງກັນຢູ່ແລ້ວ.
ເປັນຫຍັງບາງຄົນຈຶ່ງເລືອກທີ່ຈະເຮັດພຶດຕິກຳ ghosting? ໜຶ່ງໃນນັ້ນແມ່ນການລົມຊ້ອນກັນຫຼາຍຄົນ ເຮັດໃຫ້ເກີດຄວາມຮູ້ສຶກບໍ່ຢາກຈິງຈັງ ຫຼື ຜູກມັດຄວາມສຳພັນໄວ້ກັບຄົນໃດຄົນໜຶ່ງຕັ້ງແຕ່ທຳອິດ. ຕໍ່ມາແມ່ນ ເມື່ອລົມກັນໄດ້ໄລຍະໜຶ່ງແລ້ວຮູ້ສຶກວ່າ ‘ບໍ່ແມ່ນ’ ກໍບໍ່ຢາກຈະລົມຕໍ່ໃຫ້ເສຍເວລາ ຈຶ່ງເລືອກຢຸດຄວາມສຳພັນໄວ້ເທົ່ານັ້ນ ແລ້ວກໍຫາຍຕົວໄປງຽບໆ. ໃນນັ້ນ ໄດ້ມີການກ່າວເຖິງພຶດຕິກຳນີ້ວ່າ ເປັນວິທີການຢຸດຄວາມສຳພັນທີ່ສະແດງໃຫ້ເຫັນເຖິງຄວາມບໍ່ພ້ອມ ແລະ ບໍ່ມີວຸດທິພາວະພຽງພໍ ເຮັດໃຫ້ຮັບມື ແລະ ຈັດການກັບຄວາມສຳພັນໄດ້ຢ່າງບໍ່ເໝາະສົມ ພຽງເພາະວ່າບໍ່ຕ້ອງການໃຫ້ໂຕເອງຕົກຢູ່ໃນພາວະລຳບາກຫາກຕ້ອງໄດ້ບອກເລີກ ແລະ ບໍ່ຢາກຮັບຜິດຊອບຄວາມຮູ້ສຶກຂອງໃຜ.
ກົງກັນຂ້າມກັບພຶດຕິກຳນີ້ແມ່ນ ມີຄົນທີ່ເຊື່ອວ່າ ຮັກທີ່ດີ ແລະ ຍືນຍົງ ເກີດຂຶ້ນຈາກການຮຽນຮູ້ກັນ ແລະ ກັນຢ່າງຄ່ອຍເປັນຄ່ອຍໄປ ຄວາມສຳພັນຈຶ່ງເປັນເລື່ອງທີ່ຕ້ອງຮຽນຮຮູ້ປັບປ່ຽນໂຕເອງໃຫ້ພໍດີກັບອີກຝ່າຍຕະຫຼອດເວລາ ເພື່ອເຕີບໄຕໄປນຳກັນຕະຫຼອດຊີວິດ (growth belief).
ອີກມຸມໜຶ່ງ ມີບາງຄົນທີ່ບໍ່ເຖິງຂັ້ນ ghosting ໄປເລີຍ ແຕ່ຍັງມີການຖິ້ມຂໍ້ຄວາມສັ້ນໆປະມານວ່າ ຂອບໃຈເວລາດີໆທີ່ຜ່ານມາ ເຊິ່ງພຶດຕິກຳນີ້ເອີ້ນວ່າ caspering ເຊິ່ງມາຈາກຊື່ໂຕກາຕູນຜີນ້ອຍ Casper ທີ່ໝາຍເຖິງ friendly ghosting ຫຼື ການຫາຍໄປແຕ່ຍັງສະແດງອອກເຖິງຄວາມເປັນມິດ.
ໂດຍ: ທີມບັນນາທິການ Muan
