ໃຜເປັນແດ່? ຫຼອນວຽກແຮງຈົນເກັບໄປຝັນ ວິທີແກ້ອາການເຄັ່ງຄຽດຈາກວຽກຈົນໃຫ້ນອນຫຼັບຝັນດີ

ເຄີຍບໍ່? ເຮັດວຽກໜັກຈົນກັບຮອດບ້ານຮອດເຮືອນ ຍາມນອນກໍຫຼອນແຮງ ແລະ ເກັບໄປຝັນ?

ໃນແຕ່ລະມື້ເຮົາເຮັດວຽກ ກໍມີທັງມື້ທີ່ເບົາ ແລະ ມື້ທີ່ໜັກ. ບາງມື້ຕື່ນເຊົ້າມາກໍຟ້າວໄປສະສາງວຽກທີ່ຄ້າງຢູ່ ນັບແຕ່ເຊົ້າຈົນເທົ້າບ່າຍ ກາຍໄປຮອດຄໍ່າ ວຽກກໍຍັງບໍ່ແລ້ວ ກາຍເປັນຄວາມເມື່ອຍທີ່ເກາະກິນພະລັງກາຍ-ພະລັງໃຈ ລາມໄປຈົນຮອດໂມງນອນ. ກາຍເປັນວ່າ ຄວາມຄິດວົນວຽນຢູ່ນຳແຕ່ເລື່ອງວຽກຈົນຫຼອນ ເກັບໄປຄິດຕໍ່ໃນຄວາມຝັນ ເຮັດໃຫ້ເມື່ອຍຍິ່ງຂຶ້ນໄປອີກ.

ແລ້ວເຮົາຈະເຮັດແນວໃດຈຶ່ງຈະບໍ່ໃຫ້ວຽກຕາມໄປຫຼອກຫຼອນໃນຄວາມຝັນ? ກ່ອນອື່ນຕ້ອງທຳຄວາມເຂົ້າໃຈກ່ອນວ່າ ຄວາມຝັນມີຫຼາຍແບບ ແຕ່ຄວາມຝັນທີ່ເຮົາກຳລັງເວົ້າເຖິງນີ້ເອີ້ນວ່າ Anxiety Dream ເຊິ່ງເປັນຝັນທີ່ເຮັດໃຫ້ຮູ້ສຶກເຄັ່ງຄຽດ, ກັງວົນໃຈ ຫຼື ຕົກໃຈ ບໍ່ຕ່າງກັບຕອນຕື່ນນອນ ເຊິ່ງສາມາດເຮັດໃຫ້ເຮົາຮູ້ສຶກເມື່ອຍເມື່ອຕື່ນຂຶ້ນມາໄດ້.

Anxiety Dream ເປັນຜົນມາຈາກສິ່ງກະຕຸ້ນທາງລົບທີ່ຍັງບໍ່ຖືກປະມວນຜົນ ເຮັດໃຫ້ສະໝອງພະຍາຍາມປະມວນຜົນເລື່ອງນັ້ນຕໍ່ໃນເວລາທີ່ເຮົາຫຼັບ ອີງຕາມຂໍ້ມູນຈາກ Claudia Luiz ນັກຈິດວິເຄາະ ແລະ ຜູ້ຂຽນໜັງສື The Making of a Psychoanalyst.

ສຳລັບສາເຫດຂອງຝັນແບບນີ້ກໍມີທັງເກີດຈາກ ຄວາມຢ້ານກົວ ແລະ ຄວາມເຄັ່ງຄຽດ ເຊັ່ນ ຢ້ານວຽກທີ່ລໍຖ້າໃນຕອນເຊົ້າ, ການປ່ຽນແປງຄັ້ງໃຫຍ່, ໂຣກນອນບໍ່ຫຼັບ ຫຼື ເຄື່ອງດື່ມທີ່ມີທາດເຫຼົ້າ ແລະ ການສີດສານຕ່າງໆເຂົ້າຮ່າງກາຍ.

ແລ້ວຈະປັດເປົ່າຝັນຮ້າຍໃຫ້ຜ່ານພົ້ນໄປໄດ້ແນວໃດ? ການຮັບມືແບ່ງອອກເປັນ 2 ກໍລະນີໄດ້ແກ່:

1. ແກ້ບັນຫາສະເພາະໜ້າ ເຊັ່ນ ໃນຄືນທີ່ຝັນເຖິງເລື່ອງວຽກຈົນຕົກໃຈຕື່ນ ແລະຢາກກັບໄປນອນໃຫ້ຫຼັບຄືນ ລອງຊອກເຮັດສິ່ງທີ່ຊ່ວຍໃຫ້ໃຈສະຫງົບ ບໍ່ວ່າຈະເປັນການດື່ມເຄື່ອງດື່ມອຸ່ນໆ, ຟັງເພງສະບາຍໆ, ອ່ານໜັງສືໃຫ້ຕາຫຼັບ ຫຼື ນັ່ງສະມາທິກໍໄດ້.

2. ແກ້ບັນຫາທີ່ຕົ້ນເຫດ: ກໍຄືຫຼຸດຄວາມເຄັ່ງຄຽດ ແລະ ພາລະວຽກທີ່ເຮັດໃຫ້ເຮົາເກັບເອົາໄປຝັນ ເຊັ່ນ: ຫາຕົ້ນຕໍຄວາມເຄັ່ງຄຽດແລ້ວຈັດການກັບມັນ, ເລົ່າ ຫຼື ຂຽນຄວາມເຄັ່ງຄຽດນັ້ນອອກມາ, ຫາກິດຈະກຳສະຫງົບກ່ອນນອນ ເປັນຕົ້ນ.

ກໍຫວັງວ່າຫຼັງຈາກອ່ານ Tips ນີ້ແລ້ວ ຈະຊ່ວຍໃຫ້ຄໍ່າຄືນນີ້ທຸກຄົນຈະລອດພົ້ນຈາກຄວາມຝັນທີ່ເຄັ່ງຄຽດນັ້ນໄດ້.

ໂດຍ: ທີມບັນນາທິການ Muan