ດົນຕີສ້າງແຮງບັນດານໃຈ Sophie de Quay ສົ່ງຄວາມຮູ້ສຶກ-ຄວາມຫວັງ ໃຫ້ໄດ້ຜ່ອນຄາຍ

ຄົ້ນພົບແຮງບັນດານໃຈຈາກສຽງດົນຕີ ແລະ ທຳນອງເພງທີ່ມີຄວາມໝາຍໃນແນວເພງ electro-pop ຫຼັງຈາກໄດ້ຟັງແລ້ວກໍພົບວ່າ: ການຟັງເພງເຫຼົ່ານີ້ໄດ້ສ້າງແຮງບັນດານໃຈຫຼາຍຢ່າງໃຫ້ກັບຜູ້ທີ່ກຳລັງຮຽນຮູ້ ແລະ ເຮັດວຽກ, ເຮັດໃຫ້ຜູ້ຄົນໄດ້ຜ່ອນຄາຍ, ມີໄອເດຍໃນການສ້າງສັນຜົນງານໃໝ່ໆອອກມາໄດ້ແຕກຕ່າງ ແລະ ຫຼາກຫຼາຍ.

ສິລະປິນຄູ່ຊາວສະວິດ Sophie de Quay ແລະ Simon Jaccard ໄດ້ນຳສຽງດົນຕີທີ່ເປັນເອກະລັກຂອງພວກເຂົາມາສະແດງທີ່ Blues Box ໃນນະຄອນຫຼວງວຽງຈັນ ໃນຄືນວັນທີ 8 ເມສາ 2025 ທີ່ຜ່ານມາ, ໂດຍການສະແດງທີ່ເຊື່ອມໂຍງວັດທະນະທຳຕ່າງໆເຂົ້າດ້ວຍກັນໃນງານ Francophonie ຫຼື ເທດສະການເດືອນແຫ່ງພາສາຝຣັ່ງ.

ການສະແດງ ທີ່ ປະເທດລາວ, ແມ່ນເປັນສະຖານທີ່ສຸດທ້າຍຂອງພວກເຂົາໃນການສະແດງໂປຣເຈັກ “Building Bridges Asia Tour” ແລະ ຍັງມີການສະແດງພິເສດຈາກສິລະປິນລາວທີ່ມີພອນສະຫວັນ ຊື່ວ່າ: Minaz, ລາວໄດ້ເຮັດໃຫ້ຜູ້ຊົມມີຄວາມມ່ວນຊື່ນດ້ວຍການສະແດງເປີດງານ ກ່ອນທີ່ຈະເຖິງຊ່ວງການສະແດງຫຼັກຂອງ Sophie de Quay.

Sophie de Quay ມີພະລັງສຽງທີ່ມີເອກະລັກໂດດເດັ່ນ ແລະ Simon Jaccard Simon ສິລະປິນຄູ່ຂອງລາວ, ກໍເປັນທັງນັກດົນຕີ ແລະ ໂປຣດິວເຊີ ເຊິ່ງມີສາຍາທີ່ຖືກເອີ້ນກັນວ່າ “Simon the Octopus” ເພາະຄວາມສາມາດໃນການຫຼີ້ນເຄື່ອງດົນຕີຂອງລາວນັ້ນມີຫຼາກຫຼາຍ, ຫຼິ້ນດົນຕີໄດ້ເຖິງ 17 ຊະນິດ.

ການທີ່ພວກເຂົາທັງສອງສະແດງໃນງານມື້ນັ້ນ ມັນໄດ້ສ້າງຄວາມປະທັບໃຈເຮັດໃຫ້ຄົນຟັງໄດ້ຜ່ອນຄາຍທັງເຕັ້ນ ແລະ ຮ້ອງເພງດື່ມດຳກັບສຽງດົນຕີບັນຍາກາດດີໆຮ່ວມກັນນຳພວກເຂົາ.

“ດົນຕີເປັນພາສາສາກົນທີ່ເຊື່ອມຕໍ່ຜູ້ຄົນຈາກຕ່າງແດນໃຫ້ເຂົ້າເຖິງກັນ,” Sophie ໄດ້ກ່າວໄວ້.

ການສ້າງແຮງບັນດານໃຈຈາກສຽງດົນຕີຂອງ Sophie de Quay ແລະ Simon Jaccard ມາຈາກຫຼາຍແຫຼ່ງທີ່ປະສົມປະສານກັນຢ່າງລົງຕົວ, ສະທ້ອນເຖິງປະສົບການຊີວິດ, ການເດີນທາງ, ແລະ ຄວາມມຸ່ງຫວັງທີ່ຈະເຊື່ອມໂຍງຜູ້ຄົນຜ່ານສຽງຂອງດົນຕີ. ນີ້ແມ່ນບາງປັດໃຈຫຼັກທີ່ເປັນແຮງບັນດານໃຈໃຫ້ກັບສຽງດົນຕີຂອງພວກເຂົາ.

Sophie ແລະ Simon ໄດ້ຮັບແຮງບັນດານໃຈຢ່າງຫຼວງຫຼາຍຈາກການເດີນທາງໄປຫຼາຍປະເທດໃນທົ່ວໂລກ ນຳເອົາປະສົບການຈາກວັດທະນະທຳທີ່ຫຼາກຫຼາຍເຂົ້າສູ່ເນື້ອເພງຂອງພວກເຂົາ, ການພົບກັບຜູ້ຄົນຈາກພື້ນຫຼັງທີ່ແຕກຕ່າງກັນໄດ້ສ້າງໄອເດຍໃໝ່ກ່ຽວກັບ “ການສ້າງຂົວເຊື່ອມຕໍ່ (Building Bridges)”.

ເນື້ອເພງຂອງພວກເຂົາມັກຈະສະທ້ອນເຖິງຄວາມຮູ້ສຶກແຫ່ງຄວາມຫວັງ ແລະ ການຮັບຮູ້ຄວາມງາມຂອງໂລກລວມທັງຄວາມຮັກ, ຄວາມຝັນ, ແລະ ການຕໍ່ສູ້ກັບຄວາມບໍ່ຍຸດຕິທຳ. ເພງ “Building Bridges” ເປັນສັນຍາລັກຂອງຄວາມມຸ່ງຫວັງທີ່ຈະເຊື່ອມຕໍ່ຜູ້ຄົນຈາກວັດທະນະທຳທີ່ແຕກຕ່າງກັນ ແລະ ໄດ້ນຳດົນຕີພື້ນບ້ານເຂົ້າມາປະສົມປະສານໃນບົດເພງໃນແຕ່ລະປະເທດທີ່ພວກເຂົາສະແດງ.

ຕິດຕາມຄວາມເຄື່ອນໄຫວຂອງ Sophie de Quay ໄດ້ທີ່:

Instagram: sophiedequay

Facebook: Sophie de Quay

Website: sophiedequay.com