ເຄີຍສັງເກດບໍວ່າ ເປັນຫຍັງເສື້ອຜ້າຊົງເກົ່າໆ, ລວດລາຍສີສັນສົດໃສ ຫຼື ໄອເທັມທີ່ເບິ່ງຄືຫຼຸດອອກມາຈາກຕູ້ເສື້ອຜ້າຂອງພໍ່ແມ່ ຈຶ່ງກັບມາເປັນເທຣນທີ່ GEN Z ນິຍົມນຳມາໃສ່ກັນອີກຄັ້ງ? ນີ້ຄືສະເໜ່ຂອງ Retro Fashion (ແຟຊັນເຣໂທ) ສະໄຕລ໌ການແຕ່ງຕົວທີ່ພາເຮົາຍ້ອນກັບໄປສຳຜັດກັບກິ່ນອາຍຂອງວັນວານ ຜ່ານເສື້ອຜ້າທີ່ໄດ້ຮັບແຮງບັນດານໃຈຈາກຍຸກ 50s, 60s, 70s, 80s ໄປຈົນເຖິງ 90s ແຕ່ຖືກນຳມາຕີຄວາມ ແລະ ອອກແບບໃໝ່ໃຫ້ເໝາະກັບວິຖີຊີວິດໃນປັດຈຸບັນ.

ທີ່ໜ້າສົນໃຈຄື ໃນຊ່ວງນີ້ໂດຍສະເພາະ GEN Z ເລີ່ມຫັນມາສົນໃຈແຟຊັນຍ້ອນຍຸກຫຼາຍຂຶ້ນ ກະແສເສື້ອຜ້າມືສອງກໍກາຍເປັນອີກໜຶ່ງປັດໄຈທີ່ຊ່ວຍປຸກກະແສ Retro Fashion ໃຫ້ກັບມາຄຶກຄື້ນ. ເພາະສຳລັບຄົນຍຸກນີ້ ການຊື້ເສື້ອຜ້າມືສອງບໍ່ແມ່ນພຽງການຊອກຫາຂອງລາຄາດີ ຫຼື ປະຢັດຄ່າໃຊ້ຈ່າຍເທົ່ານັ້ນ ແຕ່ຍັງເປັນການຄົ້ນຫາໄອເທັມທີ່ມີເອກະລັກ, ບໍ່ຊ້ຳໃຜ ແລະ ມີເລື່ອງລາວທີ່ເອກະລັກຂອງຕົນເອງ.

ຄວາມໜ້າສົນໃຈຂອງແຟຊັນເຣໂທ ຈຶ່ງບໍ່ໄດ້ຢູ່ພຽງແຕ່ການນຳເສື້ອຜ້າເກົ່າກັບມາໃສ່ ແຕ່ເປັນການນຳເອກະລັກຂອງແຕ່ລະຍຸກມາສ້າງສັນເປັນລຸກໃໝ່ ບໍ່ວ່າຈະເປັນສີສັນສົດໃສ, ລາຍກຣາຟິກ, ລາຍດອກໄມ້, ລາຍຕາຕະລາງ ຫຼື ຮູບຊົງເສື້ອຜ້າທີ່ມີເອກະລັກ ເຊັ່ນ ໂສ້ງເອວສູງ, ໂສ້ງຂາບານ, ເສື້ອເຊີດລາຍພິມ ແລະ ເສື້ອແຈັກເກັດຊົງຄລາສສິກ ເມື່ອນຳມາຈັບຄູ່ກັບເສື້ອຜ້າ ຫຼື ເຄື່ອງປະດັບສະໄໝໃໝ່ ກໍສາມາດສ້າງລຸກທີ່ໂດດເດັ່ນ ໂດຍບໍ່ເບິ່ງຄືກຳລັງແຕ່ງຕົວໄປງານຍ້ອນຍຸກ.

Retro ກັບ Vintage ແຕກຕ່າງກັນແນວໃດ?

ເຖິງວ່າຈະເປັນສອງຄຳທີ່ມັກຖືກເວົ້າເຖິງຄຽງຄູ່ກັນ ຈົນຫຼາຍຄົນນຳມາໃຊ້ແທນກັນຢູ່ເລື້ອຍໆ ແຕ່ໃນຄວາມເປັນຈິງ Retro ແລະ Vintage ມີຄວາມໝາຍແຕກຕ່າງກັນເລັກນ້ອຍ.

Retro ແມ່ນເສື້ອຜ້າ ຫຼື ໄອເທັມທີ່ຜະລິດຂຶ້ນໃໝ່ ໂດຍນຳເອົາດີໄຊນ໌ ແລະ ແຮງບັນດານໃຈຈາກອະດີດມາໃຊ້ ບໍ່ວ່າຈະເປັນຮູບຊົງ, ສີສັນ, ລວດລາຍ ຫຼື ລາຍລະອຽດໃນການຕັດຫຍິບ ຈຸດສຳຄັນຈຶ່ງຢູ່ທີ່ສະໄຕລ໌ຫຼາຍກວ່າອາຍຸຂອງສິນຄ້າ ເຊັ່ນ ເສື້ອຍືດທີ່ອອກແບບດ້ວຍລາຍກຣາຟິກແບບຍຸກ 90s ຫຼື ໂສ້ງຂາບານທີ່ຜະລິດຂຶ້ນໃນປັດຈຸບັນ.

ສ່ວນ Vintage ແມ່ນເສື້ອຜ້າ ຫຼື ສິ່ງຂອງທີ່ຜະລິດຂຶ້ນຈິງໃນຍຸກສະໄໝນັ້ນໆ ແລະ ຜ່ານການເວລາມາແລ້ວ ໂດຍທົ່ວໄປມັກໃຊ້ເອີ້ນສິນຄ້າທີ່ມີອາຍຸປະມານ 20 ປີຂຶ້ນໄປ ທັງນີ້ ເກນການຈັດປະເພດອາດແຕກຕ່າງກັນຕາມປະເພດສິນຄ້າ ແລະ ວົງການທີ່ນຳໃຊ້.

ເວົ້າໃຫ້ເຂົ້າໃຈງ່າຍໆ ກໍຄື Retro ແມ່ນການນຳເອົາຄວາມເກົ່າມາສ້າງໃໝ່ ສ່ວນ Vintage ແມ່ນການໄດ້ຄອບຄອງຂອງເກົ່າທີ່ມີເລື່ອງລາວຈາກຍຸກນັ້ນແທ້ໆ.

ຈາກຄວາມຄິດຮອດອະດີດ ສູ່ເທຣນແຟຊັນຮ່ວມສະໄໝ

ເບື້ອງຫຼັງຄວາມນິຍົມຂອງ Retro Fashion ມີສິ່ງໜຶ່ງທີ່ເອີ້ນວ່າ Nostalgia ຫຼື ຄວາມຮູ້ສຶກຄິດຮອດວັນເກົ່າໆ ເຂົ້າມາກ່ຽວຂ້ອງ ເພາະແຟຊັນບໍ່ໄດ້ເປັນພຽງເລື່ອງຂອງເສື້ອຜ້າ ແຕ່ຍັງສະທ້ອນເຖິງຄວາມຊົງຈຳ, ວັດທະນະທຳ ແລະ ບັນຍາກາດຂອງແຕ່ລະຊ່ວງເວລາອີກດ້ວຍ.

ແນວຄິດການນຳແຟຊັນໃນອະດີດກັບມາຕີຄວາມໃໝ່ ເລີ່ມປາກົດໃຫ້ເຫັນຢ່າງຊັດເຈນໃນຊ່ວງທ້າຍຍຸກ 1960s ຜ່ານກະແສ Retro-Chic ທີ່ໄດ້ຮັບຄວາມສົນໃຈຈາກບັນດາສິລະປິນ ແລະ ນັກອອກແບບໃນປາຣີ ເຊິ່ງໄດ້ຫຍິບເອົາສະໄຕລ໌ຈາກຍຸກກ່ອນໜ້າມາສ້າງສັນໃຫ້ກາຍເປັນແຟຊັນຮ່ວມສະໄໝ ເຖິງແມ່ນວ່າຈຸດເລີ່ມຕົ້ນສ່ວນໜຶ່ງຈະມາຈາກການຕັ້ງຄຳຖາມຕໍ່ກະແສແຟຊັນໃນເວລານັ້ນ ແຕ່ສຸດທ້າຍກັບກາຍເປັນແນວທາງທີ່ໄດ້ຮັບຄວາມນິຍົມຢ່າງກວ້າງຂວາງ.

ເມື່ອເຂົ້າສູ່ຍຸກ 1990s ແນວຄິດການຍ້ອນຍຸກຍັງໄດ້ຂະຫຍາຍໄປສູ່ວົງການດົນຕີ, ຮູບເງົາ ແລະ ສິລະປະ ເຮັດໃຫ້ສະໄຕລ໌ຈາກຍຸກກ່ອນໜ້າກັບມາເປັນສ່ວນໜຶ່ງຂອງວັດທະນະທຳປັອບອີກຄັ້ງ ແລະ ກາຍເປັນແຮງບັນດານໃຈໃຫ້ແຟຊັນໃນຍຸກຕໍ່ໆມາ.

ນີ້ຈຶ່ງເປັນເຫດຜົນທີ່ເສື້ອຜ້າເຣໂທບໍ່ໄດ້ຈຳກັດຢູ່ພຽງຍຸກໃດຍຸກໜຶ່ງ ແຕ່ສາມາດຫຍິບເອົາຄວາມໂດດເດັ່ນຈາກຫຼາຍຊ່ວງເວລາມາປະສົມປະສານກັນໄດ້ຢ່າງອິດສະຫຼະ ໂດຍມີຄວາມຮູ້ສຶກຄິດຮອດອະດີດເປັນຫົວໃຈສຳຄັນ.

ໄອເທັມເດັດທີ່ຊ່ວຍຄອມພລີດລຸກ Retro Fashion

ຖ້າຢາກລອງແຕ່ງຕົວສະໄຕລ໌ເຣໂທ ແຕ່ຍັງບໍ່ຮູ້ວ່າຈະເລີ່ມຈາກຈຸດໃດ ລອງມາຮູ້ຈັກກັບໄອເທັມຄລາສສິກເຫຼົ່ານີ້ ເພາະພຽງເລືອກມາໃສ່ຈັກໜຶ່ງ ຫຼື ສອງຊິ້ນ ກໍສາມາດເພີ່ມກິ່ນອາຍຍ້ອນຍຸກໃຫ້ກັບລຸກປະຈຳວັນໄດ້ແລ້ວ.

1. ໂສ້ງຂາບານ (Flared Pants)

ໄອເທັມຈາກຍຸກ 70s ທີ່ຍັງຄົງມີສະເໜ່ມາຈົນເຖິງທຸກມື້ນີ້ ດ້ວຍຮູບຊົງທີ່ເຂົ້າຮູບບໍລິເວນສະໂພກ ແລະ ຕົ້ນຂາ ກ່ອນຈະຄ່ອຍໆ ບານອອກຕັ້ງແຕ່ຫົວເຂົ່າລົງໄປ ຈະຈັບຄູ່ກັບເສື້ອຮັດຮູບ ຫຼື ເສື້ອຍືດສີພື້ນກໍໄດ້ລຸກທີ່ມີກິ່ນອາຍຮິບປີ້ ແລະ ດິສໂກ້.

2. ເສື້ອເຊີດຮາວາຍ (Hawaiian Shirt)

ເສື້ອເຊີດລາຍດອກໄມ້, ໃບໄມ້ ຫຼື ພືດເຂດຮ້ອນທີ່ມາພ້ອມສີສັນສົດໃສ ເປັນອີກໜຶ່ງໄອເທັມທີ່ຊ່ວຍເພີ່ມຄວາມມ່ວນໃຫ້ກັບການແຕ່ງຕົວໄດ້ທັນທີ ໂດຍສະເພາະເສື້ອຊົງຫຼວມທີ່ໃສ່ປ່ອຍຊາຍເສື້ອ ເມື່ອຈັບຄູ່ກັບໂສ້ງຢີນ ຫຼື ໂສ້ງຂາສັ້ນ ກໍໄດ້ລຸກສະບາຍໆ ທີ່ມີຄວາມເຣໂທຢູ່ໃນຕົວ.

3. ເສື້ອຍືດລາຍກຣາຟິກ (Graphic T-shirt)

ບໍ່ວ່າຈະເປັນລາຍວົງດົນຕີເກົ່າ, ຮູບໂຄສະນາ, ໂລໂກ້ ຫຼື ກຣາຟິກສີສັນສະດຸດຕາ ເສື້ອຍືດເຫຼົ່ານີ້ລ້ວນມີກິ່ນອາຍຂອງວັດທະນະທຳປັອບໃນອະດີດ ໂດຍສະເພາະຊົງ Oversized ທີ່ໄດ້ຮັບຄວາມນິຍົມໃນຍຸກ 90s ເໝາະກັບການຈັບຄູ່ກັບໂສ້ງຢີນ ຫຼື ກະໂປງ ເພື່ອສ້າງລຸກສະຕຣີດທີ່ເບິ່ງເປັນທຳມະຊາດ.

4. ເສື້ອແຈັກເກັດຢີນ ແລະ ເສື້ອແຈັກເກັດໜັງ

ເສື້ອຄຸມທີ່ເກືອບຈະບໍ່ມີວັນຕົກຍຸກ ບໍ່ວ່າຈະເປັນເສື້ອແຈັກເກັດຢີນຟອກສີຊີດຊົງຫຼວມ ຫຼື ເສື້ອແຈັກເກັດໜັງທີ່ໃຫ້ຄວາມຮູ້ສຶກເທ່ແບບໄວລຸ້ນໃນຍຸກ 50s–80s ໄອເທັມເຫຼົ່ານີ້ຊ່ວຍເພີ່ມມິຕິໃຫ້ການແຕ່ງຕົວ ແລະ ສາມາດນຳໄປຈັບຄູ່ກັບເສື້ອຜ້າສະໄໝໃໝ່ໄດ້ງ່າຍ.

5. ສາຍແອວເສັ້ນໃຫຍ່ ແລະ ແວ່ນກັນແດດຊົງໂອເວີໄຊສ໌

ຢ່າມອງຂ້າມເຄື່ອງປະດັບ ເພາະບາງຄັ້ງລາຍລະອຽດນ້ອຍໆ ກໍສາມາດປ່ຽນລຸກໄດ້ຢ່າງຄາດບໍ່ເຖິງ ສາຍແອວເສັ້ນໃຫຍ່ຊ່ວຍເນັ້ນສັດສ່ວນ ແລະ ເພີ່ມກິ່ນອາຍຂອງຍຸກ 70s–80s ສ່ວນແວ່ນກັນແດດຊົງໂອເວີໄຊສ໌ກໍຊ່ວຍເພີ່ມຄວາມໂດດເດັ່ນ ເຮັດໃຫ້ການແຕ່ງຕົວເບິ່ງມີຄາແຣັກເຕີຫຼາຍຂຶ້ນ.

ແຕ່ງຕົວແນວເຣໂທແນວໃດ ໃຫ້ເບິ່ງທັນສະໄໝ?

ສະເໜ່ອີກຢ່າງຂອງ Retro Fashion ຄືບໍ່ມີສູດຕາຍຕົວວ່າຕ້ອງແຕ່ງຕົວໃຫ້ຄືກັບຄົນໃນຍຸກໃດຍຸກໜຶ່ງທັງໝົດ ເພາະຫົວໃຈສຳຄັນຄືການຫຍິບເອົາເອກະລັກຈາກອະດີດມາປະສົມກັບສະໄຕລ໌ຂອງຕົນເອງ ລອງເລີ່ມຈາກການເລືອກໄອເທັມເຣໂທທີ່ມັກຈັກໜຶ່ງຊິ້ນ ແລ້ວຈັບຄູ່ກັບເສື້ອຜ້າຊົງລຽບໆ ຫຼື ໄອເທັມຍອດນິຍົມໃນປັດຈຸບັນ ເຊັ່ນ ເສື້ອຍືດລາຍກຣາຟິກຍຸກ 90s ກັບໂສ້ງເອວສູງ ຫຼື ເສື້ອເຊີດຮາວາຍກັບໂສ້ງຊົງກົງ ແລະ ເກີບສະນີກເກີ.

ບໍ່ຈຳເປັນຕ້ອງຈັດເຕັມຕັ້ງແຕ່ຫົວຈົດປາຍຕີນ ເພາະບາງຄັ້ງການເລືອກສີ, ລວດລາຍ ຫຼື ເຄື່ອງປະດັບທີ່ມີກິ່ນອາຍຍ້ອນຍຸກພຽງເລັກນ້ອຍ ກໍພຽງພໍທີ່ຈະເຮັດໃຫ້ລຸກທຳມະດາເບິ່ງມີເລື່ອງລາວຂຶ້ນມາແລ້ວ.

ທ້າຍທີ່ສຸດ Retro Fashion ຈຶ່ງບໍ່ແມ່ນພຽງການແຕ່ງຕົວໃຫ້ຄືກັບຄົນໃນອະດີດ ແຕ່ເປັນການນຳເອົາຄວາມງາມຂອງວັນວານມາສ້າງສັນໃນແບບຂອງຕົນເອງ ເພາະແຟຊັນບາງຢ່າງອາດຜ່ານການເວລາມາຫຼາຍສິບປີ ແຕ່ຖ້າຍັງຄົງມີສະເໜ່ ແລະ ເຂົ້າກັບຍຸກສະໄໝໄດ້ດີ ກໍບໍ່ມີເຫດຜົນຫຍັງທີ່ເຮົາຈະບໍ່ນຳມັນກັບມາໃສ່ອີກຄັ້ງ.